ഹരി.........., ടാ ഹരി കൃഷ്ണാ..........., പുറത്ത് നിന്നുള്ള ആരുടെയോ വിളി കേൾക്കുന്നുണ്ട്. കഴുത്തിൽ കുരുക്ക് മുറുക്കിയവൻ ഇനി എന്ത് ചിന്തിക്കാനാണ്. അവൻ കസേര കാല് കൊണ്ട് തട്ടി മാറ്റി. ഇതേ മുറിയിലായിരുന്നു അച്ഛനും ജീവനൊടുക്കിയത്. ഇതേ ഫാനിൽ.............................. അവന്റെ കണ്ണുകൾ നിറഞ്ഞു. അവസാനമായി അവൻ ഒരിക്കൽ കൂടി അച്ഛനെ വിളിച്ചു. അ..... ച്ഛാ..... ഒരു മുഴം തുണിയിൽ കിടന്ന് പിടയുമ്പോൾ അരുത് എന്ന് അച്ഛൻ വന്ന് വിലക്കുന്നത് അവൻ കണ്മുന്നിൽ കണ്ടു. കഴുവേറി......., ചതിച്ചല്ലോടാ നീയ്. ആരുടെയോ ഒരു നേർത്ത ശബ്ദം കേട്ടു. ബാപ്പൂട്ടി ചേട്ടനാണ്. അമ്മയ്ക്ക് ദോശയുമായി എത്തിയതായിരിക്കും. അല്ലേലും ബാപ്പൂട്ടി ചേട്ടന് നല്ല മനസ്സാ. തരത്തില്ലെന്ന് പറഞ്ഞപ്പോഴേ ഓർത്തതാ, വേണു ചേട്ടനെ പേടിച്ചിട്ടായിരിക്കും. അല്ലേൽ ഈ സമയത്ത് ഇവിടെ വരേണ്ടതല്ല. അവന്റെ കണ്ണ് നിറഞ്ഞൊഴുകി. തൂങ്ങാനാണെ നിനക്ക് നേരത്തെ കേറി തൂങ്ങിയാൽ പോരായിരുന്നോടാ നാറി. ഇതിപ്പോ ആ കൊച്ചിനെ കൊത്തി പറിക്കാൻ ഇട്ട് കൊടുത്തേച്ച് അവൻ ഒറ്റക്ക് അങ്ങ് രക്ഷപ്പെടുന്നു. ബാപ്പൂട്ടി ചേട്ടൻ കാലിൽ പിടിച്ച് മുകളിലേക്ക് ഉയർത്തി നിർത്തി. ബാപ്പൂട്ടി ചേട്ടന് വയസ്സ് അമ്പതാണ്. അയാളുടെ ആരോഗ്യത്തിന് തന്റെ ശരീരം അധികനേരം ഇങ്ങനെ താങ്ങി നിർത്താനാവില്ല. അവൻ നിസ്സഹായതയോടെ സ്വയം ചാർത്തിയ മരണ ഹാരം കഴുത്തിൽ നിന്ന് ഊരി മാറ്റി. കഴുത്തിൽ നിന്ന് കയറ് ഊരി മാറ്റി എന്ന് കണ്ടതും, ബാപ്പൂട്ടി കാലിൽ നിന്ന് വിട്ടതും ഒരുമിച്ചായിരുന്നു. നിലത്ത് വീണ് കിടക്കുന്ന ഹരിയുടെ കവിളിൽ ആഞ്ഞു രണ്ടെണ്ണം കൊടുക്കുമ്പോൾ അയാളുടെ കണ്ണും നിറഞ്ഞു തുളുമ്പിയിരുന്നു. ഹരിക്ക് ഒന്നും പറയാൻ സാധിക്കുന്നുണ്ടായിരുന്നില്ല. കഴുത്തിൽ മുറുകിയ കുരുക്കിന്റെ പാട് അവന്റെ ശബ്ദം പാതി അടച്ചിരിക്കുന്നു. പാതി അടഞ്ഞ ശബ്ദത്തിൽ അവൻ തേങ്ങുന്ന ശബ്ദം അടുത്ത മുറിയിൽ ഇരുന്ന് അമ്മ കേൾക്കുന്നുണ്ടായിരുന്നു. ആരാ അത്! ബാപ്പൂട്ടി അല്ലേ! എന്താ അവിടെ! ആരാ അവിടെ കരയുന്നത്? അവരുടെ ചോദ്യങ്ങൾക്ക് ആരും ഉത്തരം നൽകിയില്ല. ചാകാൻ പോകുമ്പോഴെങ്കിലും അതിനോട് ഇത്തിരി കരുണ കാണിക്കാരുന്നില്ലെടാ നാറി നിനക്ക്. നിന്റെ തന്തയുണ്ടാരുന്നപ്പോൾ പോലും അതിന് ഇത്തിരി സന്തോഷം കിട്ടിയിട്ടില്ല. ഇനി നീ ചത്ത് കിടക്കണത് കൂടി അവള് കണ്ടോണ്ട് കിടക്കണായിരിക്കും. നീ കേറി തൂങ്ങിയാൽ നിന്റെ പെങ്ങടെ മടി കുത്ത് അഴിക്കാൻ കാത്ത് നിൽക്കുന്ന പലിശക്കാരെ അവൾ എന്ത് ചെയ്യണം! അവള് അതിന് കൂട്ട് നിക്കണോ! എന്നാൽ ഇപ്പോഴേ കൂട്ടി കൊടുക്കെടാ! അതാവുമ്പോൾ നീ ചാവണ്ട കാര്യമുണ്ടോ! അയാൾ വികാരാധീനനായി.  കതകിന്റെ ഓരം ചേർന്ന് ശ്വാസം വലിക്കുന്ന ബാപ്പൂട്ടി ചേട്ടനോട്‌ എന്ത് പറയണമെന്ന് അവന് നിശ്ചയമുണ്ടായിരുന്നില്ല. അയാൾ പല്ലുറുമ്മി അകത്തേക്ക് പോയി. എന്നാ ഉണ്ട് ഭാരതി ചേച്ചിയേ! വല്ലതും കഴിച്ചാരുന്നോ! പിള്ളേര് ഇന്ന് തൊട്ട് ജോലിക്ക് പോയി തുടങ്ങിയല്ലേ! ആ രാവിലെ ഹിമ പോയപ്പോൾ പറഞ്ഞിരുന്നു ചേച്ചി ഒന്നും കഴിച്ചിട്ടില്ലെന്ന്. അയാൾ അടുത്തിരുന്ന പാത്രത്തിലേക്ക് ദോശ കൊട്ടി ഇട്ടു. ഹരി എന്തെ ബാപ്പൂ....?? മകന്റെ ശബ്ദം തിരിച്ചറിയാത്ത അമ്മമാരുണ്ടോ? അയാൾ അതിന് ഉത്തരം നൽകിയില്ല. പകരം ചമ്മന്തികറിയിൽ കുതിർത്ത ദോശ അയാൾ അവരുടെ വായിലേക്ക് വച്ച് കൊടുത്തു. പക്ഷേ അവരത് സ്വീകരിച്ചില്ല. അവരുടെ കണ്ണിൽ ഒരു ഭയം മിന്നി മായുന്നത് ബാപ്പൂട്ടി ശ്രദ്ധിച്ചു. എന്റെ കൊച്ചെന്തേ ബാപ്പൂട്ടി? അവനല്ലേ എനിക്ക് തന്നോണ്ട് ഇരുന്നത്! അവരുടെ വിറയാർന്ന ശബ്ദം കേട്ട് ഹരിയുടെ ചങ്ക് പിടഞ്ഞു. നേരത്തെ എന്താ ശബ്ദം കേട്ടെ? ബാപ്പൂട്ടി ആരോടാ സംസാരിച്ചോണ്ട് ഇരുന്നത്! എന്തോ തട്ടി മറിക്കുന്ന ശബ്ദം കേട്ടല്ലോ? അവർ വീണ്ടും വീണ്ടും ചോദിക്കുവാൻ തുടങ്ങി. അതൊരു പൂച്ച കയറിയതാണെന്നെ! ഞാൻ അങ്ങ് ഇല്ലാണ്ടായിപ്പോയി. പണ്ടാരപൂച്ച..................... ഞാൻ നല്ല തെറിയും വിളിച്ചു. അല്ല പിന്നെ! മനുഷ്യന്റെ നല്ല ജീവനങ്ങ് പോയി കിട്ടി. ചേച്ചി കഴിക്ക്, ഹരി വരുമ്പോൾ താമസിക്കും. ഞാനേ അവനെയാ സിനിമാ സെറ്റിൽ ജോലിക്ക് വിട്ടേക്കുവാ. വൈകിട്ടെ വരത്തുള്ളൂ. അയാൾ അവരെ അശ്വസിപ്പിച്ചു. ആഹാരം കൊടുത്തെ ഉടനെ ബാപ്പൂട്ടി മുറിയിൽ നിന്ന് തിരികെ ഇറങ്ങി. പുറത്തെ ബക്കറ്റിൽ നിന്ന് ഒരു കപ്പ് വെള്ളമെടുത്ത്, അയാള് തന്നെ പാത്രം കഴുകി കമത്തി വച്ചു. ഹരിയും ഹിമയും