கர்த்தாதி கர்த்தன் உலகளந்த ஆண்டவர் ஸ்ரீமன் நாராயணர் தாமே வைகுண்டராய் தோன்றி அருளிய அகிலத்திரட்டு அம்மானை மூன்றாம் நாள் வாசிப்பு ஆரம்பம் - நாள் 18.11.2025. . அய்யா துணை . தினமொரு நேரம் எந்தன் திருமொழி யதனைக் கேட்டால் பனிவெள்ளம் போலே பாவம் பறந்திடும் நிசமே சொன்னோம் – அய்யா வைகுண்டர். . அகிலம்: ========= கஞ்சனையு மற்றுமுள்ள காலவுணர் தங்களையும் வஞ்சகமா யுள்ள வாணநர பாலனையும் இம்முதலா யுள்ள ஏற்ற அரக்கரையும் அம்முதலா யுள்ளவரை அரியோ னறுத்தனராம் சத்தபெல முள்ள தத்துவத்தார் தங்களையும் வித்தகனார் கொல்ல மேல்நினைத்தா ரம்மானை கஞ்சன் வலிமை கட்டழித்துத் தேவருக்கு அஞ்ச லருளி ஆழிக்குள் வீற்றிருந்தார் . ருக்மணி கல்யாணம் ================== வாரிக்குள் கோட்டை வளைந்துமணி மேடைவைத்து வீரக் குருநாதன் வீற்றிருந்தா ரம்மானை மாயன் துவாரகா பதிவாழ்ந்து தானிருக்க நாயனுக்கு வந்த நல்ல உருப்பிணியை விதியை யறியாமல் மேலுமொரு ராசனுக்குத் திருமாங் கலியம் சேர்க்கத் துணிந்தனராம் . விளக்கம் ======= கம்சனையும், கம்சனுக்குத் துணையாகக் கம்சனோடு வாழ்ந்த அசுரர்களையும், அரசன் நரவாணனையும் அழித்து ஒழித்த கண்ணபிரான், அடுத்து சப்தபலக்காரர்கள் ஏழுபேரில் பாகாசூரன், இடும்பாசூரன், மணிமாலன், கீசகன், சராசந்தன், துரியோதனன் ஆகிய ஆறுபேரையும் வீமனின் மூலமாகக் கொல்லவேண்டுமென நிச்சயித்து, தற்பொழுது கம்சனுடைய கயமை நிறைந்த வரலாற்றை முடித்துவிட்டு, தேjவர்களுக்கெல்லாம் நல்லருள் புரிந்துகொண்டு, துவரயம்பதியில் தாம் பள்ளிகொண்டிருக்கும் விதத்தில் கோட்டை கொத்தளங்களை அமைத்து அருள்பாலித்துக் கொண்டிருந்தார். . அப்போது மாயாதி சூட்சனாகிய மகாவிஷ்ணுவின் மறு அவதாரமான மாயக் கிருஷ்ண பரமாத்மாவை மணம் புரிவதற்கென்றே துவாபர பூமியில் பிறப்பெடுத்திருக்கும் ருக்குமணி தேவியை, சிறப்பு பொருந்திய வீர அரசன் சிசுபாலனுக்குத் திருமணம் செய்து கொடுப்பதென உற்றாரும், உறவினரும் விதிப்பயனை உணராமல் முடிவு செய்தனர். . . அகிலம் ======= அப்போது நாரதரும் அரியோ னடிபணிந்து இப்போது வுன்றனக்கு இசைந்த உருப்பிணியைப் பாணிக் கிரணம் பண்ணப் பறையடித்தார் நானிதையுங் கேட்டுநாடியுரைத்தே னென்றார் அம்முனிவன் சொல்ல அரியோன் மிகக்கேட்டு இம்முனிந்து போக இசைந்தார்கா ணம்மானை மோகத்திரு மாலை முக்கோடி பொன்னதுக்கு வேகத்தா லுண்டுபண்ணி விரைவாய்க் கொடுநடந்தார் முழுத்திரு மாலைதன்னை மொய்குழலாள் கன்னியுடக் கழுத்திலே யிட்டுக் காமக்கண் ணீட்டிடவே மாயனுக்கும் மோகம் மாதுக்கும் மும்மோகம் தேயமெங்கும் மோகம் சென்றதுகா ணம்மானை முன்னாலே கேட்டு முகூர்த்தமிட்ட பேர்களையும் அந்நாளே கொன்று அவன்படையுந் தானறுத்து உருப்பிணிக்குத் தேவரெல்லாம் ஓலமிட