#🚩அய்யா வைகுண்டர் 🚩 #அய்யா வைகுண்டர் கர்த்தன் உலகளந்த ஆண்டவர் அய்யா வைகுண்டர் அருளிய அகிலத்திரட்டு அம்மானை-1ஆம் நாள் வாசிப்பு தொடர்ச்சி - நாள் 30.09.2025. . அய்யா துணை . தினமொரு நேரம் எந்தன் திருமொழி யதனைக் கேட்டால் பனிவெள்ளம் போலே பாவம் பறந்திடும் நிசமே சொன்னோம் – அய்யா வைகுண்டர். . அகிலம் ======== . . ஆகமம் எழுதத் தொடங்கிய ஆண்டு, மாதம், தேதியும், அரிகோபால சீசரின் தன்னிலை விளக்கமும். ---------------------------------- அகிலம் ======== தோத்திர மென்று சுவாமி தனைத்தொழுது ராத்திரி தூக்கம் நான்வைத் திருக்கையிலே ஆண்டான ஆண்டு ஆயிரத்துப் பதினாறில் கண்டானைக் கண்டேன் கார்த்திகை மாதமதில் தெய்தியிரு பத்தேழில் சிறந்தவெள்ளி நாளையிலே சுகுதியுடன் நித்திரையில் சுபக்கியான லக்கமதில் நாதனென் னருகில் நலமாக வந்திருந்து சீதமுட னெழுப்பிச் செப்பினார் காரணத்தை காப்பி லொருசீரு கனிவாய் மிகத்திறந்து தாப்பிரிய மாகச் சாற்றினா ரெம்பெருமாள் மகனேயிவ் வாய்மொழியை வகுக்குங் காண்டமதுக்கு உகமோ ரறிய உரைநீ முதற்காப்பாய் அதின்மேல் நடப்புன் உள்ளே யகமிருந்து சரிசமனாய் நான்வகுப்பேன் தானெழுது காண்டமதை நானுரைக்க நீயெழுதி நாடுபதி னாலறிய யானுரைக்க நீயெழுதி அன்போர்கள் தங்கள்முன்னே . நூற்பயன் ========= வாசிக்கக் கேட்டு மகிழ்ந்திருந்த அன்போர்க்குப் பூசித்து நின்ற பூரணங்கள் கிட்டுமடா . விளக்கம் ========= மலையாள வருடம், அதாவது கொல்லம் ஆண்டு ஆயிரத்துப் பதினாறில் கார்த்திகை மாதம் இருபத்து ஏழாம் தேதி (11-12-1840) வெள்ளிக்கிழமை அன்று இரவு, அடியேன் ஏதோ ஒருவிதமான இசையின்பத்தில் கலந்தவனாக, சுகமான ஆழ்நிலை தியானத்தில் என்னையே மறந்திருந்தேன். அப்போது நான் அன்றாடம் வணங்கி வருகின்ற அய்யா வைகுண்டப் பரம்பொருள் என் அருகில் மிகப்பிரகாசமாக வந்தமர்ந்து, மெதுவாக என்னை எழுப்பி தன்னுணர்வு பெறச்செய்து, இந்த அகிலத்திரட்டு அம்மானை என்னும் ஆகமத்தை எழுதுவதற்கான காரணத்தையும், அவ்வாகமத்தின் தொடக்கமாக ஏரணியோன் என்னும் ஒரு வார்த்தையையும் அய்யா தம் திருவாய் மலர்ந்து கருத்தாழத்தோடு அருளினார். . மகனே! நான் இப்போது உன்னிடம் சொன்ன என் வாய்மொழியை இப்போது எழுதப்போகும் இந்த உலக வரலாற்றுக்கு காப்பின் முதற்சீராக அமைத்துக் கொள். உலகறிய நீ எழுதப்போகும் ஒப்பரிய சரிதைக்கு, மேல் நடப்பு விவரங்களையெல்லாம் உன் மனதுள் நான் சரிசம்மாக அமர்ந்திருந்து தெளிவாக எடுத்துரைப்பேன். எனவே தளர்ச்சியே இல்லாமல் இந்தக் காண்டத்தை எழுதத் தொடங்கு. . நான் சொல்வதைக் கேட்டு நீ ஏட்டில் எழுதும் இச்சரிதை பதினாலு லோகங்களும் அறிவதற்கே ஆகும். நானுரைக்கும் இந்தச் சம்பவத்தை நீ ஏழுதுவதின் பயனாக அன்புடையோர் அனைவரும் பயன்பெறுவார்கள். . இவ்வாகமத்தை படிப்போரும், இடைவிடாது எப்பொழுதும் இறைவனை தியானித்துக் கொண்டிருப்போருக்கும் எத்தகைய நற்பயன்கள் ஏற்படுகின்றனவோ, அத்தனையும் பூரணமாகக் கிடைக்கும் என்று அய்யா அடியேனை எழுத ஆயத்தமாக்கினார். . . அகிலம் ======== ஆகமப் பயன் ============= பழித்தோர் நகைத்தோர் பதிலெதிரி யாய்ப்பறைந்தோர் கழித்தோர் வறுமைகண்டு கடுநரகம் புக்கிடுவார் . விளக்கம் ========== இவ்வாகமச் செய்திகளைப் பழித்தோரும், நகைத்தோரும், எதிர் உரை பகர்வோரும், வெறுப்போடு பரிகாசம் செய்வோரும் அருள்செல்வம், பொருள் செல்வம் அறிவுஞானச் செல்வம் ஆகியவை எதுவுமற்று அல்லல் மிகுந்த நரக வாழ்க்கை எனப்படும் தொல்லை மிகு வாழ்க்கையை அனுபவிப்பார்கள். . . அகிலம் ======== மலடியு மிக்கதையை மாவிருப்பத் தோடிளகி தலமளந்தோ னைநாடி தான்கேட்பா ளாமாகில் என்னாணை பார்வதியாள் எகாபரத்தின் தன்னாணை உன்னாணை மதலை உடனே கிடைக்குமடா . விளக்கம் ========== முன்வினைப் பயனால் குழந்தை பாக்கியம் இல்லாதவளாக, தாய்மையடையும் தகுதியற்றவளாக மலடி, மலடி என்று மாற்றாரின் வசைமொழியால் வருந்திக் கொண்டிருக்கும் மாதுவானவள், இந்த ஆகமத்தை எடுத்து, இது இறைவனின் சரித்திரம் என உறுதியாக நினைத்து மனவிருப்பதோடு படிக்கவோ, கேட்கவோ செய்வாளேயானால் இவ்வுலகத்தைப் படைத்து அதை இயக்கிக் கொண்டிருக்கும் என்மீது சத்தியமாகவும், லோகமாதாவாகிய ஈஸ்வரியின்மேல் ஆணையாகவும் என் மக்களாகிய உங்கள் மீது ஆணையாகவும் உறுதி கூறுகிறேன். அந்த மாதுவுக்கு உடனே குழந்தை கிடைக்கும். . . அகிலம் ======== குட்டமது கொண்டோர் குணம்வைத்துக் கேட்பாரேல் திட்டமது சொன்னோம் தீருந் திருவாணை . விளக்கம் ========== இந்த ஆகமத்திலுள்ள செய்திகளை வாசித்து கொண்டிருக்கும்போது, அதை ஒரு குஷடரோகி ஒருமனத்தோடு இருந்து கேட்டுக்கொண்டிருப்பானேயானால் அவனுக்கு அந்த நோய் அப்பொழுதே அகன்று போகும் என்பதை தெய்வமாகிய நான் திட்டவட்டமாகச் சத்தியமிட்டுச் சொல்லுகிறேன் என்று எழுதப் போகும் இந்த ஆகமத்தின் பயன்பற்றிய உண்மையை அரிகோபால சீசருக்கு அய்யா எடுத்துரைத்தார். . . தொடரும்... அய்யா உண்டு. #💚Ayya 💗 Vaikundar💚 #Ayya Vaikundar #அய்யா வைகுண்டர் {1008}