#📔 കഥ ഹൃദയത്തിന്റെ അവകാശി ഭാഗം-3 രാത്രിയിലും ശ്രീക്കു നല്ല പനിയുണ്ടായിരുന്നു.. യശോധ അവൾക്കൊപ്പം കിടക്കാൻ വന്നപ്പോൾ ശ്രീ സമ്മതിച്ചില്ല. മനസ്സില്ലാമനസ്സോടെ അവർ തിരിച്ചു പോയി. "ഗൗരികുട്ടി.... നിന്റെ പണിയൊക്കെ കഴിഞ്ഞ.." "കഴിഞ്ഞു അഭിയേട്ട.. ശ്രീകുട്ടിക്ക് എങ്ങനെയുണ്ട്." "മോൾക്ക് നല്ല പനിയുണ്ട്. എന്നാലും നിന്റെ ആങ്ങള എന്റെ കൊച്ചിന്റെ കൈയിൽ എന്ത് പിടിത്തമാണ് പിടിച്ചത്. അവൻ കണ്ട ജിമ്മിലൊക്കെ പോയി മസ്സില് ഉരുട്ടികയറ്റി വച്ചിട്ട് , കണ്ടാൽ പത്തിൽ പഠിക്കുകയാണോ എന്ന് തോന്നുന്ന എന്റെ കൊച്ചിന്റെ ദേഹത്തു കൈ വച്ചേക്കുന്നു. അതിന്റെ കൈ ഒടിയാഞ്ഞത് ഭാഗ്യം. അങ്ങനെ വല്ലതും പറ്റിയാൽ അവൾ വെറുതെ ഇരിക്കുമോ. ഇന്ന് ടയറിന്റെ കാറ്റേ പോയുള്ളു. അല്ലെങ്കിൽ അവന്റെ കാറ്റ് പോയേനെ.." അത് കേട്ടപ്പോൾ ഗൗരി ചിരിച്ചു പോയി. "എടിയേ.. നമുക്ക് ഒളിച്ചോടിപോയി കല്യാണം കഴിക്കാം. അതാണ് സേഫ് ആരും വേണ്ട. വീട്ടിൽ വരുമ്പോൾ എല്ലാരും അറിഞ്ഞാൽ മതി. അല്ലെങ്കിൽ നിന്റെ ആങ്ങള എന്ന് പറയുന്ന തടിമാടനും എന്റെ പെങ്ങൾ എന്ന് പറയുന്ന നെത്തോലിയും കൂടി കൂട്ടിമുട്ടിയാൽ നമ്മുടെ കല്യാണം മുടങ്ങുമെടി സത്യം ". "ഈ അഭിയേട്ടൻ എന്താ പറയുന്നേ അവൾ കൊച്ചല്ലേ.. അതൊക്കെയങ്ങു കുറച്ചും കൂടി കഴിയുമ്പോൾ മാറും.." "അവള് കൊച്ചാണെന്നുള്ള ബോധം നിന്റെ ആങ്ങള പോത്തിനുണ്ടോ. അവനോടു ഞാൻ ഇന്ന് അതുപറഞ്ഞപ്പോൾ എന്നോട് ചോദിക്കുവാ നിന്റെ കുഞ്ഞിപ്പെങ്ങൾക്കു പ്രായം 5 ആണോന്നു.. എനിക്ക് വിറഞ്ഞു വന്നതാ. പിന്നെ നിന്നെയോർത്തിട്ട ഒന്നും മിണ്ടാഞ്ഞത്." "ഏട്ടന് മൂക്കത്താണ് ശുണ്ഠി... എന്ത് ചെയ്യാനാണ്. ഞാൻ ഉപദേശിക്കാൻ ചെല്ലാൻ പറ്റുമോ. എന്നെ ശരിയാക്കും. ഏട്ടൻ വൈകിട്ട് വന്നപ്പോൾ അമ്മ കണക്കിന് കൊടുത്തു. അതിന്റെ വീഡിയോ ഞാൻ ശ്രീകുട്ടിക്ക് ഇട്ടു കൊടുത്തു." "അതെന്തിനാ ആ വീഡിയോ അവൾക്കു ഇട്ടു കൊടുത്തത്." "അവൾ പറഞ്ഞിട്ടാണ്. അമ്മായി ഇന്ന് രുദ്രനെ തല്ലുന്ന വീഡിയോ അവൾക്കു വേണം എന്ന് വാശി പിടിച്ചു. കൊടുത്തില്ലെങ്കിൽ അറിയാലോ.." "അതാ പറഞ്ഞത് നമുക്ക് ഒളിച്ചോടാമെന്നു. നീ അതിനെ പറ്റിയൊന്നു ആലോചിക്കൂ കേട്ടോ. എന്നാ നീ ഉറങ്ങിക്കോ.. നാളെ ഞാൻ ഉച്ചയ്ക്ക് സ്കൂളിൽ വരാം. ഉച്ചയ്ക്ക് ശേഷം ലീവ് മറക്കണ്ട .. നമുക്കൊന്ന് സ്വസ്ഥമായിട്ട് പ്രണയിച്ചിട്ടു വരാടി." "ശരിയേട്ടാ... കിടന്നോ നാളെ കാണാം." ** "ശ്രീകുട്ടിക്ക് കുറവുണ്ടോ അമ്മേ.." "കുറവുണ്ട് മോനെ. കൈയ്ക്കു വേദനയുണ്ടെന്നു തോന്നുന്നു.. നാളെ പോകണം എന്ന് പറഞ്ഞു നിൽക്കുവാ." "എന്നാൽ ഒന്നുടെയൊന്നു ആശുപത്രിയിൽ കാണിക്കു ". "ഇന്നലെ ഞാൻ വിചാരിച്ചു ആശുപത്രിയാണെന്ന് നോക്കാതെ രണ്ടും തല്ലി ചാകുമെന്നു. അവൻ ഒരു ഡോക്ടറല്ലേ അത് മാത്രമോ അത് നമ്മുടെ കൊച്ചും. അവനെ കാണിക്കാതെ വേറെ ഡോക്ടറെ കാണിക്കാൻ പോയാൽ അവനല്ലേ അതിന്റെ മോശക്കേട്. അതുകൊണ്ട് ഒന്നും വയ്യാത്ത അവസ്ഥയാ എന്ത് ചെയ്യാൻ പറ്റും." "അവൾക്കു വല്ലതും വാങ്ങാൻ ഉണ്ടോ.. എന്തേലും ഉണ്ടേൽ എനിക്ക് ഒന്നു മെസ്സേജ് ഇട്ടാൽ മതി വരുമ്പോൾ ഞാൻ വാങ്ങി വരാം." "അവൾ എഴുന്നേൽക്കട്ടെ എന്നിട്ട് ചോദിക്കാം. നീ സമയം കളയാതെ ഇറങ്ങാൻ നോക്കു." "മുത്തശ്ശി.... എനിക്ക് വയ്യ മുത്തശ്ശി.." "സാരമില്ല കുട്ടി മാറിക്കൊള്ളും. വയ്യാച്ചാൽ നാളെ പോകാതെയിരുന്നൂടെ. അവിടെ ചെന്നാൽ ആര് നോക്കും." "സാരമില്ല മുത്തശ്ശി.. എന്റെ കൈ വേദനിക്കും പോലെ അവന്റെ കൈയും വേദനിക്കും. അവനെയൊന്നു ബൈക്കിൽ നിന്നും തള്ളി താഴെയിടണേ എന്റെ ഭഗവതി.. " "എന്റെ കുട്ട്യേ ഇങ്ങനെയൊന്നും പറയാതെ.. ഈശ്വര ആർക്കും ഒരു ദോഷവും വരുത്തല്ലേ.." "ഓഹോ.. കൊച്ചുമോനെ പറഞ്ഞപ്പോൾ പിടിച്ചില്ല അല്ലേ. എനിക്കറിയാം മുത്തശ്ശിക്കു എന്നെക്കാളുമിഷ്ടം ആ കാട്ടുമാക്കാനെ ആണെന്ന്. അല്ലെങ്കിലും ഞാനാണല്ലോ അധികപറ്റ് . നാളെ ഞാൻ അങ്ങ് പോകും നിന്നെ കാണാതെ വയ്യകുട്ടി എന്ന് പറഞ്ഞു വിളിക്കുമല്ലോ അപ്പോൾ ഞാൻ കാണിച്ചു തരാം." "എനിക്ക് എന്റെ കൊച്ചുമക്കൾ എല്ലാം ഒരുപോലെയാണ്. എന്നാലും ഇത്തിരി കൂടുതൽ ഇഷ്ടം നിന്നോടല്ലേ. ഇങ്ങനെ കുശുമ്പ് കുത്തിയാൽ എങ്ങനാണ്." "അങ്ങനെയാണേൽ മുത്തശ്ശിക്കു കൊള്ളാം." "അമ്മ... വിശക്കുന്നു വല്ലതും വാരിതായോ .. എന്റെ കൈപോയെ ഞാൻ ഇനി എന്തുമാത്രം കഷ്ടപെടണം." "അമ്മായി.... അമ്മായി... "രുദ്രൻ അങ്ങോട്ട്‌ കയറി വന്നു. "നീ ഇരിക്ക് മോനെ.. യശോദേ രുദ്രൻ വന്നു.." മാധവിയമ്മ അടുക്കളയിലോട്ടു പോയി. രുദ്രനെ കണ്ടിട്ടും കാണാത്തപോലെ കാലിന്മേൽ കാലിട്ടു ഇരിക്കുകയാണ് ശ്രീ. രുദ്രൻ അവളെയൊന്നു നോക്കി. മുടിയെല്ലാം കൂടി ഉച്ചിയിൽ ചുറ്റിക്കെട്ടി വച്ചേക്കുയാണ്.ഇട്ടേക്കുന്ന ഷർട്ട്‌ മുട്ടുവരെയുണ്ട്. വേറെയൊന്നും അതിനു താഴോട്ടില്ല. "അശ്രീകരം..." രുദ്രൻ പിറുപിറുത്തു. "മോനെ.. ഒത്തിരിയായോ വന്നിട്ട്. ഞാൻ ഇത്തിരി ചീര പറിക്കാൻ പാടത്തേക്ക് പോയതാ." "ഇന്നാ അമ്മായി ഈ മരുന്നും കൂടി കൊടുത്തേക്കു. ഇത് തരാൻ വന്നതാ ഞാൻ ഇറങ്ങുന്നു.." "മക്കള് വല്ലതും കഴിച്ചോ.. ഇല്ലെങ്കിൽ വായോ കഴിക്കാം ". "വേണ്ടമ്മായി ഞാൻ കഴിച്ചതാ ഇപ്പോൾ തന്നെ നേരം വൈകി." "എന്തൊരു സ്നേഹം അമ്മായിക്ക് . കുറച്ചും കൂടി ഉരുട്ടി കൊടുക്ക്‌ അവനു. എന്റെ മറ്റേ കൈയും കൂടി അവൻ ഒടിക്കട്ടെ.." "എന്റെ കൊച്ചേ ഒന്ന് പതുക്കെ പറ.. ആ ചെക്കനെങ്ങാനും കേൾക്കും." "അവൻ കേട്ടാൽ എനിക്ക് പുല്ലാണ് പുല്ല്.. എനിക്ക് ഇത്തിരി ആഹാരം തരുമോ.. " യാശോധ വേഗം ഇത്തിരി കഞ്ഞി കൊണ്ടു വന്നു അവൾക്കു വാരികൊടുത്തു. "ഈ മരുന്നു കൂടി കഴിച്ചോ മോളെ..." "ഈ മരുന്നു അവൻ എന്താ ഇന്നലെ തരാഞ്ഞത്.. അറിയോ ? മനഃപൂർവ്വം എനിക്ക് അസുഖം കുറയാതിരിക്കാൻ . ഇന്നലെ എന്റെ കൈ എന്ത് വേദന ആയിരുന്നു. ഇന്ന് കൊണ്ട് വന്നേക്കുന്നു ഒരു ഗുളിക ഔദാര്യം പോലെ.. ഇതൊന്നും