ഗർഭിണികൾ റമദാൻ നോമ്പ് എടുക്കുമ്പോൾ ശ്രദ്ധിക്കേണ്ടത്..
ഗര്ഭിണികൾക്കുള്ള നിരവധി സംശയങ്ങളിൽ ഒന്ന് റമദാനിൽ ഗർഭിണികൾ നോമ്പെടുക്കുന്നതു സംബന്ധിച്ചുള്ളത്. ഗർഭിണികളെ സംബന്ധിച്ചിടത്തോളം നോമ്പെടുക്കൽ എത്രത്തോളം സുരക്ഷിതമാണെന്ന സംശയം സ്വാഭാവികവുമാണ്. ശാരീരികമായും വൈദ്യശാസ്ത്രപരമായും കഴിയുമെങ്കിൽപ്പോലും ഗർഭിണികൾക്ക് ഉപവാസം അവരുടെ തീരുമാനമാണ്.
ഓരോ വ്യക്തിക്കും അനുസൃതമായാണ് ഗർഭിണികളുടെ ആരോഗ്യം. ചിലർക്ക് നോമ്പെടുക്കുന്നത് അത്ര പ്രയാസകരമാകില്ല. എന്നാൽ ചിലരെ സംമ്പന്ധിച്ചു വളരെ പ്രയാസവും. ഒന്നാമതായി, നോമ്പെടുക്കാൻ തീരുമാനിക്കുന്നതിന് മുൻപ് ഡോക്ടറെ സമീപിച്ച് ഉപദേശം തേടണം. അമ്മയുടെ ആരോഗ്യനില വിലയിരുത്താനും സാധ്യമായ അപകടസാധ്യതകൾ വിലയിരുത്താനും ഉപവാസം സുരക്ഷിതമാണോ അല്ലയോ എന്നതിനെക്കുറിച്ചുള്ള മാർഗനിർദേശം നൽകാനും കഴിയും. ചില സമയങ്ങളിൽ ഉപവാസം അമ്മയ്ക്കും കുഞ്ഞിനും പ്രതികൂല ഫലങ്ങൾ ഉണ്ടാക്കും.
ഗർഭിണി വ്രതമെടുക്കാൻ തീരുമാനിച്ചാൽ, ഭക്ഷണക്രമത്തിലും പ്രത്യേക ശ്രദ്ധ നൽകണം. കുഞ്ഞിന്റെ വികാസത്തിന് ആവശ്യമായ എല്ലാ പോഷകങ്ങളും വിറ്റാമിനുകളും ഉൾക്കൊള്ളുന്ന സമീകൃതാഹാരം കഴിക്കുന്നത് വളരെ പ്രധാനമാണ്. പ്രോട്ടീൻ, കാർബോഹൈഡ്രേറ്റ്, ആരോഗ്യകരമായ കൊഴുപ്പ് എന്നിവയുൾപ്പെടെ ഭക്ഷണം സമീകൃതമായിരിക്കണം. സാവധാനം ഭക്ഷണം കഴിക്കാനും പ്രഭാതത്തിന് മുൻപും സന്ധ്യയ്ക്കുശേഷവും അമിതമായി ഭക്ഷണം കഴിക്കുന്നത് ഒഴിവാക്കാനും ശ്രദ്ധിക്കണം.
നോമ്പ് തുടങ്ങുന്നതിന് മുൻപും അവസാനിപ്പിച്ചതിന് ശേഷവും ധാരാളം ദ്രാവകങ്ങൾ കുടിച്ച് നിർജ്ജലീകരണം ഒഴിവാക്കണം. വെള്ളം, ജ്യൂസുകൾ (മധുരം ചേർക്കാത്തതാണ് നല്ലത്), സൂപ്പ് എന്നിവ കുടിക്കുന്നത് നിർജ്ജലീകരണം തടയാനും ശരീരത്തിലെ ജലാംശം നിലനിർത്താനും സഹായിക്കും. നിർജ്ജലീകരണം അംനിയോട്ടിക് ഫ്ലൂയിഡ് കുറയാനും കുഞ്ഞിന്റെ വളർച്ചയെ പ്രതികൂലമായി ബാധിക്കാനും കാരണമായേക്കാം. മൂത്രത്തിൽ പഴുപ്പിനുള്ള സാധ്യതയും അതുവഴി മാസം തികയുംമുൻപ് പ്രസവവേദന വരാനും കാരണമായേക്കാം. ചൂട് കാലങ്ങളിൽ ഇക്കാര്യത്തിൽ കൂടുതൽ ശ്രദ്ധവേണം. കൂടാതെ കഫീൻ, പഞ്ചസാര പാനീയങ്ങൾ എന്നിവ ഒഴിവാക്കണം. അവ നിർജ്ജലീകരണത്തിന് കാരണമാകും. ഗർഭകാലത്ത് അടിക്കടിയുണ്ടാകുന്ന ഛർദ്ദി, ഗർഭസംബന്ധമായ പ്രമേഹം, രക്തസമ്മർദ്ദം എന്നിവ ഉള്ള സ്ത്രീകൾ നോമ്പെടുക്കുന്നത് ഉത്തമമല്ല.
#🌙 ഇന്ന് റംസാൻ 1 ; വ്രതശുദ്ധിയിൽ പുണ്യമാസത്തെ വരവേറ്റ് വിശ്വാസികൾ #🤲 റമളാൻ കരീം 🕋 #💪ഹെല്ത്ത് ടിപ്സ് #💪Health advice #👩 Women's Health
