*_సెక్స్ ట్రాఫికర్ ఎప్‌స్టీన్ 'యమకూపం'లో రాలిన పసిమొగ్గలెన్నో..._* *_---మనకు ముంబై కామాఠీపుర, పుణె బుధ్వార్ పేట్, ఢిల్లీ GB రోడ్, వారణాసి శివదాస్‌పూర్ తెలుసు.._* *_చీకోటి ప్రవీణ్, నిఖిల్ బండి, మోనిష్ గల్లా, కోల్‌కతా సోనాగాచి ముఠా- సరస్వతి బెనర్జీ, పూజా మిస్త్రీ, ఆకాష్ ఛటర్జీ లాంటి సెక్స్ బ్రోకర్లూ తెలుసూ.._* *_కానీ ఈ సెక్స్ ట్రాఫికర్ జెఫ్రీ ఎప్‌స్టీన్ ఎవరు? సెక్స్ ట్రేడింగ్ తో రూ. 55 వేల కోట్లు ఎలా పుట్టించాడు?_* *_డబ్బు, అధికారం, రాజకీయం.. కలిస్తే న్యాయమూ మూగబోతుందా? జెఫ్రీ ఎప్‌స్టీన్ కి అంత వికారపు సంపద ఎలా వచ్చిందీ? బ్రిటన్ రాజుకి ఉన్న సంబంధమేమిటీ? అమెరికా మాజీ అధ్యక్షుడు బిల్ క్లింటన్ తో లింకేంటీ? ట్రంప్ సర్కార్ లేబర్ సెక్రటరీ పదవెందుకు ఊడిందీ? అన్ని తెలిసిన ఆ న్యాయమూర్తి ఆ మదాందుణ్ణి వదిలేసినందుకు ఎంత ముట్టిందీ? చివరికి అతడెందుకు కుక్కచావు చచ్చాడు? ఇలాంటి సవాలక్ష ప్రశ్నలకు సమాధానమే_* *_"Jeffrey Epstein: Filthy Rich" (జెఫ్రీ ఎప్‌స్టీన్- వికారపు సంపద)డాక్యుమెంటరీ సీరీస్._* *ప్రస్తుతం ప్రపంచ కుబేరులను వణికిస్తున్న పేరు జెప్రీ ఎప్‌స్టీన్. ఇతడి చీకటి సామ్రాజ్యంలో ఓలలాడిన వందలాది సుఖపురుషుల రంకు ఇప్పుడు కుప్పలు తెప్పలుగా పారుతోంది. ఇప్పటికి బయటికొచ్చిన 30 లక్షల పేజీల్లో ఎవరి పేరు ఎప్పుడు తెరపైకి వస్తుందో తెలియక బిక్కుబిక్కు మంటున్నారు*. *ఎప్‌స్టీన్‌తో పరిచయాల వల్ల ప్రపంచ కుబేరుడు బిల్ గేట్స్ ఇండియా ఏఐ సమ్మిట్ కి వచ్చినా ఎంట్రీ దొరక్క చెప్పా పెట్టకుండానే ఇంటిదారిపట్టారు.* *ఇండియాకి చెందిన ఓ కేంద్ర మంత్రి సవాళ్ల మీద సవాళ్లు విసురుతున్నారు*. *సరిగ్గా ఇటువంటి దశలో నెట్ ఫ్లిక్స్ (ఇండియన్ సెక్షన్)లో Jeffrey Epstein: Filthy Rich డాక్యుమెంటరీ సంచలనం రేపుతోంది. ప్రైవేట్ జెట్‌లు, విలాసవంతమైన భవంతులు, ఎలైట్ క్లాస్ డిన్నర్లు, హైక్లాస్ విందులు, వినోదాలు, వాటి వెనుక దాగి ఉన్న లైంగిక దోపిడీ వంటి యమకూపాల సమాహారమే ఈ సీరీస్.