കുഞ്ഞച്ചൻ അപ്പന്റെ മരണശേഷം ഞാൻ അമ്മയുടെ വീട്ടിൽ നിന്നാണ് വളർന്നത് .എന്റെ അമ്മയാണ് ആ വീട്ടിലെ ഏറ്റവും മൂത്ത സന്തതി .അപ്പാപ്പനും അമ്മാമ്മക്കും എന്റെ അമ്മ ഉൾപ്പെടെ ഏഴ് മക്കൾ പിന്നെ ഞാനും എന്റെ അനിയനും അങ്ങനെ ആകെ മൊത്തം ഒരു പഞ്ചായത്ത് തുടങ്ങാനുള്ള ആളുകള്‍ അവിടെ തന്നെയുണ്ട് . ആ വീട് മൊത്തത്തില്‍ ഒരു രണ്ടു പഞ്ചായത്തിനുള്ള സ്ഥലം കാണും .ഇവരുടെ ഇടയിൽ വളർന്നു വന്നതുകൊണ്ട് പ്രത്യേകം എടുത്ത് പറയത്തക്ക ഒരു ബാല്യകാലസഖിയൊന്നും എനിക്കുണ്ടായിരുന്നില്ല. രണ്ടു അമ്മാവന്‍മാരും നാല് മേമ്മമാരും പിന്നെ എന്റെ സഹോദരനും ആകെപ്പാടെ വീടിനകം ജഗപൊക ,ഇവരൊക്കെത്തന്നെയാണ് എന്റെ ബാല്യകാലസഖികൾ . N H 47ന്റെ അരികിലൂടെ വേണം സ്കൂളിൽ പോകാൻ .അടുത്ത വീട്ടിലെ ലാലി ചേച്ചി (പേര് ഒന്ന് മാറ്റി പിടിച്ചു ട്ടോ ) താറാവ് കൂട്ടങ്ങളെ വെള്ളത്തിലിറക്കാൻ കൊണ്ടുപോകുന്നതുപോലെയാണ് ഞാനും ആ പ്രദേശത്തുള്ള കുറച്ചു കുട്ടികളുമായി സ്കൂളിൽ പോയിരുന്നത് . ലാലിച്ചേച്ചിയുടെ ആങ്ങള ഒരു വടിയും പിടിച്ച് കൂടെ കാണും . പറയാതിരിക്കാൻ വയ്യ ലാലിച്ചേച്ചി ആളൊരു സുന്ദരിയാണ്. അതുകൊണ്ടുതന്നെ ഞങ്ങൾ പോകുന്ന വഴിയിൽ കുറച്ച് ആരാധകരൊക്കെ കാണും . എപ്പോഴും വാഹനങ്ങൾ ചീറിപ്പാഞ്ഞു പോകുന്നതിനാൽ വഴിയരികിൽ കളിക്കാനൊന്നും സാധിക്കില്ലായിരുന്നു. എന്തായാലും നമുക്ക് ഈ കഥയിലെ നായകനിലേക്കു കടക്കാം .അത് മറ്റാരുമല്ല എന്റെ കുഞ്ഞച്ചൻ .എന്റെ ബാല്യകാലസഖി .എന്റെ അമ്മയുടെ രണ്ടാമത്തെ ആങ്ങള .എന്റെ അമ്മക്ക് രണ്ട് സഹോദരങ്ങളാണെന്നു പറഞ്ഞല്ലോ. മൂത്തയാൾ ഇടവക പള്ളിയിലെ വികാരിയെ പോലെ ഭയങ്കര കർക്കശക്കാരനായിരുന്നു. അപ്പന്റെ സ്ഥാനത്തു നിന്ന് എന്റെ എല്ലാ കാര്യങ്ങളും ചെയ്തിരുന്നത് ഞാൻ വല്യച്ഛൻ എന്ന് വിളിക്കുന്ന അമ്മയുടെ ആദ്യത്തെ ആങ്ങള ആയിരുന്നു .