ഇല്ലാത്തപ്പോൾ ബാപ്പൂട്ടി ചേട്ടന്റെ ഭാര്യയാണ് അമ്മയുടെ കാര്യങ്ങളെല്ലാം നോക്കിയിരുന്നത്. അമ്മയെ കുളിപ്പിക്കുന്നതും, നനഞ്ഞ തുണി മാറ്റി കൊടുക്കുന്നതുമെല്ലാം രഹന ഇത്തയാണ്. കുറച്ച് നാളായിട്ട് ഹിമ വീട്ടിലുള്ളത് കൊണ്ട് അവരെ ബുദ്ധിമുട്ടിക്കേണ്ടി വന്നിട്ടില്ല. ഇതിപ്പോ വീണ്ടും അവർക്കൊരു ഭാരമായി കാണും. അവൻ കാട് കയറി ചിന്തിച്ചു. അയാളുടെ മുഖത്ത് ഇപ്പോഴും ഗൗരവമാണ്. കഴുത്തിൽ കയറിട്ട വിവരം തത്കാലം ആരും അറിയണ്ട. ആ പെൺകൊച്ച് അറിഞ്ഞാൽ അതും കൂടി തൂങ്ങി ചാവും. നിന്നെ പോലെയല്ല. അതൊരു പെങ്കൊച്ചാ. നിനക്ക് പോറ്റാൻ കഴിവില്ലേൽ കെട്ടിച്ച് കൊടുത്തേക്ക്. വല്ലവനും കൊണ്ടേ പൊന്ന് പോലെ നോക്കിക്കോളും. കെട്ടിച്ച് കൊടുക്കുന്നതിനേ കുറിച്ചൊന്നും ചിന്തിക്കാനേ അവനായില്ല. അതൊരു കൊച്ച് പെണ്ണെല്ലേ! എപ്പോഴോ ഉണ്ടായ ഒരു തോന്നലിൽ പറ്റിപ്പോയതാ. ഇനി ഞാൻ ഇങ്ങനെ ഒന്നും ചിന്തിക്കില്ല ചേട്ടാ. പെട്ടന്ന് എനിക്ക് എന്തോ ആരും ഇല്ലാതായ പോലെ തോന്നി. അവൻ അയാളുടെ നെഞ്ചിലേക്ക് വീണ് തേങ്ങി കരയുവാൻ തുടങ്ങി. ആരും ഇല്ലെന്നോ! അപ്പൊ പിന്നെ ഞാനാരാടാ! നീ അങ്ങ് പോയാൽ പിന്നെ ഞാൻ അവളോട് എന്ത് പറയുവെടാ.ഞങ്ങൾക്ക് പടച്ചോൻ പിള്ളേരെ തന്നില്ലെന്ന് ആരാ പറഞ്ഞത്? നീയും ഹിമയും ഞങ്ങൾക്ക് ഞങ്ങളുടെ പിള്ളേരാടാ. നീ ഇതൊക്കെ മറന്ന് ആ സെറ്റിലേക്ക് ചെല്ലാൻ നോക്ക്. അയാൾ മുണ്ടിന്റെ അറ്റം കൊണ്ട് കണ്ണീരൊപ്പി. നിനക്ക് ഞാനൊരു ജോലി ശരിയാക്കിയിട്ടുണ്ട്. നമ്മുടെ സിനിമാ സെറ്റിൽ. രാവിലെ പ്രൊഡക്ഷൻ കണ്ട്രോളർ കാപ്പി കുടിക്കാൻ വന്നപ്പോ പറഞ്ഞതാ. ഷൂട്ടിങ്ങിന് കൊണ്ടെയിട്ട അംബാസഡർ കാറെല്ലാം പൊടിയെടുത്ത് കിടക്കുവാ എന്ന്????വിശ്വസിച്ച് ആരേലും കിട്ടുവോന്ന് ചോദിച്ചപ്പോൾ ഞാൻ നിന്റെ പേരാ പറഞ്ഞെ........................ വച്ച് താമസിപ്പിക്കാതെ നീ അങ്ങോട്ട് ചെല്ലാൻ നോക്ക്. അയാൾ അവനെ നിർബന്ധപൂർവ്വം സെറ്റിലേക്ക് അയച്ചു. തുടരും ❤️ -----------------------------------------------------ബാക്കി വായിക്കാൻ പ്രതിലിപിയിൽ എന്നെ ഫോളോ ചെയ്യൂ. ഗൗരി ഗായത്രി #🏝️ പ്രവാസി #💓 ജീവിത പാഠങ്ങള്‍ #💚തനി മലയാളി #💔 നീയില്ലാതെ #💪 അമേരിക്കൻ ആപ്പുകൾ ബഹിഷ്‌കരിക്കൂ