59 അയലത്തെ അമ്പിളി ആരുടെയോ സംസാരം കേട്ടാണ് കുമാരൻ ഉണർന്നത്. " ആരാ അവിടെ? കിഷോറേ..... അമ്പിളി..... ആരാ വന്നത്? " കുമാരൻ ഉറക്കെ വിളിച്ചു ചോദിച്ചു. അത് കേട്ടതും വന്ന കാര്യം നടത്താൻ ഇനിയും വൈകിപ്പിക്കുന്നത് ബുദ്ധിയല്ല എന്ന് ക്ലീറ്റസിന് തോന്നി. അയാൾ കിഷോറിന്റെ നേർക്ക് കത്തി താഴ്ത്തി. ആദ്യത്തെ കുത്ത് കിഷോർ തന്റെ സ്വാധീനമുള്ള കൈ കൊണ്ട് തടഞ്ഞു. " അമ്പിളി.... " എന്ന് ഉറക്കെ അലറി വിളിച്ചു. ക്ലീറ്റസ് കിഷോറിന്റെ സ്വാധീനമുള്ള കൈ പിടിച്ചുവച്ചു. കിഷോറിന്റെ അലർച്ച കേട്ട് വെപ്രാളത്തോടെ ഓടി കയറി വന്ന അമ്പിളി കാണുന്നത് കിഷോറിനെ ആഞ്ഞു കുത്തുന്ന ക്ലീറ്റസിനെയാണ്... ഒന്നല്ല... രണ്ടുവട്ടം.... അമ്പിളിയുടെ കയ്യിലെ പാത്രം നിലത്തേക്ക് വീണു. " അയ്യോ.... കിഷോറേട്ടാ.... " അവൾ അലർച്ചയോടെ അകത്തേക്ക് ഓടി. 🌜 രുദ്രൻ സൂപ്പർമാർക്കറ്റിന്റെ മൂന്നാം നിലയിലായി സജ്ജീകരിച്ചിരിക്കുന്ന തന്റെ റൂമിൽ ഇരിക്കുമ്പോഴാണ് അവന്റെ മൊബൈലിലേക്ക് ഒരു കോൾ വന്നത്. ബിജുവാണ്... രുദ്രൻ കാൾ എടുത്തു. " രുദ്രേട്ടാ..... ശ്യാം എന്ന് പറയുന്ന ഒരാൾ ഇവിടെ ചേട്ടനെ കാണാൻ വന്ന് നിൽപ്പുണ്ട്. ഞാൻ അങ്ങോട്ട് വിടട്ടെ? " " ശ്യാമോ? വേണ്ടടാ ഞാൻ താഴേക്ക് വരാം. നീ അവനോട് അവിടെ നിൽക്കാൻ പറ. " രുദ്രൻ കാൾ കട്ടാക്കി. " അന്ന്.... കാവ്യ പോയതിന്റെ അന്ന് കണ്ടതാണ് ശ്യാമിനെ. അന്ന് ഫ്രീ ആകുമ്പോൾ വിളിക്കാൻ ഒക്കെ അവൻ പറഞ്ഞിരുന്നുവെങ്കിലും പിന്നീട് അതോർത്തതേ ഇല്ല. അവനും വിളിച്ചില്ല. രുദ്രൻ പെട്ടെന്ന് തന്നെ താഴേക്ക് ഇറങ്ങിച്ചെന്നു . ശ്യാം അവനെ കാത്ത് അവിടെ തന്നെ നിൽപ്പുണ്ടായിരുന്നു. " ഹാ ശ്യാമേ... " രുദ്രൻ അവനെ കണ്ട് സൗഹൃദ ഭാവത്തിൽ ചിരിയോടെ അടുത്തേക്ക് ചെന്നു. " നീ ഇങ്ങോട്ട് തന്നെ വന്നതാണോ? " ശ്യാം സാധാരണ രുദ്രന്റെ കടയിൽ സാധനം വാങ്ങാൻ ഒന്നും വരാറില്ല. " ഹ്മ്മ്.... ഇങ്ങോട്ട് തന്നെ വന്നതാ. നിന്നെ കാണാൻ. എനിക്ക്... ഒരു കാര്യം സംസാരിക്കാൻ ഉണ്ട്.. " അവന്റെ സംസാരത്തിൽ ആകെ ഒരു മടി പോലെ.... " എന്നാ വാ നമുക്കൊരു ചായ കുടിച്ച് സംസാരിക്കാം. " സ്റ്റീഫൻ അച്ചായന്റെ ചായക്കടയിലേക്ക് തന്നെയാണ് രുദ്രൻ ശ്യാമിനെയും കൊണ്ട് ചെന്നത്. " നിന്നെ അല്ലെടാ ഞാൻ കുറച്ചു മുമ്പ് പറഞ്ഞു വിട്ടത്? നീ പിന്നെയും വന്നോ? " രണ്ടു മണിക്കൂർ മുൻപ് പറഞ്ഞു വിട്ടവൻ വീണ്ടും കയറി വരുന്നത് കണ്ടു സ്റ്റീഫൻ അച്ചായൻ കണ്ണു കൂർപ്പിച്ചു. " അച്ചായാ രണ്ട് ചായ എടുക്കാമോ ....? " അയാളുടെ ചോദ്യത്തിന് മറുപടി കൊടുക്കാതെ അങ്ങനെ പറഞ്ഞു കൊണ്ട് രുദ്രൻ ചായക്കടയിലേക്ക് കയറിയപ്പോഴാണ് അവന് ഒപ്പമുള്ള ആളിനെ അച്ചായൻ ശ്രദ്ധിക്കുന്നത്. അയാൾ അവനെ നോക്കി ഒന്ന് തലയാട്ടിക്കൊണ്ട് തിരിഞ്ഞു നടന്നു. രുദ്രൻ ശ്യാമിനെയും കൂട്ടി അടുത്തുള്ള ബെഞ്ചിലേക്ക് ഇരുന്നു. " എന്താടാ? എന്താ കാര്യം? " " രുദ്ര... എനിക്ക് എനിക്ക് നിന്റെ കടയിൽ എന്തെങ്കിലും ഒരു ജോലി തരുമോ? " മുഖവുര ഒന്നുമില്ലാതെയുള്ള അവന്റെ ചോദ്യം കേട്ട് രുദ്രൻ ഒന്ന് അമ്പരന്നു. എത്ര തവണ ഓരോന്നൊക്കെ ചെയ്ത് രുദ്രന്റെ കട പൂട്ടിക്കാൻ നോക്കിയവനാണ് ഇപ്പോൾ മുമ്പിൽ വന്നിരുന്ന് ജോലി ചോദിക്കുന്നത്? എങ്ങനെ അമ്പരക്കാതിരിക്കും? " എനിക്കറിയാം അത്ര പെട്ടെന്നൊന്നും ക്ഷമിക്കാൻ പറ്റുന്ന കാര്യങ്ങൾ അല്ല ഞാൻ നിന്നോട് ചെയ്തതെന്ന്. നിന്റെ കട വന്നേ പിന്നെ എന്റെ ബേക്കറി ആകെ നഷ്ടത്തിലായി. നിത്യച്ചെലവിന് പോലും ഒന്നും കിട്ടാതെ ആയപ്പോഴാ ഞാൻ നിന്റെ കട പൂട്ടിക്കാൻ വേണ്ടി ഓരോന്നൊക്കെ ചെയ്തു കൂട്ടിയത്. ഇപ്പോൾ കച്ചവടമില്ലാതെ കടയും പൂട്ടി... വേറെ എവിടെയെങ്കിലും ജോലിക്ക് നിൽക്കാമെന്ന് വെച്ചാൽ ഞാനും നീയും തമ്മിലുള്ള പ്രശ്നത്തിൽ കുറ്റക്കാരൻ ഞാനാണെന്ന് അറിയുന്നവർ ആരും എന്നെ ജോലിക്ക് നിർത്തുന്നില്ല.... കുറെ അലഞ്ഞു... ഈ ഒന്നര കൈയും വെച്ച് നല്ല ജോലികൾ ഒന്നും കിട്ടുന്നുമില്ല. " രുദ്രനോട് സഹായം അഭ്യർത്ഥിക്കേണ്ടി വന്നതിന്റെ നിസ്സഹായത ശ്യാമിന്റെ മുഖത്ത് നിഴലിച്ചിരുന്നു. അപ്പോഴേക്കും സ്റ്റീഫൻ അച്ചായൻ ചായയുമായി വന്നു. എന്തെങ്കിലും പ്രശ്നമുണ്ടോ എന്ന് അച്ചായൻ രുദ്രനോട് കണ്ണുകൊണ്ട് ചോദിച്ചു. ഒന്നുമില്ല എന്ന് രുദ്രൻ കണ്ണ് ചിമ്മി കാണിച്ചതും ഒരു ചിരിയോടെ അയാൾ മാറിപ്പോയി. " ചായ കുടിക്ക്.... " ശ്യാം ചായ എടുത്ത് മെല്ലെ ഊതി കുടിച്ചു. " ഞാൻ ഒന്ന് ആലോചിക്കട്ടെ ശ്യാമേ.... " ചായ കുടിച്ചു തീർന്ന കപ്പ് മേശമേൽ വച്ചുകൊണ്ട് രുദ്രൻ പറഞ്ഞു. " മ്മ്..... " രുദ്രന്റെ ആ മറുപടിയിൽ പ്രതീക്ഷയറ്റവനെപ്പോലെ ശ്യാം ഒന്ന് മൂളി. അപ്പോഴാണ് രുദ്രന്റെ മൊബൈൽ ശബ്ദിച്ചത്. അവൻ കോൾ എടുക്കുന്നതും പരിഭ്രമത്തോടെ ചാടി എഴുന്നേൽക്കുന്നതും കണ്ട് ശ്യാമും എഴുന്നേറ്റു. കാൾ കട്ട് ചെയ്ത് പുറത്തേക്ക് പായുന്നവന്റെ പിറകെ ശ്യാമും ഇറങ്ങി ചെന്നു. " എന്താടാ? " രുദ്രന്റെ പുറകെ ഓടി ചെന്നു കൊണ്ട് ശ്യാം ചോദിച്ചു. " എന്റെ ഫ്രണ്ടിന് ഒരാക്സിഡന്റ്. " സൂപ്പർ മാർക്കറ്റിന് മുന്നിൽ പാർക്ക് ചെയ്തിരുന്ന സ്വന്തം കാറിനടുത്തേക്ക് ഓടും വഴി രുദ്രൻ അങ്ങനെ ആണ് പറഞ്ഞത്. " എന്നാൽ ഞാനും വരാം... " ശ്യാം അങ്ങനെ പറഞ്ഞപ്പോൾ രുദ്രനും എതിർക്കാൻ നിന്നില്ല. 🌜 " എടാ അനന്ദു... ഇന്നെന്നെ വിളിക്കാൻ വരുന്നത് എന്റെ അമ്പിളിമാമനാണ് .... " " ങ്ങേ...! മാനത്തെ അമ്പിളി അമ്മാവനോ? " അപ്പു മോളുടെ പറച്ചിൽ കേട്ട് സ്കൂൾ ബസ്സിൽ അപ്പുമോൾടെ അടുത്തിരിക്കുകയായിരുന്നു അനന്ദു കണ്ണും മിഴിച്ച് അവളെ നോക്കി. " മ്ച്ചും... മാനത്തെ അമ്പിളി അമ്മാവൻ അല്ല. ഞങ്ങളുടെ വീട്ടിന്റെ അടുത്തുള്ള അമ്പിളിമാമവൻ. നിന്നെ എന്നും സുമാന്റി വിളിക്കാൻ വരുന്ന പോലെ എന്നെ വിളിക്കാൻ ഇനി എന്നും അമ്പിളിമാമൻ വരും. " അപ്പു വലിയ ഗമയിൽ പറഞ്ഞു. " അപ്പോ... അമ്പിളിയമ്മാവൻ അനാമികയുടെ അമ്മയാ? " അനന്തുവിന്റെ നിഷ്കളങ്കമായ ചോദ്യം. " മ്...ഹും.... അമ്മയല്ല.... പക്ഷേ അമ്മയെക്കാളും എനിക്കിഷ്ടവാ... " അപ്പു ചിരിയോടെ നിസംശയം പറഞ്ഞു. അപ്പോഴേക്കും സ്കൂൾ ബസ് അപ്പുവിന് ഇറങ്ങേണ്ട സ്റ്റോപ്പിൽ എത്തിയിരുന്നു. " അനാമികയെ കൂട്ടാൻ ഇന്ന് ആരും വന്നില്ലേ? " ആന്റിയുടെ ചോദ്യം കേട്ട് അപ്പു പകപ്പോടെ ചുറ്റും നോക്കി.... അവിടെയെങ്ങും അച്ഛനില്ല. അമ്പിളിമാമനും.... അപ്പുവിന് കരച്ചിൽ വന്നു. 🌜 🌜 🌜 🌜 🌜 ബാക്കി നാളെ #📚 ട്വിസ്റ്റ് കഥകൾ #📔 കഥ #💞 പ്രണയകഥകൾ #📙 നോവൽ #✍ തുടർക്കഥ