കഴിച്ചു കൂടാത്തതാണ്. പിന്നെ എനിക്ക് വേദന ഉള്ളത് കൊണ്ട് മാത്രം ഞാൻ ഈ ഗുളിക കഴിക്കുവാ.. ഇതിന്റെ ക്യാഷ് അവനു കൊടുക്കണം. എനിക്ക് അവന്റെ ഔദാര്യം വേണ്ട... " "കൊടുക്കാം ആദ്യം നീ മരുന്ന് കഴിച്ചേ.. " "ആദ്യം അവനു ക്യാഷ് കൊടുക്കട്ടെ ഒന്ന് സമാധാനപ്പെടു..." അവൾ അവനു ക്യാഷ് ഗൂഗിൾ പേ ചെയ്തു.. എന്നിട്ട് ഗുളിക കഴിച്ചു. "നിനക്ക് കൊണ്ടു പോകാൻ വല്ലതും വാങ്ങണോ.. അഭിയെ വിളിച്ചു പറഞ്ഞോ വല്ലതും ഉണ്ടേൽ അവൻ വാങ്ങി വരും." "അതുകൊള്ളാം വേണോന്നോ... ആവശ്യങ്ങളേ ഉള്ളു... ഞാൻ അവനെ വിളിച്ചു പറഞ്ഞോളാം.." "അവനെ വിളിക്കണ്ട മെസ്സേജ് അയച്ചാൽ മതിയെന്ന് പറഞ്ഞു." "അതെന്താ അവനെ വിളിച്ചാൽ കുഴപ്പം... എന്തോ ചുറ്റികളിയുണ്ടല്ലോ.." "ഗൗരിയേടത്തി.... ഫ്രീയാണോ..." ""ലഞ്ച് ബ്രേക്ക്‌ ആണ് മോളെ.."" "ആണോ ഏട്ടനെ വിളിച്ചിട്ട് കിട്ടുന്നില്ല.. എനിക്ക് ഒരു ഗുളിക വേണം. ഏട്ടനോട് ഒന്ന് പറയുമോ.. " "അതിനെന്താ അഭിയേട്ടൻ ഇപ്പോൾ ഇങ്ങോട്ട് വരും. അപ്പോൾ തന്നെ ഞാൻ പറയാം. മോളെ വിളിക്കാം കേട്ടോ." "ശരിയേടത്തി... വച്ചോളു... ഉമ്മ..." "പാവം എന്റെ ഏട്ടത്തി... അതിനു മാത്രമേ നല്ല സ്വഭാവം കിട്ടിയുള്ളൂ." "നീയിതെന്താ റോഡിൽ ഇറങ്ങി നിൽക്കുന്നത്.. ഞാൻ വന്നിട്ട് വിളിക്കുമല്ലോ അപ്പോൾ ഇറങ്ങിയാൽ പോരായിരുന്നോ.." "അഭിയേട്ട മോളു വിളിച്ചു ഏതോ ഗുളിക വേണമെന്നു.. ഏട്ടനെ വിളിച്ചിട്ട് കിട്ടിയില്ലയെന്നു പറഞ്ഞു. വേഗം അവളെ വിളിക്കു.." "നീ പറഞ്ഞു കാണും അല്ലേ അവളോട്‌ ഞാൻ ഇപ്പോൾ വരുമെന്ന്. അവൾക്കു എന്തേലും സംശയം തോന്നിയിട്ട് വിളിച്ചതാവും. നീ അതിൽ ചെന്നു കൊളുത്തിയല്ലോ പെണ്ണെ.." "അഭിയേട്ടന് എന്താ കുഴപ്പം.. അതിനു പനിയല്ലേ..." "നിന്റെ ആങ്ങള അവൾക്കു വേണ്ടി വീട്ടിൽ മരുന്ന് കൊണ്ടുകൊടുത്തു..