* *Jeffrey Epstein జీవితం ఓ వ్యక్తి నేరగాథ మాత్రమే కాదు. వ్యవస్థల వైఫల్యానికి ప్రతీక. ఇది కేవలం క్రైమ్ కథ కాదు- ఇదో అధికారపు చట్రంలో దాగిన అన్యాయాన్ని కక్కించే సామాజిక సాక్ష్యం*. *డాక్యుమెంటరీలు మామూలుగా ఏదైనా ఒక ఘటనను చెబుతాయి. కానీ* *Jeffrey Epstein: Filthy Rich అంతకు మించి ఒళ్లు జలదరించే నిజాలను చెబుతుంది. వ్యవస్థల వైఫల్యాన్ని, అధికారం ఎలా రక్షణ కవచంగా మారుతుందో కళ్లకు కడుతుంది*. *ఈ సిరీస్ లో హీరో, విలన్ రెండూ జెఫ్రీ ఎప్‌స్టీన్. యూదు మూలాలున్న వ్యక్తి. చాలా సాదాసీదా కుటుంబం. తండ్రిది చిన్న వ్యాపారం, తల్లి ఓ స్కూలు టీచర్. అతనికో అన్న. మంచి మాటకారి. అవతని వాళ్లను బురిడీ కొట్టించడంలో దిట్ట. డిగ్రీ కూడా లేకుండానే సైంటిస్ట్ అవతారమెత్తుతాడు. ఫేక్ స్టాక్ బ్రోకర్ అవుతాడు. అధికార, అనధికార వర్గాల అవసరాలు తీరుస్తాడు*. *ఒక్కమాటలో చెప్పాలంటే సుఖవాదానికి ఇతనో నగ్నావతారం. రెండు ప్రైవేటు విమానాలు, విలాసాలకు సకల సౌకర్యాలున్న రెండు ద్వీపాలు (ఐలాండ్స్), ఫ్లోరిడా తీరంలో మరెవరికీ లేనట్టుండే రాజసౌధాలు, చీమచిటుక్కుమన్నా పసిగట్టే గూఢచారులు, గోడల్లోనే బిగించిన నిఘా నేత్రాలు.. ఇలా ఒకటేమిటీ.. అతనికి లేనిది లేదంటే నమ్మండి. కానీ ఈ తణుకు బెణుకుల మెరుపు ప్రపంచం వెనుక ఉన్నది మైనర్ బాలికల మాంసపు ముద్దలు. వందలాది మంది అభం శుభం తెలియని ఆడపిల్లల శరీరాలు.* *_బాధితుల స్వరమే ఈ కథనానికి మూలం.._* *ఈ డాక్యుమెంటరీలో అత్యంత ప్రభావవంతమైంది బాధితుల ప్రత్యక్ష వాంగ్మూలాలు. ముఖ్యంగా Virginia Giuffre వంటి మహిళలు తమ అనుభవాలను నిస్సంకోశంగా పంచుకోవడం సిరీస్‌కు నైతిక బలం*. *ఈ సీరీస్ ను తెరకెక్కించినందుకు ఆ దర్శకురాలు Lisa Bryant ఎన్ని నిద్రలేని రాత్రులు గడిపిందో. ఎన్నెన్ని పాట్లు పడిందో మాటల్లో చెప్పలేం. సెన్సేషన్ వైపు వెళ్లకుండా ఏ మాత్రం తోట్రుపాటు లేకుండా బాధితుల అనుభవాలను గౌరవంగా, నెమ్మదిగా వినిపిస్తుంది. కెమెరా బాధితుల ముఖాలపై ఎక్కువ సేపు నిలిపి, మింగుడు పడని ఓ నిజానికి ఎదురుగా ప్రేక్షకుల్ని నిలబెడుతుంది.* *ఇంత దారుణమే 'మీ పిల్లలకు జరిగితే' అనే ప్రశ్న వేయకుండానే మనం జవాబు చెప్పుకునేలా చేస్తుంది*. *ఈ డాక్యుమెంటరీ ఓ వ్యక్తి పాపాల చిట్టా కాదు. ఇది మూడు వ్యవస్థల క్షుద్ర అవస్థ. డబ్బు, అధికారం, పలుకుబడి ప్రభావం. ఈ మూడు కలిస్తే బాధితుల గొంతు కీచుగొంతవుతుంది*. *ఎప్‌స్టీన్ చావు- అనేక ప్రశ్నలకు జవాబు లేకుండా చేసినా బాధితుల వాంగ్మూలాలను చరిత్రకెక్కించడం ఈ డాక్యుమెంటరీ ఘనత.* *_Jeffrey Epstein: Filthy Rich- సీరీస్ నాలుగు ఎపిసోడ్లు._* *ప్రతి ఎపిసోడ్ సుమారు 55-57 నిమిషాలు.