❤️*1942-A Love Story*❤️ പാർട്ട്‌ - 30 കല്യാണതലേന്ന്‌.... രാവിലെ ഷാഹിദ നച്ചുവിനെ വിളിച്ചുണർത്തി. തലേന്ന് കൈയിൽ അണിഞ്ഞ മൈലാഞ്ചി ഉണങ്ങി അതിന്റെ തരികൾ ബെഡ്ഷീറ്റിൽ എങ്ങും ആയിട്ടുണ്ട്. ഷാഹിദ അവളെ എഴുന്നേൽപ്പിച്ചു ബെഡ്ഷീറ്റ് എടുത്ത് വെളിയിൽ കൊണ്ട് പോയി തട്ടിക്കുടഞ്ഞു വൃത്തിയാക്കി. അപ്പച്ചി നച്ചുവിന്റെ കയ്യിലും കാലിലും എണ്ണപുരട്ടി പതിയെ ഉണങ്ങിയ മൈലാഞ്ചി മുഴുവൻ അടർത്തിയെടുത്തു. കൈകൾ പട്ടുപോലെ ചുവന്നിരിക്കുന്നു. അവളുടെ വെളുത്ത കൈകാലുകൾ ആ മൈലാഞ്ചി ചുവപ്പിൽ ഒന്ന് കൂടി ഭംഗിയായിട്ടുണ്ട്. നമസ്കാരം കഴിഞ്ഞു നച്ചു ഹാളിലേക്ക് വന്നു. എല്ലാവരും പുതിയ പെണ്ണെന്ന പരിഗണനയോടെ അവളെ സ്നേഹ പ്രകടനങ്ങൾ കൊണ്ടു മൂടി. വാപ്പുമ്മയും വല്ലീമയും അവളെ അടുത്തു പിടിച്ചു ഇരുത്തി മൈലാഞ്ചി കൈകൾ നോക്കി ചിരിച്ചു. ഷാഹിദയുടെയും ജമാലിന്റെയും സഹോദങ്ങളും അവരുടെ കുടുംബവും ചേർന്നപ്പോൾ തന്നെ വീട് നിറയെ ആളുകൾ ആയി. എല്ലാവരും കളിചിരിയും വാർത്തമാനവും ആയി ഒരു കല്യാണവീടിന്റെ ആരവം അവിടെ നിറഞ്ഞു.രാവിലെയും ഉച്ചക്കും എല്ലാം കാറ്ററിംഗ് ഏല്പിച്ചവർ കൃത്യമായി ഭക്ഷണം എത്തിച്ചു.രാവിലെ അരി പത്തിരിയും ചിക്കൻ കുറുമയും ഉച്ചക്ക് നെയ്ച്ചോറും ഇറച്ചിക്കറിയും എല്ലാവർക്കും വിളമ്പി. അയൽവീട്ടുകാരും വന്നു കഴിച്ചു. ഫൈസിയുടെ വീട്ടിൽ നിന്നു ആരും വന്നില്ല. എങ്കിലും ഷാഹിദ എല്ലാത്തിന്റെയും പങ്ക് അങ്ങോട്ട് കൊടുത്തയച്ചു. മനസ്സിൽ വിഷമം ഉണ്ടേലും കൊടുത്തയച്ച ഭക്ഷണം നസീമ മടക്കിയില്ല. വൈകിട്ട് വെള്ളയിൽ സ്റ്റോൺ വർക്ക്‌ ചെയ്ത ലാച്ചയും അതിനു ചേരുന്ന പേളിന്റെ ഹെവി സെറ്റും അണിയിച്ചു നച്ചുവിനെ ബ്യൂട്ടീഷ്യൻ സുന്ദരിയാക്കി. ഒരുങ്ങിയിറങ്ങിയ നച്ചുവിനെ എല്ലാവരും കണ്ണ് എടുക്കാതെ നോക്കി നിന്നു.ഒരു മാലാഖയെപോലെ അവൾ സുന്ദരിയായിരുന്നു. 4:30 യോട് കൂടി ഓഡിറ്റോറിയത്തിലേക്ക് എല്ലാവരും ഇറങ്ങി.10 മിനിറ്റിനുള്ളിൽ എല്ലാവരും അവിടെ എത്തിച്ചേർന്നു. 