மாலையிட்டு விருப்புகழ்ந்த மாயன் விமான மதிலேறி மனோன்மணியை யுங்கூட்டி மாயன் படையுடனே வினோகர மால்தானும் விரைவாய் நடைநடந்து வடவெல்லாந் தீர்த்து வைகுண்டப் பெம்மானும் கடலுக்குள் சென்றிருந்தார் காயாம்பு மேகவண்ணர் இப்படியே முன்னம் இசைந்திருந்த பெண்ணையெல்லாம் அப்படியே மாலையிட்டு அமர்ந்திருந்தா ரம்மானை . விளக்கம் ======== ருக்குமணி தேவிக்குத் திருமணம் நிச்சயிக்கப்பட்ட செய்தியை அறிந்த நாரதமாமுனிவர், துவரையம்பதிக்குச் சென்று கிருஷ்ண பரமாத்மாவை வணங்கி, கிருஷ்ணா தங்களுக்கு மாலையிடவேண்டிய ருக்குமணி தேவிக்கும் சிசுபாலனுக்கும் திருமணம் நடத்தப்போவதாகத் தேசமெங்கும் பறை சாற்றப்பட்டுள்ளது. யான் அறிந்த இச்செய்தியைத் தங்களுக்குத் தெரிவிப்பதற்காகவே வந்தேன் என்றார். நாரதர் உரைத்த நல்மொழியை நயமாகக் கேட்டுணர்ந்து நாராயாணர் நாரத மாமுனிவரை நளினமாக அனுப்பி வைத்துவிட்டு, ருக்குமணியைத் திருமணம் செய்யத் எண்ணினார். . அதன்படியே யாவரும் இச்சிக்கத்தக்க முக்கியமான புதியதோர் பொன்னாரத்தை துரிதமாகச் செய்து எடுத்துக் கொண்டு விரைவாக ருக்குமணிதேவியை நோக்கி சென்றார். வழியில் ருக்குமணியின் அண்ணன் ருக்குமி என்பவன் கிருஷ்ணரை வழிமறித்தான். ருக்குமணிக்கு நீ மாலையிட கூடாதென மறுத்தான். பின்பு சிசுபாலன் எதிர்த்தான். ஆனால் கிருஷ்ண பரமாத்மாவோ, தம்மை எதிர்த்தோரையெல்லாம் இனம் தெரியாமலாக்கினார். . கண்ணபிரான் எண்ணிவந்த காரியங்கள் யாவும் திண்ணமாக நிறைவேறியது. அவர் கொண்டுவந்த பொன்னாரத்தை குறுநகையோடு ருக்குமணியின் தளிர் பூங்கழுத்திலே பரிசமெனச் சூட்டினார். கிருஷ்ண பரமாத்மாவின் பரிசத்தை ஏற்ற ருக்குமணி தேவிக்கோ இந்தப் பாவபூமியில் பிறப்பெடுத்ததால் ஏற்பட்ட பரிதவிப்பெல்லாம் அக்கணமே அகன்று போயின. இருவரும் மோகனப் பார்வையில் மூழ்கிப் போயினர். அவர்களின் அந்தக் காதல் நேயத்தை, ஜென்மாந்திர பந்தத்தைத் தேசத்தோர் அனைவரும் உணர்ந்தனர். தேவர்களோ திருமுறையம் பாடி அந்தத் திருமணத்தை ஆமோதித்து அதற்கான ஏற்பாடுகளையெல்லாம் தடபுடலாகச் செவ்வனே செய்தனர். . ருக்குமணி தேவிக்கு, கிருஷ்ண பரமாத்மா மங்களமாக மானசீக தர்மத் திருச்சரடைத் தரித்தார். உடனே தம் மனைவியாகிய கருஷ்ணபிரகப்தம், எனப்படும் ருக்குமணி தேவியோடும், தம் பக்தர்களோடும் கடலுக்குள்ளிருக்கும் துவரயம்பதிக்குச் சென்றார். இவ்வண்ணமாகக் கிருஷ்ண அவதாரக் கிரிகைகளுக்காக பூலோகத்தில் பிறவி செய்யப்பட்டிருந்த மங்கையர்களையும் மணமுடித்தவராய் கிருஷ்ண பரமாத்மா துவரயம்பதியில் அமர்ந்திருந்தார். . . தொடரும்… அய்யா உண்டு. #🚩அய்யா வைகுண்டர் 🚩 #💚Ayya 💗 Vaikundar💚 #Ayya Vaikundar #அய்யா வைகுண்டர் #அய்யா வைகுண்டர் {1008}