#😇 പ്രിയ മലയാള നടി 36-ാം വയസിൽ വീണ്ടും ഗർഭിണി; ആശംസകളുമായി ആരാധകർ മലയാളി കുടുംബപ്രേക്ഷകരുടെ പ്രിയപ്പെട്ട 'അൽഫോൻസാമ്മ'യും 'കുങ്കുമപ്പൂവി'ലെ അമലയുമായ അശ്വതി തോമസ് വീണ്ടും അമ്മയാകാൻ ഒരുങ്ങുന്ന വാർത്തയാണ് ഇപ്പോൾ സോഷ്യൽ മീഡിയയിൽ തരംഗമാകുന്നത്. നീണ്ട ഇടവേളകൾക്ക് ശേഷവും മലയാളികൾ നെഞ്ചേറ്റുന്ന താരം തന്റെ ഇൻസ്റ്റാഗ്രാം പേജിലൂടെയാണ് ഈ സന്തോഷവാർത്ത ആരാധകരുമായി പങ്കുവെച്ചത്. ​ ​തന്റെ കുടുംബം വലുതാകാൻ പോകുന്നതിന്റെ ആവേശം പങ്കുവെച്ചുകൊണ്ടാണ് അശ്വതി പോസ്റ്റ് ഇട്ടത്. "ഞങ്ങളുടെ കുടുംബം വലുതാകുന്നു, ഹൃദയം നിറയുന്നു. കുടുംബത്തിലെ അഞ്ചാമത്തെ അം​ഗം 2026-ൽ എത്തും" എന്നാണ് താരം കുറിച്ചത്. നിലവിൽ അശ്വതിക്കും ഭർത്താവിനും രണ്ട് പെൺമക്കളാണുള്ളത്. മൂത്തമകൾ ജോഹാനയ്ക്ക് 15 വയസ്സാണ് പ്രായം. രണ്ടാമത്തെ മകൾ ബ്രിയന്നയും സ്കൂൾ വിദ്യാർത്ഥിനിയാണ്. താരത്തിന്റെ ഈ പുതിയ വിശേഷം അറിഞ്ഞതോടെ സഹപ്രവർത്തകരും ആരാധകരും ആശംസകളുമായി എത്തിയിരിക്കുകയാണ്. ​ ​വിവാഹശേഷം ദുബായിൽ കുടുംബസമേതം സ്ഥിരതാമസമാക്കിയതിനാലാണ് അശ്വതി അഭിനയരംഗത്ത് നിന്ന് വിട്ടുനിന്നത്. എങ്കിലും സോഷ്യൽ മീഡിയയിലൂടെ താരം എപ്പോഴും ആരാധകരുമായി സംവദിക്കാറുണ്ടായിരുന്നു. ബിഗ് ബോസ് മലയാളം എപ്പിസോഡുകളുടെ റിവ്യൂ പങ്കുവെച്ചും അശ്വതി ശ്രദ്ധിക്കപ്പെട്ടിരുന്നു. ഒമ്പത് വർഷത്തെ ഇടവേളയ്ക്ക് ശേഷം 'സുരഭിയും സുഹാസിനിയും' എന്ന പരമ്പരയിലൂടെയാണ് അശ്വതി വീണ്ടും സ്ക്രീനിലേക്ക് മടങ്ങിയെത്തിയത്. പ്രസില്ല ജെറിൻ എന്നാണ് താരത്തിന്റെ യഥാർത്ഥ പേര്. ​ ​അഭിനയത്തോടൊപ്പം തന്നെ അശ്വതിയുടെ മേക്കോവറും വലിയ ചർച്ചയായിരുന്നു. 105 കിലോയിൽ നിന്ന് കൃത്യമായ ഡയറ്റിലൂടെ 75 കിലോയിലേക്ക് എത്തിയ കഥ താരം മുൻപ് വെളിപ്പെടുത്തിയിരുന്നു. തനിക്ക് ഇഷ്ടപ്പെട്ട വസ്ത്രങ്ങൾ ധരിക്കാൻ കഴിയാത്തതിൽ വേദനിച്ചിരുന്ന കാലത്തുനിന്ന് കഠിനാധ്വാനത്തിലൂടെ ആഗ്രഹിച്ച രൂപത്തിലേക്ക് എത്തിയത് ഒരുപാട് പേർക്ക് പ്രചോദനമായിരുന്നു. വില്ലത്തി വേഷമായാലും പോസിറ്റീവ് വേഷമായാലും ഒരുപോലെ വഴങ്ങുമെന്ന് തെളിയിച്ച നടിയാണ് അശ്വതി. അൽഫോൻസാമ്മയായി സ്നേഹം നേടിയ താരം കുങ്കുമപ്പൂവിലെ അമലയായി പ്രേക്ഷകരെ വിറപ്പിക്കുകയും ചെയ്തിട്ടുണ്ട്