ഗ്വാളിയോര്: മധ്യപ്രദേശിലെ ഗ്വാളിയോറില് അഞ്ച് വയസുകാരനായ മകനെ കൊലപ്പെടുത്തിയ കേസില് അമ്മക്ക് ജീവപര്യന്തം.കോണ്സ്റ്റബിള് ധ്യാൻ സിംഗ് റാത്തോഡിന്റെ ഭാര്യ ജ്യോതി റാത്തോഡിനാണ് കോടതി ജീവപര്യന്തം തടവ് ശിക്ഷ വിധിച്ചത്.
2023 ഏപ്രില് 28നാണ് കേസിനാസ്പദമായ സംഭവം. ജ്യോതിക്ക് അയല്വാസിയായ ഉദയ് ഇൻഡോലിയയുമായി ബന്ധമുണ്ടായിരുന്നുവെന്നാണ് ആരോപണം. ഒരു ദിവസം ജ്യോതിയെയും ഉദയിനെയും മകൻ ജതിൻ ഒരുമിച്ച് കണ്ടതാണ് കൊലപാതകത്തിലേക്ക് നയിച്ചത്. താൻ കണ്ട കാര്യങ്ങള് അച്ഛൻ ധ്യാനിനോട് പറയുമെന്ന് ജതിൻ അമ്മയെ ഭീഷണിപ്പെടുത്തി. ഭയചകിതയായ ജ്യോതി കുട്ടിയെ കൊലപ്പെടുത്താൻ തീരുമാനിക്കുകയായിരുന്നു. മകനെ കെട്ടിടത്തിന്റെ രണ്ടാം നിലയില് വലിച്ചെറിഞ്ഞു. ഗുരുതരമായി പരിക്കേറ്റ ജതിനെ ആശുപത്രിയില് എത്തിച്ചെങ്കിലും 24 മണിക്കൂറിനുള്ളില് മരണം സംഭവിച്ചു. തുടക്കത്തില് അപകടമരണമാണെന്നാണ് കരുതിയിരുന്നത്. എന്നാല് കുറ്റകൃത്യം നടന്ന് പതിനഞ്ച് ദിവസത്തിന് ശേഷം, ജ്യോതി പൊട്ടിക്കരഞ്ഞുകൊണ്ട് ധ്യാനിനോട് കുറ്റസമ്മതം നടത്തി.
മകന്റെ മരണത്തില് ആദ്യം മുതലേ ധ്യാനിന് സംശയം തോന്നിയിരുന്നു. ജ്യോതി കുറ്റസമ്മതം നടത്തുന്ന ഓഡിയോ, വീഡിയോ സംഭാഷണങ്ങള് ധ്യാൻ റെക്കോഡ് ചെയ്യുകയും വീട്ടിലെ സിസി ടിവി ദൃശ്യങ്ങള് പരിശോധിക്കുകയും ചെയ്തു. തുടര്ന്ന് ഈ തെളിവുകളുമായി ധ്യാൻ പൊലീസിനെ സമീപിച്ച് പരാതി നല്കി. കേസെടുത്ത പൊലീസ് ജ്യോതിയെയും കാമുകൻ ഉദയെയും പ്രതികളാക്കി കുറ്റപത്രം സമർപ്പിക്കുകയും ചെയ്തു. വിചാരണയ്ക്കിടെ, ഹാജരാക്കിയ തെളിവുകളുടെ അടിസ്ഥാനത്തില് ജ്യോതി കുറ്റക്കാരിയാണെന്ന് കോടതി കണ്ടെത്തി ജീവപര്യന്തം തടവിന് ശിക്ഷിച്ചു. തെളിവുകളുടെ അഭാവം ചൂണ്ടിക്കാട്ടി ഉദയിനെ കോടതി വെറുതെവിട്ടു.#keralarain #localnews #viralnews #latest
#👌 വൈറൽ വീഡിയോസ്