മടക്കം.... 2019 ഒക്ടോബർ അവസാന വാരം അത് വരെ ഞാൻ ജോലി ചെയ്ത കുവൈറ്റിൽ നിന്നും മടങ്ങുന്നതിനോട് അനുബന്ധിച്ചു ജീവിതത്തിൽ നടന്ന സംഭവങ്ങളാണ് ഞാനിവിടെ കുറിയ്ക്കുവാൻ പോകുന്നത്...എന്റെ മെയിൻ വാളിൽ പോസ്റ്റിയിരുന്നു ഞാനിത് അതിവിടെയും പങ്കു വയ്ക്കുവാൻ ആഗ്രഹിക്കുന്നു... ഇനി രംഗത്തിലേക്ക് കടക്കാം... എന്റെ കോൺട്രാക്ട് തീർന്നതിനാൽ ആ വർഷം ഒക്ടോബർ മാസമവസാനത്തോടെ രണ്ടര വർഷത്തെ കുവൈറ്റ്‌ ജീവിതമവസാനിപ്പിച്ചു എനിക്ക് തിരിച്ചു നാട്ടിലേക്ക് കയറാനുള്ള കമ്പനിയിലെ നടപടിക്രമങ്ങൾ തീർക്കുവാനായി അന്നെ ദിവസം വൈകീട്ടത്തേക്ക് എന്നോട് ഓഫീസിൽ ചെല്ലാൻ നിർദേശിച്ചു. അന്ന് ഉച്ചയോടെ അത്രയും കാലം ജോലി ചെയ്തിരുന്ന അബ്‌ദലി മരുഭൂമിയിലെ ഇറാഖ് ബോർഡറിൽ നിന്നും എട്ടു കിലോമീറ്റർ മാത്രം അകലെയുള്ള സൈറ്റിൽ നിന്നും നൂറ്റമ്പതോളം കിലോമീറ്റർ അകലെയുള്ള മെഹ്ബുള്ള എന്ന സ്ഥലത്തെ കമ്പനി അക്കമഡേഷനിൽ എത്തിച്ചേർന്നിരുന്നു...ഒരു മൂന്ന് മണിയോടെ ഞാൻ പുറത്തേക്ക് ഇറങ്ങി. കമ്പനി ഓഫീസ് നിൽക്കുന്ന മിന അബ്ദുള്ള എന്ന സ്ഥലത്തേക്ക് അവിടുന്ന് ഇരുപതോളം കിലോമീറ്റർ ദൂരം പോകണം... പുറത്തിറങ്ങി ആദ്യം കണ്ട ടാക്സിയ്ക്ക് തന്നെ ഞാൻ കൈ കാണിച്ചു...ടാക്സിയുടെ ഡ്രൈവർ ഒരു മിസ്രി ആയിരുന്നു. ഞാൻ പോകേണ്ട സ്ഥലം ഇംഗ്ലീഷിൽ പറഞ്ഞപ്പോൾ അവൻ മറുപടിയായി പറഞ്ഞു.. തൂ കേദി ( ടു കേഡി - രണ്ട് കുവൈറ്റ്‌ ദിനാർ.. അറബ്, ഫിലിപ്പീനി, യൂറോപ്യൻസിന് ഒക്കെ ടി തി യും ഡ ഒക്കെ ദ യും ആണല്ലോ ) അത്രയൊന്നും ചാർജ് വരില്ല... എന്നാലും എനിക്ക് അത്യാവശ്യമായതോണ്ട് അതിൽ ആ ചാർജിൽ ഉറപ്പിച്ചു കയറി ഇരുന്നു... വണ്ടി മുന്നോട്ട് പോയിക്കൊണ്ടിരിക്കുമ്പോഴാണ് ഞാനാ ഞെട്ടിയ്ക്കുന്ന സത്യം മനസിലാക്കിയത്. ഡ്രൈവർക്ക് ഇംഗ്ലീഷ് ഒട്ടുമറിയില്ല എനിക്കാണെങ്കിൽ അറബിയും.. അടിപൊളി..