ସାମାନ୍ୟ ଶୁଖୁଆ ଟିକକ ପାଇଁ ଚାଲିଗଲା ମହିଳାଙ୍କ ଜୀବନ। ରାଗିଯାଇ ସ୍ତ୍ରୀକୁ ତେଣ୍ଟାରେ ଭୁସି ନୃଶଂସ ଭାବେ ହତ୍ୟା କରିଛି ସ୍ୱାମୀ। ଏଭଳି ଏକ ଅଭାବନୀୟ ତଥା ହୃଦୟବିଦାରକ ଘଟଣା ଘଟିଛି ଜଗତସିଂହପୁର ଥାନା ଅନ୍ତର୍ଗତ ଜଂକୋଠି ବଳରାମପୁର ଗ୍ରାମରେ। ମୃତ ମହିଳା ଜଣକ ହେଲେ ପୁଷ୍ପଲତା ସ୍ୱାଇଁ।ସୂଚନା ଅନୁସାରେ, ବିଳମ୍ବିତ ରାତିରେ ଶୁଖୁଆକୁ କେନ୍ଦ୍ର କରି ପୁଷ୍ପଲତା ଏବଂ ତାଙ୍କ ସ୍ୱାମୀ ଦିଗାମ୍ବର ସ୍ୱାଇଁଙ୍କ ମଧ୍ୟରେ କୌଣସି କଥାକୁ ନେଇ ଝଗଡ଼ା ହୋଇଥିଲା। ବଚସା ଉଗ୍ରରୂପ ନେବାରୁ ଉତକ୍ଷିପ୍ତ ହୋଇ ଦିଗାମ୍ବର ଘରେ ଥିବା ଏକ ତେଣ୍ଟାରେ ପୁଷ୍ପଲତାଙ୍କୁ ଆକ୍ରମଣ କରିଥିଲେ। ତେଣ୍ଟା ମାଡ଼ରେ ଗୁରୁତର ଆହତ ହୋଇ ଘଟଣାସ୍ଥଳରେ ହିଁ ପୁଷ୍ପଲତାଙ୍କ ମୃତ୍ୟୁ ଘଟିଥିଲା।ଖବର ପାଇ ଜଗତସିଂହପୁର ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରିବା ସହ ବ୍ୟବଚ୍ଛେଦ ପାଇଁ ଡାକ୍ତରଖାନାକୁ ପଠାଇଛି। ଏହା ସହିତ ଅଭିଯୁକ୍ତ ସ୍ୱାମୀ ଦିଗାମ୍ବର ସ୍ୱାଇଁଙ୍କୁ ପୋଲିସ ଅଟକ ରଖି ପଚରାଉଚରା ଚଳାଇଛି ଏବଂ ହତ୍ୟାକାଣ୍ଡରେ ବ୍ୟବହୃତ ତେଣ୍ଟାକୁ ଜବତ କରିଛି। ସାମାନ୍ୟ କଥାରୁ ଏଭଳି ବର୍ବର କାଣ୍ଡ ଘଟିଥିବାରୁ ସ୍ଥାନୀୟ ଅଞ୍ଚଳରେ ଶୋକାକୁଳ ପରିବେଶ ସୃଷ୍ଟି ହୋଇଛି। ପୋଲିସ ଘଟଣାର ଅଧିକ ତଦନ୍ତ ଜାରି ରଖିଛି।
#🐟ସାମାନ୍ୟ ଶୁଖୁଆ ପାଇଁ ଘଟିଗଲା ହତ୍ୟାକାଣ୍ଡ😱