* *తొలి ఎపిసోడ్ లో ఎప్‌స్టీన్ ఆడపిల్లలకు ఎలా వల వేస్తాడు అనేది డీల్ చేస్తుంది*. *1996 నుంచి మొదలవుతుంది*. *తన గర్ల్ ఫ్రెండ్ తో కలిసి మైనర్ బాలికలను టార్గెట్ చేయడం ఇందులో ఉంటుంది.* *మనకు తెలిసిన పిరమిడ్ యోగం, ధ్యానానికి సంబంధించింది. ఎప్‌స్టీన్ "పిరమిడ్ స్కీమ్" మాత్రం గొలుసుకట్టు రిక్రూట్మెంట్. ఒకరు ఇంకొకర్ని తీసుకురావాలి. వాళ్లు ఇంకొందర్ని తీసుకురావాలి. అలా మనదేశంలోని చెయిన్ మార్కెటింగ్ మాదిరి బాధితులను ఒకరికొకరు రిక్రూట్ చేయించడం ఇతని వ్యవస్థ.* *ఎప్‌స్టీన్ కబంధ హస్తాల నుంచి బయటపడిన వారి (సర్వైవర్స్) ఇంటర్వ్యూలతో మొదలవుతుంది. ఎలా వంచనకు గురయ్యారో, ఎలా భయపెట్టారో డీల్ చేస్తుంది ఈ భాగం.* *రెండో ఎపిసోడ్ -* *Follow the Money (ఫాలో ది మనీ)* *ఎప్‌స్టీన్ కి సంపద ఎలా వచ్చింది, అది ఎలా అతనికి రక్షణ కల్పించిందనేది డీల్ చేస్తుంది. డబ్బుతో దేన్నైనా కొనగలను అనే ధైర్యం రావడానికి కారణమేంటో వివరిస్తుంది.* *3వ ఎపిసోడ్- The Island (ది ఐలాండ్) ఎప్‌స్టీన్ కి రెండు సొంత ద్వీపాలు ఎలా వచ్చాయో, అవి టార్చర్ హౌసెస్ గా ఎలా మారాయో చెబుతుంది. ఇక్కడ ఆడపిల్లలు అరిచే అరుపులు ఎలా ఆర్తనాధాలవుతాయో చూస్తుంటే మనం గిలగిల్లాడాల్సిందే. మరియా ఫార్మర్ లాంటి బాధితులు తమ ఐలాండ్ అనుభవాలను వివరిస్తుంటే మనసున్నఎవరికైనా కళ్లంట నీళ్లు జలజలా రాలాల్సిందే. ఈ సీరీస్‌లో అత్యంత డిస్టర్బింగ్ ఎపిసోడ్ ఇది*. *ఇక ముగింపుగా చూపే 4వ ఎపిసోడ్ Finding Justice (ఫైండింగ్ జస్టిస్)లో బాధితుల న్యాయ పోరాటం, 2019లో మియామి హెరాల్డ్ జర్నలిస్ట్ జూలీ కె. బ్రౌన్ ఇన్వెస్టిగేషన్ ఎలా ఎప్‌స్టీన్‌ను మళ్లీ అరెస్టు చేయించిందీ, న్యూయార్క్ జైల్లో అనుమానాస్పద చావును చూపుతుంది. ఆశ నిరాశల మధ్య న్యాయం ఇంకా చచ్చిపోలేదన్న సందేశంతో ముగిసినా అంతు చిక్కని ప్రశ్నలు, జవాబులు ఎన్నో*. *_ఇన్ని ఘోరాలు చేసినా తాను అమాయకుణ్ణని తప్పించుకునేందుకు ఎప్‌స్టీన్ కోర్టు విచారణలో చూపే హావభావాలు, ఆ బాడీ లాంగ్వేజ్ మనకు అరికాలి మంట తలకెక్కాలే చేస్తాయి. ఒంటి నిండా నింపుకున్న డబ్బు మదం, అహంకారంతో గతంలో తప్పించుకున్నట్టే 2019లోనూ తప్పించుకునేందుకు చేసే ప్రయత్నం, అతని చుట్టూ కుక్కపిల్లల్లా తిరిగే అమెరికన్ టాప్ మోస్ట్ లాయర్లు, వాళ్ల భాష చూస్తే మనకు ఒళ్లు మండిపోతుంది_*. *_కోపం కట్టలు తెంచుకుంటుంది._* *_ఆలోచన రేపుతుంది._* *_“Filthy Rich” కేవలం ఒక