എസ്എസ്എൽസി, ടിഎച്ച്എസ്എൽസി, എഎച്ച്എസ്എൽസി പരീക്ഷകൾ മാർച്ച് 5ന് ആരംഭിച്ച് 30നു സമാപിക്കും. എസ്എസ്എൽസി ഐടി പരീക്ഷകൾക്ക് ഇന്നു തുടക്കമാകും. 13നു സമാപിക്കും. മോഡൽ പരീക്ഷ 16 മുതൽ 20 വരെ നടക്കും. മൂല്യനിർണയ നടപടികൾ ഏപ്രിൽ 7 മുതൽ 25 വരെ നടക്കും. മേയ് 7നു ബോർഡ് യോഗം ചേരും. 8ന് ഔദ്യോഗികമായി പരീക്ഷാ ഫലം പ്രഖ്യാപിക്കും. സംസ്ഥാനത്തെ പൊതുവിദ്യാഭ്യാസ രംഗത്തു ഗുണനിലവാരം ഉറപ്പാക്കുന്നതിന്റെ ഭാഗമായി 5 മുതൽ 9 വരെയുള്ള ക്ലാസുകളിൽ ഇത്തവണ സബ്ജക്ട് മിനിമം നടപ്പാക്കിയിട്ടുണ്ട്. ഓരോ വിഷയത്തിനും കുറഞ്ഞത് 30% മാർക്ക് ലഭിക്കാത്ത കുട്ടികൾക്കു പ്രത്യേക പഠന പിന്തുണ നൽകും. രണ്ടാം പാദത്തിലെ പരീക്ഷയുടെ ഫലം പരിശോധിക്കുമ്പോൾ എല്ലാ വിഷയങ്ങളിലും ഇ ഗ്രേഡ് ലഭിച്ച കുട്ടികളുടെ പഠന നിലവാരം ഉയർത്തുകയാണ് ലക്ഷ്യം. അഞ്ചാം ക്ലാസിൽ 2186, ആറിൽ 2451, ഏഴിൽ 2143, എട്ടിൽ 14418, ഒൻപതിൽ 6153 വീതം കുട്ടികൾക്കാണ് ഇ ഗ്രേഡ്. ഈ കുട്ടികൾക്കു പ്രത്യേക പരിഗണന നൽകി മികച്ച നിലവാരത്തിലേക്ക് ഉയർത്തുകയാണ് ലക്ഷ്യം.