ਪੰਜਾਬ ਦੇ ਜ਼ਿਲ੍ਹਾ ਹੁਸ਼ਿਆਰਪੁਰ ਪਿੰਡ ਚਗਰਾਂ ਦੇ ਵਸਨੀਕ ਅਗਾਂਹਵਧੂ ਕਿਸਾਨ ਸ. ਸੁਰਜੀਤ ਸਿੰਘ ਚੱਗਰ ਨੂੰ 10 ਫਰਵਰੀ 2026 ਨੂੰ ਕਿਸਾਨ ਵਿਕਾਸ ਚੈਂਬਰ, ਮੋਹਾਲੀ ਵਿਖੇ ਰਾਜ ਪੱਧਰੀ ਪੁਰਸਕਾਰ ਸਮਾਰੋਹ ਵਿੱਚ ਫਾਰਮ ਐਂਡ ਫੂਡ ਮੀਡੀਆ, ਦਿੱਲੀ ਪ੍ਰੈਸ ਦੁਆਰਾ ਮਸ਼ੀਨੀਕਰਨ ਵਿੱਚ ਸਰਵੋਤਮ ਕਿਸਾਨ ਪੁਰਸਕਾਰ ਨਾਲ ਸਨਮਾਨਿਤ ਕੀਤਾ ਗਿਆ।ਸ. ਸੁਰਜੀਤ ਸਿੰਘ ਚੱਗਰ ਬਾਰੇ ਗੱਲ ਕਰੀਏ ਤਾਂ ਇਹ ਕਿਸਾਨ ਜ਼ਿਲ੍ਹਾ ਹੁਸ਼ਿਆਰਪੁਰ ਦੇ ਉਸ ਇਲਾਕੇ ਦੇ ਰਹਿਣ ਵਾਲੇ ਹਨ, ਜੋ ਪੰਜਾਬ ਦੇ ਉੱਤਰ-ਪੂਰਬ ਦਿਸ਼ਾ ਵਿੱਚ ਨੀਮ ਪਹਾੜੀ ਇਲਾਕਿਆਂ ਵਿੱਚ ਸਥਿਤ ਹੈ। ਇਸ ਇਲਾਕੇ ਦੀਆਂ ਮੁੱਖ ਸਮੱਸਿਆਵਾਂ ਹਨ: ਉੱਚੀ-ਨੀਵੀਂ ਅਤੇ ਢਾਲੂ ਜ਼ਮੀਨ ਜਿਸ ਨੂੰ ਕਿ ਚੋਆਂ ਕਈ ਥਾਵਾਂ 'ਤੇ ਕੱਟਦੀਆਂ ਹਨ, ਘੱਟ ਉਪਜਾਊ ਸ਼ਕਤੀ ਵਾਲੀ ਜ਼ਮੀਨ, ਬਰਾਨੀ ਖੇਤ ਅਤੇ ਮੀਂਹ ਕਰਕੇ ਹੋਣ ਵਾਲਾ ਭੂਮੀ ਕਟਾਅ ਆਦਿ।ਇਸ ਦੇ ਨਾਲ ਹੀ ਇਸ ਇਲਾਕੇ ਵਿੱਚ ਜੰਗਲੀ ਜਾਨਵਰ ਵੀ ਫਸਲਾਂ ਦਾ ਬਹੁਤ ਨੁਕਸਾਨ ਕਰਦੇ ਹਨ। ਇਨ੍ਹਾਂ ਸਮੱਸਿਆਵਾਂ ਦੇ ਦਰਪੇਸ਼ ਇਲਾਕੇ ਦੇ ਕੁਝ ਅਗਾਂਹਵਧੂ ਕਿਸਾਨ ਝੋਨੇ-ਕਣਕ ਦੇ ਫਸਲੀ ਚੱਕਰ ਨੂੰ ਛੱਡ ਕੇ ਫਸਲੀ ਵਿਭਿੰਨਤਾ ਅਤੇ ਕੁਦਰਤੀ ਸੋਮਿਆਂ ਦੀ ਸਾਂਭ-ਸੰਭਾਲ ਦੀਆਂ ਉੱਨਤ ਤਕਨੀਕਾਂ ਨੂੰ ਅਪਣਾ ਰਹੇ ਹਨ। ਸ. ਸੁਰਜੀਤ ਸਿੰਘ ਚੱਗਰ ਵੀ ਇੱਕ ਅਜਿਹੇ ਹੀ ਅਗਾਂਹਵਧੂ ਕਿਸਾਨ ਹਨ, ਜਿਨ੍ਹਾਂ ਨੇ ਖੇਤੀਬਾੜੀ ਦੇ ਖੇਤਰ ਵਿੱਚ ਬਹੁਤ ਮੱਲ੍ਹਾ ਮਾਰੀਆਂ ਹਨ।