അയലത്തെ അമ്പിളി 🌜 15 " നീയെന്താ കരുതിയത്? ഭാര്യെ മറന്നുള്ള ഈ ദിവ്യ പ്രേമം അവന് നിന്നോട് മാത്രം ആണ് തോന്നിയതെന്നോ? എന്നാൽ കേട്ടോ... അവനെ സംബന്ധിച്ച് പലരിൽ ഒരാൾ മാത്രമാണ് നീ... " കാവ്യ മുഖം ഉയർത്തി രുദ്രനെ നോക്കി. അവളുടെ കണ്ണുകളിൽ തെളിഞ്ഞ ഞെട്ടൽ ആസ്വദിച്ച് അവനൊന്നു ചിരിച്ചു. " അതിൽ ഒന്ന് രണ്ട് പേരുടെ ഡീറ്റെയിൽസ് ഷാനു സാറിന് കിട്ടിയിട്ടുണ്ട്. ഇവനെ ഒന്നകത്താക്കാൻ പറ്റുമോ എന്നറിയാൻ ഷാനു സാർ അവരെ കോൺടാക്ട് ചെയ്തിരുന്നു. പക്ഷെ ഇവൻ ബുദ്ധിമാനാ... സേഫ് സോണിൽ നിന്നേ കളിക്കൂ... അവര് രണ്ടാളും വിവാഹിതരാണ്. അവർക്ക് കേസിനു പോകാൻ താല്പര്യം ഇല്ലാന്ന് പറഞ്ഞു.... അത് കൊണ്ട് മാത്രമാ ഇന്നിപ്പോ ഇവൻ നിന്റെ അടുത്ത് ഇങ്ങനെ നിവർന്നു നിൽക്കുന്നത്. എന്തായാലും നീ കണ്ടു പിടിച്ച ആള് കൊള്ളാം... എന്ത്‌ കൊണ്ടും എന്നെക്കാൾ യോഗ്യൻ തന്നെ.... " രുദ്രൻ ചുണ്ട് കോട്ടി കാവ്യയെ പുച്ഛിച്ചു. കാവ്യ അവിശ്വസനീയതയോടെ തല ചരിച്ചു പ്രഭനെ നോക്കി. അയാളാകെ അന്ധാളിച്ചു നിൽപ്പാണ്. കാവ്യ ഇതൊക്കെ വിശ്വസിച്ചാൽ.... അവൾ തന്റെ കൂടെ വരാതിരുന്നാൽ..... ആ നാലര ലക്ഷവും സ്വർണ്ണവും ഒക്കെ കണ്ടു മോഹിച്ചത് വെറുതെ ആകും. അതിന് വേണ്ടിയാണ് ഇതൊക്കെ ചെയ്തു കൂട്ടിയത്. അതൊക്കെ നഷ്ടപ്പെടുമോ, നാണക്കേട് മാത്രം ബാക്കിയാകുമോ എന്നയാൾ ഭയന്നു. കാവ്യ പ്രതാപനെ കൊല്ലുന്നൊരു നോട്ടം നോക്കി. അയാൾ നിന്നുരുകി.... " കാവ്യ... നീ വിശ്വസിക്കരുത്..... വെറുതെയാ... " പ്രതാപൻ മുഖത്ത് ദയനീയത വരുത്തി. " വെറുതെയോ? തെളിവുണ്ട്... കാണണോ? " രുദ്രൻ ഷാനുവിന് നേരെ തിരിഞ്ഞതും വാതിൽ കടന്ന് രണ്ട് പേര് ഉള്ളിലേക്ക് വന്നു. പപ്പുവേട്ടനും ശ്യാമും.... പപ്പുവേട്ടനെക്കണ്ട് പ്രതാപന്റെ മുഖം രക്തം വറ്റി കടലാസ് പോലെ വിളറി വെളുത്തു. " എന്താ രുദ്രാ? എന്താ സാറേ...? എന്ത് പറ്റിയെടാ മോനെ...? " ഓരോരുത്തരോടും ചോദിച്ചു കൊണ്ടയാൾ നടന്നടുത്തത് പ്രതാപനരികിലേക്കാണ്. " എന്താ പ്രഭാ? എന്താ പ്രശ്നം? അയ്യോ കാവ്യക്ക് എന്ത്‌ പറ്റി? " അയാൾ തല ഉയർത്താതെ നിൽക്കുന്ന പ്രഭനെയും, തല്ല് കൊണ്ട് തളർന്ന കാവ്യയെയും മാറി മാറി നോക്കികൊണ്ട് അമ്പരന്ന് നിന്നു. " പപ്പുവേട്ടൻ വന്നെ.... പറയാം.... " രുദ്രൻ അയാളുടെ തോളിലേക്ക് കൈ ചേർത്ത് അയാളെ തന്നോട് ചേർത്ത് പിടിച്ചു. പപ്പുവേട്ടനെയും കൊണ്ട് അല്പം മാറി നിന്ന് സംസാരിച്ചു. അല്പ സമയം കഴിഞ്ഞതും കാറ്റ് പോലെ പാഞ്ഞു വന്ന അയാൾ പ്രതാപന്റെ കവിളിലേക്ക് ആഞ്ഞടിച്ചു. " മഹാ പാപീ... എന്റെ കുഞ്ഞിനെ ചതിച്ചു കളഞ്ഞല്ലോടാ നീയ്? " അവന്റെ മറു കവിളിലും പപ്പൂവേട്ടന്റെ കൈ പതിഞ്ഞു. " അവളൊരു സൂക്കേട്കാരി ആയോണ്ടാണോടാ നീ വേറെ അവളുമാരെ തേടി പോയത്...? എന്റെ മുത്തപ്പാ... എന്റെ കുഞ്ഞിത് എങ്ങനെ സഹിക്കും? " ആ വൃദ്ധൻ പ്രതാപന്റെ മുന്നിൽ നിന്ന് ഉറക്കെ കരഞ്ഞു. ഇരു കയ്യും തലയിൽ താങ്ങി മുട്ട് കുത്തി നിലത്തേക്കിരുന്നു. ഈ ലോകത്തിൽ ഏറ്റവും മികച്ചവനെയാണ് മകൾക്ക് വേണ്ടി കണ്ടെത്തിയത് എന്നായിരുന്നു ഇത് വരെയുള്ള ധാരണ... എന്നാൽ ഇപ്പോൾ....? ഇന്ന് രാവിലെ എഴുന്നേൽക്കാൻ വയ്യാതെ കിടന്നവളുടെ അടുത്ത് കണ്ണ് നിറച്ചിരുന്നപ്പോൾ ജയ പറഞ്ഞത് അയാൾക്ക് ഓർമ്മ വന്നു. ' എനിക്ക് എന്തസുഖം വന്നാലും എന്റെ പ്രഭേട്ടൻ എന്റെ കൂടെ കാണും അച്ഛാ. പ്രഭേട്ടനും മക്കൾക്കും വേണ്ടി ഞാൻ എല്ലാ അസുഖവും മാറി തിരികെ വരും. അച്ഛൻ വിഷമിക്കാതെ... ' അതേ... ജയ്ക്ക് പ്രഭാനോട് വിശ്വാമാണ്. അമിതമായ വിശ്വാസം.... സ്നേഹമാണ്... ഭ്രാന്തമായ സ്നേഹം..... അവശയായി കിടക്കുന്നവൾ ഇത് കൂടി കേട്ടാൽ ചത്തു പോകത്തേ ഉള്ളൂ.... എന്ത്‌ വേണമെന്ന് അറിയാതെ അയാൾ നിലത്തിരുന്നു പിന്നെയും പിന്നെയും കരഞ്ഞു. അത് കണ്ട് അവിടെ കൂടെ നിന്നവരുടെ ഒക്കെയും ഹൃദയം വിങ്ങി. അപമാനഭാരത്താൽ അത് വരെയും തല കുനിച്ച് നിന്നിരുന്ന ശ്രീധരൻ അപ്പോൾ മാത്രം കാവ്യയുടെ മുഖത്തേക്ക് നോക്കി. ആ നിമിഷം അവളെ കൊന്ന് കളയാനുള്ള ദേഷ്യം തോന്നിയിരുന്നു അയാൾക്ക്.... ആദ്യത്തെ കണ്മണി... താലോലിച്ചു വളർത്തിയ മകൾ.... ഒരല്പം കർക്കശക്കാരനായ അച്ഛനായിരുന്നു എന്നതൊഴിച്ചാൽ അവളുടെ നന്മ അല്ലാതെ മറ്റൊന്നും ആശിച്ചിട്ടില്ല... അവൾ നല്ല രീതിയിൽ ജീവിക്കുന്നത് കണ്ടു സന്തോഷിച്ചിട്ടേയുള്ളൂ... അത് അഭിമാനത്തോടെ മറ്റുള്ളവരോട് പറഞിട്ടേയുള്ളൂ... എന്നിട്ടിപ്പോ അവൾ തനിക്ക് അപമാനമാവുകയാണ്... നാളെ നാട്ടുകാരുടെ മുഖത്ത് എങ്ങനെയാണ് നോക്കുന്നത്? അവളിന്ന് എത്ര പേരുടെ ഹൃദയമാണ് തകർത്തു കളഞ്ഞത്....? എല്ലാം എന്റെ തെറ്റാണ്... എന്റെ മാത്രം തെറ്റ്.... മക്കളുടെ ഇഷ്ടത്തിന് എതിരായി വിവാഹം നടത്തുന്ന ഓരോ മാതാപിതാക്കളും തെറ്റുകാര് തന്നെയാണ്... അപ്പോഴും തന്നെ ചുറ്റിപ്പിടിച്ചു നിന്ന് വിതുമ്പുന്ന കലയുടെ നേർക്ക് നോക്കുമ്പോൾ ആ പിതാവിന്റെ കണ്ണുകളും നിറഞ്ഞൊഴുകുന്നുണ്ടായിരുന്നു.... 