ശത്രുവിന്റെ ഔദാര്യം സ്വീകരിക്കാൻ വയ്യാത്തത് കൊണ്ട് അവൾ അവനു 12 രൂപ അയച്ചു കൊടുത്തു.. അപ്പോൾ നിന്റെ ഡോക്ടർ ആങ്ങള ബാക്കി 1 രൂപ 880 പൈസ ശത്രുവിന്റെ ഫോൺ നമ്പർ ഉപയോഗിക്കാത്തത് കൊണ്ടു എന്റെ അക്കൗണ്ടിൽ അയച്ചു തന്നു. എന്നിട്ട് ഒരു മെസ്സേജും , ടിപ്പ് അവളുടെ............ന് കൊടുക്കാൻ പറയാൻ. ഞാൻ ആ ഡാഷിൽ ആരെ പൂരിപ്പിക്കണം എന്ന് ആലോചിക്കുകയാണ്. " "അയ്യോ ഇനി എന്ത് ചെയ്യും." "ഒന്നും ചെയ്യാനില്ല.. ഒരു നീണ്ട ലിസ്റ്റ് ഇപ്പോൾ വരും. ഒന്നുപോലും കുറയാതെ വാങ്ങി കൊടുക്കേണ്ടി വരും. ഇതൊക്കെ കൊണ്ടാണ് ഞാൻ നിന്നോട് പറയുന്നത് ആരും അറിയാതെ നമുക്കുപോയി കല്യാണം കഴിക്കാമെന്നു. ഇങ്ങനെ ടെൻഷൻ അടിക്കണ്ടല്ലോ." "എങ്ങോട്ടാ പോകുന്നെ..." "സിനിമ ആയിരുന്നു പ്ലാൻ. നിന്നെ സമയത്തു വീട്ടിൽ എത്തിക്കണ്ടേ.. നട്ടുച്ചക്കു ബീച്ചിൽ പോകാൻ വയ്യ. വാ നമുക്ക് വല്ല പാർക്കിലും പോയിരിക്കാം.. ഒന്ന് മനസ്സമാധാനത്തോടെ പ്രേമിക്കാനും ആരും സമ്മതിക്കില്ല." വൈകിട്ട് അഭി വന്നപ്പോൾ അവൾ പറഞ്ഞ എല്ലാ സാധനങ്ങളും ഉണ്ടായിരുന്നു.. അതൊക്കെ കണ്ടപ്പോൾ അവൾക്കു തൃപ്തിയായി.. സുഭദ്ര അവൾക്കു കൊണ്ടുപോകാൻ വേണ്ടി കുറെ പലഹാരങ്ങളൊക്കെ ഉണ്ടാക്കി കൊണ്ടു വന്നു.. യശോധയും ഉണ്ടാക്കിയിട്ടുണ്ട് കുറെയൊക്കെ പലഹാരങ്ങൾ. 'എടി നിനക്കെന്തിനാ ഇത്രയും സാധനങ്ങൾ.. ഇതൊക്കെ നീ തിന്നു തീർക്കുമോ.." "ഇതിൽ നിന്നും എനിക്ക് എന്തെങ്കിലും കിട്ടിയാൽ ഭാഗ്യം." "അതുകൊണ്ടല്ലേ ഞാൻ ഇവിടെയിരുന്നു തിന്നുന്നത്.. പിന്നെ എനിക്കുള്ള സ്പെഷ്യൽ റോഹുവും മറിയാമ്മയും കൊണ്ടു വരും." "എണ്ണ രാത്രിയിൽ ഒരുപാടു കഴിക്കണ്ട മോളെ ഒന്നാമത് പനി മാറിയിട്ടില്ല. നാളെ അത്രെയും ദൂരം പോകാനുള്ളതല്ലേ." സുഭദ്ര അവളുടെ കൈയിലുള്ള പാത്രം മാറ്റി വെച്ചുകൊണ്ട് പറഞ്ഞു. "അങ്ങനെ ഞാൻ നാളെ പോകും. ഇനി തിരിച്ചു വരുന്നത് വരെ മനോഹരമായ ഈ ഓർമ്മകൾ മാത്രമാണ് എനിക്കുള്ളത്." " ആഴ്ചതോറും വരുന്ന നീയാണ്.. അവളുടെ പറച്ചിലും കെട്ടികൊണ്ട് പോകുന്ന സാധനങ്ങളും