#📔 കഥ ഹൃദയത്തിന്റെ അവകാശി ഭാഗം-6 അവർ ഹോസ്റ്റൽ ഗേറ്റിൽ തട്ടി വിളിച്ചു. സെക്യൂരിറ്റി ചേട്ടൻ വന്നു നോക്കിയപ്പോൾ പോലീസ്. അയാൾ അപ്പോൾ തന്നെ മേനക മാഡത്തിനെ വിളിച്ചു. മേനക മാഡം വേഗം തന്നെ പുറത്തേക്കിറങ്ങി വന്നു. സെക്യൂരിറ്റി ചേട്ടൻ ഗേറ്റ് തുറന്നു കൊടുത്തപ്പോൾ സണ്ണി അകത്തേക്ക് കയറി.. "എന്താ... എന്താണ് സർ. ഇവിടെ പ്രശ്നമൊന്നും ഇല്ലല്ലോ.. "മേനകയ്ക്ക് ആകെ ടെൻഷൻ ആയി. "ഈ രണ്ടെണ്ണം ഇവിടെയുള്ളതല്ലേ..." സണ്ണി ശ്രീകുട്ടിയെയും മറിയാമ്മയെയും കാണിച്ചു കൊണ്ട് ചോദിച്ചു. "ഇവരെന്താ നിങ്ങളുടെ കൂടെ.. " "ഇവർ മതില് ചാടി സിനിമക്ക് പോയി. തിരികെ വന്നപ്പോൾ ഞങ്ങൾക്ക് കിട്ടി." "എന്റെ സാറെ അല്ലെങ്കിൽ തന്നെ ഈ ശ്രീദേവിയെ കൊണ്ട് എനിക്ക് തലവേദനയാണ്. ഈ കുട്ടിയാണ് മറ്റുള്ള കുട്ടികളെ കൂടി ചീത്തയാക്കുന്നത്." "രണ്ടും വീട്ടുകാരെ വിളിച്ചുകൊണ്ട് വന്നിട്ട് ഇങ്ങോട്ട് കയറിയാൽ മതി. ഇതിവിടെ പറ്റില്ല. നിയൊക്കെ എവിടെ പോയതാണെന്ന് ആർക്കറിയാം." മേനക ശ്രീകുട്ട്യേ നോക്കി ചൂടായി. "അതെ മാഡം... ഈ കുട്ടികളെ നല്ല ഹോസ്റ്റൽ നോക്കി വീട്ടുകാർ ഏല്പിക്കുന്നത് നിങ്ങളോടുള്ള വിശ്വാസം കൊണ്ടാണ്. ഇവരെ നോക്കുകയെന്നതു നിങ്ങളുടെ ജോലിയാണ്. 11 മണിക്ക് മതില് ചാടിയിട്ടു ശബ്ദം കേൾക്കാത്ത സെക്യൂരിറ്റി... നിങ്ങളൊക്കെ പിള്ളേർ ഉറങ്ങുന്നതിനു മുന്നേ ഉറങ്ങുമോ. ഇപ്പോൾ തന്നെ ഇവര് പുറത്തുപോയി. ഒരു ആക്‌സിഡന്റ് ഉണ്ടായാൽ ആരറിയും.നിങ്ങളുടെ ഉത്തരവാദിത്വമില്ലായ്മയ്ക്ക് നിങ്ങളെ പിടിച്ചു അകത്തിടേണ്ടതാണ്. ഇനി ഇവരെ രാത്രി റോഡിൽ കണ്ടാൽ ഉറപ്പായും ഞാൻ അത് ചെയ്യും." "ക്ഷമിക്കണം സർ.. ഞാൻ ഇനി ശ്രദ്ധിച്ചോളാം.. കയറിപൊയ്ക്കോ രണ്ടും അകത്തു.." "താങ്ക്സ് അച്ചായോ... അച്ചായന്റെ നമ്പർ ഒന്ന് തരണേ..." ശ്രീ സണ്ണിയുടെ അരികിലേക്ക് ചെന്നു ചോദിച്ചു. "എന്തിനാ എന്റെ നമ്പർ." "ഇടയ്ക്ക് മേനക മാഡത്തിനു പണികൊടുക്കാം. പിന്നെ എന്തേലും ആപത്തുണ്ടായാൽ അച്ചായനെ വിളിക്കാലോ.. അതൊക്കെ പോട്ടെ അച്ചായന്റെ നാട് എവിടെയാണ് " "എന്റെ നാട്ടിൽ വന്നിട്ട് രാത്രി കറങ്ങി നടക്കാനാണോ ". "അയ്യോ അല്ല.. വെറുതെ ചോദിച്ചതാ ". "എന്റെ നാട് പാലയാണ്.. എന്റെ നമ്പർ 98........." "താങ്ക്സ് അച്ചായാ... അധികം കറങ്ങി നടക്കാതെ വീട് പിടിക്കാൻ നോക്കു കേട്ടോ. നമുക്കു ഇടയ്ക്ക് കാണാം." "പോടീ...." സണ്ണി അവളെ നോക്കി കണ്ണുരുട്ടി.. "റോഹു... മോനെ നീ പൊയ്ക്കോ.. സണ്ണിച്ചായൻ നമ്മുടെയാളാണ്." രോഹിത് അപ്പോൾ തന്നെ അവിടുന്ന് തിരിച്ചു. ശ്രീ അകത്തേക്ക് കയറിപ്പോൾ സണ്ണിയും കൂട്ടരും ജീപ്പിലേക്കു കയറി. "വിളഞ്ഞ പിള്ളേർ ആണല്ലേ സർ.." അത് കേട്ടപ്പോൾ സണ്ണിയും ചിരിച്ചു പോയി.. "അതെ... കുറുമ്പി പെണ്ണ്.. സണ്ണി മനസ്സിൽ പറഞ്ഞു. 🌺🌺 "ശ്രീ എനിക്ക് പേടിയുണ്ട് കേട്ടോ.. മാഡം ഇനി വീട്ടിൽ വിളിച്ചു പറയുമോ..." "മറിയാമ്മേ... നീ പേടിക്കണ്ട ഞാൻ ഇല്ലേ ഇവിടെ.. എന്ത് പ്രശ്നം വന്നാലും ഞാൻ നിന്നെ സഹായിക്കും പോരെ... ഇപ്പോൾ എന്റെ മോള് ചാച്ചിക്കോ.." "റോഹുനെ ഒന്ന് വിളിക്കട്ടെ.. പാവം അവൻ പേടിച്ചു പോയെന്നു തോന്നുന്നു. കൊച്ചു പയ്യനല്ലേ..." ശ്രീയുടെ ആ ഡയലോഗിൽ മറിയാമ്മ പൊട്ടിച്ചിരിച്ചു പോയി.. "മോനെ റോഹു.... നിനക്കൊന്നും പറ്റിയില്ലല്ലോ അല്ലേ.." "ഇല്ലെടി പെണ്ണേ... ഞാൻ ഒന്ന് മതില് ചാടിക്കോട്ടെ... നീ വച്ചോ..." "പാവം..... മറിയാമ്മേ റോഹു മതില് ചാടുന്നുതേയുള്ളൂ ... ഇനി നാളെ മേനകയുടെ ഡാൻസ് കാണണമല്ലോ എന്റെ ഈശ്വര... " രാവിലെ രണ്ടും കൂടി കോളേജിൽ പോകാനായിട്ട് റെഡിയായി താഴേക്കു വന്നു. മേനക മാഡം വാതിൽക്കൽ നിന്നു തങ്ങളെ നോക്കി പേടിപ്പിക്കുന്നുണ്ട്. ശ്രീ ഇടക്കണ്ണിട്ടു അവരെനോക്കിയിട്ട് മറിയാമ്മയെയും കൊണ്ടു അവരെ മറികടന്നു പോയി. "അഹങ്കാരി പോകുന്നത് നോക്കിക്കേ വച്ചിട്ടുണ്ട് ഞാൻ രണ്ടിനും. "മേനക പൂറുപിറുത്തു. അവർ കോളേജിൽ എത്തിയപ്പോൾ രോഹിത് അവരെ കാത്തുനിൽപ്പുണ്ടായിരുന്നു. "നിങ്ങൾക്കു പ്രശ്നം വല്ലതും ഉണ്ടായിരുന്നോ..." "ഞങ്ങൾക്ക് എന്ത് പ്രശ്നം റോഹു... എന്തായാലും അവര് പണിതരും. അത് എന്നാണെന്നു മാത്രം അറിയില്ല. അതിനു മുന്നേ മറിയാമ്മയെ സേഫ് ആക്കണം. അതിനു സണ്ണിച്ചാനെ ഒന്ന് വിളിക്കണം." "ശ്രീ.. ആവശ്യമില്ലാതെ ആരെയും വിളിക്കണ്ട.. കൂട്ടും വേണ്ട കേട്ടോ അവരൊക്കെ എങ്ങനെയാണെന്ന് നമുക്ക് അറിയില്ല." "പിന്നെ അയാളുടെ നെറ്റിയിൽ ഒട്ടിച്ചു വച്ചിട്ടുണ്ട് മാന്യൻ ആണെന്ന്.. അത് കൊണ്ടു പേടിക്കണ്ട." "നിന്നോട് പറഞ്ഞിട്ട് കാര്യമില്ല..." ലഞ്ച് ബ്രേക്ക്‌ ആയപ്പോൾ ശ്രീയും മറിയാമ്മയും കൂടി കാന്റീനിലേക്ക് പോയി.. "പഠിച്ചും പണിയെടുത്തും മടുത്തു എന്റെ മറിയാമ്മോ..." അതിനു മറിയാമ്മയൊന്നു ചിരിച്ചു. "എടി ഏട്ടന്റെ നിശ്ചയം ആണുട്ടോ നിന്നേ എന്റെ കൂടെ വിടില്ലേ... അതോ നീ റോഹുവിന്റെ കൂടെ വരുമോ.." "ആദ്യം ഞാൻ വീട്ടിൽ എത്തട്ടെ എന്നിട്ട് പോരെ.." "മതി കുഞ്ഞേ... 26 നു രാവിലെ എനിക്ക് വീട്ടിൽ എത്തണം. പറ്റുമെങ്കിൽ ക്രിസ്തുമസിനു ഉച്ചയ്ക്ക് ശേഷം ഞാൻ വീട്ടിലോട്ടു പോകും." "എന്താന്ന് വച്ചാൽ നമുക്ക് ചെയ്യാം.ആദ്യം വയറിനു വല്ലതും കൊടുക്കട്ടെ എന്റെ ശ്രീയെ..." 🌺🌺 രാവിലെ ഡോറിൽ ആരോ തട്ടുന്ന ശബ്ദം കേട്ടിട്ടാണ് ശ്രീയും മറിയാമ്മയും എഴുന്നേറ്റത്. അവർ വന്നു കതകു തുറന്നു.. "എന്താ മാഡം.." "താഴേക്കു വരു...." "പല്ല് തേച്ചിട്ടു വന്നാൽ മതിയോ.. ഇത്തിരി സൂസു കൂടി ഒഴിക്കണം. "എന്നിട്ട് വരാം. അത് കേട്ടപ്പോൾ മേനക ശ്രീയെ ഒന്ന് കൂർപ്പിച്ചു നോക്കി. "ശെടാ.. അവർക്കു പിടിച്ചില്ല..." ശ്രീ ഒന്ന് ഫ്രഷ് ആയി താഴേക്കു വന്നു. അവൾക്കൊപ്പം മറിയാമ്മയും ഉണ്ടായിരുന്നു. അവിടെ നിൽക്കുന്ന അവളുടെ വീട്ടുകാരെ കണ്ടപ്പോൾ ശ്രീ സന്തോഷത്തോടെ ഓടി ചെന്നു. "അയ്യോ എനിക്ക് സന്തോഷം കൊണ്ടു സഹിക്കാൻ വയ്യേ..." "എന്താ എല്ലാരും കൂടെ.." "ഗുരുവായൂർ തൊഴണം. പിന്നെ മോളെയും കൂട്ടാന്നു വച്ചു." മുരളി അവളെ ചേർത്ത് പിടിച്ചു കൊണ്ടു പറഞ്ഞു. "അതെ.. വീട്ടുകാർ എല്ലാവരും വന്ന സ്ഥിതിക്ക് എനിക്കൊരു കാര്യം പറയാനുണ്ട്." മേനക മാഡം അങ്ങോട്ട്‌ വന്നു. "എന്താണ് മാഡം " അഭി ശ്രീയെ ഒന്ന് നോക്കി അവരോടു ചോദിച്ചു. ശ്രീ മതില് ചാടി രാത്രി സിനിമക്കു പോയതും പോലിസ് കൊണ്ടു വന്നതുമൊക്കെ അവർ വിശദമായി പറഞ്ഞു. അത് കേട്ടപ്പോൾ രുദ്രൻ വരെ ഞെട്ടിപ്പോയി... എല്ലാവരും ശ്രീയെ നോക്കി. ശ്രീ എല്ലാവരെയും നോക്കി ചിരിച്ചു കാണിച്ചു.. "പോയി റെഡിയായി വരു.. ശ്രീക്കുട്ടി.." "അച്ഛാ വീട്ടിൽ ഞാൻ 25 നു വരാം.. മറിയാമ്മയുടെ വീട്ടിൽ പോകണം." അവൾ മറിയാമ്മയെ ചേർത്ത് പിടിച്ചു കൊണ്ടു പറഞ്ഞു. "അമ്പലത്തിൽ പോകാനാടി... പോയി റെഡിയായി വാ.." മുരളി പറഞ്ഞു. "എന്നാലും രാത്രി മതില് ചാടി എന്ന് പറയുമ്പോൾ.. "മാധവിയമ്മയ്ക്ക് ആകെ പരാവേശമായി.. "തല്ലി വളർത്തുവല്ലല്ലോ.. കൊഞ്ചിക്കുവല്ലേ.. അപ്പോൾ പിന്നെ ഇതൊക്കെ പ്രതീക്ഷിച്ചാൽ മതി."രുദ്രൻ എല്ലാവരെയും നോക്കി പറഞ്ഞു കൊണ്ടു പുറത്തേക്കു പോയി. അവൻ പുറത്തേക്കിറങ്ങി മതിലിന്റെയൊക്കെ ഉയരം നോക്കി.. മതിലിനോട് ചേർന്നുള്ള മാവ് കണ്ടപ്പോൾ മനസ്സിലായി അവളുടെ രാത്രി സഞ്ചാര പാത..രുദ്രൻ ഒന്ന് നെടുവീർപ്പിട്ടു. "ഒന്നും പറ്റാതെ തിരികെയെത്തിയതു തന്നെ ഭാഗ്യം." എല്ലാവരും വന്നു വണ്ടിയിൽ കയറി. ചെറിയ ഒരു ട്രാവലറിൽ ആയിരുന്നു അവർ വന്നത്. "ഇത് ഇത്തിരി കൂടി പോയി ശ്രീക്കുട്ടി.." യശോധ ശ്രീകുട്ട്യേ വഴക്ക് പറഞ്ഞു. "ഓഹോ.. എനിക്ക് ഭ്രാന്ത് എങ്ങാനും വന്നിരുന്നെങ്കിലോ... അപ്പോൾ എന്ത് ചെയ്യുമായിരുന്നു.." "എന്താ അമ്മായിടെ മോൾ പറയുന്നേ.. ഭ്രാന്ത് വരികയോ.." "അതെ അമ്മായി പഠിച്ചു പഠിച്ചു ഭ്രാന്ത് വരും.. അങ്ങനെ എനിക്ക് ഭ്രാന്ത് വരുമോ എന്നുള്ള സംശയത്തിലാണ് ഞാൻ സിനിമക്ക് പോയത്." "എന്നാലും എന്റെ കുട്ട്യേ നിനക്ക് എന്തെങ്കിലും ആപത്തു പറ്റിയെങ്കിൽ എന്ത് ചെയ്തേനെ..." "അങ്ങനെയൊന്നും പറ്റില്ല എന്റെ മുത്തശ്ശി... ഇതേ.. മനക്കാശ്ശേരിയിലെ ശ്രീദേവിയാണ്.." ശ്രീ വല്ല്യ ഗമയിൽ എല്ലാവരെയും നോക്കി പറഞ്ഞു. കുറച്ചു കഴിഞ്ഞപ്പോൾ അഭി ചെന്നു അവളുടെ അടുത്ത് ഇരുന്നു. അപ്പോഴേക്കും അവൾ അവന്റെ കൈ ചുറ്റിപിടിച്ചു .. "ഇത്തിരി കൂടി പോയി..." "ചാടി കഴിഞ്ഞപ്പോൾ എനിക്കും തോന്നി.. വഴിയിൽ പോലിസ് ഇല്ലായിരുന്നെങ്കിൽ ആരും അറിയില്ലായിരുന്നു ". "ഈ പെണ്ണ്...." "എന്റെ ശത്രു എന്ത് പറയുന്നു.." അഭി അവളോട്‌ രുദ്രന്റെ എല്ലാ കാര്യങ്ങളും പറഞ്ഞു കൊടുത്തു. "കൊള്ളാം... നല്ല സ്വഭാവം അവനു ഭ്രാന്താടാ.. പഠിച്ചു പഠിച്ചു ഭ്രാന്തായി.. പോട്ടെ.. അമ്മായിയെ ഓർക്കുമ്പോൾ ആണ് വിഷമം.. " "അതെന്തു അമ്മായിക്ക് " "അതെ.. ഇനി കൊച്ചു മാറിപ്പോയി കാണുമോ.. ഇനി അമ്മായിയുടെ സ്വന്തം കൊച്ചു വേറെ എവിടെയെങ്കിലും വളരുവാണോ.." "അവൻ കേൾക്കണ്ട.. നിന്നെ എടുത്തു എറിയും... അവന്റെ ഒരു കൈക്കില്ല നീ അതിടയ്ക്ക് ഓർക്കുന്നത് നല്ലതാ.." "ഓഹോ.. അളിയനെ പറഞ്ഞപ്പോൾ പിടിച്ചില്ല... പോടാ... നീ പോയി നിന്റെ അളിയന്റെ കൂടെ ഇരിക്ക്.." "എന്റെ കൊച്ചേ.... നിന്നെ കൊണ്ടു തോറ്റു..." "ഏട്ടത്തി... ഇവിടെ ഇരിക്കുമോ... എനിക്ക് അമ്മായിയുടെ അടുത്ത് ഇരിക്കണം.' എന്ന് പറഞ്ഞു ഗൗരിയെ പിടിച്ചു അഭിയുടെ കൂടെയിരുത്തി. എന്നിട്ട് അവൾ പോയി സുഭദ്രയുടെ മടിയിൽ തവച്ചു കിടന്നു.. അഭിക്ക് രുദ്രന്റെ മുഖം കണ്ടപ്പോൾ ചിരി വന്നുപോയി..