#😳 ഞാൻ ചത്തിട്ടില്ല; വ്യാജ വാർത്തക്കെതിരെ മലയാള നടി മലയാളികളുടെ പ്രിയപ്പെട്ട നടിയും ജനപ്രിയ അവതാരകയുമായ ജുവൽ മേരി താൻ മരിച്ചുപോയെന്ന രീതിയിൽ സോഷ്യൽ മീഡിയയിൽ പ്രചരിക്കുന്ന വ്യാജ വാർത്തകൾക്കെതിരെ ശക്തമായ പ്രതികരണവുമായി രംഗത്ത്. കഴിഞ്ഞ രണ്ട് ദിവസമായി ഓൺലൈൻ മാധ്യമങ്ങളിൽ തന്റെ മരണവാർത്ത നിറയുന്ന പശ്ചാത്തലത്തിലാണ് താരം നേരിട്ട് വീഡിയോ പങ്കുവെച്ച് സത്യാവസ്ഥ വെളിപ്പെടുത്തിയത്. ​"ചത്തിട്ടില്ല മക്കളേ ഞാൻ ചത്തിട്ടില്ല" എന്ന് പറഞ്ഞുകൊണ്ടാണ് ജുവൽ മേരി തന്റെ വീഡിയോ ആരംഭിക്കുന്നത്. "രണ്ട് ദിവസമായി എന്റെ ശബ്ദം നഷ്ടപ്പെട്ടു, ഞാൻ മരണം കാത്തു കിടക്കുകയാണ്, എനിക്ക് അനങ്ങാൻ പറ്റില്ല എന്നൊക്കെ പറഞ്ഞ് കുറേ ഓൺലൈൻ മീഡിയക്കാർ എന്നെ കൊന്ന് എന്റെ അടിയന്തരത്തിന് കാർഡ് അടിക്കുന്നുണ്ട്. പക്ഷെ നമ്മൾ ഫിനിഷ്ഡ് അല്ല," എന്ന് താരം വീഡിയോയിൽ വ്യക്തമാക്കി. മുൻപ് താൻ പങ്കെടുത്ത ഒരു പരിപാടിയിലെ വാക്കുകൾ വളച്ചൊടിച്ചാണ് ഓൺലൈൻ മാധ്യമങ്ങൾ ഇത്തരമൊരു ക്രൂരത ചെയ്തതെന്നും താരം ചൂണ്ടിക്കാട്ടി. ​2023-ലായിരുന്നു ജുവൽ മേരിക്ക് തൈറോയ്ഡ് കാൻസർ സ്ഥിരീകരിച്ചത്. തുടർന്ന് കൃത്യമായ ശസ്ത്രക്രിയകൾക്കും ചികിത്സകൾക്കും വിധേയയായ താരം കാൻസറിനെ പൂർണ്ണമായും തോൽപ്പിച്ചാണ് ജീവിതത്തിലേക്ക് ശക്തമായി മടങ്ങിവന്നത്. അടുത്തിടെ 'കേരള കാൻ' എന്ന പരിപാടിയിൽ പങ്കെടുത്തപ്പോൾ താൻ മുൻപ് നേരിട്ട ഈ കാൻസർ പോരാട്ടത്തെക്കുറിച്ച് താരം സംസാരിച്ചിരുന്നു. എന്നാൽ ഈ പഴയ വാക്കുകൾ മാത്രം അടർത്തിയെടുത്ത്, ജുവൽ മേരി ഇപ്പോൾ അതീവ ഗുരുതരാവസ്ഥയിലാണെന്ന ധ്വനിയോടെ തെറ്റിദ്ധരിപ്പിക്കുന്ന ക്യാപ്ഷനുകൾ നൽകിയാണ് ചില ഓൺലൈൻ ചാനലുകൾ വ്യാജ മരണവാർത്തകൾ നിർമ്മിച്ചത്. ​ഇത്തരം വ്യാജ വാർത്തകൾ ഉണ്ടാക്കുന്ന ഓൺലൈൻ സഹോദരന്മാരോട്, തന്റെ മരിപ്പിനുള്ള ചായയും വടയും കൊടുക്കാൻ സമയമായിട്ടില്ലെന്ന് ജുവൽ പരിഹസിച്ചു. താൻ പൂർണ്ണ ആരോഗ്യവതിയായി, ജീവിതം അതിന്റെ എല്ലാ സന്തോഷത്തോടെയും ആസ്വദിച്ചു ജീവിക്കുകയാണെന്ന് വ്യക്തമാക്കിയ താരം, വ്യാജ വാർത്തകൾ കണ്ട് ഭയപ്പെടരുതെന്നും ഇനി ആ വാർത്ത അങ്ങ് വിട്ടേക്കണമെന്നും ആരാധകരോട് ആവശ്യപ്പെട്ടു. തന്നെ സ്നേഹിക്കുന്ന ഒരുപാട് പേർ ഈ വാർത്ത കണ്ട് വല്ലാതെ ടെൻഷൻ അടിച്ച് വിളിക്കുകയും കാര്യങ്ങൾ അന്വേഷിക്കുകയും ചെയ്തതായും ജുവൽ മേരി കൂട്ടിച്ചേർത്തു.