#🇮🇳భారత్ Vs పాక్🇵🇰 మహా యుద్ధం🔥 *‘బలుపు కా బాప్’… నాకైతే పిచ్చ పిచ్చగా నచ్చేశావురా హార్దిక్…‼️* February 18, 2026🏏 మిత్రుడు బెల్లంకొండ ప్రసేన్ రీసెంటుగా ఫేస్‌బుక్‌లో ఓ ఇన్‌స్టా వీడియో బిట్, దానికి చిన్న రైటప్ షేర్ చేసుకున్నట్టు గుర్తుంది… బాగుంది… ఈరోజు వెతికితే పోస్టు ఉంది, కానీ నెట్ నుంచి, సోషల్ మీడియా ప్లాట్‌ఫారాల నుంచి ఆ వీడియో బిట్ మాయం… కారణం తెలియదు గానీ… భలే ఉంది అది… ఇదే టీ20 వరల్డ్ కప్ పోటీలు… కొలంబోలో పాకిస్థాన్‌తో జరిగిన హైవోల్టేజీ మ్యాచ్… అదీ ఫస్ట్ ఓవర్‌లోనే… యాటిట్యూడ్ కా బాప్ అనిపించుకెునే హార్దిక్ పాండ్యా ‘నో లుక్ వికెట్’ సీన్ అది… వెతగ్గా వెతగ్గా… ఓ ఫేస్‌బుక్ రీల్‌లో కనిపించింది… కాపీ రైట్ సమస్యతో ఇది కూడా బహుశా మాయం అయిపోవచ్చు కూడా… ఓసారి ఆ పోస్టులోకి వెళ్దాం… (నిన్నటిదే)… Prasen Bellamkonda …. Altitude of attitude… బలుపంటూ ఉంటే అలానే ఉండాలి. నచ్చావ్ హార్దిక్. # అద్సరేగానీ… నిన్న పాక్ ఇండియా మ్యాచ్ లో కొన్ని ఫ్రేజ్ లు నాకు కొత్తగా అర్ధమయాయి. స్టాండ్ అండ్ డెలివర్ అనే పదబంధాన్ని సెహ్వాగ్ లాంటి వాళ్ళ కొట్టుడుకి వాడతారు. కానీ నిన్న ఉస్మాన్ తారీఖ్ బౌలింగ్ కు ఆ ఫ్రేజ్ సరిగ్గా సరిపోతుందని తెలిసింది. నిలబడి బౌల్ చేయడం. నో లుక్ హిట్ అంటే కొట్టేసి ఆ బంతి సిక్స్ పోయినట్టే అని కనీసం ఆ బంతి వైపు చూడనైనా చూడకపోవడం. ఇది చాలా మంది బాట్స్మన్లలో చూడొచ్చు. కానీ నిన్న హార్దిక్ మొదటి వికెట్ తీస్తూ కనీసం రింకూ ఆ క్యాచ్ పట్టాడా లేదా అని చూడకపోవడం నిజంగా హైట్ ఆఫ్ 'నో లుక్ వికెట్'. భూమిని 70 శాతం నీరు కవర్ చేస్తే మిగతా ముప్పైశాతం రింకూ కవర్ చేస్తాడని ఫీల్డింగ్లో పేరు. హార్దిక్ ది ఆ నమ్మకం కావచ్చు కానీ మనకు రాబోయే వికెట్ గురించి ఇంత నిర్వేదంగా ఉండడం ప్రపంచంలో ఏ మానవమాత్ర బౌలర్ వల్లా కాదు. బలుపు కా బాప్ అయితేనే అది సాధ్యం. నాకైతే పిచ్చ పిచ్చగా నచ్చావురా హార్దిక్. ఉస్మాన్ తారీఖ్ బౌలింగ్ లో అయితే బంతిని ఆలస్యంగా వేసాడు కానీ బ్యాటింగ్ లో బ్యాట్ ను ముందే డిఫెన్స్ పొజిషన్ లో పెట్టేస్తున్నాడు. ఇంత కామెడీ బ్యాటింగ్ పొజిషన్ ను నేనైతే అస్సలు బ్యాటింగ్ రాని చంద్రశేఖర్, దోషి లాంటి వాళ్ళ దగ్గర కూడా చూడలేదు. మ్యాచ్ నడుస్తుంటే మా సీతారాం ఫోన్ చేసి ఏంటి పరిస్థితి అన్నాడు. నెక్స్ట్ ఓవర్లో బాబర్ అవుట్, చూడు అన్నాను. అన్నట్టే అయాడు. నాకు తెలిసిన విషయం పాక్ మేనేజ్ మెంట్ కు ఎందుకు తెలియలేదో అర్ధం కాలేదు. వాడెవడో పాకిస్థాన్ కుర్రోడు చేసిన ‘ బాబర్ ను పాక్ టీమ్ లోనే కాదు పాకిస్థాన్ లోనే ఉంచొద్దు ‘ అన్న కామెంట్ లో కామెడీ కంటే నిజమే ఎక్కువ వుంది. నిన్నటి పాక్ భారత్ మ్యాచ్ సెకండ్ హాఫ్ మొత్తం కామెడీ బాగా పండింది…