డాక్యుమెంటరీ కాదు. అధికారం, హోదా, సంపద, న్యాయ వ్యవస్థ కలగలిపితే జరిగే దుర్మార్గాలు ఎలా ఉంటాయనే దానికి అద్దం. ఇది చూసిన తర్వాత మీలో ఆగ్రహం పెల్లుబకవచ్చు. కీచు గొంతుకలు కూడా పెద్దగా అరవగలవు అన్పించవచ్చు. బలవంతమైన సర్పం చలిచీమల చేత చిక్కి చావదె సుమతీ అని అరవవచ్చు. మనవాళ్లు ఇలాంటి డాక్యుమెంటరీలు ఎందుకు తీయలేకపోతున్నారు అని మూలుగు వినిపించవచ్చు.!_* *గుండెలు పిండే వికృత నేరకాండ* *_{పీపుల్స్‌ డెమోక్రసీ సంపాదకీయం} :_* *అమెరికా న్యాయశాఖ జనవరి 30న ఎప్‌స్టీన్‌ ఫైల్స్‌ విడుదల చేసిన నాటి నుంచి ఆ దేశంలోనూ యూరప్‌లోనూ తీవ్ర అలజడి చెలరేగింది*. *30 లక్షల ఇ-మెయిల్‌ సంభాషణలు, లక్షకు పైగా ఫోటోలు, వేయికి పైగా వీడియో క్లిప్పింగులతో కూడిన ఈ పత్రాల విడుదలతో ఘోరమైన నేరస్త చర్యలు బయటపడ్డాయి. అయితే ఈ ఘోరాల పర్వం మొత్తం ఎప్‌స్టీన్‌ పాత్ర చుట్టూనే తిప్పుతూ తనే లక్ష్యంగా చర్చ సాగుతున్నది. అయితే ఎప్‌స్టీన్‌ అమానుష దురంతాలు అతనేదో వంటరి వ్యక్తిగా చేసినవి కాదని సుస్పష్టమవుతూనే వుంది. ఒక వ్యవస్థీకృత వాతావరణంలోనే ఇవన్నీ జరిగాయి*. *ఈ తప్పులు దశాబ్దాల పాటు సాగుతూ వచ్చాయి.* *మొదట్లో 2008లో వ్యక్తిగత స్థాయిలో చేస్తూ వచ్చిన ఆరోపణలు ఉన్నత స్థాయిలో వారి నేరస్థ చర్యలపై దర్యాప్తుగా మారింది. తర్వాత ఆయనను అరెస్టు చేయడం, 2019లో ఎప్‌స్టీన్‌ ఆత్మహత్య చేసుకున్నట్టు చెబుతున్నారు*. *1980, 90లలో అతను స్త్రీలనూ బాలికలనూ రిక్రూట్‌ చేసుకోవడం మొదలు పెట్టాడు*. *ఎప్‌స్టీన్‌ తన చెల్లెళ్ల ఫోటోలు దొంగిలించి, ఆ విషయాన్ని బయటపెడితే చంపుతానని బెదిరించినట్టు ఒక నటి ఎఫ్‌బిఐ గూఢచారి సంస్థకు చెప్పారు. 1998లో అతను వర్జిన్‌ దీవులలో లిటిల్‌ సెయింట్‌ జేమ్స్‌ దీవిని కొనుగోలు చేశాడు. ఎప్‌స్టీన్‌ సెక్స్‌ దురంతాలలో ఇదే కేంద్ర బిందువుగా తయారైంది. అతనికి మసాజ్‌ సేవకురాలిగా మారనున్న మహిళ 2000 సంవత్సరంలోనే తాను సెక్స్‌ బానిసగా వున్నానని ప్రకటించింది*. *_తప్పించిన తొలి విచారణ_* *14 ఏళ్ల బాలికపై అత్యాచారం జరిగిందన్న కథనాలు వచ్చాక 2005 మార్చిలో పామ్‌ బీచ్‌లో దర్యాప్తు ప్రారంభమైంది. వ్యభిచారాన్ని నడిపిస్తున్నారన్న అధికారిక ఆరోపణతో ఎప్‌స్టీన్‌ను 2006 జులైలో అరెస్టు చేశారు. ఒక మైనర్‌ బాలికను వ్యభిచారం చేయవలసిందిగా అడిగినట్టు అతను ఫ్లోరిడా కోర్టులో నేరం అంగీకరించాడు. తర్వాత