54 അയലത്തെ അമ്പിളി " അമ്പിളി ..... അച്ഛനോട് ഇപ്പഴും വെറുപ്പാണോ മക്കളെ ...? " കുമാരൻ ക്ഷീണിച്ചു ശോഷിച്ച കൈകൾ കൊണ്ട് അമ്പിളിയുടെ കൈ പിടിച്ചു. അയാളുടെ കുഴിഞ്ഞ കണ്ണുകൾ നിറഞ്ഞൊഴുകുന്നുണ്ടായിരുന്നു. കുമാരന്റെ കരച്ചിൽ കണ്ടിട്ടും അമ്പിളിക്ക് പ്രത്യേകിച്ച് ഒന്നും തോന്നിയില്ല. " വെറുപ്പായിരുന്നു .... അതൊക്കെ എന്നേ പോയി. ഇപ്പൊ വെറുപ്പും ഇല്ല... സ്നേഹവുമില്ല.... " കട്ടിലിലേക്ക് ചാരി ഇരുത്തിയിരുന്ന കുമാരന്റെ ചുണ്ടിലേക്ക് വെള്ളം നിറച്ച ഗ്ലാസ് മുട്ടിച്ചു കൊടുത്തു കൊണ്ട് അമ്പിളി പറഞ്ഞു. അവൾ അപ്പോഴും അയാളുടെ കണ്ണുകളിലേക്ക് നോക്കിയില്ല. അമ്പിളിയുടെ കയ്യിലെ പിടി വിട്ട് കൊണ്ട് ഒരിറക്ക് വെള്ളം കുടിച്ചു കുമാരൻ. " അച്ഛന് തെറ്റു പറ്റിയതാ... എത്ര വർഷം ആയി? ക്ഷമിച്ചു കള മക്കളെ.... അച്ഛന് ഇപ്പോ നീയേ ഉള്ളൂ.... " അയാൾ പിന്നെയും അപേക്ഷിച്ചു. " ക്ഷമിച്ചത് കൊണ്ടാ അമ്പിളി ഇന്ന് ഈ വീട്ടിൽ നിൽക്കുന്നത്. രണ്ടാം ഭാര്യക്കും മക്കൾക്കും വേണ്ടിയല്ലേ എന്നെ ഉപദ്രവിച്ചവന് തന്നെ കെട്ടിച്ചു കൊടുക്കാൻ നോക്കിയത്? എന്നിട്ടിപ്പോ ആ ഭാര്യയും മക്കളും തന്നെയാണോ നോക്കുന്നത്? " ആ ചോദ്യത്തിൽ കുമാരന്റെ തല കുനിഞ്ഞു. " മാമിയുടെ വീട്ടിൽ അവരുടെ ആട്ടും തുപ്പും കേട്ട് കിടക്കുകയാണ് എന്ന് അറിഞ്ഞപ്പോൾ ഇങ്ങോട്ടേക്ക് മാറ്റിയത് അമ്പിളി ക്ഷമിച്ചത് കൊണ്ട് തന്നെയാണ്...... വയ്യാതെ കിടക്കുന്ന ആളിനോട് ഒന്നും പറയണ്ട എന്ന് കരുതിയതാണ്. പറയിപ്പിച്ചതല്ലേ? ഞാനും ഒരു മനുഷ്യനാണ്. സങ്കടവും ദേഷ്യവും ഒക്കെ എനിക്കും വരും. " കുമാരന്റെ കട്ടിലിന്റെ ക്രാസിലേക്ക് തല ചേർത്തു വെച്ചു. കണ്ണുകൾ മുറുകിയടച്ചു . അമ്പിളി പറഞ്ഞത് ശരി തന്നെയാണ്. ആയുസ്സിന്റെ നല്ലൊരു പങ്കും ചെലവഴിച്ചത്, അധ്വാനിച്ച് ഉണ്ടാക്കിയത് മുഴുവൻ ചിലവാക്കിയത് രണ്ടാം ഭാര്യക്കും രണ്ട് പെൺമക്കൾക്കും വേണ്ടി തന്നെയായിരുന്നു. രണ്ടെണ്ണത്തിനെയും