ఓ అడవి దారిలో పోతున్నా...
అంతలో ఎక్కడినుండో పిలుపు..
ఓయ్..ఇలా రావోయ్! ఓసారంటూ..
చుట్టూ చూసా...
ఓ ఒంటరి వటవృక్షం నుండి
ఆ పిలుపు ...
ఏమిటి సంగతనడిగా...
నన్ను పట్టించుకోకుండా పోతున్నావేంటంది..
సమయంలేదన్నాను..
అవున్లే...కుండీల్లో అందాలు పెంచే నీకు
మేమెలా ఆనతామంది...
అంతమాటన్నావేంటన్నాను...
అప్పడు చెప్పింది తన ఎద ఘోషనిలా...
నువ్వు పుట్టింది ..
మా చెట్ల ఎదని కోసి చేసినమంచంమీద!
నువ్వు ఊయలలూగింది ...
మా కాళ్ళని నరికి చేసిన ఊయలలో!
మేమిచ్చిన ప్రాణవాయువు తోనే..
నువ్వు ఊపిరులూదుకుంది!
మా తనువు కోసి చేసిన మూడు చక్రాల బండితోనేగా..
నువ్వు అడుగులు నేర్చింది!
నువ్వు ఆటలాడిన బొమ్మలు..
పాటపాడిన వేణువు..
నువ్వు స్వర సాధన చేసిన సంగీత పరికరాలు..
మా వంటిని మలచుకుని చేసుకున్నవేగా!
నువ్వు ఆస్వాదించింది...
మేమిచ్చిన మధురఫలాల్ని!
నువ్వు అలంకరించుకొంది....
మాతరువుల నుండి తుంచుకొన్న పూలని!
నువ్వు కూర్చోడానికి కుర్చీ..
నువ్వు రాసుకునే బల్ల..
నువ్వు కవితలు రాసిన కాగితం ...
నువ్వు ఉండే ఇంటికి తలుపు..
నువ్వు నడవలేని వయసులో ఊతకర్ర..
చివరికి రేపు నువ్వు గిట్టాకా
నిను మోసే పాడె...
నీకు మోక్షాన్నిచ్చే చితి...
అన్నిటా నీకు తోడై ఉన్నాంకదా!
మరి ఇన్నిటిని ఒసగినమాకు ...
నువ్వు ఒరగబెట్టిందేంటి?
అడవుల్ని తెగనరుకుతున్నావ్..
ఆలోచించావా ఎపుడైనా.. !
మమ్మల్ని ఆశ్రయించుకున్న
ఎన్ని జీవజాతులు నశిస్తున్నాయో !!
అంతెందుకు...
నింగివైపు చూసి తిట్టుకుంటున్నావ్..
చుక్కనీరు కురియట్లేదని.
నిందలు ఇంకొకరిపైనా?
వినాశానికి కారణం నువ్వై...!
మునుపెంత మురిసిపోయేవో మేఘాలు..
మా వృక్షసమూహాలపై కురిసి పులకించి...
అవీ దాటెళ్ళిపోతున్నాయ్...
మేమెక్కడా కనరాక!
హేతువౌతున్నావు..
నీ నాశనంతో పాటు
పచ్చని ప్రకృతిని వికృతిగా మారడానికి..
అందుకే ఇకనైనా మేలుకో...
నీ వికృత స్వప్నాలనుండి..
పరిపూర్ణపురుషుడివికా...
ప్రకృతిని కాపాడి!
వృక్షోరక్షతి రక్షతి రక్షితః....
అంటూ నినాదాలివ్వడంకాదు...
ఆచరించి చూపించు...
మమ్మల్ని పచ్చగా ఉంచు...
కలకాలం చిరంజీవిగా జీవించు!!!!!!!
#save trees🌲🙏🙏 #save trees #వృక్షోరక్షతి రక్షతి రక్షితః #వృక్షో రక్షతి రక్షితః 🌳 #వృక్షో రక్షతి రక్షితః.. 🌴