#🤩 എന്റെ ആദ്യ പോസ്റ്റ് ഡിലിമിറ്റേഷൻ ബില്ലിനെ ''പട്ടിൽ പൊതിഞ്ഞ പാഷാണം'' എന്ന് വിശേഷിപ്പിച്ച് ഇ.ടി മുഹമ്മദ് ബഷീർ എം.പി. പാർലമെന്റ് മണ്ഡലങ്ങളുടെ പുനഃക്രമീകരണവും വനിതാ സംവരണ ബില്ലും പരസ്പരം കൂട്ടിക്കുഴച്ച് ജനാധിപത്യ അവകാശങ്ങൾ ധംസിക്കുന്ന നിലയിൽ ആണെന്ന് അദ്ദേഹം പാർലമെന്റിൽ നടത്തിയ പ്രസംഗത്തിൽ പറഞ്ഞു. വനിതാ സംവരണം 2023-ൽ തന്നെ പിന്തുണച്ചതുപോലെ ഇപ്പോഴും പൂർണ്ണഹൃദയത്തോടെ പിന്തുണയ്ക്കുന്നതായും, എന്നാൽ ഒ.ബി.സി വിഭാഗങ്ങൾക്ക് സബ്ക്വോട്ട ഉറപ്പാക്കാതെ അതിന്റെ യഥാർത്ഥ ലക്ഷ്യം കൈവരിക്കാനാകില്ലെന്നും അദ്ദേഹം ചൂണ്ടിക്കാട്ടി. വനിതാ സംവരണം നടപ്പിലാക്കുന്നതിൽ സത്യസന്ധത കാണിക്കാതെ, 12 വർഷത്തോളം നീട്ടിക്കൊണ്ട് പോയി അത് ഡിലിമിറ്റേഷനുമായി ബന്ധിപ്പിച്ച് വൈകിപ്പിക്കാനുള്ള നീക്കമാണ് കേന്ദ്ര സർക്കാർ നടത്തുന്നതെന്നും അദ്ദേഹം ആരോപിച്ചു. 131-ാമത് ഭരണഘടനാ ഭേദഗതി ബില്ലിനെക്കുറിച്ച് സംസാരിക്കവെ, ഇത്തരം ദൂരവ്യാപക പ്രതിഫലനങ്ങളുള്ള നിയമങ്ങൾ അടിയന്തരമായി പാർലമെന്റിൽ അവതരിപ്പിക്കുന്നതും ചർച്ചയ്ക്ക് ആവശ്യമായ സമയം നൽകാതിരിക്കുന്നതും പാർലമെന്റിന്റെ ഗൗരവവും വിശ്വാസ്യതയും തകർക്കുന്നതാണെന്ന് അദ്ദേഹം വിമർശിച്ചു. ''പാർലമെന്റിന്റെ ഗൗരവം നഷ്ടപ്പെടുമ്പോൾ ജനാധിപത്യം വഴിതെറ്റും'' എന്നും അദ്ദേഹം കൂട്ടിച്ചേർത്തു. വനിതാ സംവരണവും ഡിലിമിറ്റേഷനും ഒന്നിച്ചു കൊണ്ടുവരാനുള്ള നീക്കത്തിൽ യാതൊരു യുക്തിയും ഇല്ലെന്നും ഇത് ചില സംസ്ഥാനങ്ങളുടെ പാർലമെന്റ് പ്രതിനിധിത്വം കുറയ്ക്കാൻ ഇടയാക്കുമെന്നും അദ്ദേഹം മുന്നറിയിപ്പ് നൽകി. പ്രത്യേകിച്ച് തമിഴ്‌നാട്, കേരളം, കർണാടക, ആന്ധ്രാപ്രദേശ്, തെലങ്കാന, ഒഡീഷ, പശ്ചിമ ബംഗാൾ, പഞ്ചാബ് തുടങ്ങിയ സംസ്ഥാനങ്ങൾക്ക് അനീതി സംഭവിക്കാമെന്ന് അദ്ദേഹം പറഞ്ഞു. ഇത് ഇന്ത്യയുടെ ഫെഡറൽ ആത്മാവിനും ഭരണഘടനയുടെ അടിസ്ഥാന തത്വങ്ങൾക്കും വിരുദ്ധമാണ്. സ്ത്രീ ശാക്തീകരണത്തെക്കുറിച്ചുള്ള കേന്ദ്ര സർക്കാരിന്റെ അവകാശവാദങ്ങളെ ചോദ്യം ചെയ്ത അദ്ദേഹം, വനിതാ ക്ഷേമ പദ്ധതികൾക്ക് മതിയായ ബജറ്റ് വകയിരുത്തൽ ഇല്ലെന്നും, സ്ത്രീകൾക്കെതിരായ കുറ്റകൃത്യങ്ങൾ വർധിക്കുന്നതും ആശങ്കാജനകമാണെന്നും പറഞ്ഞു. സ്ത്രീകളുടെ രാഷ്ട്രീയ പ്രതിനിധിത്വം ഉറപ്പാക്കുന്നതിൽ സർക്കാർ താമസം വരുത്തുന്നതായും, തൊഴിൽ, സുരക്ഷ, സമാന വേതനം തുടങ്ങിയ അടിസ്ഥാന വിഷയങ്ങളിൽ കാര്യമായ പുരോഗതി കൈവരിച്ചിട്ടില്ലെന്നും കുറ്റപ്പെടുത്തി. ''ഫെഡറലിസം വികസനത്തിന് തടസ്സമല്ല, അത് ഇന്ത്യയുടെ ഐക്യത്തിന്റെ അടിത്തറയാണ്. ശക്തമായ സംസ്ഥാനങ്ങൾ ശക്തമായ രാജ്യത്തെ സൃഷ്ടിക്കും,'' എന്നായിരുന്നു ബഷീർ എംപിയുടെ സമാപന വാക്കുകൾ. കേന്ദ്ര സർക്കാർ സഹകരണ ഫെഡറലിസത്തിന്റെ ആത്മാവിനെ മാനിച്ച് സംസ്ഥാനങ്ങളെ സമാന പങ്കാളികളായി കാണണമെന്നും അദ്ദേഹം ആവശ്യപ്പെട്ടു. #delimitationbill2026