കെട്ടിച്ച് വിട്ടതും താൻ അധ്വാനിച്ചുണ്ടാക്കിയ പണം കൊണ്ടു തന്നെയാണ്. അതിൽ ഒരു തരി പോലും അമ്പിളിക്ക് കൊടുത്തിട്ടില്ല. എന്നിട്ടോ? ക്യാൻസർ ആണെന്ന് അറിഞ്ഞതിൽ പിന്നെ തിരിഞ്ഞു നോക്കിയിട്ടില്ല ഒറ്റ ഒരെണ്ണം..... അന്ന് അവർക്ക് വേണ്ടി അമ്പിളിയെ ബലിയാടാക്കാൻ നോക്കിയതാണ്. എന്നിട്ട് ഇപ്പോഴോ.....? വീണ് പോയപ്പോ നോക്കാൻ അവൾ തന്നെ വേണ്ടി വന്നു. അയാൾക്ക് കണ്ണ് തുറന്ന് ഒരിക്കൽ കൂടി അമ്പിളിയുടെ മുഖത്തേക്ക് നോക്കാൻ കഴിയാത്തത്ര കുറ്റബോധം തോന്നി. " കിടക്കണോ? " അമ്പിളിയുടെ കല്ലിച്ച ശബ്ദത്തിലെ ചോദ്യം വന്നു. കണ്ണ് തുറക്കാതെ തന്നെ അയാൾ വേണ്ടെന്നു തലയാട്ടി. അമ്പിളി തിരിഞ്ഞു നടന്നു. രുദ്രൻ അപ്പോഴും ആ മുറിക്ക് പുറത്ത് തറഞ്ഞു നിൽപ്പാണ്. " രണ്ടാം ഭാര്യക്കും മക്കൾക്കും വേണ്ടിയല്ലേ എന്നെ ഉപദ്രവിച്ചവന് തന്നെ എന്നെ കെട്ടിച്ചു കൊടുക്കാൻ നോക്കിയത്? " അവന്റെ ചെവിയിൽ എപ്പോഴും അമ്പിളി പറഞ്ഞ വാക്കുകൾ ആയിരുന്നു. താൻ അറിയാത്ത എന്തൊക്കെയോ അമ്പിളിക്കും മാമൻ ഇടയിൽ സംഭവിച്ചിട്ടുണ്ട് എന്ന് അവന് മനസ്സിലായി. അമ്പിളി അത് പറയാൻ ആഗ്രഹിക്കുന്നില്ല. അവരുടെ കുടുംബ കാര്യമാണ്. താനും അതിൽ അമിതമായി കൈ കടത്താൻ പാടില്ല. എങ്കിലും അമ്പിളിയെ ആരോ ഉപദ്രവിക്കാൻ ശ്രമിച്ചിരുന്നു എന്ന അറിവ് അവനെ ആകെ അസ്വസ്ഥനാക്കി. രുദ്രൻ തിരിഞ്ഞു നടക്കാൻ ഒരുങ്ങുമ്പോഴാണ് അമ്പിളി മുറുക്കി പുറത്തേക്ക് വരുന്നത്. " രുദ്രേട്ടൻ ഇതെപ്പോ വന്നു? " " ഞാനിപ്പോ വന്നതേയുള്ളൂ... " രുദ്രൻ ചിരിക്കാൻ ശ്രമിച്ചു. " അപ്പു മോൾ എവിടെ? " " പുറത്തുണ്ട്. കിഷോറിന്റെ കൂടെ. " പറഞ്ഞു കൊണ്ട് രുദ്രൻ തന്നെ ആദ്യം തിരിഞ്ഞു നടന്നു. പിറകെ അമ്പിളിയും. അമ്പിളിയെ കണ്ടതും അപ്പു കിഷോറിനെ വിട്ട് അവളുടെ അടുത്തേക്ക് ഓടി വന്നു. 🎵 അമ്പിളി അമ്മാവാ താമര കുമ്പിളിൽ എന്തുണ്ട്? 