മടക്കം... ലാസ്റ്റ് part.... പത്ത് മിനിറ്റിനുള്ളിൽ ഞാൻ കയറിയ ടാക്സി മെഹ്ബുള്ള എത്തിയപ്പോൾ പന്ത്രണ്ടേ കാൽ. മൂന്നാം നിലയിലുള്ള റൂമിലോട്ട് ഞാൻ കുതിച്ചു പായുകയായിരുന്നു… റൂമിൽ കയറി ലഗ്ഗേജ് എടുത്തു ഞാൻ രണ്ടാം നിലയിലെത്തി. അവിടെയാണ് ക്യാമ്പ് ബോസ്സിന്റെ ഓഫീസ്. അങ്ങേരുടെ അടുത്ത് എന്റെ എടിഎം കാർഡ് കൊടുത്ത് നടന്നതെല്ലാം പറഞ്ഞു. പുള്ളി വാട്സ്ആപ്പ് നമ്പർ തന്നു ഇരുപത് ദിവസം കഴിയുമ്പോൾ അങ്ങേരെ വിളിച്ചു ഒന്നോർമ്മിപ്പിക്കാൻ നിർദേശിച്ചു. എല്ലാം സമ്മതം മൂളിക്കൊണ്ട് ഞാൻ അവിടെ നിന്നുമിറങ്ങി ഗ്രൗണ്ട് ഫ്ലോറിൽ എത്തി. തുടർന്നു റോഡിലും. ടാക്സി കാത്ത് നിന്ന എനിക്ക് ആ സമയം ഒരു ടാക്സിയും കിട്ടിയില്ല… തിരക്ക് പിടിച്ചുള്ള ആ നിമിഷങ്ങളിൽ എനിക്കെന്റെ വിയർപ്പ് നാറുന്ന ഡ്രസ്സ്‌ മാറാനോ ഒന്ന് മുഖം കഴുകുവാനോ സമയം കിട്ടിയില്ല. എങ്ങനെയെങ്കിലും ഒന്നര ആവുമ്പോൾ എയർപോർട്ടിൽ എത്തി ചെക്ക് ഇൻ ചെയ്യണമെന്ന് മാത്രമായിരുന്നു മനസ്സിൽ… അല്പനിമിഷങ്ങളുടെ കാത്ത് നിൽപ്പിനു ശേഷം ഞാൻ കണ്ടു കെ പി ടി സി യുടെ (കുവൈറ്റ്‌ പബ്ലിക് ട്രാൻസ്‌പോർട് കോര്പറേഷൻ ) എയർപോർട്ട് ബസ് വരുന്നു… കൈ കാണിച്ചു ആ ബസിൽ ലഗ്ഗേജ് ഒക്കെ കയറ്റി അതിലെ ഒരു സീറ്റിൽ ഇരിക്കുമ്പോൾ സമയം പന്ത്രണ്ട് മുക്കാൽ. ബസിൽ ഡ്രൈവറെയും എന്നെയും കൂടാതെ ഒരു മനുഷ്യജീവി വേറെ ഇല്ല… ഒരു തമിഴ് അണ്ണനാണ് ഡ്രൈവർ.. അണ്ണൻ പലതും ചോദിച്ചെങ്കിലും അതിനൊക്കെ ഞാൻ അലക്ഷ്യമായ മറുപടി നൽകിയതേ ഉള്ളൂ… അല്പനേരത്തെ യാത്രയ്ക്ക് ശേഷം ബസ് കുവൈറ്റ്‌ എയർപോർട്ടിൽ എത്തുമ്പോൾ സമയം ഏകദേശം 1.20. ആ ബസ് അവിടെ എത്തുന്ന വരെ യാത്രക്കാരനായി അതിൽ ഞാൻ മാത്രം… ബസിൽ നിന്നിറങ്ങി ലഗ്ഗേജ് ട്രോള്ളിയിൽ ലഗ്ഗേജ് കയറ്റി എനിയ്ക്ക് പോകേണ്ട എയർ ഇന്ത്യ എക്സ്പ്രസിന്റെ ചെക്ക് ഇൻ കൌണ്ടറിലേക്ക് ബോർഡിങ് പാസ്സിനായി ഞാൻ നീങ്ങി… എന്തോ ഭാഗ്യത്തിന് ക്യു ഉണ്ടായിരുന്നില്ല. കാലിയായി കിടക്കുന്ന കൌണ്ടറിലേക്ക് ഞാൻ ചെന്നു. ലഗ്ഗേജ് തൂക്കി നോക്കിയപ്പോൾ അടുത്ത പുലിവാല്… എന്റെ ലഗ്ഗേജിനു അനുവദനീയമായതിലും കൂടുതൽ തൂക്കം. മധ്യവയസ്ക്കനായ സ്റ്റാഫ്‌ എന്നെയൊന്നു നോക്കി. ഓവർ വെയ്റ്റ് ആണ് എക്സ്ട്രാ ചാർജ് അടക്കണം അത് 22 ദിനാർ എന്നും പറഞ്ഞു. വേണമെങ്കിൽ കടത്തി വിടാവുന്നതേ ഉള്ളൂ അവർക്ക്. ഇതിന് മുമ്പ് നാട്ടിൽ ലീവിന് പോയപ്പോൾ എതിഹാദിൽ ആയിരുന്നു പോയത്. ഇതിലും കൂടുതൽ ഉണ്ടായിട്ടും അവരന്ന് അഡ്ജസ്റ്റ് ചെയ്തിരുന്നു. അന്ന് കേന്ദ്ര സർക്കാർ സ്ഥാപനമായ അഴിമതിയിൽ കുളിച്ചിരിക്കുന്ന എയർ ഇന്ത്യയിൽ നിന്നും അത് പ്രതീക്ഷിക്കാനെ പാടില്ല… 22 ദിനാർ കൂടുതലാണ് ഒന്ന് അഡ്ജസ്റ്റ് ചെയ്യാൻ അയാളോട് ഞാനപേക്ഷിച്ചു. അയാൾ ഒന്നിനും അടുക്കുന്നില്ല. നിരന്തരമായ അഭ്യർത്ഥനയിൽ ഒടുവിൽ ഒരു പോംവഴി പറഞ്ഞു. അതെന്താണെന്ന് അറിയാൻ ഞാനെന്റെ കർണ്ണങ്ങൾ കൂർപ്പിച്ചു നിന്നു… “എനിക്കും നിനക്കും ഫേവറബിൾ ആയൊരു ഓപ്ഷൻ ഞാൻ പറയാം. നീ ഇരുപത്തിരണ്ട് ദിനാർ തരേണ്ട പകരം പത്ത് ദിനാർ നീ അടച്ചാൽ നിന്റെ ലഗ്ഗേജ് ഞാൻ കടത്തി തരാം..എന്താ സമ്മതമാണോ”... ഒരു പുഞ്ചിരിയോടെ അയാളാ നിർദേശം എന്റെ മുന്നിലേക്ക് വയ്ക്കുമ്പോൾ വർഷങ്ങൾക്ക് മുമ്പുള്ള ഒരു ചാനലിലെ മുകേഷിന്റെ ഡീൽ ഓർ നോ ഡീൽ പ്രോഗ്രാം ആണെനിക്ക് ഓർമ്മയിൽ വന്നത്… പത്ത് ദിനാർ (അന്നത്തെ റേറ്റ് അനുസരിച്ചു ഏകദേശം 2300 രൂപ ) എങ്കിൽ പത്ത് ദിനാർ. ഗത്യന്തരമില്ലാതെ അടയ്ക്കാമെന്ന് സമ്മതിച്ചു ഞാനയാൾക്ക് നേരെ ഇരുപത് ദിനാറിന്റെ ഒരു നോട്ടെടുത്ത് നീട്ടി… അപ്പോൾ അടുത്ത പ്രശ്നം അയാളുടെ കൈയിൽ ബാലൻസ് തരാൻ ചേഞ്ച്‌ ഇല്ല പോലും. എടിഎമ്മിൽ നിന്നും ക്യാഷ് വലിച്ചപ്പോൾ എനിയ്ക്ക് കിട്ടിയത് മുഴുവൻ ഇരുപത് ദിനാറിന്റെ നോട്ട് ആയിരുന്നു. അതിൽ കുറഞ്ഞതൊക്കെ ടാക്സിയിലും ബസിലുമൊക്കെയായി കൊടുത്തതിനാൽ തീർന്നു പോയിരുന്നു…. ഇതികർത്തവ്യമൂഢനായി നിൽക്കുമ്പോൾ അതിനും അയാളെനിക്കൊരു പോം വഴി നിർദേശിച്ചു. കുറച്ചപ്പുറമുള്ള മണി