ஹோசனகல்லி கிராமத்தைச் சேர்ந்த நயனா என்ற இளம் பெண்ணுக்கும் கடந்த 6 மாதங்களுக்கு முன் பெரியோர்களால் பேசி முடிக்கப்பட்டு திருமண நிச்சயதார்த்தம் நடந்தது. கடந்த ஜனவரி 30ம் தேதி (வெள்ளிக்கிழமை) கொள்ளேகாலில் உள்ள வெங்கடேஸ்வரா திருமண மண்டபத்தில் திருமணம் நடைபெறுவதாக இருந்தது. முந்தைய நாளான ஜனவரி 29ஆம் தேதி (வியாழக்கிழமை) அன்று மாலையில் திருமண வரவேற்பு நிகழ்ச்சிக்கு அதே மண்டபத்தில் ஏற்பாடு செய்யப்பட்டிருந்தது. திருமண விழாவையொட்டி திருமண மண்டபத்தில் தடபுடலாக நிகழ்ச்சிகள் நடந்தன. திருமண வரவேற்பு நிகழ்வில் கலந்து கொள்வதற்காக மணமகன் வீட்டார், கார்களில் திருமண மண்டபம் நோக்கி புறப்பட்டனர். மணமகன் ரவிஷ் மட்டும் தனியாக மாருதி ஸ்விப்ட் காரில் புறப்பட்டு மண்டபத்திற்கு வந்து கொண்டிருந்தார் மணப்பெண் வீட்டார் திருமண மண்டபத்தில் மாப்பிள்ளை வருகைக்காக காத்திருந்தனர். தனியாக புறப்பட்டு வந்து கொண்டிருந்த ரவிஷின் காரை வழியில் மற்றொரு காரில் வந்து இடைமறித்த மர்ம நபர்கள், பயங்கர ஆயுதங்களால் ரவிஷை கடுமையாக தாக்கினர். அவரை கத்தியால் குத்தி விட்டு அங்கிருந்து தப்பிச் சென்றனர். இதில் பலத்த காயமடைந்த ரவிஷ் அரசு மருத்துவமனையில் அனுமதிக்கப்பட்டு சிகிச்சை பெற்று வருகிறார். இந்த சம்பவம் தொடர்பாக கொள்ளேகால் டவுன் போலீசில் ரவிஷ் புகார் அளித்தார். இச்சம்பவம் தொடர்பாக வழக்குப் பதிவு செய்த போலீசார் நடத்திய முதல் கட்ட விசாரணையில் மணமகளான நயனாவின் காதலன் தர்ஷன், தனது கூட்டாளிகளுடன் சேர்ந்து ரவிஷை தாக்கியது தெரியவந்தது. இதனை அறிந்த ரவிஷ் நயனாவை திருமணம் செய்ய மறுத்தார் . இதனால் திருமணம் ரத்து செய்யப்பட்டது. நயனாவிடம் போலீசார் தீவிர விசாரணை மேற்கொண்டனர். மேலும் தலைமறைவாகியிருந்த தர்ஷன் மற்றும் அவரது கூட்டாளிகளை போலீசார் வலை வீசி தேடி வந்தனர். இதற்கிடையே தர்ஷன் மற்றும் 17 வயது சிறுவன் ஆகியோரை போலீசார் கைது செய்து, காரையும் பறிமுதல் செய்தனர். கைதான தர்ஷனிடம் போலீசார் நடத்திய விசாரணையில் பல திடுக்கிடும் தகவல்கள் வெளிவந்தன. அதன்படி பவுன்சர் ஆகவும், புத்தக விற்பனையாளராகவும் உள்ள தர்ஷனும், நயனாவும் காதலித்து வந்துள்ளனர். இந்நிலையில் தான் நயனாவுக்கு ரவிஷுடன் திருமண நிச்சயதார்த்தம் நடந்தது. ரவிஷுடன் திருமணம் செய்ய முடியாது எனக்கூறி நயனா, அவரது காதலரான தர்ஷனிடம் தனது திருமணத்தை நிறுத்துமாறு வற்புறுத்தியுள்ளார். ஆனால் தர்ஷனோ, நீயே உனது வீட்டில் பேசி திருமணத்தை நிறுத்திவிடு என தெரிவித்துள்ளார். ஆனால் குடும்ப கௌரவம் பாதிக்கும் எனக் கூறிய நயனா அதற்கு மறுத்துள்ளார். மேலும் திருமணத்தை எப்படியாவது நிறுத்த வேண்டும் என தர்ஷனை அவர் மிரட்டியதாகவும் கூறப்படுகிறது. ரவிஷிடம் பேசுமாறு நயனா, ரவிஷின் மொபைல் எண்ணையும் தர்ஷனிடம் கொடுத்துள்ளார். இந்த நிலையில் கடந்த வியாழக்கிழமை அதாவது ஜனவரி 29ஆம் தேதி அன்று திருமண வரவேற்பு நிகழ்ச்சியில் கலந்து கொள்வதற்காக ரவிஷ் காரில் தனியாக புறப்பட்டு வந்த நிலையில், தர்ஷன் தனது கூட்டாளிகளுடன் சேர்ந்து ரவிஷை தாக்கி கத்தியால் குத்தியது தெரியவந்தது. இதையடுத்து போலீசார் நயனாவையும் அவரது காதலரான தர்ஷன் மற்றும் சிறுவன் ஆகியோரை கைது செய்தனர். மேலும் தலைமறைவாக உள்ள தர்ஷினின் நண்பர்கள் இருவரை வலை வீசி தேடி வருகின்றனர். கைதான நயனா, தர்ஷன் உள்ளிட்டவர்களிடம் போலீசார் தீவிர விசாரணை நடத்தி வருகின்றனர். திருமணத்திற்காக புறப்பட்டு வந்து கொண்டிருந்த மணமகனை, மணமகள் காதலனை ஏவி கொலை செய்ய முயற்சித்த சம்பவம் கர்நாடகாவில் பெரும் பரபரப்பை ஏற்படுத்தி இருக்கிறது. #📢பிப்ரவரி 4 முக்கிய தகவல் 🫠