#जय श्रीराम 🚩🚩 सीतेचे खूप वेगळे चित्र ! हजारो वर्षे रामायणात रंगून गेलेल्या या देशात आजवर रामचरित्रासंबंधी, लाखो कलाकृती निर्माण झाल्या आहेत. अभिजात कलावंतांपासून ते लोककलावंतांपर्यंत. राजवाड्यांपासून शबरीच्या पर्णकुटीपर्यंत या कलाकृती आढळतात. चित्रे, मूर्ती, शिल्पे, लेखन, काव्य, नाटके, संगीतिका, गीते, महाकाव्ये, चित्रपट अशा शेकडो माध्यमातून आपल्यापर्यंत रामकथा पोचते. येणाऱ्या रामनवमीच्या निमित्ताने आज एक अतिशय वेगळे चित्र आपल्यासमोर सादर करीत आहे. हे चित्र फार वेगळे आणि रंजक आहे. या चित्रामध्ये सीतेने मराठी पद्धतीची साडी नेसून पदर खोचलेला आहे. तिच्या नाकात नथ, गोल अंबाडा आणि त्यावर मोत्यांची वेणी, कानात झुबरं, हातात तोडे, वाकी असून तिघांच्याही वस्त्राचे सोगे / ओचे समोर सोडलेले आहेत. रामाच्या अंगावर राजवस्त्रे असून तो कोदंडधारी आहे. लक्ष्मणाच्या अंगावर उपरणे असले तरी पूर्ण उत्तरीय वस्त्र नाही. तो उघडा आहे. त्यांनीही धनुष्य धारण केले आहे. पाठीवर असलेल्या बाणांच्या भात्याचा पट्टा हा प्रथमच इतका तपशीलवार पाहायला मिळतो आहे. सकृतदर्शनी मराठी वाटावीत अशी वस्त्रप्रावरणे व दागिने आहेत. या मूर्तींचे चेहरे नाजूक, सुंदर आहेत. सर्वात वेगळेपणा म्हणजे सीतेने शालीनतेने रामाचा डावा हात धरला आहे. धार्मिक विधी करीत असतानाची कांही चित्रे सोडली तर मर्यादापुरुषोत्तम रामाच्या संबंधित हे दृश्य फारसे पाहायला मिळत नाही . हे चित्र खूपच जुने असून ते त्या काळात लाहोर येथे न्यायाधीश म्हणून कार्यरत असलेल्या आयसीएस भिडे यांच्या घरातील आहे. त्यांचे नातू श्री. श्रीनिवास माटे ( वय ८६ आणि आता अमेरिकेत वास्तव्य ) यांच्या संग्रहातील हे दुर्मिळ चित्र सध्या अत्यंत खराब झाले आहे. तथापि कृत्रिम बुद्धिमत्ता वापरून मी ते पुनर्जीवित केले आहे. येत्या रामनवमीच्या निमित्ताने श्रीराम सीता आणि लक्ष्मणाचे हे एक वेगळे दर्शन ! अयोध्येमध्ये पुन्हा दिमाखात अवतरलेल्या या प्रभुरामचंद्राला " भूयो भूयो नमाम्यहं "! ©( हा लेख आणि फोटो शेअर केल्यास कृपया माझ्या नावासह शेअर करावेत ). ***** मकरंद करंदीकर. makarandsk@gmail.com