എവിടേക്കേലും ഇറങ്ങാൻ തുടങ്ങിയാൽ പിന്നേ കെട്യോക്ക് ഒരുങ്ങലോട് ഒരുങ്ങലാണ്. ഇടേണ്ട ഡ്രസ്സ്‌ ഏതാണെന്ന് ഓർത്ത് അതീന്നു രണ്ട് മൂന്നെണ്ണം സെലെക്ട് ചെയ്തോണ്ട് കണ്ണാടിക്ക് മുന്നിൽ നിന്നൊരു ഫാഷൻ ഷോയുണ്ട്. കാണേണ്ട കാഴ്ചയാണ്. അതൊന്നും പോരാഞ്ഞ് ഇതൊക്കെ അനുഭവിക്കാൻ മാത്രം ന്ത്‌ പാപം ചെയ്തൂന്നോർത്തോണ്ട് മൊബൈലും തോണ്ടിയിരിക്കുന്ന കെട്യോനോട് അതായത് ഈയുള്ളവനോട് ചോയ്ക്കും ഇത് കൊള്ളാമോന്ന്. എങ്ങാനും കൊള്ളൂലാന്ന് പറഞ്ഞാൽ അല്ലേലും ങ്ങക്ക് ഞാൻ ഇടുന്നതൊന്നും പിടിക്കൂല്ലാലോ. ഫേസൂക്കിൽ കണ്ട പെണ്ണുങ്ങളെ പ്രൊഫൈൽ പോട്ടത്തിന് കമന്റിടാൻ നൂറ് നാവാണ്. സാരി കൊള്ളാം. ഞൊറി ഒന്നൂടെ ശരിയാക്കാർന്നു. ഇതിട്ട് കാണുമ്പം പത്ത് വയസ്സ് കൊറഞ്ഞ പോലെ. എന്നൊക്കെള്ള ങ്ങളെ കോയിത്തരങ്ങളൊന്നും കാണിന്നില്ലാന്ന് നിരീക്കേണ്ടന്നൊക്കെ പറഞ്ഞോണ്ട് മ്മളെ കമന്റിടാനുള്ള അവകാശത്തെ പോലും ചോദ്യം ചെയ്തേക്കാം. കൊള്ളാം എന്ന് പറഞ്ഞാലോ യാതൊരു വിധ ഡ്രസ്സ് സെൻസും ല്ലാത്ത ഒരു മനുഷ്യൻ എന്നാവും മറുപടി പറയാ. ജീവിതാനുഭവങ്ങൾ ഇതൊക്കെ പഠിപ്പിച്ചത് കൊണ്ട് തന്നെ ങ്ങനൊരു ചോദ്യം ണ്ടായാൽ എന്ത് ചെയ്യണം എന്നതിനെ കുറിച്ചെനിക്ക് വ്യക്തമായ ധാരണയുണ്ടെന്ന് കൂട്ടിക്കോളി. അതോണ്ടന്നെ അത്തരം സന്ദർഭങ്ങളിൽ പതിയെ എഴുന്നേറ്റ് ഓൾടെ അടുത്തേക്ക് ചെന്ന് പിറകിലൂടെ വട്ടം ചുറ്റി പിടിച്ചോണ്ട് മുടി തുമ്പുയർത്തി പിൻ കഴുത്തിൽ ഒന്ന് ചുംബിച്ച് നീ ഏത് ഡ്രസിട്ടാലും സുന്ദരിയാണെന്ന് മാത്രേ പറയുള്ളൂ. അങ്ങനെയേ പറയാവൂ. അതോണ്ടന്നെ ഇലക്കും മുള്ളിനും കേടില്ലാതെ ജീവിതം സുന്ദര സുരഭിലമായി മുന്നോട്ട് പോവുന്നുമുണ്ട്. ഡ്രസ്സ്‌ സെലക്ഷൻ കഴിഞ്ഞാൽ പിന്നേള്ള പരിപാടി അതിനു മാച്ചാവുന്ന ആഭരണങ്ങൾ കണ്ട് പിടിക്കലാണ്. ആഭരണങ്ങൾ മാത്രല്ല നെയിൽ പോളിഷ് തൊട്ട് മൊബൈൽ കവർ വരെ ഡ്രെസ്സിന് മാച്ചായുള്ളത് കണ്ട് വെക്കും. അതൊക്കെ സഹിക്കാർന്നു. സ്‌കൂട്ടി ഓടിക്കാൻ പഠിച്ചതിൽ പിന്നേ ഡ്രെസ്സിന് മാച്ച് ആയുള്ള ഹെൽമെറ്റ് തിരയലാണ് സഹിച്ചൂടാത്തെ. അങ്ങനെ തിരഞ്ഞ് തിരഞ്ഞ് ഇപ്പം ഹെൽമെറ്റിന്റെ എണ്ണം ആറായി. ഒരു പത്തെണ്ണം ആയിട്ട് മാണം ഹൈവേ സൈഡിലെങ്ങാനും ഹെൽമെറ്റ്‌ വാടകക്ക് കൊടുക്കുന്ന