*നെഞ്ചോരം നി മാത്രം 💞* ഭാഗം : 28 ✍️ ഇമ്മു ഞാനും പിന്നെ രണ്ട് പേരും അടങ്ങിയതാണ് ഞങ്ങളുടെ ഗാങ്... ഞാൻ പിന്നെ മീനാക്ഷി എന്ന മീനൂട്ടിയും അഞ്ജന എന്ന അഞ്ജുവും. ഫസ്റ്റ് ഇയർ ഒന്നും വലിയ കുഴപ്പമില്ലാതെ തന്നെ കടന്നു പോയി റാഗിങ് ഉണ്ടായിട്ടുണ്ടെങ്കിൽ പോലും ഒന്നും പരിധിയിൽ കവിഞ്ഞു പോകാറില്ല.കാരണം അവിടെ പഠിപ്പിക്കുന്ന ടീച്ചേഴ്സും ഞങ്ങളുടെ പ്രിൻസിപ്പളും അത്രയും സ്ട്രിക്ട് ആണ്.ഫസ്റ്റ് ഇയർ ഫസ്റ്റ് ഡേ ആണ് ആ സംഭവം നടക്കുന്നത്. അത് വരെ പറഞ്ഞു തീർത്തതും അവളുടെ ഓർമ്മകൾ ആ ദിവസത്തിലേക്ക് ഊളിയിട്ടു. അന്ന് ഫ്രഷേഴ്‌സ് ഡേ ആയിരുന്നു.ഞങ്ങൾ എല്ലാവരും കൂടി പകുതി നേരം പരിപാടി കണ്ടിരുന്ന് പിന്നീട് ബോറടിച്ചപ്പോൾ പുറത്തേക്കിറങ്ങി നേരെ ഞങ്ങളുടെ ക്ലാസ്സ്‌ റൂമിന്റെ അവിടേക്ക് നടന്നു. അവിടേക്ക് നടന്നടുക്കുന്തോറും എന്തെല്ലാമോ ശബ്ദങ്ങൾ ഞങ്ങൾ കേൾക്കുവാൻ ഇടയായി. ആദ്യം ഞങ്ങൾ അത് ഞങ്ങളുടെ തോന്നൽ ആണെന്ന് കരുതി അവഗണിച്ചെങ്കിലും പിന്നെയും ഇതേ ശബ്ദം ആവർത്തിച്ചു കേൾക്കുവാൻ തുടങ്ങിയപ്പോൾ ഞങ്ങൾ വേഗം ക്ലാസ്സ്‌ റൂമിലുള്ള ഒരു ജനാലയിലൂടെ അകത്തേക്ക് എത്തി നോക്കിയപ്പോൾ  കാണുന്ന കാഴ്ച ഒരു മൂന്നു പേർ ചേർന്ന് ഒരു പെൺകുട്ടിയെ ഉപദ്രവിക്കാൻ ശ്രമിക്കുന്നതാണ്.അത് കണ്ടതും അവരുടെ അടുത്തേക്ക് പോകാൻ ഒരുങ്ങി നിന്ന എന്നെ അഞ്ജുവും മീനുവും കൂടി തടഞ്ഞു.അത് കണ്ടതും ഞാൻ എന്താണെന്നർത്ഥത്തിൽ രണ്ടു പേരെയും മുഖം ചുളിച്ചു കൊണ്ട് നോക്കി. " ആമി വാ പോകാം... ഇനിയും നമ്മൾ ഇവിടെ നിന്നാൽ... അവർ എങ്ങാനും നമ്മളെ കണ്ടാൽ ആകെ പ്രശ്നമാകും ട്ടാ.... " എന്റെ നോട്ടം കണ്ടിട്ടാകണം മീനു എന്റെ കൈയിൽ പിടിച്ചു വലിച്ചുകൊണ്ട് പറഞ്ഞു.