*సంఘాలలో "ఉష్ట్రపక్షి" (Ostrich) భ్రమ* ఆఫ్రికా ఎడారుల్లో ఉండే ఉష్ట్రపక్షి (Ostrich) కి ఒక విచిత్రమైన గుణం ఉందని చెబుతారు. దానికి ఏదైనా క్రూర జంతువు ఎదురైనప్పుడు లేదా పెద్ద ప్రమాదం ముంచుకొచ్చినప్పుడు, దాన్ని ధైర్యంగా ఎదుర్కోలేక, పారిపోలేక తన తలను తీసుకెళ్లి ఇసుకలో దాచుకుంటుంది. కళ్లు మూసుకుని, "నాకు శత్రువు కనబడటం లేదు కాబట్టి, శత్రువుకి కూడా నేను కనబడటం లేదు, ఈ ప్రమాదం నన్ను ఏమీ చేయదు" అని గుడ్డిగా భ్రమపడుతుంది. కానీ దాని భారీ శరీరం మొత్తం బయటే ఉంటుంది, ఆ శత్రువుకు అత్యంత సులభంగా చిక్కిపోయి ప్రాణాలు కోల్పోతుంది. ప్రమాదాన్ని చూడకుండా కళ్లు మూసుకున్నంత మాత్రాన ప్రమాదం తప్పిపోదు. నేటి సంఘాలలో కూడా కొంతమంది విశ్వాసులు దేవుని వాక్యం పట్ల ఈ "ఉష్ట్రపక్షి" లాగానే ప్రవర్తిస్తుంటారు. వాక్యం చదువుతున్నప్పుడు లేదా సేవకులు వాక్యం ప్రకటిస్తున్నప్పుడు తమలో ఉన్న తప్పులు, పాపాలు తేటతెల్లంగా బయటపడతాయి. అప్పుడు పశ్చాత్తాపపడి సరిదిద్దుకోవాల్సింది పోయి, వాక్యం చదవడం మానేస్తారు లేదా ఆత్మీయ సహవాసానికి దూరంగా వెళ్ళిపోతారు. ప్రార్థన చేయడం మానేసి, "దేవుని సన్నిధి నుండి దూరంగా దాక్కుంటే, ఆయన నా పాపాలను చూడలేడు" అని భ్రమపడతారు. దేవుని వాక్యం అనే అద్దంలో తమ తప్పులను చూడకుండా కళ్లు మూసుకున్నంత మాత్రాన, రాబోయే దేవుని తీర్పు నుండి తప్పించుకోలేరు. తప్పును కప్పిపుచ్చుకునే వాడు ఎప్పటికీ వర్ధిల్లడు! *(సామెతలు 28:13) "తన అతిక్రమములను దాచిపెట్టువాడు వర్ధిల్లడు; వాటిని ఒప్పుకొని విడిచిపెట్టువాడు కనికరము పొందును."* *God bless you all* #📙ఆధ్యాత్మిక మాటలు