5 മണിയോട് കൂടി അതിഥികൾ എത്തി തുടങ്ങി. എല്ലാവരും പൂകളാൽ അലങ്കരിച്ച സ്റ്റേജിൽ ഇരിക്കുന്ന നച്ചുവിനെ കണ്ണിമ ചിമ്മാതെ നോക്കിയിരുന്നു. വീഡിയോ ഫോട്ടോ ഗ്രാഫർസ് അവളും ബന്ധുക്കളും ചേർന്ന് നിൽക്കുന്നതെല്ലാം പകർത്തുന്നുണ്ടായിരുന്നു. സുറുമിയും കുടുംബവും എത്തി. വേറെ കൂട്ടുകാരെ ആരെയും അവൾ ക്ഷണിച്ചിരുന്നില്ല അങ്ങനെയുള്ള ഒരു മാനസികാവസ്ഥയിൽ ആയിരുന്നില്ലല്ലോ അവൾ.സുറുമി അവളുടെ അടുക്കൽ തന്നെ ഉണ്ടായിരുന്നു. നച്ചുവിനും അവളുടെ സാമീപ്യം ആശ്വാസമായിരുന്നു. ബുക്ക്‌ ചെയ്ത ഒപ്പന ഗ്രൂപ്പിന്റെ ഒപ്പനയും പിന്നേ ഗാനമേളയും എല്ലാം അതിഥികൾ ആസ്വദിച്ചു. ഓഡിറ്റോറിയത്തിന്റെ ഗേറ്റ് മുതൽ പല വർണങ്ങളിൽ സ്ട്രിങ് ലൈട്സ് കൊണ്ടു മനോഹരമാക്കിയിരുന്നു. പിന്നേ വിവിധതരം ഭക്ഷണം നിരത്തിയ ഫുഡ്‌ കൌണ്ടറുകളിൽ അതിഥികൾക്കായി ഭക്ഷണം വിളമ്പി.എല്ലാവരും ആ മൈലാഞ്ചി രാത്രി ശരിക്കും ആഘോഷിച്ചു. അതിനിടയിൽ നച്ചുവിന്റെ കണ്ണിലെ നോവൊന്നും ആരും ശ്രദ്ധിച്ചത് പോലുമില്ല. എല്ലാം കഴിഞ്ഞു രാത്രി 10 മണിയോടെ നച്ചുവിനെയും ഷാഹിദയെയും ഒക്കെ നിഹാൽ വീട്ടിലേക്കു കൊണ്ടു പോയി. ഡ്രസ്സ്‌ ഒക്കെ മാറ്റി നച്ചു ബാത്‌റൂമിലേക്ക് ഫ്രഷ് ആകാനായിപോയി. അത് വരെ പിടിച്ചു നിർത്തിയ സങ്കടം അവൾ ബാത്‌റൂമിൽ ഒഴുക്കി കളഞ്ഞു. അവളുടെ കരച്ചിലിന്റ ശബ്ദം വെള്ളം വീഴുന്ന ശബ്ദത്തിൽ മുങ്ങിപ്പോയി. എല്ലാം കഴിഞ്ഞു അവൾ റൂമിൽ വന്നു കിടന്നു. കുറച്ചു കഴിഞ്ഞു അവളുടെ നെറ്റിയിൽ തടകുന്ന കൈകൾ അവൾ തിരിച്ചറിഞ്ഞു. ഉമ്മയുടെ സാമീപ്യം മനസ്സിലായത് പോലെ അവൾ തല ചെരിച്ചു നോക്കി. ചുവന്നു വീങ്ങിയ നച്ചുവിന്റെ മുഖം കണ്ടു ഷാഹിദയുടെ ഉള്ളം വിങ്ങി. അവളുടെ അടുത്തേക്കിരുന്നു അവളുടെ തലയിൽ തഴുകി.. " മോളേ... എല്ലാം മറക്കാൻ സമയെടുക്കുമെന്ന് ഉമ്മിക്കറിയാം. മറക്കാൻ മോൾ ശ്രമിക്കണം. ആത്മാർഥമായി. നാളെ മുതൽ നീ ഒരു ഭാര്യയാവും. ഭാര്യ എന്നത് ഒരു ചെറിയ വാക്കാണ്. പക്ഷെ അതിന്റെ വലുപ്പം മോൾക്ക് ആ റോളിൽ ജീവിച്ചു തുടങ്ങുമ്പോഴെ മനസിലാകൂ. ഒരു കുടുംബം ചേർത്തു വെക്കാനും തല്ലിപ്പിരിക്കാനും ഒരു പെണ്ണ് വിചാരിച്ചാൽ സാധിക്കും. മോളുടെ സംസാരമോ പ്രവൃത്തിയോ കൊണ്ടോ ഒരിക്കലും സമീറോ അവന്റെ കുടുംബമോ പ്രയാസപ്പെടാൻ അവസരം ഉണ്ടാക്കരുത്.