ഞാൻ അവളുടെ വാക്കുകൾക്ക് വില കൽപിക്കാതെ എന്റെ കൈയിൽ മുറുകെ പിടിച്ചിരിക്കുന്ന അവളുടെ കൈകളെ എന്നിൽ നിന്നും അടർത്തി മാറ്റി രൂക്ഷമായി രണ്ടു പേരെയും ഒന്ന് നോക്കികൊണ്ട് ക്ലാസിനുള്ളിലേക്ക് പ്രവേശിച്ചു. എന്നെ അവിടെ അപ്രതീക്ഷിതമായി കണ്ടതിനാലാകണം ഒരാളുടെ ഒഴിച്ച് ബാക്കി രണ്ടു പേരുടെയും മുഖത്ത് ചെറിയ തോതിൽ ഞെട്ടൽ കാണാനുണ്ട് . എന്നാൽ അയാളുടെ മുഖത്ത് മാത്രം പരിഹാസത്തോടെയുള്ള ചിരിയാണ്.പെട്ടന്ന് ആ മുഖത്തെ ചിരി അവിടെ ഗൗരവം നിറഞ്ഞു നിന്നു.അത് കണ്ടതും അവൾ തികട്ടി വന്ന ദേഷ്യത്തെ അടക്കി പിടിച്ചു കൊണ്ട് ആ പെൺകുട്ടിയുടെ അടുത്തേക്ക് ചെന്ന് നിന്നു. അവൾ ആകെ പേടിച്ചിട്ടുണ്ടെന്ന് തോന്നുന്നു.കണ്ടാൽ തന്നെ അറിയാം പാവമാണെന്നു.ധാവണിയാണ് വേഷം.ഒരു കുഞ്ഞു മുഖവും അതിൽ ആവശ്യത്തിലേറെ നിഷ്കളങ്കതയും. നീളമേറിയ മുടി പിന്നിൽ മുന്നിലേക്ക് ഇട്ടിട്ടുണ്ട്.വിയർപ്പിനാൽ മുങ്ങി നിൽക്കുന്നതിനാൽ നെറ്റിയിലെ ചന്ദനകുറി കുറച്ചു മാഞ്ഞു പോയിട്ടുണ്ട്.നീട്ടി എഴുതിയ കണ്മഷി കണ്ണുനീരിനാൽ കുതിർന്നിട്ടുണ്ട്.ഞാൻ അവളുടെ കൈയും പിടിച്ച് ക്ലാസ്സിൽ നിന്നും ഇറങ്ങാൻ ഒരുങ്ങിയപ്പോഴേക്കും അവിടെ കൂടി നിന്ന മൂന്ന് പേരിൽ ഒരുത്തൻ എന്റെ മുന്നിലായി ഒരു തടസമെന്ന പോലെ കയറി നിന്നു.ഞാൻ അവനെ ഗൗനിക്കാതെ അവളുടെ കൈയിൽ മുറുകെ പിടിച്ചുകൊണ്ടു അവനെ മറികടന്നു പോകാൻ ശ്രമിച്ചതും അപ്പോഴേക്കും അവൻ എന്റെ കയ്യിൽ പിടുത്തമിട്ടിരുന്നു.അവന്റെ ഉരുക്കു പോലുള്ള കൈകളുടെ മുറുക്കം എന്നിൽ വേദന ഉളവാക്കിയെങ്കിലും വേദന കടിച്ചു പിടിച്ചുകൊണ്ടു ബലമായി തന്നെ എന്റെ കൈയിൽ ഞെരിക്കികൊണ്ടിരുന്ന അവന്റെ കൈകളെ വിടുവിക്കാൻ ശ്രമിച്ചുകൊണ്ടിരുന്നു. എന്നാൽ എന്റെ ശ്രമങ്ങൾ പാഴായതല്ലാതെ അവന്റെ കൈകൾ ഒരിഞ്ചു പോലും നീങ്ങുന്നില്ലായിരുന്നു. ' കാലമാടൻ.... ' ഞാൻ അതും മനസ്സിൽ പറഞ്ഞുകൊണ്ട് പിന്നെയും അത് തുടർന്നു. പുറത്തു നിൽക്കുന്ന മീനുവും അഞ്ജുവും കണ്ണും തള്ളി ഇനി എന്ത് സംഭവിക്കും എന്നു പേടിച്ചു നിൽക്കുന്നുണ്ട്.