#📖జనరల్ ఇన్ఫర్మేషన్👩💼 #📜 సాహిత్యం #✍️ఒరిజినల్ సాహిత్యం #తెలుగు భాషా సాహిత్యాలు (నవల)*
సమకాలీన ప్రపంచ సాహిత్యంలో ప్రాంతీయ మూలాల నుండి విశ్వజనీన ఆర్ద్రతను పిండుకునే నవలలు అరుదుగా వస్తున్నాయి. తెలుగు సాహిత్యంలో తొలి నదీ పర్యావరణ నవలగా వచ్చిన 'అగండం' ప్రత్యేకమైనది. దక్కన్ పీఠ భూమి తాత్వికతను, పెద్దేరు (మూసీ నది) పరివాహక ప్రాంతంలోని సబ్బండ వర్గాల మూడు తరాల సంఘర్షణను ఈ నవల పోస్ట్-కలోనియల్, సబాల్టర్న్, పర్యావరణ విమర్శ సిద్ధాంతాల వెలుగు ఆవిష్కరించింది. ఈ నవల పాలకుల అణచివేతను రాజకీయ కోణంలోనే కాకుండా, సమాజంలోని అత్యంత సున్నిత భాగమైన బాల్యంపై చూపిన ప్రభావంను ప్రభావవంతంగా వ్యక్తమవుతుంది. ఇది అంతర్జాతీయ స్థాయి సాహిత్య శిల్పంలో కనిపిస్తుంది.
ఈ నవలలో ట్రామా స్టడీస్ కోణంలో చూస్తే, బాలల చిత్రణ పాఠకుడిని తీవ్రమైన అనుభూతికి లోను చేస్తుంది. పీడించేవాడి క్రూరత్వం పీడితుడి పిల్లలనే కాకుండా, పీడించే వారి సంతానాన్ని కూడా వెంటాడుతూ వారిని ఎలా వికృతంగా మారుస్తుందో సైకో-ఎనలిటికల్ ధోరణిలో మానవ భావోద్వాగాలను నవలలో రచయిత అద్భుతంగా చూపించాడు. గడీల కాలంలో దొరల దాష్టీకానికి తల్లుల చీర కొంగుల్లో దాక్కున్న పసిపిల్లల నిస్సహాయత, ఒకే రాత్రి జనన మరణాల సంధిలో మండుతున్న గుడిసెలో ప్రసవించిన నవజాత శిశువు “క్యావ్ క్యావ్” మంటూ లోకంలోకి అడుగుపెట్టిన ఆర్తనానాదాలు పాఠకుడికి కంటనీరు తెప్పిస్తుంది. దొర కొడుకు ఆరేళ్ల ప్రతాపరెడ్డి బుర్రలోకి ఉగ్గుపాలతో పాటు పగను, ప్రతీకారాన్ని నూరిపోసే తండ్రి మోహన్ రెడ్డి నైజం.. తరాల వారసత్వ క్రూరత్వానికి దర్పణం పడుతుంది.
రాబ్ నిక్సన్ చెప్పిన నిదానంగా సాగే హింస (స్లో వయోలెన్స్)కు అనారోగ్యంతో బాధపడే బస్తీ పిల్లలు బలవ్వడం పర్యావరణ విమర్శకు పరాకాష్ట. ఫ్యాక్టరీల రసాయన విషాన్ని తాగిన పసిపిల్లలు వాంతులు, విరేచనాలతో మురికివాడ సందుల్లో ప్రాణాలు విడుస్తుంటే.. పర్యావరణ విధ్వంసం సమాజపు భవిష్యత్తును ఖూనీ చేస్తున్నట్టుగా కనిపిస్తుంది.
అగండం నవల విషాదంతో ముగిసిపోలేదు. కొత్తం తరం పిల్లలు అక్షరాన్ని, సాంకేతికతను ఆయుధాలుగా మలిచారు. ఆరిపోయిన అగండ దీపాన్ని వెలిగించారు. నలిగిపోయిన బాల్యం నుండి వికసించిన మేధో విప్లవానికి ఈ నవల ప్రతీక. ఈ నవలలో ఉన్నది నది కథ. ఆ నదీ తీరంలో దగాపడ్డ బాల్యం. రేపటి స్వేచ్ఛా తీరాలను వెతుక్కుంటూ సాగించిన ఒక అజరామరమైన ఆత్మగౌరవ ప్రయాణం. ప్రపంచ శ్రేణి సాహిత్యంగా నిలవడానికి తెలుగు సాహిత్యానికి అన్ని అర్హతలున్నాయని నిరూపించడానికి త్వరలో మీ ముందుకు వస్తుంది.
-రచయిత
@all
#international day of literature 
