अशक्य ही शक्य...(©मंदार जोग) नव्या वर्षाच्या पहिल्या दिवशी आलेला एक सुंदर अनुभव. काल आम्ही भावंडं सहकुटुंब एकत्र जमलो होतो. पत्ते, गाणी आणि गप्पा मध्ये झोपायला तीन वाजले. सकाळी उठायला उशीर होऊन जवळ जवळ आठ वाजले. पण आज सुट्टीचा दिवस असल्याने काही धावपळ नव्हती. सकाळी परत सर्वांनी एकत्र ब्रेकफास्ट केला आणि आपापल्या घरी आलो. मी शक्यतो कोणताही सण किंवा विशेष दिवस असेल तर आमच्या घराजवळ असलेल्या स्वामींच्या मठात जाऊन दर्शन घेतो. खूप छान वाटतं. त्यानुसार आजही संध्याकाळी मठात जायचं ठरवलं होतं. बायकोशी बोलताना देखील त्याचा तीन चार वेळा उल्लेख केला. आज वॉक ला दांडी मारल्याने संध्याकाळ मोकळी होती. मग आमचा टिव्ही काही दिवस नादुरुस्त झाल्याने नवीन टिव्ही घ्यायचं बऱ्याच दिवसांपासून पेंडींग असलेलं काम करायचं ठरवलं. टिव्ही खरेदी झाली की बायको वॉकला जाणार आणि मी मठात जायचं अस ठरवून मी आणि बायको गाडी न घेता चालत त्या दुकानात गेलो. दुकानात बोलून, मॉडेल ठरवून, किंमत घासाघीस करून होई पर्यंत तास दीड तास गेला. हल्लीच आमच्या कामवाल्या बाईंचा मुलगा दुसऱ्या एका इलेक्ट्रोनिक दुकानात नोकरीला लागला आहे. कामवाल्या बाईंनी आमच्या बायकोला सांगितलं होतं की माझा मुलगा त्याच्या दुकानात सवलत मिळवून देईल. बायकोने त्या पहिल्या दुकानातून त्याला सहज फोन केला तर त्याने ह्या दुकानापेक्षा तीन चार हजार जास्त सवलत दिली. पण ती ज्या कार्ड वर होती नेमक ते कार्ड आम्ही बरोबर घेतलं नव्हतं. मग मेट्रो पकडून आम्ही घरी आलो. बायकोने ते कार्ड घेतलं. मग परत पार्किंग मध्ये वेळ जायला नको म्हणून आम्ही गाडी न घेता रिक्षाने त्या दुकानात गेलो. तिथे एक वेगळाच पर्याय पसंत पडला ज्यात आणखी चार हजार रुपये वाचले. आम्ही शेवटी तो टिव्ही बुक केला. मी जाणार असलेला मठ नऊ वाजता बंद होतो. तिथे वेळेत पोहोचणं अशक्य होतं. बायकोला वाटतं होतं की त्या इलेक्ट्रॉनिक दुकानाच्या जवळपास आणखी एक मठ आहे. पण तो तिचा गैरसमज असल्याचं लक्षात आलं. म्हणजे आज टिव्ही खरेदीच्या नादात मठात जाणं चुकलं होतं. मी थोडा खट्टू झालो. पण मग ठरवलं की घरी येऊन गाडी घेऊन जायचं आणि बंद झालेल्या मठाच्या बाहेरून का होईना पण वर्षाच्या पहिल्या दिवशी दर्शन घ्यायचं. तिथल्या जाळीतून स्वामींचा चेहरा दिसतो. आम्ही घरी येऊन मठात जायला निघालो. गाडी पार्क करून मी बाहेरून दर्शन घ्यायला गाडीतून उतरत असताना मला मठात एक माणूस जातना दिसला! मला आश्चर्य वाटलं. मी बायकोला म्हणालो "साडे नऊ वाजले तरी मठ अजूनही उघडा आहे बहुतेक. मी आलोच." अस म्हणून मी धावत निघालो. मठाच्या अंगणात पोहोचलो. तिथल्या सुरक्षा रक्षकाला विचारलं तर तो म्हणाला "पटापट जा. बंद होतोय!" मी हातपाय धुवून लगबगीने आत गेलो. आत तीन लोक होते फक्त. मी चौथा. पुढले दोघे गाभर्याजवळ दर्शन घेऊन बाहेर