😪 കഥകളി ചലനങ്ങളെ പോലെ കൈകൾ പല രീതിയിലും ചലിപ്പിച്ചു അവനോട് ഒരു വിധത്തിൽ എനിയ്ക്ക് പോകേണ്ടത് മിന അബ്ദുള്ള ആണെന്ന് മനസിലാക്കിക്കൊടുത്തു. അപ്പോഴാണ് അടുത്ത പ്രശ്നം എന്റെ കമ്പനി ലൊക്കേഷൻ അവന്റെ ജി പി എസിൽ കാണിക്കുന്നില്ല. അതിൽ എന്റെ കമ്പനി പേര് ഞാൻ അടിച്ചു കൊടുക്കാമെന്നു വിചാരിച്ചാൽ അവന്റെ ജി പി എസിലെ ഭാഷയും അറബി... എന്റെ കഷ്ടകാലത്തിനു തലേ ദിവസം എന്റെ മൊബൈൽ വാലിഡിറ്റി തീർന്നിരുന്നു. പോകാറായതിനാൽ ഞാൻ റീചാർജ് ചെയ്തില്ല. ചെയ്താൽ നഷ്ടവുമാണ്. അത് കൊണ്ട് എന്റെ ഫോണിൽ ലൊക്കേഷൻ കാണിച്ചു കൊടുക്കാൻ കഴിയില്ല... ഒടുവിൽ ഒരു ഭഗീരഥ പ്രയത്നത്തിലൂടെ അവന്റെ നെറ്റ് എനിക്ക് ഷെയർ ചെയ്യാമോ എന്ന് ഞാനവനോട് തിരക്കി. അവൻ സമ്മതം മൂളിക്കൊണ്ട് ഹോട്ട്സ്പോട്ട് ഓൺ ചെയ്തു. അവന്റെ വൈഫൈ തുറന്നപ്പോൾ അതിന്റെ പാസ് വേർഡ് അറബിയിൽ.... 😪 ഇടി വെട്ടിയവനെ പാമ്പ് കടിച്ച അവസ്ഥയിൽ ഞാനിരിക്കുമ്പോഴും പുട്ടിനു പീര ചേർക്കുന്ന പോലെ അവന്റെ വായിൽ നിന്നും വീഴുന്നുണ്ട് തൂ കേദി തൂ കേദി എന്ന്.... 😥 അവസാനം ഞാനെന്റെ മൊബൈലിൽ കമ്പനി പേര് അടിച്ച് കാണിച്ചു കൊടുത്തു കൂട്ടത്തിൽ എന്റെ കമ്പനിയുടെ പേരും. ആ പേര് കേട്ട അവൻ എന്തോ ടൈപ്പ് ചെയ്തു ജി പി എസിൽ. എന്നിട്ട് എന്നോട് ഇതാണോ എന്ന് ചോദിച്ചു... അവൻ കാണിച്ചു തന്നത് കണ്ട എന്റെ മനസ്സിൽ ആമോദത്തിൻ നീഹാര കണങ്ങൾ പെയ്തിറങ്ങി.. അറബിയിൽ എഴുതിയതിന്റെ അടിയിൽ ബ്രേക്കറ്റിൽ ഇംഗ്ലീഷിൽ കമ്പനി പേര് എഴുതിയിരിക്കുന്നു... അത്യന്തം ആഹ്ലാദത്തോടെ അതാണെന്ന് പറഞ്ഞ് കൊണ്ട് അവനോട് തുടന്നോളാൻ ഞാൻ നിർദേശിച്ചു. അവനും ഒരുപാട് സന്തോഷം..... എല്ലാ കോടാലികളും തരണം ചെയ്ത് കൊണ്ട് അവസാനം കമ്പനി ഗേറ്റിൽ എത്തിച്ചേർന്നു.... അവന്റെ വായിൽ നിന്നും അപ്പോഴും വീണു കൊണ്ടിരുന്നു.... തൂ കേദി... ടാക്സിയിൽ നിന്നും ഇറങ്ങി സന്തോഷത്തോടെ അവന് രണ്ട് ദിനാർ കൊടുത്തു.... പ്ലസ് ടൂ പഠിക്കുമ്പോൾ മ്യുണിച്ചിലെ സുന്ദരികളും സുന്ദരന്മാരും എന്ന പുസ്‌തകത്തിൽ എഴുത്ത് കാരൻ ജർമൻ ഭാഷ അറിയാതെ ടാക്സിയിൽ ബുദ്ധിമുട്ടിയത് വായിച്ചിരുന്നു... വർഷങ്ങൾക്ക് ശേഷം എന്റെ ജീവിതത്തിൽ അതിന് സമാനമായ ഒരനുഭവം...😆 തുടരും #📙 നോവൽ #💞 പ്രണയകഥകൾ #✍ തുടർക്കഥ #📔 കഥ #📚 ട്വിസ്റ്റ് കഥകൾ