ആ കുടുംബത്തിലെ മുഴുവൻ അംഗങ്ങളെയും തീറ്റിപോറ്റുന്നതിൽ വല്യച്ഛനുള്ള പങ്ക് അവിസ്മരണീയമാണ് . എന്റെ കളിക്കൂട്ടുകാരൻ കുഞ്ഞച്ചൻ ആണ് .ഞങ്ങൾ തമ്മിൽ പ്രായവ്യത്യാസമില്ല എന്ന ധാരണ തെറ്റാണ്.എങ്ങനെ പോയാലും ഒരു പതിനാല് ഓണം കുഞ്ഞച്ചൻ കൂടുതൽ ഉണ്ടിരിക്കണം.പക്ഷെ മനസ്സുകൊണ്ട് ഒരുപാട് ഇളയതാണ് .നാട്ടിൽ അവധിക്ക് പോകുമ്പോൾ കുഞ്ഞച്ചൻ എന്റെ മക്കളുടെ കൂടെ കളിക്കുന്നത് കാണുമ്പോൾ ഞാനും എന്റെ ബാല്യം ഓർത്തുപോകും . കുട്ടിയും കോലും കളിക്കുന്നതിനിടയിൽ കുഞ്ഞച്ചന്റെ കോല് തെറിച്ചുവന്ന് എന്റെ കണ്ണിൽ കൊണ്ട അന്നാണ് ഞാനാദ്യമായി ഒരായിരം സൂര്യന്മാരെ ഒരുമിച്ച് കാണുന്നത് .എന്നെ ആദ്യമായി അടിച്ച തങ്കമ്മ ടീച്ചറിന്റെ കണ്ണിൽ മുളക് തേക്കും എന്നും പറഞ്ഞ്‌ കാന്താരി പറിച്ചു കൊണ്ടുവന്നതിൽ നിന്ന് എന്നോടുള്ള സ്നേഹത്തിന്റെ ആഴം അളക്കാവുന്നതേയുള്ളു . ആ വലിയ വീട്ടിൽ ഫലവൃക്ഷങ്ങളും, വളർത്തു മൃഗങ്ങളും ധാരാളം ഉള്ളതിനാൽ തീറ്റക്ക് മുട്ടില്ലായിരുന്നു .ഒറ്റ നിർബന്ധം മാത്രം വേണേൽ പെട്ടെന്ന് എടുത്ത് തിന്നേക്കണം അല്ലേൽ ചട്ടി കാലിയാകും .അമ്മാമ്മക്ക് എന്നോട് കുറച്ചു കൂടുതൽ സ്നേഹം ഉള്ളതിനാൽ എന്റെ ദൗർബല്യമായ പുഴുങ്ങിയ മുട്ടയും , വറുത്ത മത്തിയും ,കോഴിച്ചാറും, വറുത്തരച്ച ബീഫും ,കുരുമുളകിട്ട പോർക്ക് ഫ്രയും എല്ലാം കുറച്ചു കൂടുതൽ എനിക്കായി മാറ്റിവച്ചിട്ടുണ്ടാകും . ഒരുദിവസം പുട്ടും കടലക്കറിയുമാണ് പ്രഭാത ഭക്ഷണം കൂട്ടത്തിൽ മുട്ട പുഴുങ്ങിയതും .മുട്ട കുറവായതിനാൽ എല്ലാവർക്കും ഇല്ല .എന്തായാലും എന്റെ പങ്ക് ആദ്യമേ ഞാൻ അകത്താക്കി .എല്ലാവരും കഴിക്കാനിരിക്കുന്നു .ഇനി ആരുടെ മുട്ട തോണ്ടും എന്നോർത്ത് കൂട്ടത്തിൽ ഞാനും ഉണ്ട് .