ഒരു കട തൊടങ്ങാൻ. അൽപ സ്വല്പം വിജയ സാധ്യതയുള്ള ബിസിനസാണ്. മ്മളെ പോലെ പണി ഒന്നുല്ലാത്തൊര് ആലോയ്ച്ചോളി. അങ്ങനൊരീസം വകേലൊരു ബന്ധുവിന്റെ കല്യാണത്തിന് പോവാനുള്ള തയാറെടുപ്പിലാരുന്നു ഞങ്ങൾ. ഞങ്ങളെന്ന് വെച്ചാൽ ഞാനും കെട്യോളും പിന്നെ ഉമ്മിയും. ഞാൻ പതിവ് പോലെ കാക്കക്കുളി കുളിച്ച് പാന്റും ടീഷർട്ടും കുത്തിക്കേറ്റി വന്ദേഭാരതിന്റെ സ്പീഡിൽ റെഡിയായിന്ന് പ്രത്യേകിച്ച് പറയേണ്ടല്ലോ. ആണുങ്ങൾ അങ്ങനാണ്. യാതൊരു വിധ അലങ്കാരങ്ങളുടേം ആവശ്യല്ല. അല്ലാതെ തന്നെ ആവശ്യത്തിൽ കൂടുതൽ സൗന്ദര്യണ്ട് ആണുങ്ങൾക്ക്. വേഗം ഇറങ്ങിയാലെ നേരത്തും കാലത്തും അങ്ങട് എത്തുള്ളൂന്ന് അറിയാവുന്നതോണ്ട് നേരത്തെ കാലത്തെ റെഡി ആയിക്കോളീന്നൊക്കെ കെട്യോളോടും ഉമ്മാനോടും ആദ്യമേ പറഞ്ഞെല്പിച്ചതാണ്. ഇത്തിരി കൈഞ്ഞപ്പളേക്കും ഉമ്മ റെഡി ആയി മ്മളെ മുന്നിൽക്ക് വന്ന്. ആ വരവിനൊരു അർത്ഥണ്ട്. ധൈര്യണ്ടേൽ കെട്യോളോട് ചെന്ന് വേഗം ഇറങ്ങാൻ പറയെടാന്നുള്ള അർത്ഥം. ഞാനാരാ മോൻ. അപ്പോ തന്നെ നീയിനീം ഇറങ്ങില്ലെടിന്ന് അലറിക്കൊണ്ട് കെട്യോൾടെ നേർക്ക് കുതിച്ചു. പക്ഷെ ന്ത്‌ കാര്യം. ന്റെ അലർച്ചയെ തെല്ലും പരിഗണിക്കാതെ ഓള് പറയാണ് നോക്കി നിക്കാതെ ഈ സാരിന്റെ ഞൊറിയൊന്ന് പിടിക്ക് മനുഷ്യാന്ന്. ഇത്തരം സന്ദർഭങ്ങളിൽ ക്ഷമയാണ് ഒരു ഭർത്താവിന് മുതൽക്കൂട്ടാവേണ്ടത്. അതോണ്ടന്നെ ഓഹ് അതാണോ കാര്യം ഇപ്പ ശരിയാക്കിത്തരാന്നും പറഞ്ഞോണ്ട് ഞാൻ ഓൾടെ മുന്നിൽ മുട്ട് കുത്തിയിരുന്നോണ്ട് ഞൊറി പിടിച്ചോടുക്കുമ്പോളാണ് ഉമ്മ അങ്ങടേക്ക് കേറി വന്നത്. ന്റെ അലർച്ചയോടെയുള്ള കുതിപ്പിന് ശേഷം ശബ്ദമൊന്നും കേക്കാത്തോണ്ട് എന്താന്നറിയാൻ വന്നതേനും. പെട്ടെന്നുള്ള ഉമ്മാന്റെ വരവിൽ ണ്ടായ ഞെട്ടലിൽ പിടി വിട്ടോയ ഞൊറി അഴിഞ്ഞുലഞ്ഞു താഴേക്ക് വീണ്. കെട്യോൾടെ മുമ്പിൽ മുട്ടും കുത്തി നിക്കുന്ന എന്നേം കെട്യോളേം മാറി മാറി നോക്കിക്കൊണ്ട് ഉമ്മ പറയാണ് നാളെ തൊട്ട് ഓൾക്കൊരു രൂപക്കൂടും കൂടി പണിത് കൊടുക്കടാന്ന്. മുട്ടുകുത്തി പ്രാർത്ഥിക്കാൻ. ഞാനൊന്നും മിണ്ടീല. അല്ലേലും ഇമ്മാതിരി ഡയലോഗിന് മുന്നിൽ ന്ത്‌ മിണ്ടാനാണ്. കണ്ണൂർകാരൻ 😂😂😂😂 #📔 കഥ #📙 നോവൽ #💞 പ്രണയകഥകൾ #✍ തുടർക്കഥ #📚 ട്വിസ്റ്റ് കഥകൾ