కలిసి వుంటే కలదు సుఖం అనే పెద్దల నానుడికి తూట్లు పోడుస్తున్న నేటి మనతరం! ( 15 - 5 - 2026)!
లేదా
ఒకప్పుడు నిత్యకళ్యాణం పచ్చ తోరణంలా వున్న ఉమ్మడి కుటుంబం నేడు ఎవరికీ వారే యమున తీరులా మారిన వైనం!
( నేడు అంతర్జాతీయ కుటుంబ దినోత్సవం సందర్బంగా )
మన భారతీయ సంస్కృతి,సంప్రదాయాలకు ఓక ఆభరణం వంటి ఉమ్మడి కుటుంబ వ్యవస్థ గురించి ఒక్కసారి మనమంతా ఆత్మావలోకనం, మననం చేసుకోవాల్సిన అవశ్యకత ఎంతైనా వుంది.ఒకప్పుడు ఉమ్మడి కుటుంబం అంటే అన్నదమ్ములు,అక్క చెల్లెళ్లు, అమ్మ నాన్నలు,బాబాయ్ లు,పెద్ద నాన్నలు, అవ్వ,తాత ముత్తాతలు,జేజి,జేజినాన్నలు,మనవళ్ళు, మనువరాళ్లతో ఇలా అందరూ కలిసి మెలిసి ఓకే చోట వుంటూ ఎంతో అన్యోన్యంగా ఉండేవారు.ఓక విధంగా చెప్పాలంటే కుటుంబ వ్యవస్థ అనేది గతంలో మూడు పువ్వులు,ఆరు కాయలుగా వర్ధిల్లుతూ సుఖ, సంతోషాలకు నిలయంగా,బంధు మిత్రుల కోలాహలంతో, రాకతో అనునిత్యం సందడి సందడిగా అలరారుతుండేది.తద్వారా అనురాగం,ప్రేమ అప్యాయతలు,ఒకరి పట్ల ఒకరు గౌరవ మర్యాదలు అనేవి ఉమ్మడి కుటుంబ సభ్యుల మధ్య వెల్లివిరిసేవి.అంటే నిత్య కళ్యాణం పచ్చతోరణంలా ఉమ్మడి కుటుంబాలు ఓక వెలుగు వెలిగేవి అన్న మాట.కానీ రాను రాను ఉమ్మడి కుటుంబ వ్యవస్థ విచ్చిన్నం అవుతూ వచ్చి చివరకు ఎవరికీ వారే యమున తీరు లాగా తయారు అయ్యి,పుట్టకొకరు, చెట్టుకొకరు అన్న తీరుగా కేవలం అమ్మ,నాన్న, కుమారుడు,కుమార్తె మాత్రమే కలిసి జీవించే (సింగిల్ ) ఒంటరి కుటుంబ వ్యవస్థగా మారిపోవడం అనేది అత్యంత బాధాకరమైన విషయం.ఓక విధంగా ఈ దయనీయ స్థితి మూలాన రోజు రోజుకు అడుగంటిపోతున్న ఉమ్మడి కుటుంబ వ్యవస్థకు,కలిసి వుంటే కలదు సుఖం అనే నీతి సామెతకు బీటలు వారేలా,తూట్లు పొడిచేలా పరిస్థితులు ప్రస్తుత వ్యవస్థలో,సమాజంలో ప్రాప్తించాయి, తయారు అయ్యాయి అనే మాట ఎవరు కాదనలేని అక్షర సత్యం.
ఏదిఏమైనా ఈ అంతర్జాతీయ కుటుంబ దినోత్సవం సందర్బంగా నైనా గతం గత: జరిగిన దాని గురించి చింతించి ఏమి ప్రయోజనం అన్న రీతిగా ఇప్పటికైనా మనమంతా మన ఉమ్మడి కుటుంబవిలువలకు,నైతికతకు అత్యంత ప్రాధాన్యం ఇచ్చి ఏ పండుగ కో, పబ్బానికో అయిన మన కుటుంబ సభ్యులంతా ఓక చోట కలిసి ముచ్చట్లు పెట్టుకొని ఒకరి కష్ట, సుఖాలు మరొకరు చెప్పుకుంటూ, ఒకరి ఆనందం, సంతోషాలలో,బాధల్లో మరొకరు పాలుపంచుకుంటూ నీరుగారిపోయిన కుటుంబ వ్యవస్థకు మళ్ళీ జనసత్వాలు నింపుదాం,దాని బలోపేతానికి ఊతమిద్దాం.ఏమైన మనమంతా తరచుగా అనే మాట( ' old is gold ' ) పాతరోజులు బంగారంతో సమానం.ఆ మరపురాని రోజులు,ఉమ్మడి కుటుంబ వ్యవస్థ చాలా గొప్పగా మనుగడ సాగించిన ఆ చిరస్మరణీయ కాలం,మధుర సృతులు అనేవి మనకు ఓక మరచిపోలేని సుమధుర జ్ఞాపకాలతో సమానం. ' సర్వేజన సుఖినోభవంతు ' ' కలిసి వుంటే నిలుస్తాం విడిపోతే పడిపోతాం అధ - పాతాళానికి అనే నైతికతకు,నియామవాళికి కట్టుబడి మన ఉమ్మడి కుటుంబ వ్యవస్థను అత్యంత సమర్థవంతంగా తీర్డిదిద్దే బృహత్తర బాధ్యత మనందరి భుజస్కందాలపై ఎంతైనా వుంది.జయ జయహో ఉమ్మడి కుటుంబవ్యవస్థ! వర్ధిల్లాలి మరో పది కాలాల పాటు మన ఉమ్మడి నైతిక విలువల కుటుంబ వ్యవస్థ!👨👩👦👦👨👨👧👧👨👨👧👦
- బుగ్గన మధుసూదనరెడ్డి,వైస్సార్సీపీ పార్టీ నాయకుడు & సామాజిక విశ్లేషకుడు, బేతంచెర్ల,నంద్యాల జిల్లా!
#🌍అంతర్జాతీయ కుటుంబ దినోత్సవం👨👩👧👦🎉
