#💪పాజిటీవ్ స్టోరీస్ అంబర్పేట పోలీస్ స్టేషన్ పరిధిలో చైన్ స్నాచింగ్కు యత్నించిన ఓ కరుడుగట్టిన పాత నేరస్తుడిని పట్టుకున్న రిటైర్డ్ ఆర్మీ జవాన్ చీర్ల రాముడు సాహసాన్ని హైదరాబాద్ పోలీస్ కమిషనర్ శ్రీ వీసీ సజ్జనర్, ఐపీఎస్ గారు అభినందించారు.
బషీర్ బాగ్లోని పాత కమిషనరేట్ కార్యాలయంలో గురువారం రాముడును ప్రత్యేకంగా పిలిపించుకుని.. ఆయనకు శాలువా కప్పి ఘనంగా సన్మానించి.. నగదు రివార్డును అందజేశారు.
ఈ నెల 14న అంబర్పేట ఇరానీ హోటల్ బస్టాప్ వద్ద బస్సు దిగుతున్న రాముడు మెడలోని బంగారు గొలుసును తస్కరించేందుకు నిందితుడు ప్రయత్నించగా, తన వయసును సైతం లెక్కచేయకుండా నిందితుడిని గట్టిగా పట్టుకుని ప్రతిఘటించారు.
తక్షణమే డయల్ 100కు సమాచారం అందించగా, అంబర్పేట పెట్రోల్ కార్ సిబ్బంది నిమిషాల వ్యవధిలోనే ఘటనా స్థలానికి చేరుకుని నిందితుడిని అదుపులోకి తీసుకున్నారు.
పోలీసుల విచారణలో నిందితుడు మల్లేపల్లికి చెందిన ఆటో డ్రైవర్ అబ్దుల్ మన్నన్గా గుర్తించారు. ఇతనిపై తెలంగాణ వ్యాప్తంగా 31 పాత కేసులు ఉండటమే కాకుండా, హబీబ్నగర్ పోలీస్ స్టేషన్లో సస్పెక్ట్ షీట్ కూడా ఉంది. మంగళ్హాట్ పోలీస్ స్టేషన్లో నమోదైన మరో కేసులో ఇతను మోస్ట్ వాంటెడ్గా ఉన్నారు.
నిందితుడు అబ్దుల్ మన్నన్ పై కేసు నమోదు చేసి.. అరెస్ట్ చేసి రిమాండ్ కు తరలించారు. నిందితుడి అనుచరులు కోటేష్, మల్లేష్ పరారీలో ఉన్నారు.
ఈ క్రమంలో నిందితుడిని అదుపులోకి తీసుకోవడంలో సమయస్ఫూర్తిని ప్రదర్శించిన అంబర్పేట ఎస్సై సురేష్, కానిస్టేబుళ్లు దినేష్ రెడ్డి, భరత్ కుమార్ల పనితీరును కూడా సీపీ గారు అభినందించి.. వారికి ప్రశంసా పత్రాలను అందజేశారు.
ఈ సందర్బంగా హైదరాబాద్ సీపీ శ్రీ వీసీ సజ్జనర్, ఐపీఎస్ గారు మాట్లాడుతూ.. ఒకసారి సైనికుడు.. ఎప్పుడూ సైనికుడే అని రాముడు నిరూపించారని ప్రశంసించారు.
భయం వీడి నేరస్తుడిని ఎదిరించిన రాముడు ధైర్యం అందరికీ స్ఫూర్తిదాయకమన్నారు.
సమాజంలో నేరాల నియంత్రణకు ప్రతి పౌరుడు యూనిఫామ్ లేని పోలీస్ లాగా వ్యవహరించాలని పిలుపునిచ్చారు.
