استقبال رمضان رحمتوں، برکتوں اور نوازشاتِ الٰہی کا مہینہ، وہ بابرکت مہینہ جس میں نیکیوں کا ثواب کئی گنا بڑھ جاتا ہے، شیطان قید ہو جاتا ہے اور دل نیکی کی طرف مائل ہو جاتے ہیں۔ ایک مرتبہ پھر یہ مہینہ یعنی رمضان المبارک ہمارے درمیان جلوہ گر ہونے والا ہے، یہ مبارک مہینہ ہر انسان کے لیے اپنی زندگی میں مثبت تبدیلی لانے کا سنہری موقع لے کر آتا ہے ۔ اس مبارک ماہ میں ہر دل ذوقِ عبادت سے لبریز ہوتا ہے۔ باجماعت نمازوں سے مساجد کی رونقیں دوبارہ بحال ہو جاتی ہیں، لوگوں کی قدم نیکیوں کی طرف رواں ہوتے ہیں، تلاوتِ کلامِ مقدس ، حمد و نعت اور ذکر و درود کی خوشبو فضاؤں میں رقص کرنے لگتی ہے۔ ہر طرف سخاوت، محبت اور ہمدردی کا سماں چھا جاتا ہے۔ یتیموں، بیواؤں اور محتاجوں کی مدد اور فقیروں کی دل جوئی چار دانگ عالم میں پھیل جاتی ہے اور دلوں میں انسانیت گھر کر جاتی ہے ۔ یہ مہینہ ہمیں یہ سبق دیتا ہے کہ نیکیاں صرف رمضان تک محدود نہیں رہتیں۔ جس طرح ہم اس بابرکت ماہ میں گناہوں سے کنارہ کشی کرتے ہیں اور نیک اعمال اختیار کرتے ہیں، اسی جذبے کو اپنی باقی زندگی میں بھی جاری رکھنا چاہیے۔ جو برے اعمال ہم رمضان میں چھوڑ سکتے ہیں، وہ مستقل طور پر بھی ترک کیے جا سکتے ہیں۔ اسی طرح سخاوت، غریبوں کی مدد اور احسان کی روح کو صرف اس مہینے تک محدود نہ رکھیں بلکہ ہر دن اپنے اعمال کا حصہ بنائیں۔ رمضان کی یہ روشنی اور رحمت ہمارے دلوں میں ایک نئے عزم کا بیج بوتی ہے۔ ہمیں چاہیے کہ اس مہینے میں پیدا ہونے والی نیکیوں اور تقویٰ کی خوشبو کو اپنی زندگی کا مستقل حصہ بنائیں، دلوں کی نرمی اور روحانیت کو ہمیشہ زندہ رکھیں، اور ہر لمحہ اللہ کی رضا کے لیے جئیں۔ یہ مہینہ صرف روزے رکھنے یا ظاہری عبادت کے لیے نہیں دلوں کی پاکیزگی، روحانیت اور اخلاص پیدا کرنے کا سنہری موقع ہے ۔ #🕋رمضان المبارک شریف اسپشل🤲 🤲