ପୁରୀ ତାଳବଣିଆ ଜଙ୍ଗଲରେ ନିଁଆ। ହୁତୁହୁତୁ ହୋଇ ଜଳିଲା ତାଳବଣିଆ ଜଙ୍ଗଲ। କେମିତି ନିଆଁ ଲାଗିଲା, ତାହା ଜଣାପଡ଼ିନାହିଁ। ତେବେ ଖବର ପାଇ ଅଗ୍ନିଶମ ବିଭାଗ ଘଟଣା ସ୍ଥଳରେ ପହଞ୍ଚି ନିଆଁଙ୍କୁ ଆୟତ୍ତ କରିଥିଲା। ତାଳବଣିଆ ଜଙ୍ଗଲ ହେଉଛି ବନ୍ୟପ୍ରାଣୀ ହରିଣମାନଙ୍କର ଚରାଭୂଇଁ। ପାଣି ପିଇବାକୁ ଆସି ବିଚରଣ କରନ୍ତି ବନ୍ୟଜନ୍ତୁ। ଜଙ୍ଗଲରେ ନିଆଁ ଲାଗିବା ଦ୍ବାରା ସେମାନେ ଅସୁରକ୍ଷିତ ହୋଇପଡ଼ିଥିବା ବେଳେ ପ୍ରାଣହାନୀ ହେବାର ଯଥେଷ୍ଟ ସମ୍ଭାବନା ରହିଛି। ସେପଟେ ତାଳବଣିଆ ଜଙ୍ଗଲରେ ପ୍ରତ୍ୟେକ ଦିନ ଲୋକଙ୍କ ଭୋଜିଭାତର ଆସର ଜମିଥିବା ବେଳେ ରୋଷେଇ ସରିବା ପରେ କେହିକେହି ଚୂଲି ନଲିଭାଇବାରୁ ଜଙ୍ଗଲକୁ ନିଆଁ ବ୍ୟାପିଥିବା ଅନୁମାନ କରାଯାଉଛି। ଅନ୍ୟପଟେ ତାଳବଣିଆ ଜଙ୍ଗଲ ବର୍ତ୍ତମାନ ଡମ୍ପିୟାର୍ଡ ପାଲଟିଥିବା ବେଳେ ସେଠାରେ ନିଶାଖୋର୍ ବ୍ୟକ୍ତିଙ୍କ ଆଡ୍ଡା ଜମୁଛି। ତେଣୁ କେହି ସିଗାରେଟ୍ କିମ୍ବା ବିଡି ଟାଣି ଜଳନ୍ତା ଅବସ୍ଥାରେ ଜଙ୍ଗଲକୁ ଫୋପାଡ଼ି ଦେବାରୁ ନିଆଁ ବ୍ୟାପିଥିବା ମଧ୍ୟ ଅନୁମାନ କରାଯାଉଛି। ତେବେ ଜିଲ୍ଲା ପ୍ରଶାସନ ଜଙ୍ଗଲ ସୁରକ୍ଷା ପାଇଁ ତତ୍ପରତା ଦେଖାଉନଥିବା ବେଳେ ଅନେକ ସମୟରେ ଜଙ୍ଗଲ ଜଳିବାର ନଜିର୍ ରହିଛି। ତେଣୁ ପ୍ରଶାସନ ଲୋକମାନଙ୍କୁ ସଚେତନ ନକଲେ କି ବେଆଇନ୍ ଭାବେ ରୋଷେଇ କରୁଥିବା ଲୋକଙ୍କ ଉପରେ କାର୍ଯ୍ୟାନୁଷ୍ଠାନ ନନେଲେ ଜଙ୍ଗଲ ସୁରକ୍ଷା ଉପରେ ପ୍ରଶ୍ନବାଚୀ ସୃଷ୍ଟି ହେବାସହ ପ୍ରାକୃତିକ ସମ୍ପଦ ନଷ୍ଟ ହେବ ଓ ହରିଣମାନେ ବିପଦରେ ପଡ଼ିବେ ଏଥିରେ ତିଳେମାତ୍ର ସନ୍ଦେହ ନାହିଁ।
#🚨 ପୁରୀ ଜଙ୍ଗଲରେ ଅଜଣା ଚାଞ୍ଚଲ୍ୟ!😱