ఎప్‌స్టీన్‌ ‘ప్రేమ పూర్వక’ అభ్యర్థన తర్వాత అమెరికా ప్రభుత్వ న్యాయవాది అలెగ్జాండర్‌ అకోస్టా ఆమోదించడంతో ప్రభుత్వ ఆరోపణల నుంచి తప్పించుకుని 18 నెలల శిక్షతో బయటపడ్డాడు*. *2011లో వర్జీనియా గుఫ్రే (అంతకు ముందు పేరు వర్జీనియా రాబర్ట్స్‌)˜ బహిరంగంగా బయటికొచ్చి ప్రిన్స్‌ ఆండ్రూతో వ్యభిచారం కోసం తనను పంపినట్టు బయటపెట్టింది. 2018 నవంబర్‌లో మియామి హెరాల్డ్‌ ప్రచురించిన సిరీస్‌లో 2008 నాటి అభ్యర్థన వివరాలు వెల్లడైనాయి. దాంతో ప్రజల దృష్టి, చట్టాల దృష్టి కూడా కేంద్రీకృతమైంది. 2019 జులై ఆరున ఎప్‌స్టీన్‌ న్యూయార్క్‌లో అరెస్టయ్యాడు. మైనర్లను వినియోగించి, జాతీయ మానవ అక్రమ రవాణా చట్టం కింద నేరాలు, కుట్రలకు పాల్పడినట్టు కేసు వేశారు. 2019 ఆగస్టు 10న జైలులో అనుమానాస్పద పరిస్థితుల్లో ఉరి తాడుకు వేలాడుతూ కనిపించాడు. దాన్ని ఆత్మహత్యగా నిర్ధారించారు*. *_చనిపోయాక కూడా…_* *ఎప్‌స్టీన్‌ మరణానంతరం కూడా దీనిపై తెరపడలేదు. 2021 డిసెంబర్‌లో ఎప్‌స్టీన్‌కు అతి సన్నిహిత సహచరుడు ఘిస్లానే మాక్స్‌వెల్‌కు మహిళల అక్రమ రవాణా నేరానికిగాను ఇరవై ఏళ్ల శిక్ష పడింది. సుదీర్ఘ న్యాయ పోరాటం తర్వాత కోర్టు అతని క్లైంట్ల పేర్లు వారి వారి నిర్దిష్ట తప్పుల ఆరోపణలు లేకుండా ఎప్‌స్టీన్‌ ఫైల్స్‌ విడుదలకు ఆదేశాలిచ్చింది*. *ఈ నేపథ్యంలోనే వేయిమంది బాధితుల ఆరోపణలతో నిరసన ప్రజ్వరిల్లింది. ప్రజా స్ఫూర్తిగల పాత్రికేయులు, ఇతర విమర్శకుల తక్షణ పరిశోధనల ఫలితంగా అమెరికా కాంగ్రెస్‌ ఎప్‌స్టీన్‌ ఫైల్స్‌ పారదర్శకత చట్టాన్ని ఆమోదించవలసి వచ్చింది. ఫలితంగా మరింత లోతైన దర్యాప్తు కథనాలు వెలుగులోకి వచ్చాయి*. *ఈ ఎప్‌స్టీన్‌ ఫైల్స్‌ ఇ-మెయిళ్లు, ఫోటోలు, వీడియో క్లిప్పులతో కూడిన భారీ భాండాగారంలో భాగం. అమెరికాలో శక్తివంతులైన అధికార శక్తుల ఆనుపానులన్నీ వాటిలో వున్నాయి. అలాగే అనేకమంది యూరోపియన్‌ దేశాల వారూ వున్నారు. కేవలం రాజకీయ నాయకులే కాదు. లారీ సమర్స్‌, పీటర్‌ మండేల్సన్‌ వంటి విధాన శిల్పులు, ప్రతిఫలం తీసుకునే మేధావులు, బిల్‌గేట్స్‌, ఎలన్‌మస్క్‌, రిచర్డ్‌ బ్రాన్సన్‌ వంటి బడా వ్యాపారులూ వున్నారు*. *ఇన్ని రకాలైన సెలబ్రిటీలతో ఎప్‌స్టీన్‌ నెట్‌వర్క్‌ పని చేసిందంటే నిజంగా బుర్ర తిరిగిపోతుంది. డోనాల్డ్‌ ట్రంప్‌ పేరే లక్ష సార్లకు పైగా వినిపిస్తుంది. నాకు అత్యంత సన్నిహిత మిత్రుడు అని ట్రంప్‌ను ఎప్‌స్టీన్‌ అభివర్ణిస్తాడు. ఇజ్రాయిల్‌తోనూ, ఇజ్రాయిల్‌ మాజీ ప్రధాని ఎహుద్‌ బరాక్‌తోనూ ఎప్‌స్టీన్‌కు భద్రతాపరంగా సున్నితమైన సంబంధాలున్నాయి.