جنگِ اُحد میں حضور ﷺ کے دندانِ مبارک کے شہید ہونے اور حضرت اویس قرنی کا خود اپنے دانتوں کو توڑنے سے متعلق تحقیق *مشہور ہے کہ* جنگ احد میں سرور کائنات صلی الله علیہ و سلم کے چار دندان شریف شہید ہو گئے تھے ـ *تحقیق یہ ہے کہ* حضور اکرم صلی اللہ علیہ و سلم کا کوئی دانت شریف مکمل شہید نہ ہوا تھا یعنی جڑ سے نہ اکھڑا تھا ـ بلکہ اس حوالے سے شیخ محقق عبد الحق محدث دہلوی علیہ الرحمہ فرماتے ہیں کہ سرکار صلی الله علیہ و سلم کے دانت ٹوٹنے کا ہرگز یہ معنٰی نہیں کہ جڑ سے اکھڑ گیا ہوگا اور وہاں رخنہ پیدا ہو گیا ہوگا بلکہ ایک ٹکڑا شریف جدا ہوا تھا ـ [اشعتۃ اللمعات شرح مشکٰوۃ، ج4، ص515] اس حوالے سے حکیم الامت علامہ مفتی احمد یار خان نعیمی علیہ الرحمہ فرماتے ہیں کہ حضور صلی اللہ علیہ و سلم کے داہنی کے نیچے کی چوکڑی کے ایک دانت شریف کا کنگرہ ٹوٹا تھا یہ دانت شریف شہید نہ ہوا تھا ـ (مراۃ المناجیح، ج8، ص107) *مشہور ہے کہ* حضرت اویس قرنی رضی اللہ عنہ نے جب یہ سنا کہ آپ صلی اللہ علیہ و سلم کا دانت شریف جنگ احد میں شہید ہو گیا تو آپ نے اپنے سارے دانت حضور کی محبت میں شہید کر ڈالے پھر آپ کے لیے اللہ تعالٰی نے کیلا پیدا کیا ـ *تحقیق یہ ہے کہ* یہ واقعہ سراسر من گھڑت اور وضع جہال ہے بعض تذکرہ کی کتابوں میں اگرچہ موجود ہے لیکن وہ بے دینوں کی ملاوٹ ہے ـ فتاوٰی بریلی شریف میں ہے کہ ایسی روایت نظر سے نہ گزری اور نہ ہی ایسی روایت ہے ـ (فتاوٰی بریلی شریف، ص301) اسی طرح جب اوپر یہ واضح ہو گیا کہ حضور صلی اللہ علیہ و سلم کا کوئی دانت شریف مکمل شہید نہ ہوا تو یہ واقعہ بھی باطل ٹھرا ـ اسی طرح دانت کو شہید کرنا کفار کا کام تھا پھر اس کو خیر التابعین کیوں نقل کریں گے؟ اس واقعہ کو سب سے پہلے شیخ عطار علیہ الرحمہ کی تصنیف ”تذکرۃ الاولیاء“ میں دیکھا جا سکتا ہے اور یہ کتاب رافضیوں کے ظلم کا شکار رہی ہے مزید تفصیل کے لیے دیکھیں (تحقیقی فتوٰی از علامہ مفتی فضل احمد چشتی) ـ 📝 حسن نوری گونڈوی #👨🏻‍🏫لوگوں کے لئے سیکھ🧑‍🤝‍🧑 #👳‍♂️روحانی رہنما💞 #📝روحانی مکتوبات☪️ #مرشد