🌜 രുദ്രനും ഷാനുവും ചേർന്ന് പപ്പുവേട്ടനെ നിലത്ത് നിന്ന് താങ്ങി പിടിച്ചു എഴുന്നേൽപ്പിച്ചു. പപ്പുവേട്ടൻ രുദ്രനെ കെട്ടി പുണർന്ന് പിന്നെയും കരഞ്ഞു. രുദ്രൻ അയാളെ കൂടുതൽ ചേർത്ത് പിടിച്ചു. അയാളുടെ തോളിൽ മെല്ലെ തട്ടി... " എന്തിനാ പപ്പൂവേട്ടാ കരയുന്നത്? ഇവനെ ഓർത്തോ? അതിന് സന്തോഷിക്കണ്ടേ? ഇപ്പോഴെങ്കിലും ഇതൊക്കെ അറിഞ്ഞില്ലേ? ഇത്രേം നാളും ഇവൻ നമ്മളെ എല്ലാം പറ്റിക്കുകയല്ലായിരുന്നോ? പിന്നെ ജയേടെ കാര്യം? അവക്കും പിള്ളാർക്കും നമ്മളില്ലേ പപ്പുവേട്ടാ? നിങ്ങളോട് ഞാൻ പലവട്ടം പറഞ്ഞിട്ടില്ലേ? പപ്പുവേട്ടാ എന്ന് വിളിച്ചാലും എനിക്ക് നിങ്ങൾ അച്ഛനെപോലെ ആണെന്ന്. അപ്പൊ ജയ എന്റെ ആരാ? എന്റെ കൂടെപ്പിറപ്പ്... അവക്ക് എന്താവശ്യത്തിനും ഞാൻ ഉണ്ടാവും പപ്പുവേട്ടാ ... നമ്മൾ ഉണ്ടാവും... " രുദ്രൻ അയാളുടെ കയ്യിൽ അമർത്തി പിടിച്ചു. " അവൻ പോട്ടേ ... എവിടാന്ന് വച്ചാ പോയി തുലയട്ടെ.... " രുദ്രൻ എന്തൊക്കെ പറഞ്ഞിട്ടും അയാളുടെ കരച്ചിൽ നിന്നില്ല. അത് അത്ര പെട്ടെന്നൊന്നും മാറുമെന്നും അവന് തോന്നിയില്ല .... " സാർ... ഞാൻ പപ്പൂവേട്ടനെ കൊണ്ട് പൊയ്ക്കോട്ടേ. ...? പുള്ളി ഇനിയും ഇവിടെ നിന്നാൽ ശരിയാവില്ല. " രുദ്രൻ ഷാനുവിനോട് ചോദിച്ചു. " ഹ്മ്... അതാണ്‌ നല്ലത്. ആളിനെ വീട്ടിൽ ആക്കിയിട്ട് നീയിങ്ങു വന്നേക്കണം... ഇവിടെ കുറച്ചു ഫോർമാലിറ്റീസ് ഉണ്ട്. ഇവളിപ്പോഴും ലീഗലി നിന്റെ ഭാര്യയാണ്. ഇവന്റെ ഒപ്പം പോയിട്ട് നാളെ എന്തെങ്കിലും പറ്റിയാൽ അത് നിന്റെ തലയിൽ ആകരുതല്ലോ? " ഷാനു പറഞ്ഞതിന് സമ്മതം അറിയിച്ചു കൊണ്ട് രുദ്രൻ പപ്പൂവേട്ടനേയും കൂട്ടി പുറത്തേക്കിറങ്ങി. കാവ്യയെ ഒന്ന് നോക്കുക പോലും ചെയ്യാതെ ശ്രീധരനും കലയും അവന് പിറകെ നടന്നു .... കാവ്യ രുദ്രനെ തന്നെ നോക്കി നിന്നു. ഇതറിയുമ്പോൾ ആകെ തകർന്ന് പോകുമെന്ന് കരുതിയവനാണ്. ഇപ്പോഴവൻ തളർത്തി കളഞ്ഞത് തന്നെയാണ് ..... തന്റെ മനസ്സിലേക്ക് വലിയൊരു കരട് ഇട്ട് തന്നിട്ടാണ് അവൻ പോകുന്നത്. കാവ്യ ഒരിക്കൽക്കൂടി തല ചരിച്ചു പ്രതാപനെ നോക്കി. അവളുടെ മനസ്സിൽ ഒരായിരം വിഷക്കൂണുകൾ ഒരുമിച്ചു മുളച്ചു പൊന്താൻ തുടങ്ങി ..... 🌜 🌜 🌜🌜 🌜 ഇനി കാവ്യയും പ്രതാപനും തമ്മിലുള്ള ബന്ധം സ്മൂത്തായി പോകുമെന്ന് തോന്നുന്നുണ്ടോ? 😉 കണ്ണൂർകാരൻ ❤️❤️❤️❤️ #📔 കഥ #✍ തുടർക്കഥ #📙 നോവൽ #📚 ട്വിസ്റ്റ് കഥകൾ #💞 പ്രണയകഥകൾ