കണ്ടാൽ രണ്ടു കൊല്ലം കഴിഞ്ഞെ അവൾ തിരിച്ചു വരികയുള്ളു എന്ന് തോന്നും. എന്തോന്നാടി.... ഇത്തിരി തള്ള് കുറയ്ക്കാം.. " "ആണോ... അമ്മ ഇനി പുട്ട് വേണ്ട..." "അമ്മായി അവനെ ചീത്ത പറയുന്ന വീഡിയോ എനിക്ക് അയക്കണം ഏട്ടത്തി.. അവന്റെ ഇഞ്ചി കടിച്ച മുഖം കണ്ടു എനിക്ക് നിർവൃതി അടയണം.. അതുകൊണ്ട് വീഡിയോ മറക്കരുത്." "ഇല്ല മറക്കാതെ തന്നെ ഞാൻ അയച്ചു തരാം.. മോൾ വിഷമിക്കണ്ട.." "പറ്റിയ നാത്തൂൻ ... ഈശ്വര ഇത് രണ്ടും കൂടി ചേർന്ന് എന്താകുമോ എന്തോ.." അഭി നെടുവീർപ്പിട്ടു.. "മോളു കിടക്കു പോയി.. മരുന്നൊക്കെ എടുത്തു വച്ചിട്ടുണ്ടോ.. ഒന്നും മറക്കരുത് കേട്ടോ. രാവിലെ പോകണ്ടേ.. അമ്മായി രാവിലെ മോളു പോകുന്നതിനു മുന്നേ വരാം." "എന്റെ അമ്മായി സൂപ്പർ ആണ്..." "മതിയെടി കള്ളിപ്പെണ്ണേ സുഖിപ്പിച്ചത്.." അതിനു അവൾ ചിരിച്ചു കാണിച്ചു. അഭി അവരെ കൊണ്ടാക്കാനായിട്ട് കൂടെ പോയി. ശ്രീ തന്റെ മുറിയിൽ വന്നു. എല്ലാം ഒന്നും കൂടി നോക്കി എടുത്തു വച്ചു. എന്നിട്ട് കിടക്കയിലേക്ക് മറിഞ്ഞു.. "ഹെലോ മാഡം ATM CARD വേണ്ടേ... മറന്നുപോയോ..." "മറന്നതല്ല വേണ്ടടാ.. ഞാൻ പറയുമ്പോൾ നീ എനിക്ക് ട്രാൻസ്ഫർ ചെയ്തു തന്നാൽ മതി." "അതെന്താ പെട്ടന്ന് ഒരു മനം മാറ്റം." "ഞാൻ കുറെ ആലോചിച്ചെടുത്ത തീരുമാനമാണ്.. ഇപ്പോൾ നിന്റെ കാർഡ് ഞാൻ കൊണ്ടു പോകുന്നു. അതിൽ ലക്ഷകണക്കിന് കാശ് ഉണ്ട്.. എന്നെ ആരെങ്കിലും തട്ടിക്കൊണ്ടു പോകുന്നു എന്ന് വിചാരിച്ചു നോക്കെ.. അവർക്കു ഈ കാർഡും കിട്ടും. എന്നെ ഭീഷണി പെടുത്തി അവർ ഇതിന്റെ പിന്നെ നമ്പർ വേടിക്കും. അപ്പോൾ ക്യാഷ് അവർ കൊണ്ടു പോകും. അതിനെക്കാൾ നല്ലതല്ലേ എന്നെ ആരെങ്കിലും പിടിച്ചു കൊണ്ട് പോയാൽ മോചനദ്രവ്യം ആവശ്യപെടുമ്പോൾ ഇത് കൊടുക്കാം അപ്പോൾ നിങ്ങൾക്കു എന്നെ തിരിച്ചു കിട്ടുമല്ലോ.." "എന്റെ ശ്രീക്കുട്ടി..... നിന്നെയുണ്ടല്ലോ....." തുടരും....... രചന -സിന്ദാരോ