ഞാൻ ഓർക്കുകയായിരുന്നു. ഇത്രയും പ്രശ്നങ്ങൾ നേരിട്ട മറ്റൊരാൾ ഉണ്ടോ എന്ന്. ജനിയ്ക്കുന്നതിനു വർഷങ്ങൾ മുൻപ് തന്നെ ഒരുപാടു പേരുടെ ശത്രുവാകേണ്ടി വന്ന ഒരാൾ. അച്ഛനമ്മമാരുടെ വിവാഹ ദിവസം തന്നെ തന്റെ ജനനത്തെ ഓർത്തു അവരുടെ സമാധാനം കെടുത്തിയ ഒരാൾ. ആറു സഹോദരങ്ങളുടെയും വിയോഗത്തിന് കാരണക്കാരനായ ആൾ.. കണ്ണൻ ജനിച്ചത് തന്നെ ഇത്രയും അപവാദങ്ങളും പേറിയാണ്. ജനിച്ച സമയവും സാഹചര്യവും നോക്കിയാലോ ജ്യോതിഷശാസ്ത്ര പ്രകാരം എട്ട് ഒട്ടും ശുഭമല്ലാത്ത സംഖ്യയാണ്. കണ്ണന്റെ ജനനം അഷ്ടമി ദിവസം, അതും എട്ടാമത്തെ പുത്രനായിട്ട്. ജനിച്ചതോ കാരാഗൃഹത്തിൽ. ജനിച്ച ഉടനെ പെറ്റമ്മയുടെ അടുത്തുനിന്നു മാറ്റപ്പെട്ടു. അതും വർഷങ്ങളോളം. ഒരു കുഞ്ഞിനോട് ചെയ്യാവുന്ന ഏറ്റവും വലിയ ക്രൂരത. ലാളനകൾ ഏറ്റുവാങ്ങേണ്ട പ്രായത്തിൽ കൊല്ലാൻ വന്നത് ഒന്നല്ല, അനേകം പേർ. ടീനേജ് ആയപ്പൊളേയ്ക്കും പ്രേമിച്ച പെണ്ണിനോട് ഒറ്റദിവസം കൊണ്ട് ഗുഡ് ബൈ പറഞ്ഞു നാടുവിട്ടു പോകേണ്ടി വന്നു. അതും ഇനി ഒരിയ്ക്കലും കാണില്ല എന്ന് അറിഞ്ഞുകൊണ്ട് തന്നെ. അമ്മാവനെ കൊന്നവൻ എന്ന അപഖ്യാതി വേറെ. അതിനിടയിൽ മനസ്സാ വാചാ അറിയാതെ സ്യമന്തകം കട്ട കള്ളനെന്ന പേരും വീണു. രാജാവിന്റെ തടവറയിൽ നിന്ന് മോചിപ്പിച്ച പതിനാറായിരത്തെട്ടു സ്ത്രീകളെ സമൂഹം പുറംതള്ളിയപ്പോൾ അവരെ രാഞ്ജിമാരുടെ പദവി നൽകി ഏറ്റവും വലിയ നവോത്‌ഥാന മാതൃക കാണിച്ചതിന് പെണ്ണുപിടിയൻ എന്ന് പലരും വിളിച്ചു. താൻ ജനിച്ച യാദവകുലം മുഴുവൻ തമ്മിൽ തല്ലി നശിയ്ക്കുന്നത് കാണേണ്ടി വന്നു. ഇടയ്ക്ക് ദ്വാരകയിൽ പോയി ഒളിച്ചു താമസിയ്ക്കേണ്ടിയും വന്നു. ഇതൊക്കെ ആയിട്ടും. ഒരു തുള്ളി കണ്ണുനീർ മനോഹരമായ ആ കണ്ണുകളിൽ നിന്ന് വീണതായി പറയുന്നില്ല എവിടെയും. ആകെ കണ്ണ് നിറഞ്ഞതായി പറയുന്നത് കുചേലനെ കണ്ടപ്പോളാണ്. അത് സന്തോഷാശ്രുക്കൾ ആണെന്ന് വേണം അനുമാനിയ്ക്കാൻ. കരഞ്ഞില്ലെന്നു മാത്രമല്ല ഒരിയ്ക്കൽപോലും ഒന്ന് മൂഡ് ഓഫ് ആയതായി. കൺഫ്യൂസ്ഡ് ആയി നിന്നതായി പറയുന്നില്ല. ഒടുവിൽ ആലിൻ കൊമ്പിൽ കിടന്ന്, കാട്ടാളന്റെ അമ്പേറ്റ്‌ വിട പറയുമ്പോളും ആ മുഖത്തു പുഞ്ചിരി ആയിരുന്നു. ഞാൻ ആലോചിയ്ക്കുകയായിരുന്നു ഇത്രയും നെഗറ്റിവിറ്റികളിൽ ജനിച്ചു, സമാനതകളില്ലാത്ത പ്രശ്നങ്ങളെ നേരിട്ട് ജീവിച്ചപ്പോൾ പോലും ആ പ്രതിസന്ധികളെ എല്ലാം ധീരതയോടെയും പുഞ്ചിരിയോടെയും നേരിട്ട്, ആസ്വാദ്യകരമായ ജീവിതം നയിച്ച് ഇങ്ങനെ വേണം ജീവിയ്ക്കാനെന്ന് കാണിച്ചുതന്ന കണ്ണന്റെ മുൻപിൽ ഇതിന്റെ ഒരംശം പോലും പ്രശ്നങ്ങളില്ലാത്ത നമ്മളൊക്കെ ചെന്ന് നിന്ന് കരയുമ്പോൾ എന്തായിരിയ്ക്കും കണ്ണന്റെ മനസ്സിൽ തോന്നുന്ന വികാരം. എനിയ്ക്ക് കിട്ടിയ ഉത്തരമിതാണ് ആ വിഗ്രഹത്തിന് ചലനശേഷി ഉണ്ടായിരുന്നെങ്കിൽ ഇറങ്ങി വന്നു കരണത്തൊന്ന് തന്നേനെ. ഒപ്പം ചോദിയ്ക്കുകയും ചെയ്തേനേ ഞാൻ ജീവിച്ചു കാണിച്ചുതന്നു, പോരാഞ്ഞ് സംസ്കൃതത്തിലും അത് മനസ്സിലാകാത്തവർക്ക് മലയാളത്തിലും എഴുതിവെപ്പിച്ചിട്ടുണ്ട്. എന്നിട്ടും ഇവിടെവന്ന് മോങ്ങുകയാണ്. അതുകൊണ്ട് നമുക്കും ജീവിയ്ക്കാം കണ്ണനെ പോലെ. പ്രശ്നങ്ങളിൽ തളരാതെ.. പ്രതിസന്ധികളിൽ പതറാതെ.. പുഞ്ചിരിയോടെ. അപ്പോൾ കണ്ണനും ഉണ്ടാവും കൂടെ..... കടപ്പാട് Suresh Krishna #🌃 ഗുഡ് നൈറ്റ് #രാധേ കൃഷ്ണ #🙏 കൃഷ്ണ ഭക്തി #🙏 ശ്രീകൃഷ്ണഭഗവാൻ #🙏 ഭക്തി Status