* *_లక్షల సాక్ష్యాలు_* *ఎప్‌స్టీన్‌కు వున్న అత్యంత ఖరీదైన ఆస్తులలో ఒకటైన న్యూయార్క్‌ సౌధం నుంచి ఈ ఫైల్స్‌ పట్టుబడ్డాయి. చాలా పకడ్బందీ అయిన చోట వాటిని దాచిపెట్టారు. అయితే ఇప్పుడు న్యాయశాఖ ఆదేశాలతో వాటిని బయటపెట్టాక ఒక్కసారిగా కొంప మునిగినంత పనైంది. ఇంకా లక్షోపలక్షల సాక్ష్యాలు బయటకు రావలసి వుందనే అనుకుంటున్నారు*. *న్యాయశాఖకు సంబంధించిన కాంగ్రెస్‌ కమిటీ తన బహిరంగ విచారణలలో అమెరికా అటార్నీ జనరల్‌ పామ్‌ బొందీని, అలాగే ఎఫ్‌బిఐ డైరెక్టర్‌ కాశ్‌ పటేల్‌ను ప్రత్యేకంగా చీల్చి చెండాడింది. పారదర్శకతా చట్టం నిబంధనలు పాటించనందుకు తప్పు పట్టింది*. *కనుక ఈ మొత్తం విచారణ తీరుతెన్నులన్నింటినీ బట్టి చూస్తే కావాలని సాగదీసేందుకూ, దారుణ కృత్యాలనూ నేరపూరిత సంబంధాలనూ కప్పిపుచ్చేందుకూ ఉద్దేశపూర్వకంగానే ప్రయత్నం జరిగిందని స్పష్టమవుతుంది*. *అంతేగాక మొత్తం సత్యం బయటికి రాకుండా చేస్తున్నారనీ, కీలకమైన వ్యక్తిగత సమాచారాలు తొక్కిపడుతున్నారనీ కూడా స్పష్టమవుతుంది. సాక్ష్యాలను వెల్లడించే క్రమంలో బాధితుల వివరాలు చెప్పడంలో కూడా బలీయమైన శక్తివంతులైన వారి సంగతులు వెల్లడి కాకుండా ఎంపిక చేసుకున్నట్టు వ్యవహరిస్తున్నారనీ తెలిసిపోతుంది. ప్రధాన మీడియా ఎప్‌స్టీన్‌ పైనే కేంద్రీకరిస్తున్నది. ఆ విధంగా చేయడంలో ఉద్దేశం ఆయన ఘోర నేరాలకు పాల్పడ్డం వెనక వున్న వ్యవస్థీకృత రక్షణలను, ప్రోత్సాహాలను మరుగుపరుస్తున్నది*. *వివరంగా బయటికి వస్తున్నదాన్ని పైపైన చూసినా సరే ఈ క్రమపద్ధతి ఏమిటో తెలిసిపోతుంది. 150 ఏళ్ల కిందటనే కారల్‌ మార్క్స్‌ పారిశ్రామిక పెట్టుబడి పుట్టుక పైన రాసిన అధ్యాయం ముగింపులో ఇలా అంటారు: ”పెట్టుబడి అనేది నఖశిఖ పర్యంతం ప్రతి అణువూ నెత్తురుతో మురికితో తడిసి వుంటుంది.” దీనికి మద్దతునిచ్చే విధంగా పాదపీఠికలో కార్మిక నాయకుడైన టిజె డన్నింగ్‌ మాటలను ఉటంకిస్తాడు: కావలసినంత లాభం వస్తే పెట్టుబడి ఎంతకైనా తెగిస్తుంది.* *పది శాతం వచ్చేట్టయితే అది ఎక్కడైనా వాలుతుంది. 20 శాతం వస్తే ఆదుర్దా పెంచుతుంది. యాభై శాతం వస్తే సానుకూల సాహసం సమకూరుతుంది. అదే వంద శాతం వస్తే మానవ చట్టాలన్నిటినీ తొక్కిపారేసేందుకు సిద్ధమైపోతుంది. 