#🗞ଓଡ଼ିଶା ଅପଡେଟ📺 ସୋନପୁର ପୁଲିସ ୮ ଲକ୍ଷ ୪୭ ହଜାର ୫୦୦ ଟଙ୍କାର ନକଲି ନୋଟ୍ ଜବତ କରିବା ସହିତ ଦୁଇ ଜଣ ଅଭିଯୁକ୍ତଙ୍କୁ ଗିରଫ କରିଛି। ଗିରଫ ଅଭିଯୁକ୍ତ ଦ୍ୱୟ ହେଉଛନ୍ତି ପୁରୁଷୋତ୍ତମ ଶତପଥୀ ଓ ପ୍ରଶାନ୍ତ ଦାଶ। ସୁବର୍ଣ୍ଣପୁର ଏସ୍‌ପି ଆଜି ଏକ ସାମ୍ବାଦିକ ସମ୍ମିଳନୀରେ ଏହି ସୂଚନା ଦେଇଛନ୍ତି। ପୁରୁଷୋତ୍ତମଙ୍କ ଘର ଯାଜପୁର ଅଞ୍ଚଳରେ ହୋଇଥିବା ବେଳେ ପ୍ରଶାନ୍ତଙ୍କ ଘର ନୟାଗଡ଼ ଜିଲ୍ଲାରେ। ସେମାନଙ୍କଠାରୁ ଏକ ସ୍କୋର୍ପିଓ ଜବତ କରାଯାଇଛି। ଗତକାଲି ରାତିରେ ଅଭିଯୁକ୍ତ ଦ୍ୱୟ ଏହି କଳା ରଙ୍ଗର ସ୍କୋର୍ପିଓରେ ସୋନପୁରର ବ୍ଳକ୍ ଛକରେ ସନ୍ଦେହ ଜନକ ଭାବେ ବୁଲୁଥିବା ବେଳେ ବିଶେଷ ସୂତ୍ରରୁ ଖବର ପାଇ ପୁଲିସର ପାଟ୍ରୋଲିଂ ଟିମ୍ ସେମାନଙ୍କୁ ଅଟକାଇଥିଲା। ଗାଡ଼ିଟିକୁ ଯାଞ୍ଚ କଲା ବେଳେ ସେଥିରୁ ୧୬୯୫ଟି ୫୦୦ ଟଙ୍କିଆ ନକଲି ନୋଟ୍‌ ମିଳିଥିଲା। ଅଭିଯୁକ୍ତମାନେ ବରଗଡ଼ ଜିଲ୍ଲାରୁ ଏହି ନକଲି ନୋଟ୍ ଆଣିଥିଲେ। ସେମାନେ ସୁବର୍ଣ୍ଣପୁର ଜିଲ୍ଲା ସହିତ ଅନ୍ୟାନ୍ୟ ଅଞ୍ଚଳରେ ଏଗୁଡ଼ିକୁ ବଦଳାଇବାକୁ ଯୋଜନା କରିଥିଲେ। ସୁବର୍ଣ୍ଣପୁର ଏସ୍‌ପି କହିଛନ୍ତି, ଗତକାଲି ରାତି ପ୍ରାୟ ସାଢ଼େ ୮ଟା ବେଳେ ସୋନପୁର ଟାଉନ ପୁଲିସର ପାଟ୍ରୋଲିଂ ଟିମ୍ ଏକ ସୂଚନା ପାଇଥିଲା ଯେ ଗୋଟିଏ କଳା ରଙ୍ଗର ସ୍କୋର୍ପିଓ ସହରରେ ଦୁଇ ଚାରି ଘେରା ମାରି ସାରିଲାଣି। ସେଥିରେ ଦୁଇ ଜଣ ଲୋକ ବସିଛନ୍ତି। ସେମାନେ କିଛି ନକଲି ନୋଟ୍ ବଦଳାଇବା ଚକ୍କରରେ ଅଛନ୍ତି। ଏହି ସୂଚନାକୁ ଆଧାର କରି ପାଟ୍ରୋଲିଂ ଟିମ୍ ଗାଡ଼ିଟିକୁ ଅଟକାଇଥିଲେ। ପଚରାଉଚରା ବେଳେ ସେମାନେ କାହିଁକି ସୋନପୁର ଆସିଥିଲେ, ତା’ର ସନ୍ତୋଷ ଜନକ ଉତ୍ତର ଦେଇ ପାରି ନଥିଲେ। ତା’ପରେ ସେମାନଙ୍କ ଗାଡ଼ି ଯାଞ୍ଚ କରାଯାଇଥିଲା। ଯାଞ୍ଚ ବେଳେ ଗାଡ଼ିରୁ ନକଲି ନୋଟ୍ ମିଳିଥିଲା। ଏହା ପରେ ସେମାନେ ପୁଲିସ ଆଗରେ ସେମାନଙ୍କ ଦୋଷ ସ୍ୱୀକାର କରିଥିଲେ। ଅଭିଯୁକ୍ତ ଦ୍ୱୟଙ୍କୁ ପୁଲିସ କୋର୍ଟ ଚାଲାଣ କରିଥିବା ବେଳେ ଅଧିକ ଖୋଳତାଡ଼ ଜାରି ରଖିଛି।