Police Saved Children From Falling Prey to Fraudsters : వారు ముగ్గురు అక్కాచెల్లెళ్లు. ఎనిమిది, తొమ్మిదో తరగతులు చదువుతున్నారు. వారంతా ఆన్​లైన్​ గేమ్​లకు అలవాటు పడటంతో తల్లి తరచూ వారిని మందలించేది. ఇదే విషయాన్ని తమతో పాటే గేమ్​ ఆడుతున్న గుర్తుతెలియని మాయగాళ్లతో పంచుకోగా, ఈసారి మీ అమ్మ కోప్పడితే బిహార్​ వచ్చేయాలని సూచించారు. ఇక్కడ ఆన్​లైన్​ గేమ్స్​ ఉచితంగా ఆడుకోవచ్చని వారికి మాయమాటలు చెప్పారు. ఇంకేం, వెనకా ముందూ, మంచీచెడు అలోచించకుండా ఆ ముగ్గురూ ఈ నెల 22వ తేదీన రైలు ఎక్కేశారు. ఎంత వెదికినా పిల్లలు కన్పించకపోవడంతో తల్లి పోలీసులను ఆశ్రయించారు. వారు తీవ్రంగా శ్రమించి ముగ్గుర్నీ ఏపీలో రక్షించారు. ఈ ఘటన హైదరాబాద్​ నగరంలోని ఫలక్​నుమాలో చోటుచేసుకుంది. ఫ్రీ ఫైర్‌ గేమ్‌, ఆన్‌లైన్‌ పరిచయం : బాలికలు తమ కుటుంబసభ్యుల సెల్‌ఫోన్‌లో ఫ్రీ ఫైర్‌ గేమ్‌ ఆడేవారు. దీన్ని ఆన్‌లైన్‌లో ఒకేసారి 4-16 మంది కలిసి ఆడొచ్చు. ఈ క్రమంలో బాలికలకు బిహార్‌ రాష్ట్రానికి చెందిన అపరిచిత వ్యక్తులతో పరిచయం ఏర్పడి, వారితో గంటల తరబడి పలు విషయాలను ముచ్చటించేవారు. ఈ క్రమంలో గేమ్స్‌ ఆడుతున్నందుకు తన తల్లి కోప్పడుతోందని బాలికలు వారికి చెప్పారు. అదనుగా తీసుకున్న ఆ అపరిచితులు బిహార్‌ వచ్చినట్లయితే ఉచితంగా ఫ్రీ ఫైర్‌ ఆడుకోవచ్చని, తమ వద్ద చాలా ఫోన్లున్నాయని ఆశ చూపించారు. ఈ నెల 22న తల్లి కోప్పడటంతో ముగ్గురూ సికింద్రాబాద్‌ రైల్వేస్టేషన్‌ చేరుకుని బిహార్‌ వెళ్లే ట్రైన్ ఎక్కారు. ముగ్గుర్నీ ఎలా గుర్తించారంటే? : పిల్లలు కనిపించకపోవడంతో తల్లి పోలీసులకు ఫిర్యాదు చేసింది. దీంతో ఫ్రీ పైర్ ఆడిన సెల్​ఫోన్​ను పోలీసులు స్వాధీనం చేసుకున్నారు. దానిలో లభించిన ఐడీ ఆధారంగా ముంబయికి చెందిన ఓ బాలుడితోనూ బాలికలు ప్రీఫైర్ ఆడినట్లు గుర్తించారు. ఐపీ అడ్రస్​ ఆధారంగా అతడిని కనిపెట్టి ప్రశ్నించడంతో బాలికలు బిహార్ వెళ్లినట్లు సమాచారం ఇచ్చాడు. ఈ క్రమంలో ప్రయాణంలో ఉన్న బాలికలు రైలులో పరిచయమైన ఓ వ్యక్తి స్మార్ట్​ఫోన్ తీసుకొని బిహార్‌లోని అపరిచితులతో తాము ట్రైన్​లో బిహార్‌ వస్తున్నట్లు ఇన్‌స్టా ద్వారా సమాచారమిచ్చారు. అట్నుంచి అపరిచితులు ‘కోల్‌కతా రండి. ఇక్కడ చాలా గేమ్‌లు ఆడుకోవచ్చు’ అంటూ రిప్లై ఇచ్చినట్లుగా పోలీసులు గుర్తించారు. పిల్లలు ఉపయోగించిన ఫోన్‌ నంబరు ఆధారంగా వారు ఫలక్‌నుమా ఎక్స్‌ప్రెస్‌లో వెళ్తున్నట్లు గుర్తించి రైల్వే, ఏపీలోని ఏలూరు పోలీసులకు ముగ్గురు బాలికల సమాచారమిచ్చారు. వారు అప్రమత్తమై బాలికలు మాయగాళ్ల చెరకు చిక్కకుండా సురక్షితంగా కాపాడారు. పిల్లల్ని భద్రంగా తల్లి ఒడికి చేర్చిన పోలీసు సిబ్బందిని సీపీ సజ్జనార్‌ అభినందించారు. #📰జాతీయం/అంతర్జాతీయం #👉నేరాలు - ఘోరాలు🚨 #పిల్లల పెంపకం👨‍👩‍👧‍👦 #👶కిడ్స్ ఎడ్యుకేషన్🎰 #💖🦋లవిరాజ్ క్రియేషన్స్🥀💖