അവരെ നോക്കികൊണ്ട് നിൽക്കുന്നതിനിടയിലാണ് എന്റെ കൈ പിടിച്ചു ഞെരിക്കികൊണ്ടിരുന്നവൻ അത് പറഞ്ഞത്. " ഞങ്ങളെ മറികടന്നു ഇവളെ അത്ര വേഗത്തിൽ ഇവിടെ നിന്ന് കൊണ്ടു പോകാമെന്നു നീ കരുതിയോ.... ഹേ? " പുച്ഛം കലർന്ന രീതിയിൽ എന്റെ അടുത്തേക്ക് ഒന്നൂടെ ചേർന്നു നിന്നുകൊണ്ടുള്ള  അവന്റെ ചോദ്യത്തിന് വിലകൽപ്പിക്കാതെ ഞാൻ അവനിൽ നിന്നും എന്റെ കൈകളെ വേർപെടുത്താൻ ശ്രമിച്ചു കൊണ്ടിരുന്നു. ഒടുവിൽ എങ്ങനെയൊക്കെയോ അവന്റെ കൈകളെ എന്നിൽ നിന്നും വേർപ്പെടുത്തി അവളെയും കൂട്ടി ഞാൻ ക്ലാസ്സ്‌ മുറിയുടെ പുറത്തേക്ക് നടന്നു. അവിടെ എത്തിയതും രണ്ടും കൂടി നെടുവീർപ്പുമിട്ടുകൊണ്ട് എന്നെയും അവളെയും അവിടെ നിന്നും വലിച്ചുകൊണ്ട് സ്റ്റെപ് ഇറങ്ങ് കാന്റീൻ ലക്ഷ്യമാക്കി നടന്നു. ___________________________________________________ ആമിയും കൂട്ടുകാരികളും അവിടെ നിന്നും ഇറങ്ങി പോയതും ആമിയെ തടഞ്ഞവൻ നേരെ അവരുടെ ഗാങ് ലീഡർ എന്നു തോന്നിക്കുന്ന ആമിയെ നോക്കി പരിഹസിച്ചവന്റെ അടുത്തേക്ക് ചെന്നു നിന്നുകൊണ്ട് ചോദിച്ചു. " ദേവാ നീ എന്താ അവളെ വെറുതെ വിട്ടത്....? " അവൻ ദേവന്റെ തോളിൽ കൈവെച്ച് കൊണ്ട് ചോദിച്ചതും അവൻ അവന്റെ മേലുള്ള മറ്റവന്റെ കൈകൾ എടുത്തുമാറ്റി അവിടെയുള്ള ജനാലക്കരികിലേക്ക് ചെന്നു നിന്നുകൊണ്ട് നിഗൂഢത നിറഞ്ഞ ചിരിയാലെ എന്തോ പറഞ്ഞതും ബാക്കി രണ്ട് പേരുടെ മുഖതും ഒരുതരം പരിഹാസത്തോടെയുള്ള പുഞ്ചിരി വിടർന്നു. _____________________________________________________________________________________ നടക്കുന്ന സമയമെല്ലാം അവിടെ ചെന്നിരുന്നു അവളെ ഒന്ന് കൂൾ ആക്കി അവിടെ എന്താണ് നടന്നതെന്ന് ചോദിച്ചറിയണമെന്ന ഉദ്ദേശം മാത്രമായിരുന്നു മനസ്സിൽ . ആ കുട്ടി നല്ലത് പോലെ പേടിച്ചിട്ടുണ്ടായിരുന്നു. അവിടുന്ന് ഇറങ്ങി വന്നിട്ടും ഒരു പാവ കണക്കെ ആണ് അവൾ എന്റെ കൂടെ നടന്നു വന്നിരുന്നത്. ശരീരത്തിലെ വിറയൽ അപ്പോഴും