ഇനി നിന്റെ ലോകം സമീർ ആയിരിക്കണം. സ്നേഹം കൊണ്ടു മാത്രമേ നല്ലൊരു കുടുംബം കെട്ടിപ്പെടുക്കാൻ സാധിക്കൂ. സ്നേഹം കൊടുത്താലേ അത് തിരിച്ചും കിട്ടൂ.ഭർത്താവും ഭാര്യയും തമ്മിൽ ഒരു നല്ല സുഹൃത്ബന്ധം ഉണ്ടാവണം. എന്തും തുറന്നു പറയാവുന്ന രീതിയിൽ ആ ബന്ധം വളർത്തിയെടുക്കണം. എന്റെ മോൾക്ക് അതിനൊക്കെ സാധിക്കും. ഉമ്മിയുടെ മോൾക്ക് പടച്ചവൻ എന്നും നല്ലതേ വരുത്തൂ... അത് പറയുമ്പോൾ ഷാഹിദയുടെ സ്വരം ഇടറി. നച്ചു ഷാഹിദയുടെ മടിയിലേക്ക് തല ഉയർത്തി വെച്ചു. അവളുടെ കണ്ണുനീർ ആ മടിയിലേക്ക് ഊർന്നു വീണു. ഇത് കണ്ടു കൊണ്ടു ജമാലും നിഹാലും നബീലും അകത്തേക്ക് വന്നു. എല്ലാവരുടെയും മുഖത്ത് അവളെ പിരിയുന്നതിന്റെ വിഷമം എടുത്തറിയാം. ഈ വിരഹം അനിവാര്യമായതാണല്ലോ... ✳️✳️✳️✳️✳️✳️ കല്യാണം.... രാവിലെ തന്നെ നച്ചുവിനെ അപ്പച്ചി വിളിച്ചുണർത്തി. കുളിയും പ്രാർത്ഥനയും കഴിഞ്ഞപ്പോൾ തന്നെ ബ്രെക്ക്ഫസ്റ് അപ്പച്ചി തന്നെ അവൾക്കു വാരിക്കൊടുത്തു. 7.30 ആയപ്പോൾ തന്നെ ബ്യൂട്ടിഷൻ വന്നു. സാരിയും ഷാളും മുല്ലപ്പൂവും ആഭരണങ്ങളും മറ്റു അക്സസറീസും അവരുടെ മുൻപിൽ നിരന്നു. ഓർണമെൻറ്സ് എല്ലാം ഉള്ളത് കൊണ്ടു അപ്പച്ചിയും കൂടെ തന്നെ നിന്നു. അപ്പച്ചി അത്യാവശ്യം ഡ്രെസ്സ് സെൻസ് ഒക്കെ ഉള്ള ആളാണ്. അത്കൊണ്ടു ഷാഹിദ അതിന്റെ ഉത്തരവാദിത്തം പൂർണമായും അപ്പച്ചിയെ ഏല്പിച്ചു. ഡാർക്ക്‌ റെഡ് കാഞ്ജീവരം പട്ടുസാരി നച്ചുവിന് നന്നായി ഇണങ്ങുന്നുണ്ട്. അവളുടെ ഇടതൂർന്ന മുടിയിൽ മുല്ലപ്പൂ ചൂടി ഭംഗിയാക്കി. മുഖത്തു മിനിമൽ മേക്കപ്പ് മതി എന്ന് പറഞ്ഞിരുന്നു നച്ചുവിന്റെ ഭംഗിയുള്ള കണ്ണുകൾ ഹൈലൈറ്റ് ചെയ്തു. ആഭരണങ്ങൾ ഭംഗിയിൽ അറേൻജ് ചെയ്തു. അവസാനം നെറ്റിച്ചുട്ടിയും എംബ്രോയ്‌ഡറി ചെയ്ത സിൽക്ക് ഷാളും ഫിറ്റ്‌ ചെയ്തു അവളുടെ ഒരുക്കം പൂർണമായി. ഒരുക്കിയ ബ്യൂട്ടീഷ്യന്റെ മുഖത്ത് സംതൃപ്തി നിറഞ്ഞു. കണ്ടു നിന്ന അപ്പച്ചിയും അവളെ നോക്കി പുഞ്ചിരിച്ചു. മുറിയിൽ നിന്നു അവൾ പുറത്തു വന്നപ്പോൾ ജമാലും ഷാഹിദയും നിഹാലും നബീലും അവളെ കണ്ണു നിറഞ്ഞു നോക്കി നിന്നു. അവളെ ഒരു പുതുപ്പെണ്ണിന്റെ വേഷത്തിൽ കണ്ട അവരുടെ മുഖത്ത് അഭിമാനവും സന്തോഷവും നിറഞ്ഞു. ഉമ്മുമ്മമാർ അവൾക്കു വേണ്ടി പ്രാർത്ഥിച്ചു. 10 മണിയായി. ഓഡിറ്റോറിയത്തിലേക്കു പോകാൻ സമയമായി. വീടിനു പുറത്തേക്കു ജമാൽ അവളുടെ കയ്യും പിടിച്ചു ഇറങ്ങി. ഒരു നിമിഷം അവളുടെ നോട്ടം ഫൈസിയുടെ വീട്ടിലേക്കു ആയി. വാപ്പീ. ഞാൻ ആന്റിയെ കണ്ടിട്ട് വരാം.. ജമാൽ എതിർപ്പ് ഒന്നും പറഞ്ഞില്ല. നച്ചു വിവാഹ വേഷത്തിൽ അങ്ങോട്ട് നടന്നു. കൂടെ ഷാഹിദയും. നച്ചുവിനെ കണ്ടു നസീമയും റമീസായും ഫാത്തിമയും ഇറങ്ങി വന്നു. നസീമ അവളെ അടിമുടി നോക്കി മനസ്‌ നിറഞ്ഞു ചിരിച്ചു. അവളുടെ കവിളിൽ ഉമ്മ വെച്ചു. " മോളെ ഈ വേഷത്തിൽ കാണണം എന്നാഗ്രഹമുണ്ടായിരുന്നു. പക്ഷേ അങ്ങോട്ട് വരാൻ തോന്നിയില്ല.. എന്നാലും മോള് വന്നല്ലോ... ഫാത്തിയും റമീസയും അവളെ നോക്കി ചിരിച്ചു അവളുടെ കൈകളിൽ പിടിച്ചു. " ദുആ ചെയ്യണേ ആൻറ്റീ അത് പറയുമ്പോൾ അവളുടെ കണ്ണുകൾ നിറഞ്ഞു. സ്വരം ചിലമ്പിച്ചു. സന്തോഷമായിട്ട് പോ മോളേ... മോൾക്ക് നല്ലതെ വരൂ... യാത്ര ചോദിച്ചു അവൾ നേരെ നോക്കി. ഫൈസിയുടെ ബൈക്ക് അവിടെ ഇരിപ്പുണ്ട്. അതിലേക്കൊന്നു നോക്കി അവൾ കണ്ണടച്ച് തിരിഞ്ഞു നടന്നു. നച്ചു കാറിലേക്ക് കയറിയിരുന്നു. കൂടെ ഷാഹിദയും അപ്പച്ചിയും. ഓഡിറ്റോറിയത്തിൽ അതിഥികൾ നിറഞ്ഞു. ജമാലും നിഹാലും നബീലും അഥിതികളോട് സംസാരിച്ചു. സ്ത്രീകളെ ഷാഹിദയും മറ്റും സ്നേഹത്തോടെ സ്വീകരിച്ചു. സ്റ്റേജിനു അടുത്തുള്ള മുറിയിൽ നച്ചുവിനോടൊപ്പം സുറുമിയും അനിയത്തിയും മറ്റ് കസിൻസും നിന്നു. 11.30 ഓട് കൂടി ചെറുക്കനും കൂട്ടരും എത്തിയെന്നു ആരോ പറഞ്ഞത് കേട്ട് നച്ചുവിന്റെ നെഞ്ചിടിപ്പ് ഉയർന്നു. സുറുമിയുടെ കൈകളിൽ അവൾ മുറുക്കിപിടിച്ചു. സമീറിന്റെ കാർ ഓഡിറ്റോറിയത്തിനു മുൻപിൽ വന്നു നിന്നു. കറുത്ത സ്യുട്ടും സൺഗ്ലാസും വെച്ചുസുന്ദരനായി സമീർ പുറത്തേക്കിറങ്ങി. വേറെ ഒരു കാറിൽ ദുബായിൽ നിന്നു വന്ന വിദേശിയരും അറബ് വംശജരും