आपल्याला सवय झालीय. कधी नागरिकत्वाचे पुरावे घेऊन, कधी नोटा बदलायला रांगा लावण्याची आपल्याला सवय झालीय. कधी लसी टोचायची कागद हातात घेऊन, अमक्याला तमका कागद जोडायला रांगेत उभ राहण्याची सवय झालीय. अशी रांगेत उभी राहिलेली बिनचेहऱ्याची , पिचलेली माणस बघण्याची आपल्याला सवय झालीय. फ्रीजमध्ये कसल मांस आहे या संशयावरून माणूस तुडवून मारला जाण्याची आपल्याला सवय झालीय. आणि त्याचा तपास करणारा पोलीसही तसाच मरण्याची आपल्याला सवय झालीय. टीव्हीवाले भाट पोलिसांनी धरले तर अर्ध्या रात्री उघडणारे कोर्टाचे दरवाजे बघायची सवय झालीय. आणि महिनोंमहिने बेकायदेशीर सरकार राजरोस राज्यात चालू देणार कोर्ट बघण्याचीही सवय झालीय. खून, बलात्कार करून गुन्हेगार ठरलेले निवडणुकीच्या काळात पॅरोल वर सुटण्याची आणि पर्यावरणवादी शिक्षक जेलमध्ये खितपत पडत बघण्याची सवय झालीय. ३०० किलो स्फोटक राजरोस येऊन सैनिक मारले जाण्याची आणि अतिरेकी घुसून निष्पाप नागरिक मारले जाण्याची सवय झालीय. राजकीय सूड अथवा खिंडीत गाठून दावणीला बांधायला यंत्रणा बटिक म्हणून वापरल्या जात असल्याची सवय झालीय. आणि सोम्यागोम्याने केलेल्या आरोपावरून महिनोंमहिने माणस कोठडीत अडकून पडल्याच बघण्याचीही सवय झालीय. सरकारच्या मर्जीतल्या कंपन्यांनी माणसांनी नंगानाच घातला तरी झापड बांधून वाळूत तोंड खुपसणाऱ्या यंत्रणा बघण्याची सवय झालीय. आणि विरोधातला आवाज दाबून टाकायला छापे पडण्याचीही सवय झालीय. टीव्हीवर दिवसरात्र द्वेषाचे विषारी मळे पिकवणाऱ्या सापांची सवय झालीय. आणि सत्यासाठी लढणारा शशिकांत कोकणात चिरडून मरण्याचीही सवय झालीय. अन्नदात्या शेतकऱ्यांना चिरडून मारणारे मोकाट फिरत बघण्याची सवय झालीय. मुलींवर बलात्कार करणाऱ्याच्या समर्थनाचे मोर्चे निघण्याची सवय झालीय. सामुहिक बलात्काराचे गुन्हेगार सुटून सत्कार घेताना बघण्याची सवय झालीय. आपल्याच नागरिकांच्या घरांवर बुलडोझर चालण्याची सवय झालीय. हि सवय नेमकी कधी झाली ? मेणबत्त्या हातात घेऊन, ‘ मै भी अण्णा ‘ च्या टोप्या घालून २०१२-१३ ला रस्त्यावर लाखोंच्या संख्येने उतरलेली तरुणाई आता तिशी पस्तीशी मध्ये असेल ना ? अगदीच म्हातारी झालेली नाहीयेत ती माणस ना ? तरीही त्यांना त्याकाळी खटकणारी गोष्ट आता अक्राळविक्राळ स्वरुपात आलीय तरीही त्याची सवय झालीय ? धर्माची अफू खाऊन गुंगल्यावर सगळ्याना सवय होते. आनंद शितोळे #आपल्या_धडावर_आपलेच_डोके #सीधी_बात #SayNoToHatred #🙏 प्रेरणादायक बॅनर