300 శాతం వస్తే గనక అది ఎంతటి నేరానికైనా పాల్పడేందుకు వెనుకాడే ప్రసక్తి వుండదు. తన యజమానిని ఉరి తీయడానికి కూడా సిద్ధమైపోతుంది.” ఎప్‌స్టీన్‌ ఫైల్స్‌ బయట పెట్టిన కథనం చూస్తే మార్క్స్‌ వాదన ఎంత వాస్తవికమో అర్థమవుతుంది.* *మానవత మృగ్యమైన తీరు* *పెట్టుబడిదారీ విధానం ప్రస్తుత నయా ఉదారవాద అవతారం దాల్చేందుకు దాన్ని వెంటనంటి వుండే ఆశ్రిత పోకడలు అగాధమైన అసమానతలకూ నిరుద్యోగానికి దారితీస్తున్నాయి. ఇది సృష్టించిన ప్రమాదకరమైన నయా ఉదారవాద భావజాలం దాని ఆర్థిక నమూనాను దాటేసి ముందుకు పోతుంది*. *విపరీతమైన అసమానతల వల్ల వ్యాఖ్యాతలు చెబుతున్నట్టు ఎప్‌స్టీన్‌ బాపతు ప్రపంచ పీడక సంతతి పుట్టుకొచ్చారు. వీరు ఇతరులను ఆర్థికంగానూ ఇతరత్రా కూడా కొల్లగొడతారు. సాధారణ మానవతా విలువలను ఇంకే మాత్రం పట్టించుకోరు. వీరినే ఎలన్‌ మస్క్‌ ”పని లేని పాత్రలు” అంటాడు. పాశ్చాత్య నాగరికతలో అతి ప్రాథమికమైన బలహీనత సహానుభూతి మాత్రమేనని తేల్చేస్తాడు*. *ఈ బరితెగింపు, ఏమీ కాదనే ధీమా వల్లనే వారు కనీసమైన జవాబుదారీతనం కూడా లేకుండా ప్రవర్తించేలా కొమ్ములు తెస్తుంది. కార్పొరేట్‌ మీడియా ఈ భావాన్ని మళ్లీ మళ్లీ సృష్టిస్తూ దాన్ని మామూలు విషయంగా మార్చేసి ఇప్పుడున్న వ్యవస్థీకృత వాతావరణాన్ని కొనసాగించే పరిస్థితులు కల్పిస్తుంది. మీడియా యాజమాన్యాలలోనూ సమాచార భావజాల రంగంలోనూ ఎలాంటి స్వేచ్ఛా వాణిజ్యం వుండతగదు. ఈ రంగంలో ఆధిపత్యం వహించే చిరు బృందాలు ఇబ్బందికరమైన ఆలోచనలను చిదిమివేస్తాయి.తమ భాగ్యరేఖలను పెంచే విధానాలనే ప్రోత్సహిస్తాయి*. *మోడీ ప్రభుత్వంలో ప్రస్తుత పెట్రోలియం శాఖామంత్రి హరదీప్‌ సింగ్‌, అలాగే ప్రస్తుతం ఆరోపణల పాలైన పారిశ్రామికవేత్త అనిల్‌ అంబానీ జెఫ్రీ ఎప్‌స్టీన్‌తో తమ సంభాషణలను పత్రాలకెక్కించారు. నిజంగా ఏమి జరిగిందీ, దానికి ప్రేరణ ఏమిటి అన్నది తెలియాలంటే సరైన విచారణ ద్వారానే సాధ్యమవుతుంది.* *అయితే అదంతా జరిగింది 2014, 2016, 2017, 2019లలో…దాదాపు ఒక దశాబ్ది తర్వాత ఎప్‌స్టీన్‌ స్వయంగా తన ఘోర నేరాలను అంగీకరించాడు*. *ఇక్కడ నిజమేమిటో బయటికి లాగడానికి మనం పట్టుదలగా కృషి చేయాలి*. *మానవాళికే వ్యతిరేకమైన ఇలాంటి నేరాలు జరిగేందుకు అనుమతిస్తున్న వ్యవస్థాగత మౌలిక చట్రం అంతర్జాతీయ ప్రభావం ఎదుర్కొనేందుకు మనం సిద్ధం కావాలి.* #😁Hello🙋‍♂️