മാറിയിട്ടില്ലായിരുന്നു. ആലോചിച്ചു കഴിഞ്ഞതും ഞങ്ങൾ നാലു പേരും കാന്റീനിൽ എത്തിയിരുന്നു. അവിടെ ഇരുന്ന് നാലു പേർക്കുമായി ഓരോ കോഫിയും ഓർഡർ ചെയ്തു അവളോടുള്ള സംസാരത്തിനു ഞാൻ തന്നെ തുടക്കമിട്ടു. " താൻ പേടിക്കേണ്ട ഇനി ഒരു പ്രശ്നവും അവരെ കൊണ്ട് ഉണ്ടാകില്ല.... അല്ല താൻ എങ്ങനെയാ അവിടെ എത്തിയത്.... ഇവിടെ പ്രോഗ്രാംസ് നടക്കുവല്ലേ..... " ഞാൻ അവളുടെ കൈകൾ കൂട്ടി പിടിച്ചുകൊണ്ടു അവളെ സമാധാനിപ്പിക്കാനെന്ന വണ്ണം അത്രയും പറഞ്ഞു ഒപ്പം തന്നെ എന്റെ ഉള്ളിൽ അത്രയും നേരം ഉണ്ടായിരുന്ന സംശയവും കൂടി അവളോട് തുറന്നു ചോദിച്ചു. അതിന് അവൾ എന്നെ പകപ്പോടെ നോക്കിയതല്ലാതെ ഒന്നും തന്നെ പറഞ്ഞില്ല.അത് കണ്ടതും ഞാൻ സൗമ്യതയോടെ അവളോട് ചോദിച്ചു. " താൻ പേടിക്കണ്ട ഡോ.... അവർ ഇനി തന്നെ ഒന്നും ചെയ്യില്ല.... ഞങ്ങളില്ലേ കൂടെ... ഇനി പറഞ്ഞു എന്താ ശെരിക്കും അവിടെ സംഭവിച്ചത്....? " ആദ്യം മടിച്ചു നിന്നെങ്കിലും അവൾ പതിയെ കാര്യങ്ങൾ അവരോട് പറയുവാൻ തുടങ്ങി. അവൾ അവരുടെ ക്ലാസ്സിൽ തന്നെ ഉള്ളതാണെന്നും അധികം സംസാരിക്കാത്ത കൂട്ടത്തിൽ ആയതിനാൽ അവൾക്കങ്ങനെ കൂട്ടുകാരികൾ ഒന്നുമില്ലെന്നും ഫ്രഷേഴ്‌സ് ഡേ ആയതുകൊണ്ട് ഒറ്റക്കിരുന്നു ബോറടിച്ചതിനാൽ തിരികെ ക്ലാസ്സ്‌ മുറിയിലേക്ക് പോകും വഴിയാണ് അവർ വന്ന് തടഞ്ഞത്.പിന്നീട് ബലമായി തന്നെ ക്ലാസ്സ്‌ മുറിക്കകത്തേക്ക് വലിച്ചിടുകയായിരുന്നുവെന്നും അവരുടെ നീക്കം തന്നെ ഉപദ്രവിക്കുകയാണെന്നു മനസിലായ അവൾ അവിടെ രക്ഷപെടാൻ നോക്കുന്ന സമയത്താണ് ഇവർ അവിടെ എത്തിയതെന്നും അവൾ പറഞ്ഞു. ഒരു ഏങ്ങലോട് കൂടിയാണ് അവൾ അത്രയും പറഞ്ഞു തീർത്തത്. അവളുടെ സങ്കടം കണ്ടതും മറ്റു മൂന്ന് പേർക്കും അവളോട് എന്ത് പറയണമെന്നറിയാതെ കുഴഞ്ഞെങ്കിലും കുറച്ചു നേരത്തെ നിശബ്ദതയെ കീറി മുറിച്ചു കൊണ്ട് പിന്നീട് അഞ്ജുവിന്റെ വക ചളിയുടെ ഒരു വാരി വിതറൽ ആയിരുന്നു. ആമിയുടെയും മീനുവിന്റെയും മുഖം കണ്ടാൽ അറിയാം ഇത് അവർ പ്രതീക്ഷിച്ചതാണെന്ന്. എന്നാൽ ഇതെന്ത് ജീവി എന്ന കണക്കെ ആയിരുന്നു ആ പെൺകുട്ടി ഇരുന്നിരുന്നത്. പിന്നീട് അതൊരു കൂട്ടച്ചിരിയിലേക്ക് വഴിമാറി.