#vaibhav suryavamshi ಬೆರಗು ಹುಟ್ಚಿಸುವ ಆ ಬ್ಯಾಟ್ ಸ್ಪೀಡ್.. ಅತಿಮಾನುಷ ಟೈಮಿಂಗ್ ಮತ್ತು raw ಪವರ್.
ಅವನು ಕೇವಲ ಕ್ರಿಕೆಟ್ ಆಡುತ್ತಿಲ್ಲ, ಬ್ಯಾಟಿಂಗ್ ಕಲೆಯನ್ನು redefine ಮಾಡುತ್ತಿದ್ದಾನೆ.
ನಾವು ನೋಡುತ್ತಿರುವುದು ಅಪರೂಪದ generational talent.
ವೈಭವ್ ಸೂರ್ಯವಂಶಿ ಬಗ್ಗೆ ಈಗಾಗಲೇ ಸಾಕಷ್ಟು ಬಾರಿ ಬರೆದಿದ್ದೇನೆ. ಈ 15ರ ಪೋರ ತನ್ನ ಬಗ್ಗೆ ಇನ್ನೂ ಬರೆಯುತ್ತಲೇ ಇರಲು ಕಾರಣಗಳನ್ನು ಕೊಡುತ್ತಲೇ ಇದ್ದಾನೆ.
ಬುಮ್ರಾ, ಬೋಲ್ಟ್, ಹೇಜಲ್’ವುಡ್, ರಬಾಡ, ಭುವನೇಶ್ವರ್ ಕುಮಾರ್, ಮ್ಯಾಟ್ ಹೆನ್ರಿ.. ಇವೆಲ್ಲಾ ಬರೀ ಹೆಸರುಗಳಲ್ಲ, ಕ್ರಿಕೆಟ್ ಜಗತ್ತಿನ ಹೆಗ್ಗುರುತುಗಳು.. ಈ ಹುಡುಗ ಆ ಹೆಗ್ಗುರುತುಗಳ ಮೇಲೆಯೇ ತನ್ನ ಗುರುತು ಮೂಡಿಸಿದ್ದಾನೆ.
ರಬಾಡಗೆ ಹೊಡೆದ, ಆಕಸ್ಮಿಕ ಎಂದರು..
ಮ್ಯಾಟ್ ಹೆನ್ರಿಗೆ ಹೊಡೆದ, ‘ತಾಕತ್ತಿದ್ದರೆ ಬುಮ್ರಾಗೆ ಬಾರಿಸಲಿ ನೋಡೋಣ’ ಎಂದರು.
ಬುಮ್ರಾಗೂ ಸಿಕ್ಸರ್’ಗಳನ್ನು ಚಚ್ಚಿದ.. ಟ್ರೆಂಟ್ ಬೌಲ್ಟ್’ಗೂ ಬಾರಿಸಿದ..
ಉಳಿದವನು ಆಸ್ಟ್ರೇಲಿಯಾದ ಜೋಶ್ ಹೇಜಲ್’ವುಡ್.
ಇವನು ಅಂತಿಂಥಾ ಬೌಲರ್ ಅಲ್ಲ.. ನಿಖರತೆಯಲ್ಲಿ ‘ದಿ ಗ್ರೇಟ್’ ಗ್ಲೆನ್ ಮೆಗ್ರಾತ್ ಅವರನ್ನೇ ನೆನಪಿಸುವ ಟಾಪ್ ಕ್ಲಾಸ್ ಫಾಸ್ಟ್ ಬೌಲರ್. ಅಂಥಾ ಹೇಜಲ್’ವುಡ್’ಗೆ ಮುಟ್ಟಿ ನೋಡಿಕೊಳ್ಳುವ ರೀತಿಯಲ್ಲಿ ಚಚ್ಚಿದ್ದಾನೆ ಹದಿನೈದರ ಹೈದ ವೈಭವ್ ಸೂರ್ಯನಂಶಿ. ಮಧ್ಯದಲ್ಲಿ ಐಪಿಎಲ್’ನ 200 ವಿಕೆಟ್’ಗಳ ಸರದಾರ ಭುವನೇಶ್ವರ್ ಕುಮಾರ್’ನನ್ನೂ ಬಿಟ್ಟಿಲ್ಲ ಈ ಹುಡುಗ.
