#💥 അതീവ ജാഗ്രത; വീണ്ടും യുദ്ധം, നാടിനെ വിറപ്പിച്ച് സ്‌ഫോടനങ്ങൾ /ആണവായുധ പദ്ധതിയുമായി ബന്ധപ്പെട്ട് അമേരിക്കയുമായുള്ള തർക്കം രൂക്ഷമായിരിക്കെ ഇറാനിൽ വൻ സ്ഫോടനങ്ങൾ. ശനിയാഴ്ച രാവിലെ ഇറാൻ തലസ്ഥാനമായ ടെഹ്‌റാനിലും മറ്റ് പ്രധാന നഗരങ്ങളിലും ശക്തമായ സ്‌ഫോടനങ്ങൾ നടന്നതായി അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു. ഇസ്രയേലും അമേരിക്കയും സംയുക്തമായാണ് ഈ ആക്രമണം നടത്തിയതെന്നാണ് പുറത്തുവരുന്ന വിവരം. ടെഹ്‌റാനിലെ സുപ്രീം ലീഡർ ആയത്തുല്ല അലി ഖമേനിയുടെ ഓഫീസിന് സമീപം സ്‌ഫോടനം നടന്നതായി ദൃക്‌സാക്ഷികളെ ഉദ്ധരിച്ച് റിപ്പോർട്ടുകളുണ്ട്. നഗരമധ്യത്തിൽ നിന്ന് പുക ഉയരുന്നതിന്റെ ദൃശ്യങ്ങൾ പുറത്തുവന്നിട്ടുണ്ട്. ടെഹ്‌റാനിന് പുറമെ ഇസ്ഫഹാൻ, ഖും, കറജ് തുടങ്ങിയ നഗരങ്ങളിലും സ്‌ഫോടന ശബ്ദങ്ങൾ കേട്ടതായി ഫാർസ് ന്യൂസ് ഏജൻസി റിപ്പോർട്ട് ചെയ്യുന്നു. ഇറാനിലെ ഭീഷണികൾ നീക്കം ചെയ്യുന്നതിനായി തങ്ങൾ "മുൻകൂർ ആക്രമണം" (Preemptive strike) നടത്തിയതായി ഇസ്രയേൽ പ്രതിരോധ മന്ത്രി ഇസ്രയേൽ കാറ്റ്‌സ് അറിയിച്ചു. ഇതിനെത്തുടർന്ന് ഇസ്രയേലിൽ ഉടനീളം അടിയന്തരാവസ്ഥ പ്രഖ്യാപിച്ചിരിക്കുകയാണ്. ഇറാന്റെ ഭാഗത്തുനിന്നുള്ള ആസന്നമായ ഭീഷണികൾ ഒഴിവാക്കാൻ അമേരിക്ക ഇറാനിൽ "വലിയ തോതിലുള്ള സൈനിക നടപടികൾ" ആരംഭിച്ചതായി യുഎസ് പ്രസിഡന്റ് ഡൊണാൾഡ് ട്രംപ് അറിയിച്ചു. ഇറാന്റെ മിസൈൽ വ്യവസായത്തെ തകർക്കുകയാണ് ലക്ഷ്യമെന്നും അദ്ദേഹം കൂട്ടിച്ചേർത്തു. ഇറാന്റെ ആണവ പദ്ധതിയുമായി ബന്ധപ്പെട്ട് പാശ്ചാത്യ രാജ്യങ്ങളുമായുള്ള തർക്കം നിലനിൽക്കെയാണ് ഈ ആക്രമണം. ആണവ കരാറിൽ ഇറാനെ സമ്മർദ്ദത്തിലാക്കാൻ അമേരിക്ക മേഖലയിൽ വൻതോതിൽ യുദ്ധവിമാനങ്ങളും യുദ്ധക്കപ്പലുകളും വിന്യസിച്ചിരുന്നു. ആക്രമണത്തെത്തുടർന്ന് ഇസ്രയേലും ഇറാനും തങ്ങളുടെ വ്യോമപാതകൾ (Airspace) അടച്ചു. ജറുസലേമിൽ അപായ സൈറണുകൾ മുഴങ്ങിയിട്ടുണ്ട്. ഇസ്രയേലിലുള്ള ഇന്ത്യൻ പൗരന്മാരോട് അതീവ ജാഗ്രത പാലിക്കാൻ ഇന്ത്യൻ എംബസി നിർദ്ദേശം നൽകി. ഇറാൻ-യുഎസ് ബന്ധം കൂടുതൽ വഷളായിരിക്കുന്ന സാഹചര്യത്തിൽ, ഈ ആക്രമണം പശ്ചിമേഷ്യയിൽ വീണ്ടുമൊരു വലിയ യുദ്ധത്തിന് വഴിതെളിക്കുമോ എന്ന ആശങ്കയിലാണ് ലോകരാജ്യങ്ങൾ. #Iran #Israel #MiddleEast #ഇറാൻ #ഇസ്രയേൽ