कारंजाला परमहंस परिव्राजकाचार्य श्रीमद् वासुदेवानंदसरस्वती (टेंबे) स्वामी महाराज असतांना त्यांचा मुक्काम मारोती मंदीरात होता. ज्या मंदीरात श्री स्वामी महाराजांचा मुक्काम होता, तेथिल पुजारी मारूतीची पुजा करून नैवेद्य दाखवल्यानंतर लगेच खाऊन पुजा समाप्त करी. श्री स्वामी महाराज मुक्कामी असल्यामुळे पुजार्यास नैवेद्य भक्षण करणे बरे वाटले नाही. त्यामुळे त्या दिवशी त्याने नैवेद्य खाल्ला नाही. तेव्हा श्री स्वामी महाराज मारोती समोर ध्यानस्थ बसले असतांना मारोतीराया महाराजांपुढे तोंड आ करून उभे असल्याचे त्यांना दिसले व मला भूक लागली आहे असे त्याने श्री स्वामी महाराजांना सांगितले. ही गोष्ट त्यांनी लगेच तेथिल पुजार्यास सांगितली. पुजार्यास आश्चर्य वाटले की आजपर्यंत असे कधीच घडले नाही कारण पुजा झाल्यावर तो नैवेद्य आपण खात होतो. पुजार्याने श्री स्वामी महाराजांना सगळे सविस्तर सांगितले. श्री स्वामी महाराज विचारातच पडले की हा भक्तीचा कुठला प्रकार आहे? आपला भक्त ऊपाशी आहे जेवला नाही तर भगवंत कळवळतो. हा पुजारी निश्चितच अधिकारी भक्त असला पाहिजे. डोळ्यात पाणी आलेल्या व वारंवार मारोतीरायाची क्षमा याचना करणार्या पूजार्यास श्री स्वामी महाराज म्हणाले, “तुम्ही भक्तीचे अत्यूच्च शिखर गाठले आहे. भगवंत भुकेने कळवळतो आहे आधी नैवेद्य भक्षण करा, त्या शिवाय भगवंताची भूक शमणार नाही.” श्री स्वामी महाराज हात जोडून म्हणाले, “सदगुरूराया! आज आपण मला आगळ्या वेगळ्या भक्तीचे दर्शन घडविले. त्यामुळे माझे ईथे येणे धन्य झाले.” #🌸हनुमान जयंती लवकरच🛕 #🚩बजरंगबली स्टेट्स #🚩श्रीराम भक्त हनुमान #जय हनुमान #हनुमान