ഒരു ജനതയുടെ ഒറ്റപ്പെടലിനും യാത്രാദുരിതങ്ങൾക്കും വിരാമമിട്ടുകൊണ്ട് അരൂക്കുറ്റിയിലെ വടുതലയെയും പെരുമ്പളം ദ്വീപിനെയും തമ്മിൽ ബന്ധിപ്പിക്കുന്ന പെരുമ്പളം - പാണാവള്ളി പാലം നാടിന് സമർപ്പിക്കുകയാണ്. കിഫ്ബിയിലൂടെ 106 കോടി രൂപ വകയിരുത്തിയാണ് ഈ ബൃഹത്തായ പദ്ധതി സർക്കാർ യാഥാർത്ഥ്യമാക്കിയത്. 1455.40 മീറ്റർ നീളവും 11 മീറ്റർ വീതിയുമുള്ള പാലത്തിൽ കാൽനടയാത്രക്കാർക്കായി ഇരുവശങ്ങളിലുമായി 1.5 മീറ്റർ വീതിയിൽ സുരക്ഷിതമായ നടപ്പാതകൾ ഒരുക്കിയിട്ടുണ്ട്. കായലിലൂടെയുള്ള ജലഗതാഗതത്തിന് യാതൊരു തടസ്സവുമുണ്ടാകാത്ത വിധം 55 മീറ്റർ നീളമുള്ള 3 മനോഹരമായ ബോ സ്ട്രിംഗ് ആർച്ച് സ്പാനുകളും (Bow string arch spans) 35 മീറ്റർ നീളമുള്ള 27 സ്പാനുകളും ഈ നിർമ്മിതിയുടെ മാറ്റുകൂട്ടുന്നു. നാലുചുറ്റും വെള്ളത്താൽ ചുറ്റപ്പെട്ട പെരുമ്പളത്തേക്ക് നേരിട്ട് റോഡ് മാർഗ്ഗം എത്താൻ ഇതോടെ സാധിക്കും. ഈ പാലം കേവലമൊരു കോൺക്രീറ്റ് നിർമ്മിതിയല്ല, മറിച്ച് മുഖ്യധാരയിൽ നിന്നും അകന്നുപോകുമായിരുന്ന ഒരു ജനതയെ കൈപിടിച്ചുയർത്തുന്ന പ്രതീക്ഷയുടെ പാലമാണ്. പെരുമ്പളത്തിൻ്റെ അനന്തമായ ടൂറിസം സാധ്യതകൾ ലോകത്തിന് മുന്നിൽ തുറന്നിടുന്നതിനൊപ്പം, ആ നാട്ടിലെ സാധാരണക്കാരായ മനുഷ്യരുടെ ജീവിതനിലവാരം മെച്ചപ്പെടുത്താനും സാമ്പത്തികവും സാമൂഹികവുമായ ഉന്നമനത്തിനും ഈ പാലം വഴിയൊരുക്കും. #🆕 ലേറ്റസ്റ്റ് അപ്ഡേറ്റ്