എക്സ്ചേഞ്ച് ഇൽ പോയി ചേഞ്ച്‌ കൊണ്ട് വരാൻ പറഞ്ഞു. അയാൾ പറഞ്ഞത് പോലെ ഞാൻ അവിടെ പോയി ചേഞ്ച്‌മായി തിരികെ വന്നു… അയാൾ സ്ലിപ്പിൽ രണ്ട് ദിനാർ ആണെഴുതിയത്. അത്രയ്ക്കുള്ളതേ ഉണ്ടായിരുന്നുള്ളൂ യഥാർത്ഥത്തിൽ കൂടുതലുള്ള എന്റെ ലഗ്ഗേജ് ന്റെ വെയ്റ്റ്. ബാക്കി എട്ട് ദിനാർ അതായത് നാട്ടിലെ ആയിരത്തി എഴുന്നൂറോളം രൂപ കൗണ്ടറിൽ ഇരിക്കുന്ന മഹാന്റെ പോക്കറ്റിൽ.. 😎 ബോര്ഡിങ്ങ് പാസ്സ് വാങ്ങി കസ്റ്റമ്സ് ന്റെ ക്ലീറൻസ് ഒക്കെ കഴിഞ്ഞു ഉള്ളിൽ കയറി ആദ്യം കണ്ട ബരിസ്തായുടെ ഔട്ലെറ്റിൽ കയറി ഒരു ക്യാപ്പുചിനോ വാങ്ങി അതും മൊത്തി കൂടെ വാങ്ങിയ സാൻഡ് വിച്ചും കഴിച്ചതിന് ശേഷം ഞാൻ ലോഞ്ചിലേക്ക് നടന്നു… അന്നത്തെ ദിവസം ഏഴു മണിയ്ക്ക് താമസിക്കുന്ന ബിൽഡിംഗ്‌ ന്റെ താഴെയുള്ള മലയാളി ബക്കാലയിൽ നിന്നുമൊരു ചായയും പരിപ്പുവടയും കഴിച്ചതിനു ശേഷം എന്തെങ്കിലും ഒന്ന് കഴിക്കുന്നത് ഇപ്പോഴാണ്… മൂന്ന് മണിയോടെ ഫ്ലൈറ്റിലേക്കുള്ള കോൾ വന്നു. വൈകാതെ കേരളീയർ കെ എസ് ആർ ടി സി എന്ന് വിളിക്കുന്ന എയർ ഇന്ത്യ എക്സ്പ്രസിൽ കയറി ഞാനെന്റെ സീറ്റിൽ ഇരുന്നു…അല്പ സമയത്തിനകം ഫ്ലൈറ്റ് കുവൈറ്റിന്റെ മണ്ണിൽ നിന്നും പറന്നുയർന്നു… രണ്ടര വർഷത്തെ കുവൈറ്റ്‌ ജീവിതത്തോട് അങ്ങനെ വിട…. കെ എസ് ആർ ടി സി എന്ന് വിളിക്കുന്ന എയർ ഇന്ത്യ എക്സ്പ്രസിൽ നാലര മണിക്കൂർ യാത്ര ചെയ്ത് ഞാൻ കരിപ്പൂർ എയർപോർട്ടിൽ എത്തി. എയർ ഇന്ത്യ എക്സ്പ്രസിനെ കുറിച്ച് എല്ലാവരും പറയുന്ന പ്രശ്നങ്ങൾ ഒന്നും എനിക്ക് അനുഭവപ്പെട്ടില്ല. ഞാൻ കയറിയ ഫ്ലൈറ്റ് കുഴപ്പമില്ലാത്തത് കൊണ്ടാവും… കരിപ്പൂർ എയർപോർട്ടിൽ ഇറങ്ങി ലഗ്ഗേജ് എടുത്ത് കസ്റ്റമ്സ് ചെക്കിങ്ങിനായി ക്യുവിൽ നിന്നു. എന്റെ കോലം കണ്ടത് കൊണ്ടാണോ ആവോ എന്നെ സ്കാനെറിലൂടെ രണ്ട് തവണ നടത്തിച്ചു. ആദ്യം ഷൂ ധരിച്ചു കൊണ്ടായിരുന്നെങ്കിൽ രണ്ടാമത്തെ തവണ ഷൂ അഴിപ്പിച്ചു കൊണ്ടായിരുന്നു. അതും പോരാതെ ഷൂവിന്റെ ഉള്ളിലും കസ്റ്റമ്സ്ക്കാരുടെ വിശദപരിശോധന….😪 എല്ലാ നടപടിക്രമങ്ങളും കഴിഞ്ഞ് പുറത്തെന്നെയും കാത്ത് നിൽക്കുന്ന നേരത്തെ പറഞ്ഞേൽപ്പിച്ച വണ്ടിയിൽ കയറി നാല്പതോളം കിലോമീറ്റർ അപ്പുറമുള്ള എന്റെ വീട്ടിൽ എത്തുമ്പോൾ സമയം രാത്രി പന്ത്രണ്ടര. എയർപോർട്ടിൽ പത്ത് മണിയോടെ ഇറങ്ങിയെങ്കിലും കസ്റ്റമ്സ് ചെക്കിങ് നന്നായി വൈകിപ്പിച്ചിരുന്നു… വീട്ടിൽ വന്നിറങ്ങിയ എന്റെ കോലം കണ്ട് മാതാശ്രീയും വാമഭാഗവും മിഴിച്ചു നിൽക്കുന്നത് ഞാൻ ശ്രദ്ധിച്ചു… വണ്ടിയെ പറഞ്ഞയച്ചു വീട്ടിൽ കയറി കുളിച്ചു ഫ്രഷായി ഭക്ഷണം കഴിക്കുവാൻ ഇരിക്കുമ്പോൾ വാമഭാഗം എന്നോട് മൊഴിഞ്ഞു… ഗൾഫിൽ നിന്നും ആളുകൾ വരുമ്പോൾ സാധാരണ നല്ല ടിപ്പ്റ്റോപ്പിൽ ഒക്കെ വരുന്നതേ കണ്ടിട്ടുള്ളൂ. പക്ഷേ ഒരാൾ ഗൾഫിൽ നിന്നും ഇത്രയ്ക്ക് കൂതറ ലുക്കിൽ വരുന്നത് ജീവിതത്തിൽ ആദ്യമായ് കാണുകയാണെന്ന്…😪 അവളെ പറഞ്ഞിട്ട് കാര്യമില്ല…പാറി പറന്ന് അലങ്കോലമായി കിടക്കുന്ന മുടിയും വിയർപ്പ് നാറുന്ന വസ്ത്രങ്ങളും പൊടി പിടിച്ച ജീൻസും ഒക്കെ ധരിച്ചു വരുന്ന ഗൾഫിൽ നിന്നും വരുന്നവരെ കാണാൻ ഒരിക്കലും പറ്റില്ല. ലീവിന് പോയപ്പോൾ പോലും പണ്ടത്തെ ഗൾഫ്കാരെ പോലെ കൂളിംഗ് ഗ്ലാസ്സ് ഒന്നും ഇട്ടില്ലെങ്കിലും നല്ല രീതിയിൽ ആയിരുന്നു വന്നിരുന്നത്… അവളോടും മാതാശ്രീയോടും ഈ കോലത്തിലെങ്കിലും ഈ ദിവസം വന്നെത്തിച്ചേരാൻ ഞാൻ അനുഭവിച്ചതെല്ലാം അങ്ങട് വിവരിച്ചു. എല്ലാമൊരു അമ്പരപ്പോടെ ഇരുവരും അത് കേട്ട് നിന്നു… ഇരുപത്തി നാല് മണിക്കൂറിനുള്ളിൽ അനുഭവിച്ച മാനസിക സംഘർഷങ്ങളും നടന്ന സംഭവങ്ങളും എല്ലാം മറന്ന് വാമഭാഗം വിളമ്പിയ ഭക്ഷണം കഴിയ്ക്കുമ്പോഴും പ്രണയപുരസരം വാമഭാഗം തന്റെ കുവലയദലകരാംഗുലികളാലേകിയ പരിലാളനകൾ ശിരസിലേറ്റ് വാങ്ങുമ്പോഴും ഈ ദിവസം തന്നെ സ്വന്തം വീട്ടിലെത്താൻ കഴിഞ്ഞതിന് അവസരമൊരുക്കിയ നീലനയനവദനയായ മുനീറയെന്ന സുന്ദരിയേയും പേരറിയാത്ത ആ മാനേജറെയും ഞാൻ നന്ദിയോടെ ഓർത്തു….🙂 ശുഭം.... #✍ തുടർക്കഥ #📔 കഥ #📚 ട്വിസ്റ്റ് കഥകൾ #💞 പ്രണയകഥകൾ #📙 നോവൽ