ਇਹ ਕਿਸਾਨ ਬਾਸਮਤੀ, ਮੱਕੀ, ਕਣਕ, ਦਾਲਾਂ, ਤੇਲਬੀਜ, ਸਬਜ਼ੀਆਂ ਅਤੇ ਪੋਪਲਰ ਦੀ ਸਫਲ ਕਾਸ਼ਤ ਕਰਦੇ ਹਨ। ਇਸ ਤੋਂ ਇਲਾਵਾ ਇਨ੍ਹਾਂ ਕੋਲ ਦੁਧਾਰੂ ਪਸ਼ੂ ਵੀ ਹਨ। ਇਸ ਉੱਦਮੀ ਕਿਸਾਨ ਨੇ ਹੱਥ ਨਾਲ ਚੱਲਣ ਵਾਲੀ ਮੱਕੀ ਦੀਆਂ ਛੱਲੀਆਂ ਦੀ ਗਹਾਈ ਦੀ ਮਸ਼ੀਨ ਬਣਾਈ ਹੈ। ਇਹ ਹੱਥ ਵਾਲੀ ਮਸ਼ੀਨ ਇੱਕ ਸਟੈਂਡ ਨਾਲ ਜੁੜੀ ਹੋਈ ਹੈ ਜਿਸ ਨਾਲ ਇਸਦੀ ਕੁਸ਼ਲਤਾ ਵੱਧ ਜਾਂਦੀ ਹੈ। ਇਸ ਮਸ਼ੀਨ ਨਾਲ ਛੱਲੀ ਤੋਂ ਮੱਕੀ ਦੇ ਦਾਣੇ ਅਸਾਨੀ ਨਾਲ ਵੱਖ ਹੋ ਜਾਂਦੇ ਹਨ। ਇਹ ਮਸ਼ੀਨ ਛੋਟੇ ਕਿਸਾਨਾਂ ਲਈ ਬਹੁਤ ਲਾਹੇਵੰਦ ਹੈ ਕਿਉਂਕਿ ਉਹ ਇਸ ਮਸ਼ੀਨ ਨਾਲ ਕੱਢੇ ਹੋਏ ਦਾਣੇ ਬਿਜਾਈ ਲਈ ਵਰਤੇ ਜਾ ਸਕਦੇ ਹਨ।ਮੱਕੀ ਤੋਂ ਇਲਾਵਾ ਇਸ ਮਸ਼ੀਨ ਨਾਲ ਸੂਰਜਮੁਖੀ ਅਤੇ ਆਲੂ ਦੀ ਬਿਜਾਈ ਵੀ ਕੀਤੀ ਜਾ ਸਕਦੀ ਹੈ। ਇਸ ਮਸ਼ੀਨ ਵਿੱਚ ਫਾਲੇ ਤੋਂ ਫਾਲੇ ਦਾ ਫਾਸਲਾ ਜਰੂਰਤ ਅਨੁਸਾਰ ਘਟਾਇਆ ਜਾਂ ਵਧਾਇਆ ਜਾ ਸਕਦਾ ਹੈ। ਇਸ ਮਸ਼ੀਨ ਨਾਲ ਸਮੇਂ ਅਤੇ ਲੇਬਰ ਦੀ ਬੱਚਤ ਹੁੰਦੀ ਹੈ। ਸ. ਚੱਗਰ ਨੇ ਇੱਕ ਦੋ-ਮੂੰਹੀ ਖੁਰਪਾ ਬਣਾਇਆ ਹੈ ਜਿਸ ਨਾਲ ਖੁਰਪੇ ਦੇ ਦੋਵੇਂ ਪਾਸਿਆਂ ਤੋਂ ਕੰਮ ਲਿਆ ਜਾ ਸਕਦਾ ਹੈ। ਇਸ ਖੁਰਪੇ ਨਾਲ ਖੜ੍ਹੇ ਹੋ ਕੇ ਅਸਾਨੀ ਨਾਲ ਕੰਮ ਕੀਤਾ ਜਾ ਸਕਦਾ ਹੈ, ਜਿਸ ਨਾਲ ਕਾਮੇ ਨੂੰ ਥਕਾਵਟ ਵੀ ਮਹਿਸੂਸ ਨਹੀਂ ਹੁੰਦੀ।ਸ. ਸੁਰਜੀਤ ਸਿੰਘ ਚੱਗਰ, ਸੋਮੇ ਬਚਾਊ ਤਕਨੀਕਾਂ ਜਿਵੇਂ ਕਿ ਪਾਣੀ ਦੀ ਯੋਗ ਵਰਤੋਂ ਲਈ ਕੰਪਿਊਟਰ/ਲੇਜ਼ਰ ਕਰਾਹਾ, ਯੂਰੀਆ ਦੀ ਯੋਗ ਵਰਤੋਂ ਲਈ ਪੱਤਾ ਰੰਗ ਚਾਰਟ ਅਤੇ ਭੂਮੀ ਪਰਖ ਰਾਹੀਂ ਖਾਦਾਂ ਦੀ ਸੁਚੱਜੀ ਵਰਤੋਂ ਕਰਦੇ ਹਨ। ਉਹ ਆਪਣੀਆਂ ਪਰਿਵਾਰਿਕ ਜਰੂਰਤਾਂ ਲਈ ਸਬਜ਼ੀਆਂ ਦੀ ਕਾਸ਼ਤ ਘਰੇਲੂ ਬਗੀਚੀ ਵਿੱਚ ਕਰਦੇ ਹਨ ਅਤੇ ਕੁਝ ਰਕਬੇ 'ਤੇ ਜੈਵਿਕ ਖੇਤੀ ਵੀ ਕਰਦੇ ਹਨ।#successmindset #ICAR #KVK #hoshiarpur #punjab #progressive #award #farmer #📑ਸ਼ੇਅਰਚੈਟ ਜਾਣਕਾਰੀ 📑