സമീറിന്റെ മറ്റ് സുഹൃത്തുക്കളും സമീറിനെ അനുഗമിച്ചു. ദഫ് മുട്ടും പാട്ടുമായി അവനെ അകത്തേക്ക് ആനയിച്ചു. നിഹാൽ പൂമാല ഇട്ട് അവനെ സ്വീകരിച്ചു. നബീൽ ബൊക്കെ കൊടുത്തു. അവൻ ചിരിയോടെ അവരെ ചേർത്തു പിടിച്ചു. അകത്തേക്ക് വന്ന അവനെ കണ്ടു എല്ലാവരുടെയും മുഖത്ത് പുഞ്ചിരി വിടർന്നു. സ്റ്റേജിലേക്ക് ജമാൽ അവനെ ആനയിച്ചു. ചെറുക്കൻ കൂട്ടർക്കു ഫ്രണ്ടിൽ തന്നെ സീറ്റ്‌ റിസർവ് ചെയ്തിരുന്നു. അങ്ങോട്ട് അവന്റെ കുടുംബക്കാരും സുഹൃത്തുക്കളും മറ്റു സ്ത്രീകളും ഒക്കെ ഇരിപ്പുറപ്പി.ച്ചു സമീറിന്റെ ഉമ്മയും സഹോദരിമാരും ചേട്ടന്റെ ഭാര്യയും മറ്റു അടുത്ത ബന്ധുക്കളും നസിയ ഇരുന്ന മുറിയിലേക്ക് പോയി. അവളുടെ അടുക്കൽ ചെന്നു അവളോട് കുശലം ഒക്കെ ചോദിച്ചു കൂടെ നിന്നു. നിക്കാഹ് നടത്താൻ പള്ളി ഭാരവാഹികൾ എത്തി. സ്റ്റേജിൽ രണ്ടു കൂട്ടത്തിൽ നിന്നുമുള്ള പ്രധാനപ്പെട്ടവർ ഇരുന്നു. നിക്കാഹ് നടക്കാൻ സമയം ആയപ്പോൾ ജമാൽ എഴുന്നേറ്റു മൈക്ക് കയ്യിലെടുത്തു. " അസ്സലാമു അലൈകും. എന്റെ മകൾ നസിയയും സമീർ റഹ്മാനും തമ്മിലുള്ള വിവാഹത്തിന് ഞങ്ങളുടെ ക്ഷണം സ്വീകരിച്ചു ഇവിടെ എത്തിയ എല്ലാവരോടും ഞാൻ നന്ദി അറിയിക്കുന്നു. എന്റെ മകൾ നസിയയെ നിങ്ങളുടെ എല്ലാം അനുവാദതോടും അനുഗ്രഹത്തോടും ഞാൻ നിക്കാഹ് ചെയ്തു കൊടുക്കുകയാണ്. എന്റെ മോളുടെ സന്തോഷകരമായ ജീവിതത്തിനു വേണ്ടി എല്ലാവരും പ്രാർത്ഥിക്കണം. തുടർന്നു ചടങ്ങുകൾ തുടങ്ങി. പള്ളിവക വിവാഹ രജിസ്റ്ററിൽ സമീർ ഒപ്പുവെച്ചു. തുടർന്നു ജമാലും സമീറും പരസ്പരം പുണർന്നു. ബന്ധുക്കൾ എല്ലാവരും സ്റ്റേജിൽ നിന്നു ഇറങ്ങി താഴെയുള്ള സീറ്റുകളിൽ വന്നിരുന്നു. സമീർ കൂട്ടുകാർക്കൊപ്പം ഒരു സൈഡിൽ ആയി നിന്നു. മഹർ കൊടുക്കൽ ചടങ്ങിനു വേണ്ടി നസിയയെ സ്റ്റേജിലേക്ക് കൊണ്ടു വരാൻ ഷാഹിദയുടെ സഹോദരൻ ആ റൂമിലേക്ക്‌ ചെന്നു. മാമയുടെ കൈ പിടിച്ചു സർവാഭരണഭൂഷിതയായി നടന്നു വരുന്ന നച്ചുവിനെ സമീർ കണ്ണെടുക്കാതെ നോക്കി നിന്നു. തുടരും. എക്സാം ഡ്യൂട്ടി ഉണ്ട്. അത് കൊണ്ടു തിരക്കിലാണ്. എല്ലാവരും സഹകരിക്കുമല്ലോ. 😊 #📙 നോവൽ