മൂർഖനെ പ്രണയിച്ചവൾ !!!!! “ പ്രണയിച്ചിട്ടുണ്ടോ ? മൂർഖനെ!! പത്തിവിടർത്തിയാടുന്ന അവന്റെ ജ്വലിക്കുന്ന കണ്ണുകളിൽ ഉമ്മവെച്ചിട്ടുണ്ടോ?” ഇത് എന്റെ കഥ . ശരീരമാസകലം മിനുസവും തിളക്കമാർന്നതുമായ ചെതുമ്പലുകൾ . കോണാകൃതിയിലുള്ള ശിരസ്സും ശൂലാകൃതിയിലുള്ള നാവും എന്റേതുമാത്രമായ ലാവണ്യം . അരണബുദ്ധി എന്നുപറഞ്ഞ്‌ വീണ്ടും വീണ്ടും അപമാനിക്കുമ്പോളും ഞാൻ മൗനം പുല്കിയതെന്തിനെന്നറിയണോ ? വരുന്നോ എന്റെ കൂടെ? ഒരുപാട് വർഷങ്ങൾക്കപ്പുറത്തേക്ക് ഇഴഞ്ഞിഴഞ്ഞ്‌. പാറക്കൂട്ടങ്ങൾക്കിടയിൽ ചീവീടിനെ പരതിയ ഞാൻ വഴുതിവീണത് മൂർഖന്റെ മാളത്തിലേക്കായിരുന്നു. ഇരയെ വിഴുങ്ങാനായി ശീൽക്കാര ശബ്ദത്തോടെ പാഞ്ഞടുത്ത അവനെ ഇമവെട്ടാതെ ഞാൻ നോക്കിനിന്നു. നിങ്ങൾ കളിയാക്കുന്നതുപോലെ “അരണബുദ്ധി” ആയിരുന്നില്ല . ആദ്യാനുരാഗം !!!! ഉരഗ വംശത്തിലെ വീരനായകനെ അടുത്തുകണ്ടപ്പോൾ തോന്നിയ പ്രണയം . ഒട്ടും പേടിയില്ലാതെ, പ്രണയാതുരയായി നിൽക്കുന്ന എന്റെ കണ്ണുകളിലേക്കു ഉറ്റുനോക്കികൊണ്ടവൻ ആരാഞ്ഞു . “എന്തെ ഭയക്കുന്നില്ല നീ” “കാരണം, പ്രണയിക്കുന്നു ഞാൻ നിന്നെ !” അവനിൽ ചുറ്റിപ്പുണർന്നുകൊണ്ട് തേനിൽ ചാലിച്ച വിഷകുമിളകളെ തട്ടിത്തെറിപ്പിക്കുമ്പോൾ എവിടെ നിന്നോ വന്ന അശരീരി!! “അരുത് . നീ ചെയ്യുന്നത് തെറ്റ്. മൂർഖനും അരണയും ഇണചേരില്ല. അതിലുപരി അവനൊരു പതി. അവനായി ത്യജിച്ചവൾ നിന്നോട് പ്രതികാരം ചെയ്യും. പ്രകൃതി നിയമങ്ങളെ നീ കയ്യിലെടുക്കരുത്.” അശരീരി മുഴുമിപ്പിക്കുന്നതിനു മുൻപേ ആഞ്ഞുകൊത്താനായി പാഞ്ഞെത്തിയ പത്നിയെ തടഞ്ഞ അവനോടവൾ അലറി. “ഒരുനിമിഷനേരത്തേക്കെങ്കിലും എന്നെ മറന്ന് മറ്റൊരുവളെ പ്രാപിക്കാനടുത്ത നിന്നെയെനിക്ക് വേണ്ട.” അടുത്തത് എനിക്കുള്ള ഊഴമായിരുന്നു. “കൊണ്ടുപോകാം നിനക്കിവനെ. നീ വന്ന് ഇവന്റെ മുതുകിലേറുംവരെ ഒരടിപോലും ഇവന് ചലിക്കാനാവില്ല . ഇതെന്റെ ശാപം. ഇവനെമാത്രം ധ്യാനിച്ച എന്നെ വഞ്ചിച്ചതിനുള്ള ശിക്ഷ.” സന്തോഷത്താൽ അവനിലേക്ക്‌ തിരിഞ്ഞതും