ಹೇಜಲ್’ವುಡ್, ಭುವನೇಶ್ವರ್ ಕುಮಾರ್, ಕೃಣಲ್ ಪಾಂಡ್ಯರನ್ನೊಳಗೊಂಡ ಬೌಲಿಂಗ್ ಅಟ್ಯಾಕ್ ಮುಂದೆ 26 ಎಸೆತಗಳಲ್ಲಿ 78 ರನ್ ಚಚ್ಚುತ್ತಾನೆ ಎಂದರೆ it wasn’t just batting. It was a fearless statement, sheer brilliance.
ಕಳೆದ ವರ್ಷ ಐಪಿಎಲ್ ಪದಾರ್ಪಣೆಗೂ ಕೆಲ ಗಂಟೆಗಳಿಗೆ ಮುನ್ನ ವೈಭವ್’ನನ್ನು ತಮ್ಮ ಕೊಠಡಿಗೆ ಕರೆದಿದ್ದ ಆಗಿನ ರಾಜಸ್ಥಾನ ರಾಯಲ್ಸ್ ತಂಡದ ಕೋಚ್ ರಾಹುಲ್ ದ್ರಾವಿಡ್ ‘’ಇವತ್ತು ನಿನ್ನನ್ನು ಆಡಿಸುತ್ತೇನೆ, ನಿನ್ನ ಗೇಮ್ ಪ್ಲಾನ್ ಏನು’’ ಎಂದು ಕೇಳಿದ್ದರಂತೆ’
‘’ಐಸಾ ಕುಚ್ ನಹೀ ಹೇ ಸರ್.. ಹಮ್ ತೋ ಖೇಲೇಂಗೆ.. ಅಗರ್ ಹಮೇ ಪೆಹ್ಲಾ ಮಿಲಾ, ಪೆಹ್ಲಾ ಹೀ ಉಡಾ ದೇಂಗೇ’’
ರಾಹುಲ್ ದ್ರಾವಿಡ್ ಅವರಿಗೆ ಹೀಗೆ ಉತ್ತರಿಸಿದ್ದ ವೈಭವ್ ಸೂರ್ಯವಂಶಿ ಐಪಿಎಲ್’ನಲ್ಲಿ ಎದುರಿಸಿದ ಮೊಟ್ಟ ಮೊದಲ ಎಸೆತವನ್ನೇ ಎಕ್ಸ್’ಟ್ರಾ ಕವರ್ಸ್’ನಲ್ಲಿ ಸಿಕ್ಸರ್’ಗಟ್ಟಿದ್ದ. ದ್ರಾವಿಡ್ ಅವರ ಮುಂದೆ ಕುಳಿತು ‘ಮೊದಲ ಎಸೆತವನ್ನೇ ಉಡಾಯಿಸುತ್ತೇನೆ’ ಎಂದಿದ್ದವನು ಈ ಕ್ಷಣಕ್ಕೂ ಉಡಾಯಿಸುತ್ತಲೇ ಇದ್ದಾನೆ. ಆರ್.ಸಿ.ಬಿ ವಿರುದ್ಧ ಅವನು ಆಡಿದ ಆಟ next level. ಅವನ ಆಟವನ್ನು ನೋಡಿ ಕ್ಯಾಪ್’ಗೆ ಹಸ್ತಾಕ್ಷರ ಹಾಕಿ ‘’ಒಳ್ಳೆಯದಾಗಲಿ ಚಾಂಪಿಯನ್’’ ಎಂದು ಹಾರೈಸಿದ್ದಾನೆ ವಿರಾಟ್ ಕೊಹ್ಲಿ.
ವೈಭವ್ ಸೂರ್ಯವಂಶಿ ಬಿಹಾರದ ಸಮಸ್ತಿಪುರದ ಹುಡುಗ. ಹುಟ್ಟೂರಲ್ಲಿ ಕ್ರಿಕೆಟ್ ಅಭ್ಯಾಸಕ್ಕೆ ಅಂಥಾ ವ್ಯವಸ್ಥೆ ಇರಲಿಲ್ಲ.. ಹೀಗಾಗಿ ಎಂಟನೇ ವಯಸ್ಸಲ್ಲಿ ಬೆಳಗ್ಗೆ 4ಕ್ಕೆ ಎದ್ದವನು ತಂದೆಯ ಜೊತೆ ಸಮಸ್ತಿಪುರದಿಂದ 85 ಕಿ.ಮೀ ದೂರದ ಪಾಟ್ನಾಗೆ ಪ್ರಯಾಣಿಸುತ್ತಿದ್ದ. ಪಾಟ್ನಾದಲ್ಲಿ ಪ್ರತೀ ದಿನ ನಾಲ್ಕು ಗಂಟೆಗಳ ಕಾಲ ಅಭ್ಯಾಸ. ದಿನಪೂರ್ತಿ ಆಡಿದರೂ ದಣಿಯದ ಉತ್ಸಾಹಿ ಬಾಲಕ.
ಕ್ರಿಕೆಟ್ ಕಂಡ ಶ್ರೇಷ್ಠ ಎಡಗೈ ದಾಂಡಿಗರಾದ ಬ್ರಯಾನ್ ಲಾರಾ, ಯುವರಾಜ್ ಸಿಂಗ್ ಅವರ ವೀಡಿಯೊಗಳನ್ನು 11ನೇ ವಯಸ್ಸಿಗೆ ಮಗನಿಗೆ ತೋರಿಸುತ್ತಿದ್ದರಂತೆ ತಂದೆ ಸಂಜೀವ್ ಸೂರ್ಯವಂಶಿ.
ಎದುರಲ್ಲಿ ದೊಡ್ಡ ದೊಡ್ಡ ಬೌಲರ್’ಗಳಿದ್ದರೂ ಭಯವೇ ಇಲ್ಲದೆ ಬ್ಯಾಟ್ ಬೀಸುವ ಧೈರ್ಯ ಈಗಿನದ್ದಲ್ಲ.. ಅದು ಅವನು ಆರಂಭದಲ್ಲೇ ಇಟ್ಟಿದ್ದ ಹೆಜ್ಜೆ. 11ನೇ ವಯಸ್ಸಲ್ಲೇ ಅಂಡರ್-19, ಅಂಡರ್-23 ಬೌಲರ್’ಗಳನ್ನು ಹಿಗ್ಗಾಮುಗ್ಗ ಚಚ್ಚಿ ಬಿಡುತ್ತಿದ್ದ.
ಅವನ ಅಭ್ಯಾಸ ಹೇಗಿರುತ್ತಿತ್ತೆಂದರೆ ಒಂದು particular ಹೊಡೆತವನ್ನು ಕಲಿಯಲು 400-500 ಎಸೆತಗಳನ್ನು ಎದುರಿಸುತ್ತಿದ್ದ . ಅಂಥಾ ಎನರ್ಜಿ ಅವನದ್ದು.
10 ದಿನಗಳ ಅಂತರದಲ್ಲಿ 15ನೇ ವಯಸ್ಸಲ್ಲಿ ಐಪಿಎಲ್’ನಂತಹ ದೊಡ್ಡ ವೇದಿಕೆಯಲ್ಲಿ 15 ಎಸೆತಗಳಲ್ಲಿ ಎರಡು ಅರ್ಧಶತಕಗಳು..
ಈ ವರ್ಷದ ಐಪಿಎಲ್’ನಲ್ಲಿ 4 ಪಂದ್ಯಗಳು… 75 ಎಸೆತಗಳಲ್ಲಿ 200 ರನ್.. ಆ 75 ಎಸೆತಗಳಲ್ಲಿ 18 ಬೌಂಡರಿ, 18 ಸಿಕ್ಸರ್.
ಇವನು ಬಾಲಕನಲ್ಲ.. ಬಾಲ ಪ್ರತಾಪಿ.
#ipl 