ଶୁଭ ତ୍ରିବେଣୀ ଅମାବାସ୍ୟା 🌺 ହରିହରବ୍ରହ୍ମବିରିଞ୍ଚିବନ୍ଦ୍ୟାଂ ବ୍ରହ୍ମାଗ୍ନିଜାଂ ତ୍ରିଜଗତ୍ସୁଧାତ୍ରୀଂ । ସୌଭାଗ୍ୟଦାଂ ଭକ୍ତଜନପ୍ରସନ୍ନାଂ ବିରଜାମ୍ବିକାଂ ଶରଣଂ ପ୍ରପଦ୍ୟେ ॥ ଅନନ୍ତକୋଟି ବ୍ରହ୍ମାଣ୍ଡସ୍ୱାମିନୀ, ପରମବ୍ରହ୍ମସ୍ୱରୂପିଣୀ, ହରି–ହର–ବିରିଞ୍ଚି ଜନନୀ ଆଦ୍ୟା ଭଗବତୀ ମା ବିରଜାଙ୍କ ପବିତ୍ର ସ୍ୱନକ୍ଷତ୍ର ଉତ୍ସବ ଅବସରରେ ଦିବ୍ୟ ଅଭିନନ୍ଦନ। ବାହାରିଶୀର୍ଷଂ ରବିନ୍ଦନିଭେନ ପାଦେନାକ୍ରମ୍ୟ ପାଣିକମଲେନ ଗୃହୀତପୁଚ୍ଛା । ଅନ୍ୟେନ ତତ୍କକୁଦଗାତ୍ରିଶିଖସ୍ୟ ମୂଲଂ ସଂଗୃହ୍ୟ ଭୂଷୟସି ମେଽହଃ ଗାର୍ହପତ୍ୟମ୍ ॥ ପୌରାଣିକ ମତାନୁସାରେ, ବେଦପତି ବ୍ରହ୍ମା ଅବିମୁକ୍ତ କ୍ଷେତ୍ର ଯାଜପୁରର ତିନି ଦିଗରେ ତିନିଟି ଶିବଲିଙ୍ଗ ସ୍ଥାପନ କରି, ପବିତ୍ର ବୈତରଣୀ ନଦୀତଟରେ ଏକ ମହାଯଜ୍ଞ ସମ୍ପାଦନ କରିଥିଲେ। ତ୍ରିବେଣୀ ଅମାବାସ୍ୟାର ପୁଣ୍ୟ ତିଥିରେ, ମଧ୍ୟାହ୍ନ କାଳେ ସେହି ଯଜ୍ଞର ଗାର୍ହପତ୍ୟ ଅଗ୍ନିକୁଣ୍ଡରୁ ଆଦ୍ୟା ଭଗବତୀ ମା ବିରଜା ଦ୍ୱିଭୁଜା ମହିଷମର୍ଦ୍ଦିନୀ ରୂପେ ପ୍ରକଟିତ ହୋଇଥିଲେ। “ତ୍ୱଂ ମାଂ ବିରଜସାଂ ନାମ୍ନା ମନ୍ୟସ୍ୱ କମଲୋଦ୍ଭବ । ପ୍ରସନ୍ନାଂ ଭବତେ କାମଂ ଜାନୀହି ଜଗତାଂ ପିତଃ ॥” ତଦନନ୍ତରେ ଦେବୀ ନିଜ ଆତ୍ମପରିଚୟ ଦେଇ ପିତାମହ ବ୍ରହ୍ମାଙ୍କୁ ବର ପ୍ରାର୍ଥନା କରିବାକୁ କହିଥିଲେ ଏବଂ ଘୋଷଣା କଲେ—ଏହି ଦିନଠାରୁ ସେ ‘ବିରଜା’ ନାମରେ ଜଗତରେ ବିଖ୍ୟାତ ହେବେ। ବେଦପତି ବିରିଞ୍ଚିଙ୍କ ଯଜ୍ଞାଗ୍ନିରୁ ଦେବୀଙ୍କ ଆବିର୍ଭାବ ହେତୁ ସେ ‘ଯଜ୍ଞଜା’ ଓ ‘ବିରଜା’ ନାମରେ ପରିଚିତ ହେଲେ। ପୁଣ୍ୟ ବୈତରଣୀ ତଟରେ ଅବସ୍ଥିତ ପଞ୍ଚ ‘ବ’ କାର କ୍ଷେତ୍ର ଯଯାତିନଗରୀ, ନାଭିକ୍ଷେତ୍ର ଭାବେ ମଧ୍ୟ ପ୍ରସିଦ୍ଧ। ବିରଜା, ବରାହ, ବେଦ, ବିପ୍ର ଓ ବୈତରଣୀ—ଏହି ପଞ୍ଚତତ୍ତ୍ୱ ଆଜି ମଧ୍ୟ ଏଠାରେ ସ୍ୱମହିମାରେ ବିରାଜିତ। ଦକ୍ଷଯଜ୍ଞ ତାଣ୍ଡବ ସମୟରେ ବ୍ରହ୍ମାଙ୍ଗ ଦେବୀଙ୍କ ନାଭି ଏଠାରେ ପତିତ ହୋଇଥିବାରୁ ଏହା ‘ନାଭିଗୟା’ ନାମରେ ପରିଚିତ। ମହାଭାରତ ସହିତ ବିଭିନ୍ନ ପୁରାଣରେ ଏହି କ୍ଷେତ୍ରର ମାହାତ୍ମ୍ୟ ବର୍ଣ୍ଣିତ। ସୃଷ୍ଟିର ଆଦିକାଳରେ ଦେବୀ ନିର୍ଗୁଣ ଓ ନିରାକାର ରୂପେ ଅବ୍ୟକ୍ତ ଥିଲେ; ସୃଷ୍ଟିର ପ୍ରକାଶ ସହିତ ଜଗତ୍କଲ୍ୟାଣାର୍ଥେ ମାତୃରୂପେ ଅବତୀର୍ଣ୍ଣ ହେଲେ। କପିଳ ପୁରାଣରେ ସ୍ପଷ୍ଟ ଘୋଷିତ— “ସାଧକାନାଂ ହିତାର୍ଥାୟ ବିରଜା ସା କଲୌ ସ୍ଥିତା ॥” ଅର୍ଥାତ୍, ଭକ୍ତ ଓ ସାଧକଙ୍କ କଲ୍ୟାଣାର୍ଥେ ଭଗବତୀ ବିରଜା କଳିଯୁଗରେ ମଧ୍ୟ ଏହି ମର୍ତ୍ତ୍ୟଲୋକରେ ବିରାଜମାନ। ପ୍ରଳୟ ଆସିଲେ ମଧ୍ୟ ସେ ଓଡ୍ର ମହାସାମ୍ରାଜ୍ୟ ପରିତ୍ୟାଗ କରିବେ ନାହିଁ। ସେ ଭକ୍ତପ୍ରିୟା, କରୁଣାମୟୀ ଓ ମଙ୍ଗଳମୟୀ—ସମଗ୍ର ଉତ୍କଳଭୂମିର ମହାସାମ୍ରାଜ୍ଞୀ। କ୍ଷେତ୍ରେଶ୍ୱରୀ ମା ବିରଜାଙ୍କୁ କେନ୍ଦ୍ର କରି ସମୟାନୁସାରେ ଏହି ସ୍ଥାନ ‘ବିରଜା’, ‘ବିରଜାକ୍ଷେତ୍ର’, ‘ବିରଜାପୀଠ’, ‘ବିରଜାନଗର’, ‘ବିରଜାମଣ୍ଡଳ’ ଆଦି ନାମରେ ପରିଚିତ। ପିତୃପୁରୁଷଙ୍କ ମୁକ୍ତି ଓ ତୃପ୍ତିର ବିଧାନ ଥିବାରୁ ଏହା ‘ପିତୃତୀର୍ଥ’ ଭାବେ ମଧ୍ୟ ସ୍ୱୀକୃତ, ଏବଂ ସେହି କାରଣରୁ ଏହା ‘ନାଭିଗୟା’ ନାମରେ ପ୍ରସିଦ୍ଧ। ପବିତ୍ର ସ୍ୱନକ୍ଷତ୍ର ତିଥିରେ ନିତ୍ୟକୃତ୍ୟ ପରେ ଦେବୀଙ୍କ ମହାସ୍ନାନ ସମ୍ପନ୍ନ ହୁଏ ଏବଂ ସେ ସାବିତ୍ରୀ ବେଶରେ ଦର୍ଶନ ଦିଅନ୍ତି। ଗାୟତ୍ରୀ ମନ୍ତ୍ରରେ ଦେବୀଙ୍କ ପୂଜା, ଜପ ଓ ଯଜ୍ଞାନୁଷ୍ଠାନ ସମ୍ପନ୍ନ ହୁଏ। “ବିରଜା ମା ମହାଦେବୀ ପରଂବ୍ରହ୍ମ ସ୍ୱରୂପିଣୀ । ଗାୟତ୍ରୀ ବେଦମାତା ଚ ଶବ୍ଦବ୍ରହ୍ମ ସ୍ୱରୂପିଣୀ ॥” ଦେବୀ ବେଦର ପରମତତ୍ତ୍ୱ ଓ ପରମମନ୍ତ୍ରକୁ ତନ୍ତ୍ରରୂପେ ବିସ୍ତାର କରି ତନ୍ତ୍ରଧର୍ମ, ସଂସ୍କୃତି ଓ ଦର୍ଶନରେ ଅଦ୍ୱିତୀୟ ସ୍ଥାନ ଅଧିକାର କରିଛନ୍ତି। ଗରୁଡ଼ ପୁରାଣ, ପଦ୍ମ ପୁରାଣ, ବ୍ରହ୍ମାଣ୍ଡ ପୁରାଣ, ବାୟୁ ପୁରାଣ, କପିଳ ସଂହିତା, ବ୍ୟାସଦେବଙ୍କ ମହାଭାରତ, ଶାରଳାଦାସଙ୍କ ଓଡ଼ିଆ ମହାଭାରତ, ଅବଧୂତ ଗୀତା, ବିରଜାକ୍ଷେତ୍ର ମାହାତ୍ମ୍ୟ ଇତ୍ୟାଦି ଗ୍ରନ୍ଥରେ ଏହି କ୍ଷେତ୍ରର ମହିମା ବର୍ଣ୍ଣିତ। ଅଥର୍ବବେଦରେ ମଧ୍ୟ ଦେବୀ ବିରଜାଙ୍କ ନାମ ଉଲ୍ଲେଖିତ। ଦେବୀ ବିରଜାଙ୍କୁ ସାବିତ୍ରୀ ବେଶରେ ଦର୍ଶନ କଲେ ବିଶେଷ କୃପା ମିଳେ। ଦେବୀଙ୍କ ଆଶୀର୍ବାଦରେ ସାଧକମାନେ ନିଜ ଇଚ୍ଛା ପୂରଣ କରନ୍ତି। ତାଙ୍କର କୃପାରେ ସମଗ୍ର ଜଗତର କଳ୍ୟାଣ ଘଟେ। ଅସୁର ମହିଷ ପରି ସମସ୍ତ ଅଶୁଭକୁ ନାଶ କରି ଦେବୀ ତ୍ରିଭୁବନରେ ଶୁଭ, ସଂତୋଷ ଓ କଳ୍ୟାଣ ପ୍ରସାର କରନ୍ତୁ। ଜୟତୁ ବିରଜା 🌺 #🚩ସନାତନ ଧର୍ମ💪 #Jay Maa