ഞാൻ ഞെട്ടിവിറച്ചു. പരിഹാസച്ചിരിയുമായി ഒരുപോലെയുള്ള നാല് മൂർഖൻ പ്രതിമകൾ. ഇതിലേതാണ് എന്റെ മൂർഖൻ? ‘അരണബുദ്ധി’എന്നെ ചതിച്ചു. അവളുടെ പിടിയിൽനിന്നും രക്ഷപ്പെട്ടു പിടഞ്ഞോടിയ ഞാൻ നഷ്ടപ്രണയത്തെയോർത്തു തലതല്ലി ചാവാനൊരുങ്ങിയതും അശരീരി വീണ്ടും വന്നു. “അരുത്. മരണം ഒന്നിനും പരിഹാരമല്ല” ഞാൻ അലറിക്കരഞ്ഞു. “പെട്ടെന്ന് മറന്നുപോകുന്ന ഈ ‘അരണബുദ്ധി’ എനിക്കുവേണ്ട. എനിക്കെന്റെ ഓർമ്മ തിരിച്ചുവേണം. എനിക്കവന്റെ മാളത്തിൽ പോകണം. എന്നെ പരിഹസിച്ച അവനെ കടിച്ചുമുറിക്കണം. എന്നെ വെറുമൊരു ഭോഗവസ്തുവായിക്കണ്ട അവനോടെനിക്ക് പ്രതികാരം ചെയ്യണം” എന്റെ പിടിവാശിയിൽ ക്ഷണനേരം അശരീരിയ്ക്ക് തെറ്റിയോ? “ഒരേയൊരു ദിവസത്തേക്ക് നിനക്ക് ഓർമ്മ തരാം.ആ ഒരു ദിവസത്തെ ഓർമ്മ മാത്രം മരണം വരെ നിന്നിലുണ്ടാകും.” ഒരുദിവസത്തേക്കു കിട്ടിയ ഓർമ്മയുമായി ഞാനവന്റെ മാളത്തിലേക്ക് കുതിച്ചു. എവിടെ നിന്നോ ആ ഗന്ധം എന്റെ നാസികയിലേക്ക് തുളച്ചുകയറി. അതെ ശത്രുവിന്റെ മണം. ഞാൻ ചുറ്റും പരതി. കുറച്ചകലെ മണ്ണിൽ കളിച്ചുകൊണ്ടിരിക്കുന്ന ഒരു നാലു വയസ്സുകാരൻ.എന്റെ തലച്ചോറിലൂടെ അന്നത്തെ പ്രഭാതം ഓടിയെത്തി. അതെ ഇരക്കായി പരതിയ എന്നെ കല്ലെറിഞ്ഞവൻ. മറ്റൊന്നും ചിന്തിക്കാൻ സമയമുണ്ടായില്ല . പാഞ്ഞുചെന്ന് അവന്റെ കാലിൽ ആഞ്ഞുകടിച്ചു. അവന്റെ അലർച്ചയും, ഒപ്പം ആരുടെയോ കാൽപ്പെരുമാറ്റം അടുത്തെത്തിയതും തൊട്ടടുത്ത മാളത്തിലേക്ക് ഇഴഞ്ഞിറങ്ങി. “മോനെ…..” നെഞ്ചുപൊട്ടി അലറിവിളിക്കുന്ന അമ്മ “ഓടിവരണേ. മോന്റെ കാലിൽ ചോര.” ആറ്റുനോറ്റുകിട്ടിയ അവരുടെ പൊന്നോമനയെയാണോ ഞാൻ കടിച്ചുകീറി കൊന്നത്. എന്തൊരുവിധിയാണെന്റെ? പ്രതികാരബുദ്ധി കലർന്ന ഈ ഓർമ്മ എനിക്കിനി വേണ്ട . എനിക്ക് ഓർമ്മ തന്നവനെ എവിടെ നീ. അതെ നീ പറഞ്ഞതാണ് സത്യം. “അരണബുദ്ധിയാണ് എന്റെ അലങ്കാരം. എന്നിലെ ഓർമ്മ എന്റെ പ്രതികാരത്തിന്റെ മൂർച്ച കൂട്ടുമെങ്കിൽ, മറ്റൊരുവനെ കത്തിച്ചാമ്പലാക്കാൻ കെൽപുള്ളതെങ്കിൽ എനിക്കെന്റെ അരണബുദ്ധി മതി. അപരന്റെ കണ്ണീരുകലർന്ന സംഹാരതാണ്ഡവം വെറുക്കുന്നു ഞാൻ.” അവസാനിച്ചു . ഒരുനിമിഷം : ഇതൊരു സാങ്കല്പിക കഥ മാത്രം. “അരണ കടിച്ചാൽ ഉടൻ മരണം” ഇത് വെറുമൊരു ചൊല്ലുമാത്രമാണെന്നു ഒരുകൂട്ടർ വാദിക്കുമ്പോൾ, അരണയ്ക്ക് വിഷമുണ്ടെന്നും കടിക്കാൻ ചെല്ലുമ്പോഴേക്കും അത് മറന്നുപോകുന്നുവെന്നും മറ്റുചിലർ എതിരഭിപ്രായം പറയുന്നു . രചന : മൂർഖനെ പ്രണയിച്ചവൾ രചയിതാവ് : നിരഞ്ജൻ നിരഞ്ജൻ = കളങ്കമില്ലാത്തവൻ എന്റെ അച്ഛൻ കളങ്കമില്ലാത്തവനായിരുന്നു. അച്ഛന്റെ ഓരോ എഴുത്തുകളും വിചിത്രമായിരുന്നു. അച്ഛന്റെ ഗ്രന്ഥശാലയാണ് എന്റെ ആത്മീയപുര. എന്തിന്റെയും തുടക്കത്തിനുള്ള ഊർജ്ജം അവിടെനിന്നെനിക്ക് കിട്ടും. “ചാരൂ … മോളെ ചാരൂ … എവിടെയാ നീ? ഇറങ്ങാൻ സമയമായി.” അച്ഛൻ എഴുതിയ ചിത്രകഥയുടെ പുസ്തകം മടക്കിവയ്ക്കുമ്പോൾ അമ്മയുടെ വിളിയിലെ പതിവില്ലാത്ത സന്തോഷം ഞാൻ തിരിച്ചറിഞ്ഞു. ഞാനാദ്യമായി IPS യൂണിഫോം ധരിച്ചപ്പോളും അമ്മ ഇത്രേം സന്തോഷിച്ചു കണ്ടിട്ടില്ല. വർഷങ്ങൾക്കു മുൻപ് ജന്മനാട് വിട്ട് ഈ ഓണംകേറാമൂലയിൽ ആരും കാണാതെ പാർത്തത് അമ്മയുടെ അലങ്കാരമായ അരണബുദ്ധി. പാവങ്ങളുടെ വക്കീലായ എന്റെ അച്ഛനെ കുത്തിക്കീറിയിട്ട് , ‘ആളുമാറി കുത്തിയതാണ്’ എന്ന പേരിൽ രാഷ്ട്രീയത്തിന്റെയും പണത്തിന്റെയും സ്വാധീനത്താൽ വിലസ്സിയവനെ പേടിച്ചോടിയത്. ആ കൊട്ടേഷൻ ഗുണ്ടയുടെ കഴുകൻ കണ്ണിൽ നിന്നും എനിക്ക് സംരക്ഷണമായത് അമ്മയുടെ പ്രതികാരത്തിന്റെ ആദ്യപടി. IPS യൂണിഫോം ആദ്യമായി അണിഞ്ഞ ആ ദിവസം അമ്മയിലെ പ്രതികാരം ആളിക്കത്തിയത് ഞാനറിഞ്ഞു. രക്ഷപ്പെടാനുള്ള എല്ലാ പഴുതുകളും അടച്ചുകൊണ്ട് അച്ഛന്റെ ഘാതകനെ ഇന്ന് ഞാൻ വിലങ്ങണിയിക്കുന്ന നിമിഷം ….. മൂർഖന്റെ പത്നിയെപ്പോൽ ഞാനവന്റെ ശിരസ്സിൽ താണ്ഡവമാടും. എനിക്കുറപ്പുണ്ട് അതുകണ്ട് അച്ഛന്റെ ആത്മാവ് സന്തോഷിക്കും. ✍🏽 കണ്ണൂർകാരൻ ❤️❤️❤️❤️ #📔 കഥ #✍ തുടർക്കഥ #📙 നോവൽ #📚 ട്വിസ്റ്റ് കഥകൾ #💞 പ്രണയകഥകൾ