पडले. माझ्या पुढला हात जोडून अर्ध मिनिट उभा होता. तो बाजूला झाल्यावर मी स्वामींच्या समोर उभा राहिलो. प्रार्थना केली. अंगारा, तीर्थ, प्रसाद घेतले. नमस्कार करून डोळे मिटून नामस्मरण केलं. डोळे उघडून परत दर्शन घेतलं आणि गाभाऱ्यातील पुजाऱ्याने माझ्याकडे पाहिलं. मी मान हलवून हो म्हणालो आणि मग त्याने गाभाऱ्याचा दरवाजा बंद केला. मी बाहेर येऊन प्रदक्षिणा घातली आणि चपला घालताना गार्ड ला विचारलं की आज मठ इतक्या उशिरा पर्यंत कसा काय सुरू? आणि त्याने आठवण करून दिली की आज श्री नृसिंसरस्वती जयंती आहे. म्हणून आज बंद करायला जरा उशीर झालाय. वर्षाच्या पहिल्या दिवशी मनात होतं त्यानुसार स्वामींच अनपेक्षित दर्शन झाल्याने मी खुश होतो. मी गाडीत येऊन बसलो आणि मठाचा मुख्य दरवाजा बंद झाला. मला फारच भरून आलं. जणू स्वामींची इच्छा होती मला दर्शन द्यायची. मला पोहोचायला एक मिनिट जरी उशीर झाला असता तर गाभारा, मठ आणि बाहेरचा मुख्य दरवाजा बंद झाले असते. जणू स्वामी मला दर्शन देण्यासाठी ते दरवाजे उघडे ठेऊन वाट पहात असावे असं मनाला वाटून खूप खूप समाधान वाटलं. डोळ्यात पाणी दाटलं. आपली श्रद्धा आणि भक्ती मनापासून असेल तर देव कोणत्याही प्रकारे आपल्याला दर्शन देतोच ह्याचा प्रत्यय आला आणि आजच्या दर्शनातून मिळालेला स्वामींचा आशीर्वाद वर्षभर पाठीशी राहील असा आत्मविश्वास देखील निर्माण झाला. आज श्री नृसिंसरस्वती जयंती आहे हे मला अजिबात माहीत नव्हतं. मी टीव्हीच्या नादात मठात न जाऊ शकल्याने थोडी अपराधी भावना मनात घेऊन बाहेरून नमस्कार करायला गेलो होतो. बरं मठ बंदच असणार हे गृहीत असल्याने धावपळ वगैरे काहीही न करता आरामात गेलो होतो. पण मला दर्शन मिळालं. मी आज दर्शन घेणारी शेवटची व्यक्ती ठरलो! माझ्यासाठी अशक्य असलेली गोष्ट स्वामींनी शक्य केली अशी माझी श्रद्धा आणि भावना आहे. आणि ही भावना खूप ऊर्जा, सकारात्मकता देणारी आणि humbling आहे. तसेच नवीन वर्षात पदार्पण करताना खूप आत्मविश्वास देणारी आहे! आपले सर्वांचे नवीन वर्ष श्री स्वामी समर्थ ह्यांच्या कृपेने अतिशय आनंदाचे, आरोग्यपूर्ण आणि भरभराटीचे जावो ही सदिच्छा! श्री स्वामी समर्थ🙏🏻 टीप - ज्यांना असं वाटेल की मठ आज anyway उशिरा बंद झाला आणि मी योगायोगाने त्या वेळेत पोहोचलो म्हणून ह्यात काही विशेष नाही त्यांच्या मताचा आदर आहे. ज्यांना ह्यात अंधश्रद्धा वगैरे वाटेल त्यांच्याबद्दल देखील राग नाही. पण ह्या पोस्टवर जे चेष्टा वगैरे करायचा प्रयत्न करतील त्यांना मी अजिबात ब्लॉक करणार नाहीये. कारण ती चेष्टा माझी नसेल. त्यांच्या कॉमेंट मात्र डिलीट करून त्यांचा फैसला त्याच्यावर सोडणार आहे ज्याची त्यांनी चेष्टा केलेली असेल! ज्यांची श्रद्धा आहे त्यांनी पोस्ट अवश्य शेयर करा. #😍फक्त प्रेम वेडे #💑तुझी माझी जोडी #❤️I Love You #💗प्रेम #🌹प्रेमरंग