അല്ലേലും എന്റെ ശ്രീക്കുട്ടി പൊളിയാണ്. അവനു എന്നെ പറ്റൂല്ല.. ഡോക്ടർ അളിയൻ തന്നെ വേണം.. അലവലാതി... നിന്റെ മുന്നിൽ ഞാൻ നിന്റെ പെങ്ങളുടെ കൂടെ ഞെളിഞ്ഞിരിക്കുന്നത് കണ്ടില്ലേ.. രുദ്ര... ഹ.. ഹ.. ഹ... അഭി രുദ്രനെ നോക്കി മനസ്സിൽ പറഞ്ഞു. "ശ്രീക്കുട്ടി.... മോളെ... അമ്മായിടെ മോള് ഇനി ഇങ്ങനെയൊന്നും കാണിക്കല്ലേ..." ശ്രീ എഴുന്നേറ്റു സുഭദ്രയുടെ കവിളിൽ ഉമ്മ കൊടുത്തു കൊണ്ട് അവരെ കെട്ടിപിടിച്ചു ഇരുന്നു. ഗുരുവായൂർ ചെന്നു റൂമെടുത്തു. എല്ലാവരും ഒന്നും കൂടെ ഫ്രഷ് ആയി നടയിലേക്ക് നടന്നു. കണ്ണനെ കൺനിറയെ കണ്ടു പ്രാർത്ഥിച്ചു... അവളുടെ പ്രാർത്ഥന എല്ലാം കണ്ണൻ ഒരു ചിരിയോടെ കേൾക്കുന്നുണ്ടായിരുന്നു.. തൊഴുതിറങ്ങിയിട്ടു അവൾ പോയി മഞ്ചാടി മണി വാരിയെടുത്തു "എന്റെ കുട്ട്യേ കണ്ണനെക്കാളും കുരുത്തക്കേട് നീ കാണിക്കുന്നുണ്ട് . എന്നിട്ടു വീണ്ടും മഞ്ചാടി വാരുകയാണോ നീയ്." മാധവി താടിക്കു കൈ കൊടുത്തു കൊണ്ട് ചോദിച്ചു. പിന്നെ എല്ലാവരും പ്രസാദം വാങ്ങാനായി പുറത്തേക്കിറങ്ങി. നെയ് പായസവും പാൽപ്പായസവും വാങ്ങി . അഭിയെ ഉള്ള കടകൾ തോറും കൊണ്ട് നടന്നു. അവിടെ നിന്നും മമ്മിയൂരും പോയി തൊഴുതു. എന്നിട്ട് ഹോട്ടലിൽ കയറി എല്ലാവരും ബ്രേക്ക്‌ ഫാസ്റ്റ് കഴിച്ചു.. "വൈകിട്ട് വടക്കുംനാഥനെ കൂടി കയറി കണ്ടിട്ട് പോകാം അല്ലേ.." കൃഷ്ണൻ എല്ലാവരോടുമായി ചോദിച്ചു. "അച്ഛാ... 7 മണി കഴിഞ്ഞാൽ മേനക ഭൂതം എന്നെ അകത്തു കയറ്റത്തില്ല.." "ഞങ്ങൾ ഇല്ലേ അതുകൊണ്ട് ഒന്നും പറയില്ല.." അഭി അവളുടെ തലയിൽ കൊട്ടി. വൈകുന്നേരം വടക്കും നാഥനെ കൂടി കണ്ടിട്ടാണ് അവർ ശ്രീയെ ഹോസ്റ്റലിൽ കൊണ്ടാക്കിയത്.. ശ്രീ അകത്തേക്ക് പോയപ്പോൾ മേനക മാഡം. ശ്രീയുടെ അച്ഛനോടായി പറഞ്ഞു. "പറയുന്നത് കൊണ്ട് ഒന്നും തോന്നരുത്. ഇങ്ങനെയും ഉണ്ടോ കുരുത്തക്കേട്. വീട്ടിൽ വരുമ്പോൾ ഇന്ന് ഉപദേശിക്കാൻ മറക്കരുത്.കാരണം ഇപ്പോൾ രാത്രി എനിക്ക് ഉറങ്ങാൻ പേടിയാണ്.. ഇതൊക്കെ ഇനിയും മതില് ചാടുമോ എന്ന് ഓർത്തിട്ടു." തുടരും....... രചന -സിന്ദാരോ