അമ്മേ...അമ്മേയെന്നെ ഇട്ടിട്ടു പോകുവാണോ? എന്തിനാ അമ്മേ വേറെ കല്യാണം കഴിക്കുന്നത് ??? ഉണ്ണിമോളുടെ ചോദ്യം കേട്ട് ശിവദ കണ്ണുനീർ തുടച്ചു അമ്മമ്മയുടെ പൊന്നുമോളിങ്ങ് വന്നേ... അമ്മമ്മ ഒരു കാര്യം പറയട്ടെ ശിവദയുടെ അമ്മ സാവിത്രി, ഉണ്ണിമോളെ അരികിലേക്ക് വിളിച്ചു ഉണ്ണി മോളുടെ നിറഞ്ഞ കണ്ണുകൾ അമ്മമ്മ തുടച്ചു കളഞ്ഞു. നോക്ക്...മോളുടെ അമ്മ പാവമല്ലേ, മോളുടെ അച്ഛൻ വേറെ വിവാഹം കഴിച്ചല്ലോ.അപ്പോൾ അമ്മ ഒറ്റക്കായില്ലേ... അമ്മയെ നമുക്ക് നല്ല സുന്ദരൻ ചെക്കന്റെ കൂടെ കല്യാണം കഴിച്ചു വിടണം. അമ്മ സന്തോഷമായി ജീവിക്കട്ടെ ഉണ്ണിമോൾക്ക് അമ്മമ്മയും മാമനും ഉണ്ടല്ലോ... എനിക്ക് അമ്മ മതി. ഉണ്ണിമോൾ പറഞ്ഞു. അങ്ങനെ പറയല്ലേ മോളെ... വേണ്ട എനിക്കെന്റെ മതി....അവൾ വിതുമ്പി.. നോക്ക്...മോളുടെ അമ്മയുടെ കല്യാണത്തിന്, മോള് രാജകുമാരിയെ പോലെ ഒരുങ്ങി നിൽക്കണം. എന്തൊക്കെ സാധനങ്ങളാ മോളെ ഒരുക്കാൻ വേണ്ടി അമ്മമ്മ മേടിച്ചു വെച്ചിരിക്കുന്നതെന്നറിയാമോ?? നല്ല ഉടുപ്പും, വളയും, പൊട്ടും ഒക്കെയുണ്ട്. എനിക്കൊന്നും വേണ്ട... നീ മുറിയിലേക്ക് പോ ശിവദേ..സാവിത്രി മകളോട് പറഞ്ഞു. ഉണ്ണി മോളുടെ സങ്കടം കണ്ട് ശിവദ ഈ കല്യാണത്തിൽ നിന്നും പിന്മാറുമോ എന്ന് സാവിത്രിക്ക് ഭയമായിരുന്നു. ശിവദക്ക് ഇരുപത്തിയെട്ട് വയസ്സേ ഉള്ളൂ.. ഭർത്താവ് അവളെ ഉപേക്ഷിച്ചതാണ്. ഇവൾ ഭാര്യയായി ഉള്ളപ്പോഴും അയാൾക്ക് വേറെ ബന്ധമുണ്ടായിരുന്നു. അതറിഞ്ഞ് ശിവദ ആ ജീവിതത്തിൽ നിന്നും സ്വയം പിൻവാങ്ങിയതാണ്. മക്കളുടെ കാര്യത്തിൽ ഏതമ്മയും സ്വാർത്ഥത നിറഞ്ഞവളാകും, സാവിത്രിയും അതുപോലെയാണ് തന്റെ മകൾക്ക് നല്ലൊരു ജീവിതം വേണമെന്നാണ് അവരുടെ ആഗ്രഹം. മോളിന്ന് അമ്മമ്മയുടെ കൂടെ കിടന്നാൽ മതി ട്ടോ... സാവിത്രി പറഞ്ഞു. വേണ്ട എനിക്ക് എന്റമ്മയുടെ കൂടെ കിടന്നാൽ മതി.