അവളുടെ  കൂടെ എന്തിനും ഏതിനും അവർ കൂടെ കാണുമെന്ന തരത്തിൽ ആയിരുന്നു പിന്നീട് മൂവരുടെയും അവളോടുള്ള പെരുമാറ്റവും സംസാരവുമെല്ലാം. _____________________________________________________________________________________ ആമി ഇതെല്ലാം അമ്മുവിനോട് പറഞ്ഞു തീർത്തപ്പോഴേക്കും ഭക്ഷണം കഴിക്കാനായുള്ള അമ്മയുടെ വിളി വന്നിരുന്നു. അതേതുടർന്ന് ഇരുവരും സംഭാഷണം നിർത്തിവെച്ച് ഭക്ഷണം കഴിക്കുവാനായി അകത്തേക്ക് നടന്നു.അവളുടെ കൂടെ നടന്ന അമ്മുവിന്റെ മനസ്സിൽ പല ചോദ്യങ്ങളും ഉയർന്നു വന്നെങ്കിലും പിന്നീട് അവയെ കുറിച്ച് അവളോട്‌ തന്നെ ചോദിക്കാമെന്നു കരുതി ആ ചിന്തകളെ എല്ലാം മനസ്സിൽ നിന്നും ആട്ടിപായിച്ചു കൊണ്ട് അവൾ ആമിയുടെ കൈയും പിടിച്ച് അവൾ എല്ലാവരുടെയും അടുത്ത് പോയിരുന്നു.പതിവ് തെറ്റിച്ചു കൊണ്ട് അന്ന് ആരും ഭക്ഷണം കഴിക്കുന്നതിനിടയിൽ പരസ്പരം മിണ്ടിയില്ല എന്നു മാത്രമല്ല  ആമിയുടെ മൗനം കാശിയിൽ സംശയങ്ങൾ തീർത്തെങ്കിലും അവൻ അതിനെ കാര്യമാക്കാതെ ഭക്ഷണത്തിൽ ശ്രദ്ധ കൊടുത്തു.എന്നത്തേയും പോലെ അമ്മു അടുക്കളയിൽ അമ്മയെ സഹായിച്ചതിനു ശേഷം കാശിയുടെ കൂടെ അവരുടെ മുറിയിലേക്കും പണികൾ എല്ലാം തീർത്ത് അമ്മയും അച്ഛനും അവരുടെ മുറിയിലേക്കും ആമി അവളുടെ മുറിയിലേക്കും പോയി. അമ്മു മുറിയിൽ എത്തിയതിനു ശേഷം കാശിയെ മൈൻഡ് ചെയ്യാതെ കിടക്കയിൽ ചെന്നു കിടന്നു പതിയെ നിദ്രയെ പുൽകി. അമ്മുവിനെ കുറച്ചു നേരം നോക്കി നിന്നതിനു ശേഷം അവനും അവളുടെ തൊട്ടപ്പുറത്തായി അവളെ കാണാൻ പാകത്തിന് തിരിഞ്ഞു കിടന്നു.പതിയെ അവനും നിദ്രയിലേക്കാണ്ടു പോയി. തുടരും..... #📙 നോവൽ #💞 പ്രണയകഥകൾ #📔 കഥ