#🌾शेती माहिती #🌾शेती आणि व्यवसाय⚙ #🌱मी शेतकरी विभाग🏵️* *🏵️महाराष्ट्र शासन🏵️* *रोग नियंत्रण ⭕पोक्का बोईंग -* हा रोग फ्युजॅरिअम बुरशीमुळे होतो. तीन ते सात महिन्यांच्या उसामध्ये मॉन्सूनपूर्व वळीव पाऊस व मॉन्सूनमुळे वाढलेल्या हवेतील आर्द्रतेमुळे हा रोग पानांवर मोठ्या प्रमाणात दिसून येतो. सुरवातीस बुरशीची लागण शेंड्यातून येणाऱ्या तिसऱ्या वा चौथ्या कोवळ्या पानावर दिसून येते. पानाच्या खालच्या भागात सुरवातीस फिक्कट हिरवट, पिवळसर, पांढरट पट्टे अथवा ठिपके दिसतात. अशा पानांचा आकार बदलतो. लांबी कमी होते व खोडाकडील भाग अरुंद होऊन पाने एकमेकांत गुंफली जातात. त्यामुळे ती पूर्णपणे उघडली जात नाहीत. प्रादुर्भावग्रस्त जुन्या पानावर पिवळसर पट्ट्याच्या जागेवर वर्तुळाकार, लांब अरुंद वेगवेगळ्या आकारांचे लालसर ते तपकिरी ठिपके अथवा रेषा दिसतात. रोगाची तीव्रता वाढल्यास शेंडा कूज व कांडी कापाची लक्षणे दिसतात. शेंडा कूज व कांडी काप झालेल्या उसातील शेंडा जोम नष्ट होतो. त्यामुळे उसावरील डोळ्यातून पांगशा फुटतात, कालांतराने असे ऊस वाळतात. 🛡️उपाययोजना 👉माती परिक्षणावर आधारित रासायनिक खतांची (मुख्य व सूक्ष्म अन्नद्रव्ये) मात्रा वेळेवर व योग्य प्रमाणात द्यावी. 👉रोगामुळे शेंडा कूज व पांगशा फुटलेले ऊस शेतातून वेगळे काढावेत व नष्ट करावेत. 👉ऊस पिकावर रोग आढळून आल्यानंतर लगेचच, मॅन्कोझेब (७५ डब्ल्यूपी) ३ ग्रॅम किंवा कार्बेन्डाझिम (५० डब्ल्यूपी) १ ग्रॅम प्रति लिटर पाणी या प्रमाणात १० ते १२ दिवसांच्या अंतराने दोन ते तीन फवारण्या कराव्यात. 👉शेतात पाण्यामुळे दलदल होणार नाही, याची काळजी घ्यावी. पाण्याचा निचरा योग्य पद्धतीने करावा.