പണ്ടുമുതലേ ഇഷ്ടമുള്ള ഭക്ഷണം ആദ്യം കഴിച്ച് പിന്നേം വേണേൽ അടുത്ത പാത്രത്തിൽ കയ്യിട്ടു വാരുന്ന മനോഹരമായ ആചാരം (ഇപ്പോൾ ഇല്ല )എനിക്കിഷ്ടായിരുന്നു .ആ ആചാരത്തിലെ ബലിയാട് മിക്കപ്പോഴും കുഞ്ഞച്ചനായിരുന്നു. അമ്മാമ്മയുടെ കറുത്ത കരങ്ങളുടെ പിന്തുണയും ഇല്ലാതില്ല .അന്ന് കുഞ്ഞച്ചന് ചുമയായതിനാൽ മുട്ടയിൽ ആടലോടകം വാട്ടിപ്പിഴിഞ്ഞു പൊരിച്ചാണ് കൊടുത്തിരിക്കുന്നത്.കുഞ്ഞച്ചൻ അത് മുഴുവൻ തിന്നാനായി അതിന്റെ രുചിയെ കുറിച്ച് അമ്മാമ വാചാലയായതുമുതൽ എന്റെ കണ്ണുകൾ രണ്ടും കുഞ്ഞച്ചന്റെ പാത്രത്തിൽ ആയിരുന്നു .ആ മുട്ടയിൽ നിന്ന് കുറച്ച് എങ്ങനെ കൈക്കലാക്കും എന്നാലോചിച്ച് എന്റെ തലയിലൂടെ പുക പോയിത്തുടങ്ങി . അതാ പ്രതീക്ഷിച്ച സമയം വന്നെത്തി കഴിക്കാനിരുന്ന കുഞ്ഞച്ചന് നമ്മുടെ കുഞ്ഞാവ പറയുന്ന ചീച്ചി മുള്ളണം .ഇതുവരെ ആ മുട്ട പൊരിച്ചത് തൊട്ടുനോക്കാത്ത കുഞ്ഞച്ചനറിയാം ആടലോടകം അല്ല കാഞ്ഞിരക്കുരു പൊടിച്ചു കലക്കി പൊരിച്ചതാണെന്നു പറഞ്ഞാലും തിരിച്ചു വരുമ്പോളേക്കും ഞാനതു റാഞ്ചുമെന്ന്. അമ്മാമ്മയുടെ സംരക്ഷണത്തിൽ കുഞ്ഞച്ചന് വിശ്വാസം പോരാ .എന്റെ മനസ്സിലെ ലഡു ആണേൽ പൊട്ടിച്ചിതറിക്കൊണ്ടിരിക്കുന്നു .എല്ലാം അപ്രതീക്ഷിതമായിരുന്നു സുഹൃത്തുക്കളെ ഒരു നിമിഷത്തിനുള്ളിൽ കുഞ്ഞച്ചന്റെ തുപ്പൽ പ്രയോഗം. പൊരിച്ച മുട്ടയിൽ പെയിന്റ് സ്പ്രേ ചെയ്തപോലെ കുഞ്ഞച്ചൻ തുപ്പൽ കൊണ്ട് കളമെഴുതി .വളരെ ലളിതമായി പറഞ്ഞാൽ മുട്ടയിൽ തുപ്പിവച്ച് കുഞ്ഞച്ചൻ മനസമാധാനത്തോടെ ചൂച്ചി മുള്ളി വന്നു. ആർക്കോ വേണ്ടിതിളച്ച മീൻകറി പോലെ കുഞ്ഞച്ചന്റെ പാത്രത്തിലെ മുട്ട പൊരിച്ചത് എന്നെ നോക്കി ചിരിച്ചോ? കണ്ണൂർകാരൻ ❤️❤️❤️❤️ #📚 ട്വിസ്റ്റ് കഥകൾ #📙 നോവൽ #📔 കഥ #💞 പ്രണയകഥകൾ #✍ തുടർക്കഥ