एक अल्पसा दिलासा देणारी घडामोड - इराणच्या अधिकाऱ्यांनी भारतीय ध्वज असलेल्या जहाजांना या सामुद्रधुनीतून सुरक्षितपणे जाण्याची परवानगी देण्याचा निर्णय घेतला आहे. अमेरिका आणि इस्रायलने इराणवर केलेल्या हल्ल्यांनंतर या मार्गावरील सागरी वाहतूक जवळपास पूर्णपणे ठप्प झाली असताना भारतासाठी ही घडामोड महत्वाची ठरते. दरम्यान मध्यपूर्वेतील वाढत्या तणावाच्या दरम्यान लायबेरियाचा ध्वज असलेलं शेंलॉन्ग सुमॅक्स हे जहाज कच्चे तेल घेऊन होर्मुझची सामुद्रधुनी पार करून थेट मुंबईच्या बंदरात सुरक्षितपणे दाखल झालं आहे. इराणच्या 'इस्लामिक रिव्होल्युशनरी गार्ड्स कॉर्प्स' (IRGC) च्या नौदल प्रमुखांनी म्हटले होते की, रणनीतिकदृष्ट्या महत्त्वाच्या अशा होर्मुझच्या सामुद्रधुनीतून जाणाऱ्या जहाजांना इराणची मंजुरी मिळवणे आवश्यक आहे; अन्यथा ती इराणच्या हल्ल्याचे लक्ष्य बनू शकतात. रिअर ॲडमिरल अलीरेझा तांगसिरी यांनी इशारा दिला होता की, इराणच्या वॉर्निंगकडे दुर्लक्ष करणाऱ्या दोन जहाजांना बुधवारी सामुद्रधुनीमध्ये लक्ष्य करण्यात आले. यात भारताकडे येणाऱ्या 'मयुरी नारी' या थाई जहाजाचाही समावेश होता. मात्र ताज्या घडामोडीनुसार अशी वेळ पुन्हा ओढवणार नाही. पुष्पक आणि परिमल ही दोन जहाजेही होर्मुझच्या सामुद्रधुनीमधून मार्गस्थ झाली आहेत, ती देखील लवकरच भारतात येतील असे आपल्या परराष्ट्र खात्याच्या वतीने म्हटले आहे. या जहाजावरील कच्चे तेल रशियन तेल नसून आखाती देशातून आयात केलेले तेल आहे. जे रशियन तेल जहाजात पूर्वीच चढवलेले आहे आणि खरेदीबंदीमुळे अर्ध्यातच अडकून पडले आहे ते देखील येत्या आठवड्यात भारतात दाखल होईल. इराणच्या वतीने मात्र हा दावा फेटाळून लावण्यात आला आहे. इराणी दूतावासात जाऊन शोकसंदेश जारी केल्यानंतर आणि पंतप्रधान मोदी यांच्यासह परराष्ट्रमंत्री जयशंकर यांनी देखील भारताच्या युद्धविषयक भूमिकेत बदल झाल्याचे संकेत दिल्यानंतर इराणने भारताला हा दिलासा दिला असेल का? जुना मित्र मैत्रीला जागू शकतो, या मित्राच्या पाठीत खंजीर खुपसण्याचे काम पुन्हा होऊ नये इतके तरी आपल्याकडील अनेकांना कळून चुकले असेल. विशेष गोष्ट म्हणजे भारतीय शेयर बाजार मागील एका महिन्यात नऊ टक्क्याहुन अधिक म्हणजे ७६४० निर्देशांकानी कोसळला असताना अलीकडील काळात आपण ज्या इस्रायलला मिठ्या मारत होतो त्यांचा शेयर निर्देशांक TASE हा जसाच्या तसा शाबूत आहे, तर अमेरिकन स्टॉक एक्सचेंजचे भारताच्या तुलनेने निम्मेही नुकसान झालेले नाही. अशांच्या कच्छपी लागणे म्हणजे आपल्या पायावर धोंडा पाडून घेणे हे एव्हाना कळले असेलच. कुणा एकाची जिरवायच्या नादात ज्यू मंडळींना आपण मिठ्या मारायला लागलो आणि अखेर इराणी भाईजानच आपल्याला पावला! आंतरराष्ट्रीय राजकारणात जी राष्ट्रे बलाढ्य आहेत त्यांच्या अनेक चुका त्यांना भारी पडत नाहीत कारण त्यांच्याकडे तितके पोटेन्शियल असते, जे विकसनशील आहेत ज्यांची धोरणे जागतिक महासत्तांच्या लहरीनुसार हेलकावे खातात त्यांनी धर्मांधतेचे चष्मे घालून आंतरराष्ट्रीय धोरणे आखली तर त्याचे काय पडसाद उमटू शकतात याचे ट्रेलर आपण नुकतेच पाहिलेय. देर आये दुरुस्त आये; इराण आपला जुना मित्र आहे आणि हा एकमेव इस्लामिक देश आहे ज्याने जागतिक मंचावर पाकिस्तानच्या पारड्यात आपले मत न टाकता भारताच्या बाजूने आपला कौल दिला होता. गेल्या सात दशकातले आपले परराष्ट्र धोरण ज्या दिशेने आहे त्या दिशेने आपण पुन्हा वळलो की होर्मुझच्या सामुद्रधुनीतुन आपल्याला सेफ बायपास मिळू शकतो ही गोष्ट खूप बोलकी आहे. एलपीजी गॅस आणि अन्य पेट्रोलियम उत्पादनांच्या बाबतीतही लवकरच सुचिन्हे दिसली म्हणजे जनजीवन पूर्ववत हॊईल! बाकी ज्यांना युद्धाची खुमखुमी आहे त्यांना लढू द्यावे आपण शांततेच्या बाजूने आहोत हा भारताचा जुना संदेश आपल्या पंतप्रथानांनी दिला आहे हे बरेच झाले. भारताकडून हे दावे केले जात असतानाच इराणच्या वतीने अशी कोणतीही परवानगी दिलेली नसून लायबेरीयन जहाजाला दिलेली परवानगी त्या देशाच्या धोरणांना अनुसरून होती असे म्हटले आहे, याचे अपडेट्स भारतीय आणि इराणी माध्यमात उपलब्ध आहेत. त्यामुळे इतक्यात हुरळून जाऊन चालणार नाही. कदाचित आपण आणखी कणखर आणि स्पष्ट भूमिका घ्यावी असे इराणला वाटत असेल. हा दिलासा अल्पकालीन न ठरता दीर्घकालीन राहो! #🔴आजचे ताजे अपडेट्स📰 #🤪राजकीय टोलेबाजी😜 #👌प्रेरणादायी स्टेट्स #😏मतलबी दुनिया #🏛️राजकारण