సాధారణంగా తలస్నానం చేయాలంటే రసాయనాలతో కూడిన షాంపూ బాటిల్స్ కోసం వెతుకుతాం. కానీ 'జింజర్ లిల్లీ' అనే వింత మొక్క ఉంటే చాలు, మన పెరట్లోనే సహజమైన షాంపూ లభిస్తుంది. దీని పువ్వును చేత్తో పిండితే జిగురులాంటి చిక్కటి ద్రవం వస్తుంది. ఈ ద్రవాన్నే చాలామంది జుట్టుకు షాంపూలా, కండిషనర్‌లా ఉపయోగిస్తారు. విశేషం ఏమిటంటే ఈ పువ్వును ఎంత పిండినా అది వాడిపోదు, ఎండిపోదు. నిరంతరం ఊటలా ద్రవం ఊరుతూనే ఉంటుంది. మన దేశంలో పుట్టి హవాయి వంటి ప్రాంతాలకు వలస వెళ్లిన ఈ మొక్క శాస్త్రీయ నామం జింజిబర్ జెరంబెట్. వాడుక భాషలో దీనిని షాంపూ జింజర్, బిట్టర్ జింజర్ అని కూడా పిలుస్తారు. దీని వేర్లు అల్లం, పసుపు కొమ్ములలాగే ఉంటాయి. కాండానికి మొదట ఆకుపచ్చ రంగులో జొన్న కంకిలాంటి పువ్వు వస్తుంది. అది క్రమంగా ఎరుపు రంగులోకి మారుతుంది. పువ్వులోని రేకల మధ్య నిక్షిప్తమై ఉండే ద్రవం జుట్టుకు మంచి మెరుపును ఇవ్వడమే కాకుండా చర్మానికి మాయిశ్చరైజర్‌లా కూడా పనిచేస్తుంది. ఈ మొక్కలో ఎన్నో ఔషధ గుణాలు కూడా ఉన్నాయి. దీని వేళ్లను హెర్బల్ నూనెలు, మందుల తయారీలో ఉపయోగిస్తారు. కొన్ని ప్రాంతాల్లో ఆహార పదార్థాల తయారీలో ఈ ఆకులను వాడుతుంటారు. తక్కువ నీరు, ఎక్కువ ఎండ ఉండే ప్రదేశాల్లో ఈ మొక్కలు బాగా పెరుగుతాయి. కుండీల్లో కూడా పెంచుకునే వీలుండటంతో ప్రస్తుతం చాలామంది తమ ఇంటి గార్డెన్లలో ఈ సహజ షాంపూ మొక్కను పెంచుకోవడానికి ఆసక్తి చూపిస్తున్నారు. #ShampooGingerLily #NaturalShampoo #GardeningTips #HerbalBeauty #OrganicHairCare #🔊షేర్‌చాట్ చాట్‌రూమ్😍 #🔊షేర్‌చాట్ చాట్‌రూమ్😍