🎵 കൂടെ ഒരു പാട്ടും.... അമ്പിളി അവളെ എടുത്ത് ഒക്കത്തിരുത്തി. " കുറുമ്പി..... " അമ്പിളി അപ്പുവിന്റെ മൂക്കിൽ തുമ്പിൽ പിടിച്ചുലച്ചു കൊണ്ട് ചിരിച്ചു. " പറ അമ്പിളിമാമാ. എന്തെങ്കിലും ഉണ്ടോ? " വയറും തടവി കൊണ്ടാണ് ഇത്തവണ അപ്പുവിന്റെ ചോദ്യം. അമ്പിളിക്ക് അപ്പോഴാണ് കാര്യം കത്തിയത്. " ഇടിയപ്പവും മുട്ടക്കറിയും ഉണ്ട്. അതു മതിയോ? " " ഹൈ.... അപ്പുവിന്റെ ഫേവറേറ്റ്. കൊതിയാവുന്നു.... " അവൾ നാക്ക് നുണഞ്ഞു.... " അപ്പു. നീ ഇപ്പോ അവിടെ നിന്ന് കഴിച്ചിട്ടല്ലേ വന്നത്? " രുദ്രൻ അപ്പുവിനെ നോക്കി കണ്ണുരുട്ടി. " ചുമ്മാതിരിക്ക് രുദ്രേട്ടാ. അവൾ കുഞ്ഞല്ലേ...? " അമ്പിളി രുദ്രനോട് പറഞ്ഞിട്ട് അപ്പുവിനെയും കൂട്ടി അകത്തേക്ക് പോയി. രുദ്രനും കിഷോറും ഓരോന്നൊക്കെ സംസാരിച്ചിരുന്നു. " രുഗ്മിണി അമ്മ പോയ ശേഷം വലിയ പാടാ അല്ലേ രുദ്രേട്ടാ .? " അപ്പുവിനെ ആഹാരം കഴിപ്പിച്ച് തിരികെ കൊണ്ടു വന്ന് അമ്പിളി ചവിട്ടു പടിയിലേക്ക് ഇരുന്നു. അപ്പുവിനെയും അവളുടെ മടിയിലേക്ക് തന്നെ ഇരുത്തി. " ഹ്മ്മ്... ആകെ കൂടി വട്ടായി എന്ന് പറഞ്ഞാൽ മതിയല്ലോ? ബോട്ടീക്കിൽ ആണെകിൽ ഇപ്പോ നല്ല തിരക്കാണ്. പുതിയൊരു സ്റ്റിച്ചിങ് യൂണിറ്റ് കൂടെ തുടങ്ങിയാലോ എന്നാ... അതിന് പറ്റിയ ഒരു സ്ഥലം നോക്കിയുള്ള ഓട്ടത്തിലാണ്.... അതിന്റെ കൂടെ കടയിലെ കാര്യങ്ങൾ നോക്കണം. അഭി ഇപ്പോ ആറ്റിങ്ങൽ അല്ലേ? അവൻ ഇവിടത്തെ കടയിൽ ഉണ്ടായിരുന്നപ്പോ ഇത്തിരി താമസിച്ചു പോയാലോ നേരത്തെ ഇറങ്ങിയാലോ ഒന്നും ഒരു കുഴപ്പവും ഇല്ലായിരുന്നു. ഇതിപ്പോ ആകെ തിരക്കാണ്. അതിന്റെ കൂടെ രുഗ്മിണി അമ്മ കൂടെ പോയപ്പോ.... ബാക്കി ഒക്കെ എങ്ങനെയും അഡ്ജസ്റ്റ് ചെയ്യാം. ഫുഡ്‌ ഉണ്ടാക്കുന്നതാണ്... ഞാൻ എന്ത് ഉണ്ടാക്കിയാലും ഇവക്ക് പിടിക്കില്ല. " രുദ്രൻ ഒന്ന് നെടുവീർപ്പിട്ടു.... " കഴിഞ്ഞ ആഴ്ച ജോലിക്ക് ഒരാൾ വന്നിരുന്നില്ല? അവരെന്താ പോയത്? " കിഷോറാണ് ചോദിച്ചത്. രുദ്രൻ അവന്റെ നേരെ തിരിഞ്ഞു. " പോയതല്ല. ഞാൻ പറഞ്ഞുവിട്ടത്. ഏജൻസിയിൽ പറഞ്ഞിട്ട് കിട്ടിയതാ. അവര് വന്നതിന്റെ രണ്ടാമത്തെ ദിവസം വൈകിട്ട് ഞാൻ കടയിൽ നിന്ന് വന്നപ്പോ കാണുന്നത് അവര് ഇവളെ പിടിച്ചിട്ട് തല്ലുന്നതാ... നിങ്ങൾക്കറിയാല്ലോ ഇവളുടെ സ്വഭാവം? കുസൃതിക്ക് കയ്യും കാലും വെച്ചതാ.... ഞാൻ സഹി കെടുമ്പോ വഴക്ക് പറയും... ചെറിയ തല്ലും കൊടുക്കും. പക്ഷേ മറ്റൊരാൾ നമ്മുടെ കുഞ്ഞിനെ തല്ലുന്നത് കാണുമ്പോൾ.... അതും നല്ല നോവിച്ച്... കാശു കൊടുത്ത് നിർത്തുന്നത് ഇവളെ നോക്കാൻ അല്ലേ? തല്ലാൻ അല്ലല്ലോ? തല്ലിയതിന് അവർക്ക് കുറേ ന്യായങ്ങൾ ഒക്കെ ഉണ്ടായിരുന്നു. എന്തായാലും ഞാൻ അന്ന് തന്നെ അവരെ കാശും കൊടുത്തു പറഞ്ഞു വിട്ടു... വേറെ ഒരാളെ കിട്ടുവോന്നു നോക്കട്ടെ. ആര് വന്നാലും എനിക്കിപ്പോ പേടിയാ.... " " രുദ്രേട്ടാ..... " രുദ്രൻ പറഞ്ഞു നിർത്തിയതും അമ്പിളി മെല്ലെ വിളിച്ചു. " അപ്പുവിന്റെ കാര്യങ്ങളൊക്കെ ഞാൻ നോക്കിക്കോളാം. രുഗ്മിണിയമ്മ ചെയ്തിരുന്ന എല്ലാ പണിയും ചെയ്യാം. അവർക്ക് കൊടുത്തിരുന്ന കാശ് എനിക്ക് തന്നാ മതി... " രുദ്രൻ ഞെട്ടലോടെയാണ് അമ്പിളിയെ നോക്കിയത്. " ഏട്ടൻ എപ്പോൾ എന്താ ചിന്തിക്കുന്നത് എന്ന് എനിക്കറിയാം. എല്ലാ ജോലിക്കും അതിന്റേതായ മഹത്വം ഉണ്ട്. അവിടെ ആയിരുന്നപ്പോൾ പശുവും കോഴിയും ഒക്കെ ആയിട്ട് മാസ ചിലവിനുള്ള കാശൊക്കെ കിട്ടുമായിരുന്നു. ഇതിപ്പോ വരുമാനം ഒക്കെ നിലച്ചു. കൂട്ടി വെച്ചതൊക്കെ ആശുപത്രിയിൽ തീരുകയും ചെയ്തു. അടുത്ത മാസം തൊട്ട് ആ ഹോം നേഴ്സിനോട് വരണ്ടാന്ന് പറയാൻ ഇരിക്കുകയാ ഞാൻ. അയാൾക്ക് കൊടുക്കാനുള്ള പൈസ പോലും ഇപ്പൊ എന്റെ കയ്യിൽ ഇല്ല. ദൂരെ എവിടെയെങ്കിലും വീട്ടു ജോലിക്കൊ വേറെ എന്തെങ്കിലും ജോലിക്കോ പോയാ ഇവരുടെ കാര്യങ്ങൾ ഒക്കെ എങ്ങനെ നോക്കാനാ? ഇതാവുമ്പോ എനിക്ക് ഇവരുടെ കാര്യങ്ങളും നോക്കാം... ഒരു വിളി വിളിച്ചാൽ എനിക്ക് ഓടി വരാലോ? " രുദ്രൻ എന്ത് മറുപടി പറയണം എന്നറിയാതെ നിന്നു. കിഷോറും ഒന്നും മിണ്ടാതെ ഇരുന്നതേയുള്ളൂ. അവളാ പറഞ്ഞതിനോട് അവനും യോജിപ്പുണ്ടായിരുന്നില്ല. പക്ഷേ അതല്ലാതെ മറ്റെന്തു വഴി? മുന്നോട്ട് ജീവിക്കാൻ കാശ് വേണ്ടേ? ഇപ്പത്തന്നെ കുറച്ചായി രുദ്രനെയും വിഷ്ണുവിനെയും ഒക്കെയാണ് ആശ്രയിക്കുന്നത്. എത്രയാണെന്ന് പറഞ്ഞാണ് മറ്റുള്ളവരെ ബുദ്ധിമുട്ടിക്കുന്നത്? രുദ്രേട്ടനോട് അമ്പിളിക്ക് ഇഷ്ടമുണ്ടായിരുന്നു എന്ന് അറിഞ്ഞു കൊണ്ട് തന്നെയാണ് അവളെ സ്വന്തമാക്കിയത്. ആരെക്കാളും നന്നായി തനിക്ക് അവളെ സ്നേഹിക്കാൻ കഴിയുമെന്ന്, സംരക്ഷിക്കാൻ കഴിയും എന്ന് കരുതി. എന്നിട്ടോ? ഈ വീൽ ചെയറിൽ നിന്നൊന്ന് എഴുന്നേൽക്കാൻ കഴിഞ്ഞിരുന്നുവെങ്കിൽ... പിന്നീട് ഒരിക്കലും അവളെ കഷ്ടപ്പെടാൻ വിടില്ലായിരുന്നു.... കിഷോറിന് കണ്ണ് നിറഞ്ഞു. കുറഞ്ഞ ദിവസം കൊണ്ട് അപ്പു അമ്പിളിയോട് നന്നായി ഇണങ്ങിയിട്ടുണ്ട്. അവളുടെ അടുത്ത് അപ്പുവിനെ ഏൽപ്പിച്ചു പോകുന്നതാവും കൂടുതൽ സുരക്ഷിതമെന്ന് രുദ്രനും തോന്നി. പക്ഷെ തന്റെ അമ്മ അത്രയേറെ സ്നേഹിച്ചിരുന്ന, മകളായി കണ്ടിരുന്ന അമ്മയുടെ അമ്പൂട്ടനെ എങ്ങനെ വീട്ടിലെ ജോലിക്കാരിയെപ്പോലെ കാണും? " അപ്പുവിനെ ഞാൻ പൊന്ന് പോലെ നോക്കി കൊള്ളാം രുദ്രേട്ടാ. " അമ്പിളി വീണ്ടും പറഞ്ഞു. " ഹ്മ്മ്... ശരി... എന്നാൽ അങ്ങനെ ആവട്ടെ.... " ഒടുവിൽ രുദ്രൻ മനസ്സില്ലാ മനസ്സോടെ സമ്മതം മൂളി. രുദ്രന്റെ സമ്മതം കിട്ടിയതും അമ്പിളിയുടെ ചുണ്ടിൽ ഒരു ചിരി വിരിഞ്ഞു. അവൾ തല ചരിച്ച് മടിയിലിരുന്ന അപ്പുവിന്റെ കവിളിൽ ഒന്ന് ചുണ്ട് ചേർത്തു. 🌜 🌜 🌜 🌜 🌜 അപ്പൊ ദേ ഞാൻ ഉണ്ടാക്കിയ പ്രശ്നത്തിന് ഞാൻ തന്നെ പരിഹാരം കണ്ടിട്ടുണ്ട്. കിഷോറും ക്ളീറ്റസും തമ്മിൽ എന്തെങ്കിലും ലിങ്ക് ഓഫ് ദി ലിങ്ക് ഉണ്ടോ എന്ന് വൈകാതെ പറയാം.... 😁 ഞാൻ പ്രോമിസ് പാലിക്കുന്നുണ്ട്. വൈകിക്കാതെ ഇട്ടാൽ റിവ്യൂ തരാമെന്ന് നിങ്ങൾ പറ്റിച്ചത് അല്ലാലോ അല്ലെ? 😌 നിങ്ങളുടെ റിവ്യൂ ഉഷാറായാൽ എന്റെ മടി മാറും. അപ്പൊ ചിലപ്പോ ഡെയിലി തരാൻ പറ്റിയാലോ.... 😁 #📙 നോവൽ #✍ തുടർക്കഥ #📔 കഥ #📚 ട്വിസ്റ്റ് കഥകൾ #💞 പ്രണയകഥകൾ