അവഹേളിക്കുന്നവർക്ക് മുന്നിൽ ആത്മനിയന്ത്രണം പാലിക്കാൻ പഠിക്കാം; കപട തന്ത്രങ്ങളെ പൊളിച്ചടുക്കാം. അടുത്ത പറമ്പിൽ കെട്ടിയിട്ടിരുന്ന കഴുതയെ വികൃതിയായ ബാലൻ അഴിച്ചുവിട്ടു. കഴുത സമീപത്തെ കൃഷിയിടത്തിൽ കയറി വിളവ് മുഴുവൻ നശിപ്പിച്ചു. ഓടിയെത്തിയ ഉടമസ്ഥന്റെ ഭാര്യ കഴുതയെ ഓടിച്ചുവിടാൻ തലങ്ങും വിലങ്ങും അടിച്ചു. അടിയേറ്റ കഴുത ചത്തു. ഇതുകണ്ടുവന്ന കഴുതയുടെ ഉടമ ദേഷ്യം തീർക്കാൻ ആ സ്ത്രീയെ അടിച്ചു. അവർ ബോധരഹിതയായി. ഭാര്യ വീണതുകണ്ട കർഷകൻ അരിവാളുകൊണ്ട് കഴുതയുടെ ഉടമസ്ഥനെ വെട്ടി. തുടർന്ന് അയാളുടെ മക്കൾ കർഷകന്റെ വീടിന് തീയിട്ടു. സംഭവങ്ങൾ നീണ്ടുപോയെങ്കിലും കുറച്ചുകഴിഞ്ഞ് കാര്യങ്ങൾ ശാന്തമായി. അപ്പോൾ കർഷകൻ ആ ബാലനോട് ചോദിച്ചു: നീ എന്തിനാണ് ആ കഴുതയെ അഴിച്ചുവിട്ടത്. അതല്ലേ ഈ പ്രശ്നമെല്ലാം ഉണ്ടാക്കിയത്. അവൻ പറഞ്ഞു: കഴുതയുടെ കെട്ടഴിഞ്ഞതല്ല, നിങ്ങളുടെ ഉള്ളിലെ പകയുടെയും വിദ്വേഷത്തിന്റെയും കെട്ടഴിഞ്ഞതാണ് ഈ ദുരന്തത്തിന് കാരണം. ഒരാൾ എന്തിൽ പ്രകോപിതനാകുന്നു എന്ന് കണ്ടെത്തിയാൽ അയാളുടെ ദൗർബല്യം എന്തെന്ന് മനസ്സിലാകും. ആർക്കും ആരെയും പുറമേനിന്നു പ്രകോപിപ്പിക്കാനാകില്ല. നിന്റെ ആ വാക്കാണ് എന്നിൽ ദേഷ്യം ഉണ്ടാക്കിയത്, നിന്റെ നോട്ടമാണ് എല്ലാറ്റിനും കാരണം തുടങ്ങിയ ന്യായീകരണങ്ങൾ സ്വയം രക്ഷപ്പെടുന്നതിനുള്ള മുഖംമൂടികൾ മാത്രമാണ്. സ്വന്തം ജീവിതത്തിന്റെ നിയന്ത്രണം മറ്റുള്ളവരുടെ കൈകളിലാണ്, തനിക്ക് ഒരുത്തരവാദിത്തവും സ്വന്തം ജീവിതത്തിലില്ല എന്നല്ലേ ഇത്തരം ബാലിശമായ വാദങ്ങളുടെ അർത്ഥം. സംഭവിക്കുന്ന നന്മകളുടെയെല്ലാം ഉടമസ്ഥാവകാശം കൈക്കലാക്കുകയും വന്നുപോകുന്ന തെറ്റുകളെല്ലാം അപരന്റെ തലയിൽ അടിച്ചേൽപിക്കുകയും ചെയ്യുന്നത് സ്വയം നിഷ്കളങ്കനായി ചിത്രീകരിക്കാനുള്ള കപടതന്ത്രമാണ്.    എല്ലാവർക്കും അവരുടേതായ വിചാരങ്ങളും വികാരങ്ങളുമുണ്ട്. പുറമേനിന്നുണ്ടാകുന്ന ശബ്ദങ്ങൾക്കോ കാഴ്ചകൾക്കോ അവയെ വ്രണപ്പെടുത്താനോ പ്രലോഭിപ്പിക്കാനോ സാധിക്കുന്നുണ്ടെങ്കിൽ അക്കൂട്ടർക്ക് നിയന്ത്രണശേഷിയോ ആത്മബോധമോ ഇല്ലെന്നാണ് അതിനർത്ഥം. അനുകൂല വർത്തമാനങ്ങൾക്കും അഭിനന്ദനങ്ങൾക്കും നടുവിൽ ദിവ്യനായി ജീവിക്കാൻ ആർക്കും കഴിയും. പ്രതികൂലിക്കുകയും അവഹേളിക്കുകയും ചെയ്യുന്നവർക്ക് മുന്നിൽ ആത്മനിയന്ത്രണം നഷ്ടപ്പെടാതെ നിലനിൽക്കാൻ കഴിയുന്നുണ്ടോ എന്നതിലാണ് സ്വഭാവവൈശിഷ്ട്യം വെളിവാകുന്നത്. #💭 Inspirational Quotes #💭 Best Quotes #✍️Quotes #motivation #💫✌🏼★𝙿𝙾𝚂𝙸𝚃𝙸𝚅𝙸𝚃𝚈★✌🏼💫