ഉണ്ണിമോൾ പറഞ്ഞു. മോളെ അമ്മമ്മ നല്ല കഥകളൊക്കെ പറഞ്ഞുതരാം. സാവിത്രി അല്പം ബലമായി ഉണ്ണിമോളെ മുറിയിലെ കട്ടിലിൽ കിടത്തി. ശിവദയുടെ കൂടെ കിടത്തിയാൽ കുഞ്ഞിന്റെ വിഷമം കണ്ട് ശിവദയുടെ മനസ്സ് മാറിയാലോ?? നാളെ വിവാഹം നടക്കേണ്ട ദിവസമാണ്. കുഞ്ഞിന്റെ കണ്ണുനീരിൽ മനസ്സലിഞ്ഞു പോയി അവളീ വിവാഹത്തിൽ നിന്നും പിന്മാറിയാലോ??. വേണ്ട.. മറ്റെന്തിനേക്കാളും തനിക്കിപ്പോൾ വലുത് തന്റെ മകളുടെ ഭാവിയാണ്. ഉണ്ണിമോളെ നോക്കാൻ താനുണ്ട്. കൂടാതെ ശിവദയുടെ അനിയൻ ആരോമലും ഉണ്ട്. എത്രനാളെന്ന് വച്ചാണ് തന്റെ മകൾ ഇവിടെ നിൽക്കുന്നത്. ഒന്നാമത് അതൊരു പാവം പെണ്ണാണ്. തന്റെ കാലം കഴിഞ്ഞാൽ അതിന്റെ ഭാവി എന്താകും ?? ചോദിക്കാനും പറയാനും ആരുമില്ലാതെ എന്റെ മകൾ ജീവിക്കുന്നത് ഞാൻ കാണേണ്ടി വരില്ലേ... ഇപ്പോൾ ആരോമൽ ഉണ്ടെങ്കിലും, അവന് ഒരു കുടുംബമായി കഴിഞ്ഞാൽ തന്റെ മകൾ അവർക്കൊരു ബാധ്യതയാകും. അത് പാടില്ല. സാവിത്രി കഥകൾ പറഞ്ഞുണ്ണിമോളെയുറക്കാൻ തുടങ്ങി. പക്ഷേ ആ ഏഴു വയസ്സുകാരി ഉറങ്ങാതെ കണ്ണും നിറച്ചു കിടന്നു. തന്നെ അമ്മ ഉപേക്ഷിച്ചുപോകുകയാണല്ലോ എന്ന ചിന്തയിൽ ആ പിഞ്ചുമനസ് വേവലാതിപ്പെട്ടു കൊണ്ടിരുന്നു കുറേ നേരം കഴിഞ്ഞപ്പോൾ സാവിത്രി തലയുയർത്തി നോക്കി, അവൾ ഉറങ്ങിയിരിക്കുന്നു. സാവിത്രി പതിയെ എഴുന്നേറ്റു. തനിക്ക് ഉറക്കമില്ലാതായിട്ട് കുറെയായിരിക്കുന്നു. മകളുടെ കല്യാണം നാളെ നടക്കണം അത്രയേ ഉള്ളൂ... എങ്കിലേ തനിക്ക്‌ സമാധാനം കിട്ടൂ.. ഉറങ്ങിക്കിടക്കുന്ന ഉണ്ണി മോളുടെ നിറുകയിൽ സാവിത്രി മെല്ലെ തഴുകി.. പാവം കുട്ടി.. അവളുടെ അച്ഛന് അവളെ വേണ്ട.... ശിവദയെ കല്യാണം കഴിക്കാൻ പോകുന്ന മനുവിനോട് ഉണ്ണിമോൾ ഒരു ബാധ്യതയാകില്ലെന്ന് തങ്ങൾ ഉറപ്പ് പറഞ്ഞതാണ്.. ഉണ്ണി മോൾക്ക് താൻ ഉണ്ടല്ലോ, താനവളെ നന്നായി നോക്കും. ഈ സമയം മുറിയിൽ ഇരുന്ന് ശിവദ കണ്ണുനീർ വാർക്കുകയായിരുന്നു. തന്റെ മകളെ പിരിയാൻ തന്നെക്കൊണ്ടാവില്ല. അമ്മയും ആരോമലും പറയുന്നത് മറ്റൊരു ജീവിതം തെരഞ്ഞെടുക്കണമെന്നാണ്. എത്ര നാൾ ഇങ്ങനെ വീട്ടിൽ നിൽക്കുമെന്ന് നിനക്കും വേണ്ടേ ഒരു ജീവിതമെന്ന്. ഒറ്റക്ക് മകളെയും കൊണ്ട് ജീവിക്കാൻ താൻ തീരുമാനിച്ചതാണ്. പക്ഷെ എല്ലാവരും കൂടി തന്നെ ഭയപ്പെടുത്തുകയാണ്, വളർന്നു വരുന്ന മകളെയും കൊണ്ട് ഒറ്റയ്ക്ക് എങ്ങനെയാണ് ഒരു സ്ത്രീ ജീവിക്കുന്നത് , അതൊന്നും ശരിയല്ലെന്ന്. ചുറ്റിലും കഴുകൻ കണ്ണുമായി ജീവിക്കുന്നവരാണെന്ന്... മനു പാവമാണത്രേ.... രണ്ടാം വിവാഹമായതുകൊണ്ട് അടുത്ത ബന്ധുക്കളെമാത്രമേ ക്ഷണിച്ചിട്ടുള്ളൂ... മനുവിന്റെയും രണ്ടാം വിവാഹമാണ് അയാളുടെ ഭാര്യ മരിച്ചു പോയതാണ്. തന്റെ മകളെക്കുറിച്ചോർത്ത് കരഞ്ഞു കരഞ്ഞവളെപ്പോഴോ തളർന്നുറങ്ങി.... 💚💚💚💚💚💚💚 പിറ്റേന്ന് അതിരാവിലെ സാവത്രി അവളെ വിളിച്ചുണർത്തി. മോളെ എഴുന്നേറ്റ് പല്ല് തേക്ക്, എന്തെങ്കിലും കഴിക്കാം. അമ്പലത്തിൽ ചെന്ന് താലികെട്ടും, ഫോട്ടോയെടുപ്പും ഒക്കെ കഴിഞ്ഞ് ഏതെങ്കിലും സമയത്തെ വയറു നിറച്ച് ഭക്ഷണം കഴിക്കാൻ പറ്റൂ... അമ്മേ മോളുടെ കാര്യം ആലോചിച്ചിട്ട് എനിക്ക് ഒട്ടും സമാധാനമില്ല. ശിവദ പറഞ്ഞു. അതോർത്ത് നീ വിഷമിക്കേണ്ട. നിന്നെയും ആരോമലിനെയും ഞാൻ എങ്ങനെയാണ് വളർത്തിയതെന്ന് നിനക്കറിയാമല്ലോ. അതുപോലെ തന്നെ ഞാൻ അവളെയും വളർത്തും. നീ എഴുന്നേൽക്കാൻ നോക്ക്. അവർ ഗൗരവത്തോടെ പറഞ്ഞു. അവൾ എഴുന്നേറ്റു... ബ്രഷ് ചെയ്ത്,കുളിച്ച് വന്ന്, അവൾ ഭക്ഷണം കഴിച്ചു അവളെ ഒരുക്കാനായി അവളുടെ കസിൻ ഹിമ നേരത്തെ തന്നെ വന്നിട്ടുണ്ടായിരുന്നു. ശിവദയെ ഒരുക്കിയതിനു ശേഷം ഹിമ ഉണ്ണിമോളെയും സുന്ദരിയായി ഒരുക്കി. ഉണ്ണി മോളുടെ മുഖത്ത് അല്പംപോലും സന്തോഷമില്ലായിരുന്നു. കല്യാണപ്പെണ്ണായി ഒരുങ്ങിയിരിക്കുന്ന ശിവദയുടെ നേരെയവൾ നോക്കി.. അമ്മയെ നോക്കുംതോറും കുഞ്ഞിന്റെ കണ്ണുകൾ നിറഞ്ഞൊഴുകി.... 💚💚💚💚💚💚 തുടരും. (ബാക്കി വായിക്കാൻ കമ്മന്റ് ഇട്ട് ഫോളോ ചെയ്താൽ മതി ട്ടോ 🥰🥰) കണ്ണൂർകാരൻ 🥰🥰🥰🥰 #✍ തുടർക്കഥ #💞 പ്രണയകഥകൾ #📔 കഥ #📙 നോവൽ #📚 ട്വിസ്റ്റ് കഥകൾ